Qaqa o Karisito vei Setani

Qaqa o Karisito vei Setani, mai vei Robert T. Barrett

Feperueri 4–10

Maciu 4; Luke 4–5

“Sa Tu Vei Au na Yalo i Jiova”

Tekivuna na nomu vakarautaka na lesoni oqo ena wiliki ni Maciu 4 kei na Luke 4–5. Lako Mai, Mo Muri Au—Baleta na Tamata Yadua kei na Matavuvale sa rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Vola na Veika o Uqeti Kina

ivakatakilakila ni veiwasei

Sureta na Veiwasei

Kerei ira na gone me ra veisolitaka e dua na iyaloyalo kei Jisu mai na dua na gone ki na dua tale. Ni sa taura na iyaloyalo na gone yadua, sureti koya me wasea e dua na ka e cakava o Jisu ni a tiko e vuravura.

ivakatakilakila ni veivakavulici

Vakavulica na iVunau

Gone Sobu

Maciu 4:1–11; Luke 4:1–13

Au rawa ni digitaka na dodonu me vakataki Jisu.

O ira na gonelalai era “sega ni rawa ni ivalavala ca” (V&V 29:47). Ia, na italanoa kei Jisu ni vorata voli na veitemaki nei Setani sa rawa ni uqeti ira na gone me ra tekivu digitaka na dodonu ena gauna oqo.

iTaviqaravi e Rawa ni Caka

• Tukuna na italanoa ni temaki nei Jisu mai na Maciu 4:1–11. (Raica talega na “Wase 11: Jesus Is Tempted,” New Testament Stories, 30–31, se na kena vidio ena LDS.org.) Ena vanua veiganiti ena italanoa, taroga, “Na cava o nanuma ni dodonu me cakava Jisu?”

• Vakaraitaka e dua na iyaloyalo kei Jisu Karisito, ka qai vakamacalataka na digidigi eso ena rairai cakava e dua na gone lailai. Ena veidigidigi vinaka yadua, kerei ira na gone me ra kalawa vakadua ki na iyaloyalo. Ena veidigidigi ca yadua, kerei ira me ra kalawa tani vakadua mai na iyaloyalo.

• Vukei ira na gone me ra vulica na qaqa ni “Choose the Right Way,” Children’s Songbook, 160–61, ni vakayagataki na iyaloyalo, iyaya, se iyaloyalo ni vuli tale eso ka salavata kei na kena itautau.

Luke 4: 18–19

Sa noqu iVakabula o Jisu Karisito.

Luke 4:18–19 e vakaraitaka na ituvatuva eso ni ilesilesi nei Jisu. O rawa vakacava ni vukei ira na gone me ra taleitaka na veika sa cakava o Koya vei ira?

iTaviqaravi e Rawa ni Caka

• Wilika na Luke 4:18–19 vei ira na gone, ka vakamacalataka na ka a talai mai kina ki vuravura o Jisu Karisito me cakava (veivakavulici, veivakacegui, ka vakabulai ira na tamata). Wasea na sala sa vakayacora kina vei iko o Koya na veika oqo.

• Sureta e vica na gone me ra vakalasutaka ni ra veilecayaki, rarawa, se tauvimate. Kerea na vo ni gone me ra matanataka na ka e rawa ni ra cakava me ra vukei ira. Vakadinadinataka ni a lako mai o Jisu Karisito me veivakavulici, veivakacegui, ka vakabulai keda, ka sa dodonu me da muria na Nona ivakaraitaki.

• Vakaraitaka na iyaloyalo eso kei Jisu ni vakataucokotaka voli na ituvatuva ni Nona veiqaravi (raica na iVola ni iYaloyalo Vakosipeli), ka kerei ira na gone me ra vakamacalataka na ka e cakava tiko o Jisu. Vakaraitaka talega na kedra iyaloyalo na tamata era tovolea tiko me vakataki Jisu (o rawa ni kunea eso ena mekesini ni Lotu).

• Vola ena tikinipepa na veimalanivosa ka tekivu ena “Ena vuku i Jisu Karisito” (me vakaoqo “Ena vuku i Jisu Karisito, sa rawa ni duavata me tawamudu na noqu matavuvale”). Sureta na gone yadua me tomika e dua na tikinipepa, ka vukei koya me wilika na malanivosa.

Maciu 4:18–22; Luke 5:1–11

Sa sureti keda o Jisu Karisito me da “gonedau ni tamata.”

Na kaci ni iVakabula, “Drau muri au mai, au na qisi kemudrau mo drau gonedau ni tamata” (Maciu 4:19), e sa baleti keda kece, oka kina o ira na gone.

iTaviqaravi e Rawa ni Caka

• Sureta e rua na gone me vakalasutaki Saimoni Pita kei Adriu ni o wilika na Maciu 4:18–22. Vukei ira na gone ni vakatakila na ka era a biuta tu na tamata oqo me ra muri Jisu.

• Me ra veivukevuke na gone ni tukuna na italanoa mai na veitikina oqo ena vakayagataki ni iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale.

• Lagata vata “I Will Follow God’s Plan,” Children’s Songbook, 164. Na cava eda rawa ni vulica mai na sere oqo me baleta na muri Jisu Karisito?

• Vakayagataka na tabana ni itaviqaravi ena macawa oqo mo veivosakitaka vata kei ira na gone na sala era rawa ni “gonedau ni tamata” kina ena muri Jisu. O rawa talega ni qitora e dua na qito ni veivakasotari vata: kotiva e rua na ilavelave ni ika yadua, vakatoboicutaki rau, ka sureti ira na gone me ra vukica yadudua me vakasotari vata.

