unang mga misyonaryo sa Simbahan

Abril 5–11

Doktrina ug mga Pakigsaad 30–36

“Ikaw Gitawag sa Pagsangyaw sa Akong Ebanghelyo”

Samtang ikaw mainampuong nagtuon sa Doktrina ug mga Pakigsaad 30–36 uban sa mga bata sa imong klase nga gihunahuna, ang Espiritu mahimong mohatag kanimo og mga ideya mahitungod kon unsaon sa pagtudlo kanila. Pangita og dugang nga mga ideya dinhi niini nga outline.

Irekord ang Imong mga Impresyon

pagpaambit nga icon

Dapita ang Pagpaambit

Ipataas ang usa ka hulagway sa mga misyonaryo, ug hangyoa ang mga bata sa pagpakigbahin kon unsa ang ilang nahibaloan mahitungod sa misyonaryo nga buhat.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 33:2–3, 6–10

Makahimo ako sa pagpakigbahin sa ebanghelyo ni Jesukristo.

Bisan ang gagmay nga mga bata makahimo sa pagpakigbahin sa ilang pagsaksi sa ebanghelyo ni Jesukristo. Unsaon nimo paggamit kini nga mga bersikulo aron sa pagtabang og dasig kanila sa pagbuhat sa mao?

Posible nga mga Kalihokan

• Dapita ang mga bata sa pagsulay sa pagsulti og hugpong sa mga pulong sama sa ang “Dios nahigugma kanimo” nga nakatak-um ang ilang mga ba-ba. Ipasabut nga kita dili makatudlo sa mga tawo mahitungod sa ebanghelyo kon kita dili moabli sa atong mga ba-ba. Basaha ang Doktrina ug mga Pakigsaad 33:8–10, ug dapita ang mga bata sa pag-abli sa ilang mga ba-ba sa matag higayon nga ilang madungog ang hugpong sa mga pulong “abliha ang inyong mga ba-ba.” Ngano nga ang Langitnong Amahan gusto kanato nga moabli sa atong mga ba-ba ug mopakigbahin sa ebanghelyo ngadto sa uban?

• Paghunghong og usa ka butang sa labing mahinay ngadto sa mga bata, sama sa si “Joseph Smith usa ka Propeta sa Dios,” ug hangyoa sila sa pagbalik og sulti unsay imong gisulti. Dayon isulti ang sama nga hugpong sa mga pulong sa usa ka mas kusog nga tingog. Basaha ang Doktrina ug mga Pakigsaad 33:2. Tabangi ang mga bata sa pagsabut nga ang “pagpabati sa [atong] mga tingog” nagkahulugan sa dili pagkahadlok sa pagsulti sa uban mahitungod ni Jesukristo, sa Basahon ni Mormon, ug ubang mga kamatuoran sa ebanghelyo.

• Pagbutang og mga monyeka nga papel o mga hulagway sa mga tawo libut sa kwarto. Dapita ang mga bata sa pagpangita sa mga tawo ug sa pagpundok kanila ngadto sa atubangan sa kwarto. Basaha ang Doktrina ug mga Pakigsaad 33:6, ug ipasabut kon unsa ang kahulugan nga ang Ginoo “mopundok sa [Iyang] pinili.” Pagpamatuod nga kita makatabang sa pagpundok og mga tawo ngadto sa Ginoo samtang kita nakigbahin sa ebanghelyo.

• Panganta og dungan sa usa ka awit mahitungod sa pagpakigbahin sa ebanghelyo, sama sa “Gusto Ko Karon nga Mamisyonaryo (Songbook sa mga Bata, 90). Tabangi ang mga bata sa paghunahuna og mga paagi nga sila makatabang sa ubang mga tawo nga makakat-on mahitungod ni Jesukristo.

Doktrina ug mga Pakigsaad 33:12–17

Ako makatukod sa akong kinabuhi diha sa ebanghelyo ni Jesukristo.

Ang tambag nga gihatag sa Ginoo ngadto ni Ezra Thayer ug Northrop Sweet makatabang sa mga bata nga imong gitudloan sa pagtukod sa ilang mga kinabuhi diha sa ebanghelyo ni Jesukristo.

