Suba sa Missouri

Campfire sa Missouri, ni Bryan Mark Taylor

Mayo 31–Hunyo 6

Doktrina ug mga Pakigsaad 60–62

“Ang Tanan nga Tawo Ania sa Akong Kamot”

Hinumdumi nga ang imong labing maayo nga pagpangandam sa pagtudlo sa Doktrina ug mga Pakigsaad 60–62 moabut pinaagi sa imong mga kasinatian sa personal ug tibuok pamilya nga pagtuon niini nga mga seksyon.

Irekord ang Imong mga Impresyon

pagpaambit nga icon

Dapita ang Pagpaambit

Hatagi ang matag bata og kahigayunan sa pagpakigbahin sa butang nga iyang nakat-unan sa mga kasulatan sa miaging semana o gikan sa miaging klase sa Primary pagka Dominggo. Human makigbahin ang matag bata, hangyoa ang laing bata sa klase sa pag-summarize unsay iyang gisulti.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 60:4; 61:1–2, 36; 62:1

Ang mga kasulatan nagtudlo kanako mahitungod ni Jesukristo.

Ang Doktrina ug mga Pakigsaad 60–62 naglakip sa daghang mga pamahayag nga makatabang sa mga bata nga imong gitudloan nga makasabut kinsa si Jesukristo ug makapalambo sa ilang gugma alang Kaniya.

Posible nga mga Kalihokan

• Ipakita ang litrato ni Jesukristo, ug hangyoa ang mga bata sa pagpakigbahin ngano nga sila nahigugma ni Jesus. Pagpili og pipila ka pulong gikan sa Doktrina ug mga Pakigsaad 60–62 nga nagtudlo nimo mahitungod sa Manluluwas, ug ipakigbahin kini sa mga bata (tan-awa, pananglitan sa, Doktrina ug mga Pakigsaad 60:4; 61:1–2, 36; 62:1). Tabangi ang mga bata nga balikon paglitok ang mga pulong uban nimo. Ipakigbahin unsay imong gibati ni Jesukristo.

• Ipakita ang pipila ka mga litrato ni Jesus gikan sa Iyang yutan-ong pangalagad (tan-awa sa Mga Hulagway sa Ebanghelyo, nu. 34–61). Tuguti ang mga bata nga motabang nimo sa pagpasabut unsa ang gibuhat ni Jesus diha sa mga litrato. Sa unsa nga paagi Niya gipakita ang Iyang gugma alang sa mga anak sa Langitnong Amahan? Sultihi ang mga bata mahitungod sa usa sa imong paborito nga mga kasulatan nga nagtudlo mahitungod ni Jesus.

• Kanta uban sa mga bata “Maninguha Kong Mahimong Mahisama Kang Jesus” (Songbook sa mga Bata, 40–41; tan-awa usab sa sing-along video sa ChurchofJesusChrist.org). Samtang ikaw mokanta mahitungod sa mga paagi nga mahisama ni Jesus, hunong panagsa ug hangyoa ang mga bata sa pagkompleto sa sentence “Ako mahimong sama ni Jesus pinaagi sa …”

  nabanhaw nga Manluluwas

  Tungod Niini nga Katuyoan Ako Mianhi, ni Yongsung Kim

Doktrina ug mga Pakigsaad 62:3

Gusto ni Jesukristo nga mopakigbahin ko sa Iyang ebanghelyo.

Ang mga bata ganahan nga mopakigbahin unsay ilang nahibaloan ngadto sa uban. Tabangi sila nga makasabut nga kon sila mopakigbahin unsay ilang nahibaloan mahitungod sa ebanghelyo, ang Langitnong Amahan mahimuot kanila.

