Na Vunau ena Ulunivanua

Na Vunau ena Ulunivanua, mai vei Jorge Cocco

Feperueri 18–24.

Maciu 5; Luke 6

“Sa Kalougata”

Tekivu ena nomu wilika na Maciu 5 kei na Luke 6. Lako Mai, Mo Muri Au—Baleta na Tamata Yadua kei na Matavuvale e rawa ni vukea nomu kila na wase eso oqo, ka rawa ni solia na ituvatuva oqo eso na iwalewale ni veivakavulici.

Vola na Veika o Uqeti Kina

ivakatakilakila ni veiwasei

Sureta na Veiwasei

Kerei ira na gone me ra tukuna e dua na ka era a cakava ena macawa oqo me ra wasea kina vua e dua na rarama ni Turaga.

ivakatakilakila ni veivakavulici

Vakavulica na iVunau

Gone Sobu

Maciu 5:9

E rawa niu dautataro.

E rawa ni mana sara na nodra veivakayarayarataki mai vale na gone ni ra raici ira na kena vo ena loloma kei na yalovinaka.

iTaviqaravi e Rawa ni Caka

• Wilika na Maciu 5:9 vei ira na gone, ka vakamacalataka ni o ira na dautataro era cakava na vanua cava ga me vanua ni sautu, veitalia na vanua era tiko kina. Wasea e vica na ituvaki buli ga, ka vukei ira na gone me ra tukuna se ra dautataro na tamata era tukuni kina se sega.

• Sureta e vica na itubutubu ni gone me ra sikova nomu kalasi ka wasea na ivakaraitaki eso ni gauna era dautataro kina mai vale na luvedra.

• Vola ena so na tikinipepa e vica na gauna dredre era na rawa ni sotava na gone (me vaka nodra veivalataka na tacidra na iyaya ni vakatatalo). Sureti ira yadua na gone me ra tomika e dua na tikinipepa. Ni o wilika na veika e yaco, kerea me ra wasea na iwalewale e rawa me ra dautataro kina ena gauna oya.

Maciu 5: 14–16

E vinakata o Jisu meu rarama vei ira na tani.

O ira na gone sobu e rawa ni mana sara nodra veivakayarayarataki vei ira na tani. E rawa vakacava ni o vakauqeti ira me ra vakacilava yani nodra rarama?

iTaviqaravi e Rawa ni Caka

• Vakaraitaka vei ira na gone e vica na iyaya dau solia na rarama, oka kina e dua na kedra itaba na gone. Wilika Maciu 5:14–16, ka tukuna vei ira na gone ni tu vei keda kece e dua na rarama. E rawa vakacava ni da vakayagataka noda rarama me da kauti ira mai kina eso vua na Kalou?

• Cina wavokita na rumu ena dua na cinalivaliva. E vukei keda vakacava na rarama? E rawa vakacava me da dua na rarama e vuravura? Ubia na cinalivaliva. Na cava ena yaco kevaka eda sega ni wasea se vunia noda rarama?

• Vunia ena loma ni rumu e dua na cinalivaliva, ka bokoca na cina. Me ra tovolea na gone me ra kunea. Railesuva na Maciu 5:15, ka tukuna na vuna me da kakua kina ni vunia noda rarama.

• Cinava na lalaga ena dua na cinalivaliva, ka sureti ira na gone me ra muria na rarama e matadra. Vakayagataka na rarama me vagolea na matadra ki na dua na itaba ni iVakabula. Kerei ira na gone me ra wasea na ivakarau e rawa kina me da rarama ka na kauti ira yani eso vei Jisu Karisito.

• Vukei ira na gone me ra kunea ka rokataka na kadrala vunitaki ena draunipepa ni itaviqaravi ena macawa oqo.

• Lagata vata kei ira na gone “Jesus Wants Me for a Sunbeam,” “Shine On,” se “I Am like a Star,” Children’s Songbook, 60–61, 144, 163.

Maciu 5:44--45

E vinakata o Jisu meu lomani ira na tamata kecega.

Sa rawa vei ira na gone sobu me ra tekivu vakaraitaka oqo na loloma, kevaka sara mada ga era vakasagai vei ira era itabavata se na tacidra. Ni o wilika na Maciu 5:44–45, vakasamataka na ivakarau ena yaga kina vei ira na gone o vakavulica na ivakavuvuli ni iVakabula.

iTaviqaravi e Rawa ni Caka

• Cavuta tale na Maciu 5:44 ka vakayagataka na vosa kei na veigauna eso era na kila na gone ka veiwekanitaki ira kina. Kerei ira na gone me ra wasea na gauna eso era lomana kina e dua dina ga ni a dredre. Na cava beka era a vakila ena veika era sotava?