Posible nga mga Kalihokan

• Pagpakita sa mga bata og mga hulagway sa usa ka pundasyon sa gambalay, ug hangyoa sila sa paghulagway niini. Ngano nga ang usa ka gambalay nanginahanglan og lig-on, solido nga pundasyon? Pagbasa uban sa mga bata sa Doktrina ug mga Pakigsaad 33:12–13, ug pasabta nga ang Ginoo gusto kanato nga motukod sa atong mga kinabuhi diha sa Iyang ebanghelyo. Tabangi ang mga bata sa paghunahuna og pipila ka mga paagi sila makatukod sa ilang mga kinabuhi diha sa ebanghelyo ni Jesukristo.

• Hatagi ang mga bata og pipila ka mga butang nga ilang maggamit sa pagtukod og tore, sama sa mga block o plastik nga mga tasa. Butangi og ngalan ang matag butang uban sa usa ka hulagway nga nagrepresentar sa mga butang nga gisulti sa Ginoo diha sa Doktrina ug mga Pakigsaad 33:14–17. Dapita ang mga bata sa pagtukod og tore samtang ikaw nakigsulti kanila mahitungod kon sa unsa nga paagi kini nga mga butang nagtabang kanato sa pagtukod sa atong mga kinabuhi diha sa ebanghelyo ni Jesukristo.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 30:1–2

Kinahanglan ko nga mopunting pa diha sa mga butang sa Dios kay sa mga butang sa yuta.

Ang tambag sa Ginoo ngadto ni David Whitmer diha sa seksyon 30 makatabang sa mga bata nga imong gitudloan sa pagpabilin nga matinud-anon ngadto sa ebanghelyo ni Jesukristo.

Posible nga mga Kalihokan

• Basaha ang Doktrina ug mga Pakigsaad 30:1 og dungan, ug hangyoa ang mga bata sa pag-summarize, sa ilang kaugalingon nga mga pulong, ang tambag sa Ginoo nga gihatag ngadto ni David Whitmer. Sa unsa nga mga paagi kita usahay mahimong “mahadlok sa tawo,” o maguol kon unsa ang gihunahuna sa uban, kay sa magbuhat unsa ang atong nahibaloan nga atong kinahanglan nga buhaton?

• Hangyoa ang mga bata sa pagpaninguha sa pagbuhat og duha ka buluhaton og dungan, sama sa pag-recite og usa ka artikulo sa hugot nga pagtuo samtang nagsulat sa mga ngalan sa tanang mga bata sa klase. Pangutan-a kon nganong malisud ang pagtutok diha sa unang buluhaton. Unsa ang pipila ka “mga butang sa yuta” (Doktrina ug mga Pakigsaad 30:2) nga makapalinga kanato gikan sa paghinumdom ni Jesukristo ug sa Iyang ebanghelyo? Unsaon nato sa pagpabiling nakatutok diha Kaniya kay sa dili kaayo importanting mga butang?

Doktrina ug mga Pakigsaad 30–34

Makahimo ako sa pagpakigbahin sa ebanghelyo ni Jesukristo.

Daghang mga bata sa Simbahan ang naglantaw sa pagserbisyo og usa ka full-time o serbisyo nga misyonaryo. Ang mga kasinatian sa mga misyonaryo nga gipasabut sa mga seksyon 30–34 makatabang kanila sa pagpangandam.

Posible nga mga Kalihokan

• Dapita ang usa ka miyembro sa ward sa pagkat-on mahitungod sa usa ka misyonaryo nga ginganlan diha sa Doktrina ug mga Pakigsaad 30–34 ug sa pagpakigbahin ngadto sa mga bata kon unsa ang ilang nakat-unan (tan-awa ang “Mga Tingog sa Pagpahiuli: Unang mga Kinabig [Voices of the Restoration: Early Converts]” sa Dali, Sunod Kanako—Alang sa mga Indibidwal ug mga Pamilya o “The Faith and Fall of Thomas MarshEzra Thayer: From Skeptic to BelieverOrson Pratt’s Call to ServeRevelations in Context,54–69).

