“Pebrero 18–24. Mateo 5; Lucas 6: ‘Bulahan Kamo’” Dali, Sunod Kanako—Alang sa Primary: Bag-ong Tugon 2019 (2019)
“Pebrero 18–24. Mateo 5; Lucas 6,” Dali, Sunod Kanako—Alang sa Primary: 2019
Ang Wali ibabaw sa Bungtod, ni Jorge Cocco
Pebrero 18–24
Mateo 5; Lucas 6
“Bulahan Kamo”
Sugdi pinaagi sa pagbasa sa Mateo 5 ug Lucas 6. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.
Irekord ang Imong mga Impresyon
Awhaga ang Pagpaambit
Hangyoa ang mga bata sa paghisgot og butang nga ilang gibuhat karong semanaha aron mapaambit ang kahayag sa Ginoo ngadto sa usa ka tawo.
Itudlo ang Doktrina
Mas Gagmay nga mga Bata
Mamahimo ko nga tigpasiugda og kalinaw.
Ang mga bata nga imong gitudloan mahimong adunay kusganong impluwensya sa panimalay samtang motratar sila sa ubang tawo uban sa gugma ug pagkamabination.
Posible nga mga Kalihokan
-
Basaha ang Mateo 5:9 ngadto sa mga bata, ug ipasabut nga ang mga tigpasiugda og kalinaw mohimo sa bisan unsang dapit nga usa ka malinawon nga dapit, bisan asa pa sila. Pagpaambit og pipila ka dili tinuod [fictional] nga mga sitwasyon, ug tabangi ang mga bata sa pagtino kon ang mga tawo nga nalambigit tigpasiugda ba og kalinaw o dili.
-
Dapita ang pipila sa mga ginikanan sa mga bata sa pagbisita sa imong klase ug sa pagpaambit og mga ehemplo sa mga panahon dihang ang ilang mga anak maoy tigpasiugda og kalinaw sa panimalay.
-
Isulat sa gagmayng piraso sa mga papel ang pipila ka lisud nga mga sitwasyon nga mahimong atubangon sa mga bata (sama pananglit, ang mga igsoon mag-away tungod sa usa ka dulaan). Dapita ang matag bata sa pagkuha og usa ka piraso sa papel. Samtang imong basahon ang mga sitwasyon, hangyoa sila sa pagpaambit kon sa unsang paagi sila mahimong tigpasiugda og kalinaw niana nga sitwasyon.
Gusto ni Jesus nga mahimo akong kahayag ngadto sa uban.
Ang gagmay nga mga bata mahimong adunay kusganong impluwensya alang sa kaayohan ngadto sa uban. Unsaon nimo sa pagdasig kanila aron mapasanag ang ilang kahayag?
Posible nga mga Kalihokan
-
Ipakita sa mga bata ang pipila ka mga butang nga mohatag og kahayag, lakip ang usa ka litrato sa mga bata. Basaha ang Mateo 5:14–16, ug sultihi ang mga bata nga kitang tanan adunay kahayag sulod kanato. Unsaon nato sa paggamit sa atong kahayag aron sa pagdala sa uban ngadto sa Dios?
-
Ipadan-ag ang usa ka flashlight libut sa kwarto. Sa unsang paagi ang kahayag makatabang kanato? Sa unsang paagi nga mahimo kitang kahayag sa kalibutan? Tabuni ang flashlight. Unsay mahitabo kon dili nato ipaambit ang atong kahayag o kon ato kining taguan?
-
Tagoi ang flashlight sa kwarto, ug palunga ang mga suga. Ipapangita kini sa mga bata. Ribyuha ang Mateo 5:15, ug hisguti kon nganong dili nato angayng taguan ang atong kahayag.
-
Ipadan-ag ang flashlight diha sa bong-bong, ug dapita ang mga bata nga sundon ang kahayag sa ilang mga mata. Gamita ang kahayag aron magiyahan ang ilang mga mata ngadto sa hulagway sa Manluluwas. Hangyoa ang mga bata sa pagpaambit kon sa unsang paagi nga mahimo kitang usa ka kahayag nga mogiya sa uban ngadto ni Jesukristo.
-
Tabangi ang mga bata nga makakita ug makoloran ang gitaguan nga mga kandila diha sa pahina sa kalihokan niini nga semana.
-
Kantaha uban sa mga bata ang “Si Jesus Buot nga Ako Mahimong Bidlisiw,” “Dan-ag,” o “Sama Ko sa Usa ka Bitoon,” Songbook sa mga Bata, 38–39, 96, 84.
Gusto ni Jesukristo nga higugmaon nako ang tanan.
Ang gagmayng mga bata makasugod na karon nga magpraktis sa pagpakita og gugma, bisan kon napasakitan sila sa ilang mga kaedad o mga igsoon. Samtang imong basahon ang Mateo 5:44–45, ikonsiderar kon sa unsang paagi ang mga pagtulun-an sa Manluluwas magamit ngadto sa mga bata nga imong gitudloan.
Posible nga mga Kalihokan
-
Isulti og balik ang Mateo 5:44 gamit ang mga pulong ug mga sitwasyon nga masabtan ug mobati og koneksyon ang mga bata. Hangyoa ang mga bata sa pagpaambit og mga panahon nga mipakita sila og gugma ngadto sa usa ka tawo bisan kon lisud kining buhaton. Unsa ang gibati nila niini nga mga kasinatian?