Posible nga mga Kalihokan

• Ipasabut nga ang Ginoo misugo sa Propeta nga si Joseph Smith ug sa ubang mga lider sa Simbahan sa pagbiyahe gikan sa Kirtland, Ohio, ngadto sa Lalawigan sa Jackson, Missouri. Siya misugo kanila sa pagsangyaw sa ebanghelyo sa pagpaingon nila ug sa ilang pagpauli. Basaha ang Doktrina ug mga Pakigsaad 62:3, ug hangyoa ang mga bata sa pagpaminaw unsay gibuhat sa mga misyonaryo nga nakapahimuot sa Ginoo. Pagpamatuod nga ang Ginoo mahimuot kanato kon kita mopakigbahin sa ebanghelyo ngadto sa uban.

• Tabangi ang mga bata nga maghimo og mga tsapa nga magpakita nga sila gusto nga mahimong mga misyonaryo sa Simbahan. Ipasul-ob nila ang ilang mga tsapa ug magbansay sa pagpakigbahin sa ilang mga pagpamatuod uban sa usag usa.

• Panganta og dungan sa usa ka awit mahitungod sa pagpakigbahin sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90). Tabangi ang mga bata sa paghunahuna unsay ilang ikasulti kon dunay mangutana kanila unsay ilang ganahan ni Jesukristo ug sa Iyang Simbahan. Dapita sila sa pagdrowing og mga litrato sa mga butang nga ilang ganahan mahitungod sa ebanghelyo ni Kristo.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 60:7, 13; 62:3, 9

Akong maabli ang akong ba-ba sa pagpakigbahin sa ebanghelyo ni Jesukristo.

Ang pagpamatuod sa usa ka bata mahimong gamhanan sama sa hamtong, tungod kay ang gahum sa pagpamatuod dili moabut tungod sa edad sa tawo o kasinatian apan gikan sa Espiritu Santo. Tabangi ang mga bata nga makabaton og pagsalig nga sila makaabli sa ilang mga ba-ba ug mopakigbahin sa uban unsay ilang nahibaloan nga tinuod.

Posible nga mga Kalihokan

• Unsa nga mga panalangin ang gisaad sa Ginoo sa Doktrina ug mga Pakigsaad 60:7; 62:3, 9 niadtong kinsa mopakigbahin sa Iyang ebanghelyo? Sa unsa nga paagi nga ang pagpakigbahin sa ebanghelyo makapanalangin sa uban? Ikonsiderar ang kasinatian gikan sa imong kinabuhi sa dihang imong gipakigbahin ang ebanghelyo—unsa nga mga panalangin ang miabut gikan sa imong mga paningkamot? Dapita ang mga bata sa pagpakigbahin sa bisan unsa nga mga kasinatian nga ilang nasinati. Mahimo usab nga manganta kamo og awit mahitungod sa misyonaryo nga buhat, sama sa “Lakaw Uban ang Hugot nga Pagtuo” (Mga Himno, nu. 163), ug maghisgot sa mga panalangin nga gihisgutan sa kanta.

• Tabangi ang mga bata nga i-drama ang mga sitwasyon diin sila mahimong mopakigbahin sa ebanghelyo uban sa ilang mga higala. Sama pananglit, unsay ilang isulti kon dunay mangutana kanila ngano nga sila mosimba? O kon ang usa ka higala makakita nila nga nagsul-ob sa PAM nga singsing o nagbasa a Basahon ni Mormon ug mangutana? Unsa ang ilang isulti?

Doktrina ug mga Pakigsaad 60:7; 61:1–2, 36; 62:1

Ang Ginoo andam nga mopasaylo nako kon ako maghinulsol.

Si Joseph Smith ug ang ubang mga lider sa Simbahan dili hingpit. Usahay sila maglalis ug dili mapailubon (tan-awa sa “Ezra Booth and Isaac Morley,” Revelations in Context, 133). Apan ang Ginoo maloloy-on ngadto kanila ug sa kanunay mitanyag og kapasayloan kon sila maghinulsol.