• Pagdrowing og dako nga ba-ba diha sa pisara, ug tabangi ang mga bata sa pagpangita diha sa Doktrina ug mga Pakigsaad 33:8–10 sa mga saad sa Ginoo ngari kanato kon kita moabli sa atong mga ba-ba sa pagpakigbahin sa ebanghelyo. Ipasulat sa mga bata kini nga mga saad diha sa pisara, ug tabangi sila sa pagsabut kon unsa ang kahulugan niini nga mga saad. Hangyoa ang matag bata sa pagsulat sulod sa ba-ba og usa ka kamatuoran sa ebanghelyo nga ilang ipakigbahin ngadto sa uban.

• Pagpakita og hulagway sa usa ka trumpeta, ug pag-istorya mahitungod sa unsa ang kahulugan sa pagsangyaw sa ebanghelyo “sama sa tunog sa usa ka trumpeta.” Unsaon nato sa “pagpabati” sa atong mga tingog? (Doktrina ug mga Pakigsaad 33:2; 34:6).

• Hangyoa ang mga bata sa pagpakigbahin kon sa unsa nga paagi sila mag-andam sa pagserbisyo og mga misyon sa pipila ka adlaw. Kon nakaila sila og usa ka tawo (tingali usa ka sakop sa pamilya) kinsa nagserbisyo, dapita sila sa pagsulti mahitungod sa iyang mga kasinatian. O dapita ang mga misyonaryo, usa ka returned missionary, o usa ka tawo kinsa nag-andam alang sa misyon sa pagpakigbahin sa iyang kadasig alang sa misyonaryo nga buhat. Pakigbahin og pipila sa imong mga kasinatian sa pagpakigbahin sa ebanghelyo, lakip ang mga kasinatian sa inyong inadlaw nga kinabuhi.

  mga batang lalaki nagdula

  Makahimo ako sa pagpakigbahin sa ebanghelyo ngadto sa akong mga higala.

Doktrina ug mga Pakigsaad 33:12–17

Ako makatukod sa akong kinabuhi diha sa ebanghelyo ni Jesukristo.

Kon ang mga bata makakat-on sa sayo nga edad kon unsaon sa pagtukod sa ilang mga kinabuhi diha sa ebanghelyo ni Jesukristo, sila mas malagmit nga magpabilin nga matinud-anon ngadto Kaniya. Ang tambag nga gihatag dinhi niini nga mga bersikulo makatabang kanila.

Posible nga mga Kalihokan

• Pagdala ngadto sa klase og mga butang sa nagkalain-laing kagahi, sama sa stuffed animal, espongha, lapok, ug usa ka dako nga bato. Tuguti ang mga bata sa paggunit sa matag usa. Hangyoa sila sa pagtan-aw sa Doktrina ug mga Pakigsaad 33:12–13 aron sa pagsuta kon sa unsa nga paagi ang Ginoo mihulagway sa Iyang ebanghelyo. Ngano nga ang “dakong bato” usa ka maayo nga pulong sa paghulagway sa ebanghelyo? Unsaon nato pagtukod ang atong mga kinabuhi diha sa dakong bato sa ebanghelyo?

• Tabangi ang mga bata sa pagbasa sa Doktrina ug mga Pakigsaad 33:12–17 ug pangita og mga butang nga atong mahimo sa pagtukod sa atong mga kinabuhi diha sa ebanghelyo ni Jesukristo. Dapita ang mga bata sa pagdrowing og usa ka hulagway sa usa ka butang nga ilang nakita, ug ipatagna nila kon unsa ang gipakita sa hulagway sa usag usa.

pagkat-on nga icon

Awhaga ang Pagkat-on diha sa Panimalay

Dapita ang mga bata nga magpakasama nga mga misyonaryo pinaagi sa pagpakigbahin sa ilang mga pamilya og usa ka butang nga ilang nakat-unan sa Primary karon.

Pagpalambo sa Atong Pagtudlo

Pagpamatuod sa gisaad nga mga panalangin. Kon dapiton nimo ang mga bata sa pagpuyo og usa ka baruganan sa ebanghelyo, pakigbahin sa mga saad nga gihimo sa Dios ngadto niadtong kinsa nagpuyo niana nga baruganan. Sama pananglit, makapamatuod ka sa mga panalangin nga ang Ginoo naghatag ngadto niadtong kinsa nag-abli sa ilang mga ba-ba ug nakigbahin sa ebanghelyo.

pahina sa kalihokan: Makahimo ako sa pagpakigbahin sa ebanghelyo