“Pebrero 4–10. Mateo 4; Lucas 4–5: ‘Ang Espiritu sa Ginoo Ania Kanako’” Dali, Sunod Kanako—Alang sa Primary: Bag-ong Tugon 2019 (2019)
“Pebrero 4–10. Mateo 4; Lucas 4–5,” Dali, Sunod Kanako—Alang sa Primary: 2019
Si Kristo Nagmadaugon batok ni Satanas, ni Robert T. Barrett
Pebrero 4–10
Mateo 4; Lucas 4–5
“Ang Espiritu sa Ginoo Ania Kanako”
Sugdi ang imong pagpangandam alang niini nga leksyon pinaagi sa pagbasa sa Mateo 4 ug Lucas 4–5. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.
Irekord ang Imong mga Impresyon
Awhaga ang Pagpaambit
Hangyoa ang mga bata nga ipasa-pasa ang usa ka hulagway ni Jesus gikan sa usa ka bata ngadto sa sunod. Samtang ang matag bata modawat sa hulagway, dapita siya sa pagpaambit og usa ka butang nga gibuhat ni Jesus sa dihang dinhi pa Siya sa yuta.
Itudlo ang Doktrina
Mas Gagmay nga mga Bata
Makapili ako sa matarung sama sa gibuhat ni Jesus.
Ang gagmay nga mga bata “dili makasala” (D&P 29:47). Hinoon, ang istorya ni Jesus nga nakigbatok sa mga tintasyon ni Satanas makadasig sa mga bata nga magsugod karon sa pagpili sa matarung.
Posible nga mga Kalihokan
-
Isaysay ang istorya mahitungod sa mga pagtintal kang Jesus gikan sa Mateo 4:1–11. (Tan-awa usab sa “Kapitulo 11: [Si] Jesus Gitintal,” Mga Istorya sa Bag-ong Tugon, 30–31.) Sa tukma nga mga punto sa istorya, pangutana, “Unsa kaha ang angay nga buhaton ni Jesus?”
-
I-display ang usa ka hulagway ni Jesukristo, ug dayon ihulagway ang mga kapilian nga tingali himoon sa usa ka gamayng bata. Alang sa matag maayo nga pagpili, hangyoa ang mga bata sa paghimo og usa ka lakang padulong sa hulagway. Alang sa matag dili maayo nga pagpili, hangyoa sila sa paghimo og usa ka lakang palayo niini.
-
Tabangi ang mga bata nga makakat-on sa mga pulong sa “Pilia ang Matarung nga Paagi,” Songbook sa mga Bata, 82–83, gamit ang mga litrato, mga butang, o uban nga mga visual aid nga motakdo sa mga pulong sa kanta.
Si Jesukristo mao ang akong Manluluwas.
Ang Lucas 4:18–19 naglista og mga aspeto sa misyon ni Jesus. Unsaon nimo pagtabang ang mga bata nga makadayeg sa unsay Iyang nahimo alang kanila?
Posible nga mga Kalihokan
-
Basaha ang Lucas 4:18–19 ngadto sa mga bata, ug ipasabut kon unsa ang gisugo kang Jesukristo nga buhaton dinhi sa yuta (pagtudlo, paghupay, ug pag-ayo sa mga tawo). Ipaambit kon sa unsang paagi nga gibuhat Niya kini kanimo.
-
Dapita ang pipila ka mga bata nga magpakaaron-ingnon nga naglibug, naguol, o nasakit. Hangyoa ang ubang mga bata sa pag-role-play kon unsay ilang mabuhat sa pagtabang kanila. Ipamatuod nga si Jesukristo mianhi aron sa pagtudlo, paghupay, ug pag-ayo kanato, ug nga kita kinahanglang mosunod sa Iyang ehemplo.