-
Uban sa tibuok klase, kantaha ang “Mouban Ko Nimo,” Songbook sa mga Bata, 78–79. Unsa ang atong makat-unan gikan niini nga kanta mahitungod sa paghigugma sa uban?
-
Hatagi og mga kasingkasing nga papel ang mga bata nga gisulatan sa mga pulong nga “Akong ipakita ang akong gugma alang sa tanan.” Hangyoa sila sa pag-adorno sa mga kasingkasing ug sa pagsab-it niini sa ilang mga panimalay isip usa ka pahinumdom nga mohigugma sa uban.
-
Tabangi ang mga bata nga makakat-on sa mga aksyon nga mobagay sa “Maghigugmaay,” Songbook sa mga Bata, 74, sigun sa gisugyot diha sa Songbook sa mga Bata.
Itudlo ang Doktrina
Mas Dagko nga mga Bata
Mahimo ko nga magmalipayon kon magpuyo ko sumala sa gitudlo ni Jesus.
Samtang imong basahon ang Mateo 5:3–12, unsa nga mga pulong ang makahuluganon kanimo? Sa unsang paagi kini nga mga pagtulun-an makapanalangin sa kinabuhi sa mga bata nga imong gitudloan?
Posible nga mga Kalihokan
-
Paghimo diha sa pisara og tsart nga adunay duha ka kolum, nga ginganlan og Bulahan ang … ug Panalangin. Dapita ang mga bata sa pagsiksik sa Mateo 5:3–12 kon si kinsa ang giingon ni Jesus nga bulahan ug ang mga panalangin nga gisaad Niya kanila.
-
Isulat ang matag usa sa mga kinaiya ug ang katakdo nga mga panalangin gikan niini nga mga bersikulo diha sa mga kard, ug ipapares-pares sa mga bata ang mga kinaiya ug mga panalangin. Hangyoa ang mga bata sa pagpili og usa sa mga kalidad niini nga mga bersikulo nga gusto nilang mapalambo.
Mamahimo ko nga tigpasiugda og kalinaw.
Mitudlo si Jesus nga ang mga tigpasiugda og kalinaw pagatawgon nga mga anak sa Dios. Unsaon nimo sa pagdasig ang mga bata nga mamahimong mga tigpasiugda og kalinaw?
Posible nga mga Kalihokan
-
Dapita ang usa ka bata sa pagbasa sa Mateo 5:9. Dayon pangutan-a: Unsa ang tigpasiugda og kalinaw? Unsa ang mga paagi nga mamahimo kitang mga tigpasiugda og kalinaw diha sa atong mga pamilya ug mga higala? (Alang sa pipila ka mga ideya, tan-awa ang mga bersikulo 21–24, 38–47.)
-
Hangyoa ang matag bata sa paghunahuna og usa ka sitwasyon nga nagkinahanglan sa tabang sa usa ka tigpasiugda og kalinaw. Unsa ang buhaton sa usa ka tigpasiugda og kalinaw niana nga sitwasyon?
-
Dapita ang mga bata sa pagpaambit og mga panahon sa dihang mipakita sila og gugma sa usa ka tawo, bisan kon kana nga tawo lahi kanila o lisud higugmaon.
Ang akong kahayag mahimong modan-ag sa dalan aron ang uban makasunod ni Jesus.
Hunahunaa ang mga bata nga imong gitudloan samtang magbasa ka niini nga mga bersikulo. Unsa kaha ang mga mensahe sa Ginoo alang sa mga bata niini nga tudling?
Posible nga mga Kalihokan
-
Tabangi ang mga bata nga makasag-ulo sa Mateo 5:16. Isulat ang bersikulo diha sa pisara. Basaha kini og dungan sa pipila ka higayon, nga papason ang pipila ka pulong sa matag higayon. Human makasag-ulo ang mga bata sa bersikulo, mahimo usab kamong mokanta sa “Dan-ag,” Songbook sa mga Bata, 96.
-
Hangyoa ang mga bata sa pagdrowing og mga butang nga mohatag kanato og kahayag. Basaha ang Mateo 5:14–16. Pangutan-a sila nganong gusto ni Jesus nga mamahimo kitang kahayag sa kalibutan.
-
Dapita ang mga bata sa pagdrowing og mga butang nga ilang mabuhat aron mahimong kahayag ngadto sa uban. Mahimo nimong ipasalida ang video nga “Light the World: 25 Days of Service” (LDS.org). Dapita ang duha ka mga bata nga mag-atubang sa usag usa, ug hangyoa ang usa ka bata nga maningkamot nga makapahiyom ang usa nga dili mohikap kaniya. Hisguti ang gahum sa mga bata nga makadala og kalipay ngadto sa uban.
Awhaga ang Pagkat-on diha sa Panimalay
Dapita ang mga bata sa pagtan-aw og tawo nga nahimong tigpasiugda og kalinaw niining semanaha. Sa pagsugod sa klase sa sunod semana, dapita sila sa paghisgot kon kinsa ug unsay ilang nakita.
Pagpalambo sa Atong Pagtudlo
Tabangi ang mga bata nga mahimong aktibo. “Samtang ikaw nagtudlo sa mga bata, tugoti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).