Suba sa Susquehanna

Pebrero 8–14

Doktrina ug mga Pakigsaad 12–13; Joseph Smith—Kasaysayan 1:66–75

“Diha Kaninyo Akong Kauban nga mga Sulugoon”

Ang mga bata nga inyong gitudloan nagagikan sa nagkalainlaing mga sitwasyon ug adunay lainlaing mga panginahanglan. Samtang ikaw nangandam, paghunahuna kon unsaon nimo sa labing maayo pagtabang kanila sa pagkat-on sa mga kamatuorang gitudlo sa Doktrina ug mga Pakigsaad 12–13 ug Joseph Smith—Kasaysayan 1:66–75.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga bata sa pagpakigbahin og mga panahon sa dihang sila adunay usa ka tawo nga gipabunyagan o nakadawat og panalangin sa priesthood. Sa unsa nga paagi nadawat ni Joseph Smith ug Oliver Cowdery ang priesthood?

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 13

Si Juan Bautista mipahiuli sa Aaronic Priesthood.

Niadtong Mayo 15, 1829, si Juan Bautista mipakita ngadto ni Joseph Smith ug Oliver Cowdery ug mihatag kanila sa Aaronic Priesthood. Sa unsa nga paagi nga ang pagkat-on mahitungod niini nga hitabo nagpanalangin sa mga bata nga imong gitudloan?

Posible nga mga Kalihokan

• Sultihi ang mga bata mahitungod kon giunsa pagpahiuli ang Aaronic Priesthood (tan-awa sa Joseph Smith—Kasaysayan1:68–70; tan-awa usab sa “Kapitulo 6: Joseph ug Oliver Gihatagan sa Gahum sa Pagkapari,” Mga Istorya sa Doktrina ug mga Pakigsaad, 26–27). O dapita ang usa ka lalaki sa ward sa pag-anha sa klase ug sa pag-istorya ingon og siya si Juan Bautista, nagbasa ngadto sa mga bata unsa ang gisulti ni Juan ngadto ni Joseph Smith ug Oliver Cowdery.

• Pagpakita og hulagway ni Juan Bautista nga nagbunyag sa Manluluwas ug nagpahiuli sa Aaronic Priesthood (Libro sa mga Hulagway sa Ebanghelyo, 35, 93; tan-awa usab ang hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya). Dapita ang mga bata sa pagpakigbahin kon unsa ang ilang nahibaloan mahitungod sa unsa ang mga hitabo diha sa mga hulagway (tan-awa sa Mateo 3:13–17; Doktrina ug mga Pakigsaad 13; Joseph Smith—Kasaysayan 1:68–70).

• Tabangi ang mga bata sa pagkat-on og usa ka awit mahitungod sa priesthood, sama sa “Ang Priesthood Gipahiuli” (Songbook sa mga Bata, 60). Dapita ang mga bata sa pagmartsa libut sa kwarto samtang nagkanta sila, magpuli-puli sa pagkupot sa hulagway gikan sa outline karon nga semana sa Dali, Sunod Kanako—Alang sa mga Indibidwal ug mga Pamilya.

Doktrina ug mga Pakigsaad 13

Ang priesthood gahum sa Dios.

Ang mga leksyon mahitungod sa pagpahiuli sa Aaronic Priesthood mahinungdanon nga mga panahon sa pagtabang sa mga bata nga mas makasabut og maayo kon unsa ang priesthood ug sa unsa nga paagi kini makapanalangin kanila.

Posible nga mga Kalihokan

• Pagdala og pipila ka mga butang ngadto sa klase, lakip ang usa ka yawe. Ipakita ang mga butang, ug hangyoa ang mga bata sa pagpaminaw samtang ikaw magbasa sa Doktrina ug mga Pakigsaad 13 ug sa pagpangita sa butang nga ginganlan sa kasulatan. Unsa ang atong mabuhat sa usa ka yawe? Pagpakita og mga hulagway sa mga butang nga kita makabuhat tungod kay ang Aaronic Priesthood gipahiuli (tan-awa ang pahina sa kalihokan niini nga semana; tan-awa usab sa Libro sa mga Hulagway sa Ebanghelyo, 103–4, 107–8). Sultihi ang mga bata kon giunsa sa priesthood pagpanalangin ang imong kinabuhi.

• Aron sa pagtabang sa mga bata nga makakat-on sa hugpong sa mga pulong Ang priesthood mao ang gahum sa Dios, hangyoa sila sa pagpakpak samtang ilang isulti ang matag silaba [syllable]. Pagpakita og butang nga nagkinahanglan og bateriya aron moandar, ug itudlo nga, sama sa bateriya nga nagdala og kusog ngadto sa butang, ang priesthood nagdala og gahum sa Dios nganhi sa atong mga kinabuhi. Pakigbahin sa imong pagpamatuod sa mga panalangin nga miabut nganha kanimo tungod sa priesthood.