Posible nga mga Kalihokan

• Basaha uban sa mga bata ang Doktrina ug mga Pakigsaad 60:7; 61:2, ug hangyoa sila sa pagpangita sa mga pulong nga komon niini nga mga bersikulo. Pahinumdumi ang mga bata nga kini nga mga pagpadayag gihatag ngadto ni Joseph Smith ug sa ubang mga lider sa Simbahan. Unsa ang gusto sa Ginoo nga ilang mahibaloan? Unsa ang atong makat-unan gikan niini nga mga bersikulo mahitungod kon unsay gibati sa Manluluwas kanato kon kita makahimo og mga sayop?

• Isulat ang Unsa nahisama si Jesukristo? diha sa pisara. Basaha pagdungan ang Doktrina ug mga Pakigsaad 61:1–2, 36; 62:1, ug paghimo og lista sa mga tubag niini nga pangutana nga makita sa mga bata diha sa mga bersikulo. Sa unsa nga paagi nga ang mga hiyas nga anaa diha sa pisara makatabang nato nga makasabut ngano nga ang Manluluwas andam nga mopasaylo nato? Unsa ang mga paagi nga kita makasunod sa Iyang ehemplo?

Doktrina ug mga Pakigsaad 60:5; 61:22; 62:5–8

Ang Ginoo gusto nga ako mogamit sa akong kabubut-on ug sa Iyang Espiritu sa paghimo og maayong mga pagpili.

Unsaon nimo sa paggamit niini nga mga bersikulo sa pagtudlo sa mga bata sa unsa nga paagi ang Ginoo motabang nila sa paghimo og maayo nga mga pagpili?

Posible nga mga Kalihokan

• Hangyoa ang mga bata sa paghisgot sa usa ka panahon sa dihang sila kinahanglang mohimo og desisyon. Giunsa nila sa paghukom unsay buhaton? Basaha pagdungan ang Doktrina ug mga Pakigsaad 62:5, 7–8 aron makahibalo mahitungod kon unsay gisulti sa Ginoo ngadto sa mga elder kinsa hapit na mobiyahe gikan sa Missouri ngadto sa Kirtland, Ohio. Unsa nga mga pagpili ang kinahanglan nilang himoon mahitungod sa ilang biyahe? Unsa ang gihatag sa Ginoo kanato aron makatabang nato sa paghimo og mga pagpili? Sultihi ang mga bata mahitungod kon giunsa nimo sa paggamit ang giya sa Espiritu ug ang imong labing maayong paghukom sa paghimo og mga desisyon.

• Bahina ang klase ngadto sa tulo ka grupo, ug hangyoa ang matag grupo sa pagbasa sa usa sa mosunod nga mga bersikulo, diin ang Ginoo misugo sa pipila ka mga misyonaryo mahitungod kon unsaon sa pagtuman sa ilang mga misyon: Doktrina ug mga Pakigsaad 60:5; 61:22; 62:5. Unsay atong namatikdan mahitungod sa instruksyon sa Ginoo niini nga mga bersikulo? Ngano nga usahay maayo alang nato nga mogamit sa atong kaugalingong paghukom imbis maghulat sa piho nga instruksyon gikan sa Dios sa matag butang?

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagbansay sa pagpakigbahin sa ebanghelyo uban sa usa ka sakop sa pamilya. Sama pananglit, sila mahimong mopakigbahin og butang nga ilang nakat-unan sa Primary.

Pagpalambo sa Atong Pagtudlo

Pagpamatuod diha sa imong klase. Ang paghatag sa imong pagpamatuod kanunay makatabang sa mga bata nga imong gitudloan nga makaangkon sa ilang kaugalingong mga pagpamatuod. Ang usa ka pagpamatuod mahimong sama ka yano sa “Nasayud ko nga ang Langitnong Amahan nahigugma sa matag usa kaninyo” o “Maayo ang akong bation samtang magkat-on ko mahitungod ni Jesukristo.”

pahina sa kalihokan: Makahimo ako sa pagpakigbahin sa ebanghelyo