estatuwa ni Christus

Marso 29–Abril 4

Pasko sa Pagkabanhaw

“Ako Mao Siya Kinsa Nabuhi, Ako Mao Siya Kinsa Gipatay”

Ang Dominggo sa Pasko sa Pagkabanhaw nga klase sa Primary usa ka maayo kaayo nga oportunidad sa pagtabang sa mga bata sa paglig-on sa ilang pagtuo diha ni Jesukristo ug sa Iyang Pag-ula. Pangayoa ang paggiya sa Ginoo kon unsaon paghimo niana. Mahimo nga makakaplag ka og pipila ka mga ideya niini nga outline.

Irekord ang Imong mga Impresyon

pagpaambit nga icon

Dapita ang Pagpaambit

Himoa nga ang mga bata makigbahin kanimo kon unsa ang ilang nahibaloan mahitungod sa katarungan nga kita nagsaulog sa Pasko sa Pagkabanhaw. Pangutan-a sila kon unsa ang gibuhat sa ilang mga pamilya aron sa pagsaulog sa Pagkabanhaw ni Jesukristo sa panahon sa Pasko sa Pagkabanhaw. O himoa nga mopakigbahin sila kon unsa ang ilang nakat-unan mahitungod ni Jesukristo diha sa panimalay ug diha sa mga kasulatan.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 138:11–17

Tungod ni Jesukristo, ako mabanhaw.

Samtang ikaw magtudlo sa mga bata mahitungod sa Pagkabanhaw ni Jesukristo, ang Doktrina ug mga Pakigsaad 138:11–17 makatabang kanimo sa pagpasabut kon unsa ang kahulugan sa mabanhaw. Kini nga mga bersikulo makatabang usab sa pagtukod sa ilang hugot nga pagtuo nga sila mabanhaw sa pila ka adlaw.

Posible nga mga Kalihokan

• Pagpakita og mga hulagway sa pagkamatay, paglubong, ug Pagkabanhaw sa Manluluwas (tan-awa sa Libro sa mga Hulagway sa Ebanghelyo, mga nu. 57, 58, ug 59). Pangutan-a ang mga bata kon unsa ang ilang nahibaloan mahitungod niini nga mga hitabo. Pagpamatuod nga si Jesus namatay alang kanato ug mibangon gikan sa patay aron tanan kita mabanhaw human kita mamatay.

• Paghunahuna og leksyon nga naggamit og butang nga makatabang sa mga bata sa pagsabut kon unsa ang mahitabo kon kita mamatay (ang atong mga espiritu ug mga lawas magbulag) ug kon kita mabanhaw (ang atong mga espiritu ug mga lawas mobalik sa pagkahiusa). Sama pananglit, unsa ang mahitabo kon atong tangtangon ang bateriya gikan sa flashlight o ang sudlanan sa tinta gikan sa usa ka pen? Unsa ang mahitabo kon kining mga butanga maghiusa pag-usab?

• Basaha ngadto sa mga bata gikan sa Doktrina ug mga Pakigsaad 138:17: “Ang espiritu ug ang lawas pagahiusahon dili na gayud mabahin pag-usab, nga sila unta makadawat og usa ka kahingpitan sa kalipay.” Ngano nga kita mapasalamaton alang sa atong mga lawas? Pakigbahin sa hingpit nga kalipay nga imong gibati nga nahibalo nga tanan kita mabanhaw ug makabaton sa atong mga lawas pag-usab.

• Pagkanta og dungan sa usa ka awit mahitungod sa Pagkabanhaw, sama sa “Nabuhi ba Gayud Pag-usab si Jesus?” o “Si Jesus Nabanhaw” (Songbook sa mga Bata, 44, 45). Hatagi ang mga bata og mga hulagway nga nagrepresentar og mga pulong o hugpong sa mga pulong diha sa awit (sama pananglit, tan-awa sa Libro sa mga Hulagway sa Ebanghelyo, mga nu. 59, 60, ug 61), ug dapita sila sa pagpataas sa ilang mga hulagway kon sila manganta niadto nga mga pulong.

Doktrina ug mga Pakigsaad 76:11–24; 110:1–7; Joseph Smith—Kasaysayan 1:14–17

Ang Propeta Joseph Smith nakakita ni Jesukristo.