-
Ipakita ang mga hulagway ni Jesus nga nagtuman sa mga aspeto sa Iyang misyon (tan-awa sa Libro sa mga Hulagway sa Ebanghelyo), ug hangyoa ang mga bata sa paghulagway unsa ang gibuhat ni Jesus. Ipakita usab ang mga litrato sa mga tawo nga naningkamot nga mahisama ni Jesus (makakita ka og pipila diha sa mga magasin sa Simbahan).
-
Pagsulat sa gagmayng piraso sa mga papel og mga pulong nga magsugod sa “Tungod ni Jesukristo” (sama sa “Tungod ni Jesukristo, ang akong pamilya mahimong magkauban sa kahangturan”). Dapita ang matag bata sa pagpili og usa sa mga piraso sa papel, ug tabangi siya sa pagbasa sa mga pulong.
Si Jesukristo nagdapit kanato nga mahimong “mga mangingisdag tawo.”
Ang panawagan sa Manluluwas nga, “Sumunod kamo kanako, ug himoon ko kamong mga mangingisdag tawo” (Mateo 4:19), para sa tanan, lakip sa mga bata.
Posible nga mga Kalihokan
-
Dapita ang duha ka mga bata nga magpakaaron-ingnon nga si Simon Pedro ug si Andres samtang imong basahon ang Mateo 4:18–22. Tabangi ang mga bata sa pagtino kon unsay giundangan niining mga tawhana aron mosunod ni Jesus.
-
Papuli-puliha ang mga bata sa pagsaysay sa istorya gikan niini nga mga bersikulo gamit ang hulagway sa outline niini nga semana diha sa Dali, Sunod Kanako—Alang sa mga Indibidwal ug mga Pamilya.
-
Kantaha og dungan ang “Sundon Ko ang Plano sa Dios,” Songbook sa mga Bata, 86–87. Unsa ang atong makat-unan gikan niini nga istorya mahitungod sa pagsunod kang Jesukristo?
-
Gamita ang pahina sa kalihokan karong semanaha aron hisgutan uban sa mga bata kon sa unsang paagi sila mahimong “mga mangingisdag tawo” pinaagi sa pagsunod kang Jesus. Mahimo usab kamong magdula og pares-pares: paggunting og duha ka kopya sa matag isda, ikulob kini, ug dapita ang mga bata nga itagsa-tagsa kini og pagpahayang aron makakita og pares.
Si Kristo Nagtawag sa Duha ka Disipulo, ni Gary E. Smith
Itudlo ang Doktrina
Mas Dagko nga mga Bata
Si Jesus mipakita og ehemplo kanako pinaagi sa pagbuntog sa tintasyon.
Bisan si Jesukristo gitintal ni Satanas, apan wala gayud Siya magpadala. Unsaon nimo pagtabang ang mga bata nga mosunod sa Iyang ehemplo?
Posible nga mga Kalihokan
-
Paghimo og tsart sa pisara nga gingalanan og Mga Tintasyon ni Satanas ug Mga Tubag ni Jesus. Tabangi ang mga bata nga masulatan ang sulod sa tsart gamit ang Mateo 4:1–11 ug Lucas 4:1–13. Pangutan-a ang mga bata kon sa unsang paagi sila makasunod sa ehemplo ni Jesus.
-
Pagsulat og pipila ka sitwasyon diin ang mga bata mahimong matintal sa paghimo og sayop nga pagpili. Papilia ang usa ka bata og usa ka sitwasyon nga basahon, ug hisguti sa tibuok klase kon unsaon nila paglikay sa tintasyon niana nga sitwasyon.
Ang pagpuasa makatabang nako nga mobati nga duol sa Langitnong Amahan.
Sa wala pa mosugod sa Iyang pangalagad, si Jesus nagpuasa ug “nakig-uban sa Dios” (Joseph Smith Translation, Matthew 4:2 ). Tabangi ang mga bata nga makasabut kon sa unsang paagi ang pagpuasa makahatag kanila og espiritwal nga kalig-on ug makatabang kanila nga mobati nga duol sa Langitnong Amahan.