Kacivi ira na tisaipeli o Jisu

Kaciva e Rua na Tisaipeli o Karisito, mai vei Gary Ernest Smith

ivakatakilakila ni veivakavulici

Vakavulica na iVunau

Gone Qase Cake

Maciu 4:1–11; Luke 4:1–13

Sa vakarautaka vei au o Jisu na ivakaraitaki ena vorati ni veitemaki.

O Jisu Karisito mada ga a temaki vei Setani, ia a sega ni rawai o Koya. O na vukei ira vakacava na gone ni muria na Nona ivakaraitaki?

iTaviqaravi e Rawa ni Caka

• Cakava e dua na ivolakabi ena papa ka vakayacana ena Veitemaki nei Setani kei na Kena iSau mai vei Jisu. Vukei ira na gone me ra vakalewena na ivolakabi ena vakayagataki i Maciu 4:1–11 kei na Luke 4:1–13. Tarogi ira na gone e rawa vakacava ni ra muria na ivakaraitaki nei Jisu.

• Vola eso na ituvaki ena rairai temaki kina e dua na gone me digidigi cala. Me digitaka na gone e dua me wiliwili, ka veivosakitaka vakalasi na ivakarau era rawa ni vorata kina na veitemaki ena ituvaki oya.

Maciu 4: 1–2

Na lolo e rawa ni vukei au meu voleka cake kivei Tamada Vakalomalagi.

Ni bera ni tekivutaki na Nona ilesilesi, a lolo ko Jisu ka “veivosaki kei na Kalou” (iVakadewa nei Josefa Simici, Maciu 4:2 [ena Maciu 4:2, ivakamacala e ra c]). Vukei ira na gone me ra raica na ivakarau e rawa ni vaqaqacotaki ira kina vakayalo na lolo ka vukei ira me ra voleka cake kivei Tamada Vakalomalagi.

iTaviqaravi e Rawa ni Caka

• Sureta e dua na gone me wilika i cake na Maciu 4:1–2 ena vakayagataki ni railesuvi ni iVakadewa nei Josefa Simici e kune ena ivakamacala e ra. Na cava e cakava o Jisu me “tiko vata kei na Kalou”? Wasea na ivakarau e sa vukei iko kina na lolo mo voleka cake kivei Tamada Vakalomalagi.

• Sureti ira na gone ka sa lolo eliu me ra wasea na veika era sotava. Era na vakamacalataka vakacava na lolo kivua e dua e se bera vakadua ni lolo?

• Vola na taro eso e baleta na lolo (me vaka na cava na vuna, na kena gauna, se na ivakarau ni lolo) ena tiki ni pepa eso, ka biuta ena dua na bilo. Sureti ira na gone me ra tomika e dua na taro ka tovolea me ra sauma. Na cava soti o rawa ni wasea se o ira na gone me baleta na lolo?

Luke 4:16–22, 28–30

Sa noqu iVakabula o Jisu Karisito.

Vakananuma titobu na ivakarau e sa vakalougatataka kina na nomu bula na iVakabula. O na vukei ira vakacava na gone me ra vakavinavinakataka na Nona veivakayarayarataki ki na nodra bula?

iTaviqaravi e Rawa ni Caka

• Sureta e dua na gone me vakavakarau mai ki na kalasi me vakalekalekataka na Luke 4:16–30. Ena rairai veivuke sara me vakayagataki na “Wase 17: Angry People in Nazareth,” New Testament Stories, 42–43; na kena vidio (LDS.org); se na vidio “Jesus Declares He Is the Messiah” (LDS.org).

• Wilika i cake na Luke 4:18 ni ra vakamuria tiko na gone. Kerei ira me ra vola na veika a tukuna na iVakabula ni mai cakava o Koya. Sureti ira na gone me ra wasea na ivakaraitaki ni so na gauna e vakayacora kina o Jisu na veika oqo, ena ivolanikalou se ena nodra bula.

Maciu 4:18--22; Luke 5:1–11

Sa sureti keda o Jisu Karisito me da muri Koya ka me da “gonedau ni tamata.”

Sa vuqa na sala era rawa ni muria kina na iVakabula na gone ka me ra “gonedau ni tamata” (Maciu 4:19). O na vukei ira vakacava me ra raica na nodra rawa ni veivakayarayarataki vinaka kivei ira na tani?

iTaviqaravi e Rawa ni Caka

• Sureti ira na gone me ra wilika na Maciu 4:18–22 kei na Luke 5:1–11. Era a sauma vakacava na tisaipeli i Jisu na Nona veikacivi me ra muri Koya? Na cava eda rawa ni cakava meda muria kina na nodra ivakaraitaki?

• Vakaraitaka vei ira na gone eso na iyaya ni qoli se dua na iyaloyalo ni gonedau. Na cava na kena ibalebale meda “gonedau ni tamata”? Na iyaya ni cakacaka cava e tu vei keda me vukei keda ni gonedau ni tamata?

ivakatakilakila ni vuli

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa vulica me baleta na gonedau ni tamata.

Vakatorocaketaki Noda Veivakavulici

E rawa ni ra vakila na gone na veivakayarayarataki ni Yalo. Vakavulica vei ira na gone ni yalo vakacegu, loloma, kei na lomavinaka e tiko vei ira ni ra tukuni se lagati Jisu Karisito kei na Nona kosipeli e sa vakavuna na Yalo Tabu. Na veiyalo oqo sa rawa ni tara cake na nodra ivakadinadina.

tabana ni itaviqaravi: sa sureti keda o Jisu me da gonedau ni tamata