Usa ka paagi sa pagtabang sa mga bata paglig-on sa ilang pagtuo diha sa Manluluwas mao ang pagpakigbahin ngadto kanila sa pagpamatuod ni Joseph Smith: “Siya buhi! Kay kami nakakita kaniya, gani diha sa tuo nga kilid sa Dios” (Doktrina ug mga Pakigsaad 76:22–23).

Posible nga mga Kalihokan

• Pakit-a ang mga bata og usa ka hulagway sa Unang Panan-awon ni Joseph Smith (tan-awa ang Enero 4–10 outline sa Dali, Sunod Kanako—Alang sa mga Indibidwal ug mga Pamilya). Dapita ang mga bata sa pagsulti kanimo kon unsa ang nahitabo diha sa hulagway, ug hangyoa sila sa pagpangita ni Jesukristo. Pangutan-a ang mga bata kon sila nahibalo ba mahitungod sa ubang mga panahon nga nakita ni Josephn Smith ang Manluluwas. Sa imong kaugalingong mga pulong, sulti mahitungod sa mga kasinatian nga gihulagway diha sa Doktrina ug mga Pakigsaad 76:11–24; 110:1–7. Sultihi ang mga bata kon giunsa niini nga mga kasulatan pagtukod ang imong hugot nga pagtuo diha ni Jesukristo.

• Samtang ang mga bata nagkolor sa pahina sa kalihokan niini nga semana, basaha ngadto kanila ang mga kasulatan nga nagpasabut niini. Ipasabut ang mga detalye diha sa mga kasulatan nga gihulagway sa mga bersikulo. Pagpamatuod ngadto sa mga bata nga ang Propeta Joseph Smith nakakita ni Jesukristo, ug kini usa sa mga katarungan nga kita nahibalo nga si Jesus buhi.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 76:11–24; 110:1–10; Joseph Smith—Kasaysayan 1:14–17

Ang Propeta Joseph Smith mipamatuod nga si Jesukristo buhi.

Ang labing importante nga misyon sa usa ka propeta mao ang pagpamatuod kabahin ni Jesukristo. Tabangi ang mga bata sa pagtukod sa ilang hugot nga pagtuo diha sa Manluluwas pinaagi sa pagkat-on gikan sa pagpamatuod ni Joseph Smith kabahin Kaniya.

Posible nga mga Kalihokan

• Ang mosunod nga mga tudling naghulagway sa mga panahon sa dihang si Jesukristo mipakita ngadto ni Joseph Smith: Doktrina ug mga Pakigsaad 76:11–24; 110:1–10; Joseph Smith—Kasaysayan 1:14–17. Diha sa pisara, paglista og pipila ka mga kamatuoran nga atong nakat-unan mahitungod sa Manluluwas gikan niini nga mga bersikulo. Dapita ang mga bata sa pag-ila kon hain nga mga bersikulo ang nagtudlo sa mga kamatuoran nga gilista diha sa pisara. Unsa pa ang atong nakat-unan mahitungod ni Jesukristo gikan sa mga kasinatian ni Joseph Smith?

• Sa pahina sa kalihokan niini nga semana, dapita ang mga bata sa pagpares sa mga hulagway ngadto sa mga bersikulo sa kasulatan. Ngano nga panalangin kini ang mahibalo nga si Joseph Smith nakakita sa nabanhaw nga Manluluwas? Pakigbahin sa imong pagpamatuod nga si Jesukristo buhi ug nga si Joseph Smith usa ka propeta.

Doktrina ug mga Pakigsaad 63:49; 88:14–17, 27; 138:11, 14–17

Tungod ni Jesukristo, ako mabanhaw.

Unsaon nimo pagtabang sa mga bata sa pagpalawom sa ilang pasalamat alang sa gasa sa Manluluwas sa pagkabanhaw nganhi kanatong tanan?