• Ni lagata vata vakalasi “I’ll Walk with You,” Children’s Songbook, 140–41. Na cava eda vulica mai na sere oqo me baleta na lomani ira na tani?

• Solia vei ira na gone na utopepa ka volai kina “Au na vakaraitaka noqu loloma vei ira na tamata kecega.” Kerei ira me ra ukutaka na uto ka laki vakaliliga toka i nodra vale me vakananumi ira me ra dau lomani ira na tani.

• Vukei ira na gone me ra vulica na matanimeke me salavata kei na “Love One Another,” Children’s Songbook, 136–37, me vaka e vakaturi ena Children’s Songbook.

ivakatakilakila ni veivakavulici

Vakavulica na iVunau

Gone Qase Cake

Maciu 5:3–12

E rawa niu mamarau kevaka au bula ena ivakarau e vakavulica o Jisu.

Ni o wilika na Maciu 5:3–12, na veivosa kei na malanivosa cava eso e vakaibalebale vei iko? Ena vakalougatataki ira vakacava na gone o vakavulica na ivakavuvuli oqo?

iTaviqaravi e Rawa ni Caka

• Vola ena papa e dua na ivolakabi me rua na kena iyatu, ka vola kina Sa Kalougata … kei na Veivakalougatataki. Sureti ira na gone me ra vaqara ena Maciu 5:3–12 a tukuna vei cei o Jisu ni sa kalougata kei na veivakalougatataki sa yalataka vei ira o Koya.

• Vola ena kadi na itovonibula kei na veivakalougatataki eso e salavata mai na veitikina oqori, me ra qai vakasotara na gone na itovonibula kei na kena veivakalougatataki. Kerei ira na gone me ra tomika e dua na itovonibula mai na veitikina oqo era vinakata me ra taracake.

Maciu 5:9, 21–24, 38–47

E rawa niu dautataro.

E vakavulica o Jisu ni o ira na dautataro era na vakatokai me ra luve ni Kalou. Ena rawa vakacava ni o vakauqeti ira na gone me ra dautataro?

iTaviqaravi e Rawa ni Caka

• Sureta e dua na gone me wilika na Maciu 5:9. Qai taro: A cava na dautataro? Na cava eso na sala e rawa ni da dautataro kina vei ira noda matavuvale kei ira na itokani? (Ena so na vakasama, raica na tikina 21–24, 38–47.)

• Kerei ira yadua na gone me ra vakasamataka e dua na ituvaki ena gadrevi kina na nona veivuke e dua na dautataro. Na cava beka ena cakava na dautataro ena ituvaki vaqori?

• Sureti ira na gone me ra wasea na gauna eso era a lomana kina e dua, kevaka sara mada ga e duatani vua na tamata oqori se a dredre me lomani.

Maciu 5: 14–16

Noqu ivakaraitaki e rawa ni vakararamataka na sala vei ira tale eso me ra muri Jisu.

Vakasamataki ira na gone o vakavulica ni o wilika na veitikina oqo. Na itukutuku cava beka ena via tukuna na Turaga vei ira na gone ena italanoa oqo?

iTaviqaravi e Rawa ni Caka

• Vukei ira na gone me ra cavuqaqataka na Maciu 5:16. Vola na tikinivola ena papa. Ni wilika vata vakavica, ka bokoca laivi eso na vosa ena veigauna. Ni ra sa cavuqaqataka rawa na tikinivola o ira na gone, e rawa talega mo ni lagata na “Shine On,” Children’s Songbook, 144.

• Kerei ira na gone me ra droinitaka na veika e dau solia vei keda na rarama. Wilika na Maciu 5:14–16. Taroga vei ira na vuna e vinakata kina o Jisu me da rarama ki vuravura.

• Sureti ira na gone me ra droinitaka na veika era rawa ni cakava me ra rarama kina vei ira na tani. E rawa ni o vakaraitaka na vidio “Light the World: 25 Days of Service” (LDS.org). Sureta e rua na gone me rau qara vata, qai kerea e dua me tovolea me vakadredrei koya kadua ni sega ni tarai koya. Tukuna na kaukauwa e tu vei ira na gone me ra vakamarautaki ira tale eso.

ivakatakilakila ni vuli

Vakauqeta na Vuli e Vale

Bolei ira na gone me ra vakaraica toka mai e dua a dautataro ena macawa oqo. Ena itekivu ni kalasi ena macawa mai qo, sureti ira me ra tukuna se o cei kei na cava era raica.

Vakatorocaketaki Noda Veivakavulici

Vukei ira na gone me ra dauyavala. “Ni o vakavulici ira na gone, vakatarai ira me ra tara, droinitaka, rokataka, vola, ka bulia. Na veika oqo sa ra levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).

tabana ni itaviqaravi: E vinakata o Jisu meu dua na rarama