Posible nga mga Kalihokan
-
Dapita ang usa ka bata sa pagbasa og kusog sa Mateo 4:1–2. Ipasabut nga sa mga kausaban sa Hubad ni Joseph Smith niini nga mga bersikulo, atong makat-unan nga si Jesus miadto sa kamingawan “aron makig-uban sa Dios” (Hubad ni Joseph Smith, Mateo 4:1). Unsa ang gibuhat ni Jesus aron mas mapaduol sa Dios? Ipaambit kon sa unsang paagi ang pagpuasa nakatabang kanimo nga mobati nga mas duol sa Langitnong Amahan.
-
Dapita ang mga bata nga nakapuasa na kaniadto sa pagpaambit sa ilang mga kasinatian. Unsaon nila pagpasabut ang pagpuasa ngadto sa usa ka tawo kinsa wala pa gayud makapuasa sukad?
-
Pagsulat og mga pangutana mahitungod sa pagpuasa (sama sa ngano, kanus-a, o unsaon nato sa pagpuasa) diha sa mga piraso sa papel, ug ibutang kini sa usa ka panaksan. Dapita ang mga bata sa pagkuha og usa ka pangutana ug maningkamot sa pagtubag niini. Unsa nga mga kasinatian ang mapaambit nimo o sa mga bata mahitungod sa pagpuasa?
Si Jesukristo mao ang akong Manluluwas.
Pamalandungi kon sa unsang paagi ang Manluluwas mipanalangin sa imong kinabuhi. Unsaon nimo pagtabang ang mga bata nga mas makadayeg sa Iyang impluwensya diha sa ilang kinabuhi?
Posible nga mga Kalihokan
-
Dapita ang usa ka bata nga motungha sa klase nga andam sa pag-summarize sa Lucas 4:16–30. Tingali makatabang ang paggamit sa “Kapitulo 17: Nasuko nga mga Tawo sa Nazaret,” Mga Istorya sa Bag-ong Tugon, 42–43; ang katukma nga video sa (LDS.org); o ang video nga “Jesus Declares He Is the Messiah” (LDS.org).
-
Basaha og kusog ang Lucas 4:18 samtang magsunod ang mga bata. Hangyoa sila sa paghimo og lista sa mga butang nga giingon sa Manluluwas nga mianhi Siya aron buhaton. Dapita ang mga bata sa pagpaambit og mga ehemplo sa mga panahon nga gibuhat kini ni Kristo, diha ba sa mga kasulatan o sa ilang kinabuhi.
Si Jesukristo nagdapit kanato sa pagsunod Kaniya ug mahimong “mga mangingisdag tawo.”
Adunay daghang paagi nga ang mga bata makasunod sa Manluluwas ug mahimong “mga mangingisdag tawo” (Mateo 4:19). Unsaon nimo pagtabang kanila nga makakita sa maayo nga impluwensya nga ilang mahimo ngadto sa uban?
Posible nga mga Kalihokan
-
Dapita ang mga bata sa pagbasa sa Mateo 4:18–22 ug Lucas 5:1–11. Giunsa pagsanong sa mga disipulo ni Jesus ang Iyang tawag sa pagsunod Kaniya? Unsa ang atong mahimo aron masunod ang ilang ehemplo?
-
Pagpakita sa mga bata og pipila ka mga himan sa pangisda o hulagway sa usa ka mangingisda. Unsay ipasabut nga mahimong “mga mangingisdag tawo”? Unsa nga mga himan ang anaa kanato nga makatabang kanato nga mahimong mga mangingisdag tawo?
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya sa unsay ilang nakat-unan mahitungod sa pagkahimong mga mangingisdag tawo.
Pagpalambo sa Atong Pagtudlo
Ang mga bata makaila sa impluwensya sa Espiritu. Tudloi sila nga ang mga pagbati sa kalinaw, gugma, ug kainit nga anaa kanila kon maghisgot o mokanta sila mahitungod ni Jesukristo ug sa Iyang ebanghelyo nagagikan sa Espiritu Santo. Kini nga mga pagbati makalig-on sa ilang mga pagpamatuod.