Posible nga mga Kalihokan

• I-assign sa matag bata ang usa sa mosunod nga mga tudling sa kasulatan: Doktrina ug mga Pakigsaad 63:49; 88:14–17, 27; 138:11, 14–17. Dapita ang mga bata sa pagsiksik sa ilang mga bersikulo aron sa pagpangita og hugpong sa mga pulong nga sa ilang hunahuna nakakuha sa mensahe sa Pasko sa Pagkabanhaw. Himoa nga sila mopakigbahin sa ilang mga hunahuna. Kon ang panahon motugot, pahimoa sila og mga kard nga nagpakita sa mga hugpong sa mga pulong nga ilang nakaplagan nga ilang mahatag ngadto sa mga sakop sa pamilya o mga higala.

• Pangutan-a ang mga bata kon unsaon nila pagpasabut ngadto sa mas manghud nga igsoon o usa ka higala kon unsa ang kahulugan sa mabanhaw. Alang sa mga ideya, pagbasa og dungan sa Doktrina ug mga Pakigsaad 138:14–17, ug hunahunaa ang mga pangutana sama niini: Unsa ang mahitabo sa atong mga espiritu ug mga lawas kon kita mamatay? Unsa ang mahitabo kon kita mabanhaw? Giunsa paghimo ni Jesukristo ang pagkabanhaw nga posible?

• Ipasalida ang video “Because He Lives” (ChurchofJesusChrist.org), ug himoa nga ang mga bata makigbahin kon unsa ang ilang gibati mahitungod sa unsay gibuhat sa Manluluwas alang kanila.

  Si Jesus Nag-ampo

  Lord of Prayer, ni Yongsung Kim

Doktrina ug mga Pakigsaad 18:10–13; 19:16–19; 45:3–5; 58:42–43

Tungod ni Jesukristo, ako mapasaylo sa akong mga sala.

Agi og dugang sa pagluwas kanato gikan sa pisikal nga kamatayon, si Jesukristo mihatag og paagi alang kanato nga maluwas gikan sa espiritwal nga kamatayon—sa lain nga pagkasulti, nga mapasaylo alang sa atong mga sala ug mobalik ngadto sa presensya sa Dios.

Posible nga mga Kalihokan

• Pagsulat diha sa pisara og duha ka ulohan susama niini: Unsa ang gibuhat sa Manluluwas ug Unsa ang kinahanglan gayud nakong buhaton. Dapita ang matag bata sa pagsiksik sa usa sa mosunod nga mga tudling aron sa pagpangita og usa ka butang nga sakop ubos niini nga mga ulohan: Doktrina ug mga Pakigsaad 18:10–13; 19:16–19; 45:3–5; 58:42–43. Pakigbahin sa imong hingpit nga kalipay ug pasalamat alang sa unsay nabuhat sa Manluluwas alang kanato.

• Tabangi ang mga bata nga makakat-on sa ikatulo nga artikulo sa hugot nga pagtuo. Makatabang ka nila sa pagmemorya niini pinaagi sa pagpakita og mga hulagway nga motukma sa importanting mga hugpong sa mga pulong.

• Ipasalida ang video “The Shiny Bicycle” (ChurchofJesusChrist.org), o pag-istorya og imong kaugalingon mahitungod sa usa ka bata kinsa naghimo og sayop nga pagpili ug unya naghinulsol. Tabangi ang mga bata sa paghisgot kon unsa ang gibuhat sa bata diha sa istorya aron makadawat og pagpasaylo. Giunsa sa Manluluwas sa paghimo niini nga posible alang kanato nga mapasaylo?

pagkat-on nga icon

Awhaga ang Pagkat-on diha sa Panimalay

Tabangi ang mga bata sa paghunahuna og usa ka butang nga ilang mabuhat aron sa pagsulti sa ubang mga tawo—ilabi na sa ilang mga sakop sa pamilya—kon unsa ang nabuhat ni Jesukristo alang kanato. Sa sunod ninyo nga panagkita, hangyoa sila sa pagpakigbahin kanimo kon unsa ang ilang gibuhat.

Pagpalambo sa Atong Pagtudlo

Ang mga bata makabenepisyo gikan sa pagbalik-balik. Ayaw kahadlok nga ibalik-balik ang mga kalihokan sa makadaghang higayon, ilabi na sa mas gagmay nga mga bata. Ang pagbalik-balik makatabang sa mga bata nga mahinumdom kon unsa ang ilang nakat-unan.

pahina sa kalihokan: Nakakita si Joseph Smith ni Jesukristo