Joseph Smith—Kasaysayan 1:66–75

Makapabunyag ako.

Gibasa ni Joseph Smith ug Oliver Cowdery ang mahitungod sa pagbunyag diha sa Basahon ni Mormon ug gusto nga makahibalo pa og daghan. Makatabang ka sa mga bata nga imong gitudloan sa pagpaabut sa ilang bunyag ug sa pagkat-on pa mahitungod niining sagrado nga ordinansa.

Posible nga mga Kalihokan

• Ipasalida ang video “Restoration of the Aaronic Priesthood” (ChurchofJesusChrist.org). Pahunonga usahay ang video aron sa pagpangutana sa mga bata sama sa “Nganong miadto sa kakahoyan si Joseph Smith ug si Oliver Cowdery?” ug “Unsa sa inyong hunahuna ang gibati ni Joseph Smith ug Oliver Cowdery human sila gibunyagan?” Hangyoa sila sa pagpakigbahin kon unsa ang ilang mahunahuna nga ilang pagabation kon sila mabunyagan.

• Sultihi ang mga bata mahitungod ni Joseph Smith ug Oliver Cowdery nga gibunyagan (tan-awa sa Joseph Smith—Kasaysayan 1:68–74; tan-awa usab sa “Kapitulo 6: Joseph ug Oliver Gihatagan sa Gahum sa Pagkapari,” Mga Istorya sa Doktrina ug mga Pakigsaad, 26–28). Hatagi og gibug-aton ang hingpit nga kalipay nga gibati ni Joseph ug Oliver, ug sultihi ang mga bata mahitungod sa imong bunyag. Dapita sila sa pagdrowing og usa ka hulagway sa ilang mga kaugalingon nga bunyagan usa ka adlaw niana.

  batang lalaki nga gibunyagan

  Ako makapabunyag tungod kay ang priesthood gipahiuli.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 13; Joseph Smith—Kasaysayan 1:66–72

Si Juan Bautista mipahiuli sa Aaronic Priesthood.

Ang istorya sa pagpahiuli sa Aaronic Priesthood makatabang sa mga bata nga imong gitudloan sa pagsabut og importante nga mga kamatuoran mahitungod sa priesthood ug mga pag-orden sa priesthood.

Posible nga mga Kalihokan

• Pagbasa og dungan sa Joseph Smith—Kasaysayan 1:66–72, ug dapita ang mga bata sa pagdrowing og mga hulagway kabahin sa unsay gihulagway niini nga mga bersikulo. Dayon pa-istoryaha ang mga bata gamit ang ilang mga hulagway. Dapita ang usa ka tawo sa pagpakigbahin og kasinatian sa dihang siya nakakita og usa ka tawo nga i-orden ngadto sa buhatan sa priesthood. Sa unsa nga paagi kana susama ngadto sa paagi si Joseph ug si Oliver gi-orden ingon nga gihulagway diha sa Joseph Smith—Kasaysayan 1:66–72?

• Hatagi ang mga bata og pipila ka minuto aron sa paghimo og lista sa tanan nga ilang nahibaloan mahitungod ni Juan Bautista, ug dayon tuguti sila sa pagpakigbahin sa unsay ilang gisulat. Dapita ang mga bata nga magpares sa pagbasa sa usa sa mosunod nga mga tudling ug idugang kini ngadto sa ilang lista: Mateo 3:13–17; Doktrina ug mga Pakigsaad 13; Joseph Smith—Kasaysayan 1:66–72.

Doktrina ug mga Pakigsaad 13

Ako nakadawat og mga panalangin pinaagi sa Aaronic Priesthood.

Kita makadawat og daghang mga panalangin pinaagi sa Aaronic Priesthood. Unsa ang imong mabuhat aron sa pagtabang sa mga bata nga imong gitudloan sa pagsabut nga kini nga mga panalangin nahimo nga posible tungod kay ang pagkapari gipahiuli?

Posible nga mga Kalihokan

• Pagbutang og mga hulagway sa bunyag ug sa sakramento sa usa ka sudlanan nga nagkinahanglan og yawe aron maabli. Paghisgot kon ngano nga ang mga yawe importante, ug ipagamit sa mga bata ang yawe sa pag-abli sa sudlanan. Dapita ang mga bata sa pagbasa sa Doktrina ug mga Pakigsaad 13 ug pangita og mga pulong ug mga hugpong sa mga pulong nga nagtudlo kanila unsa nga mga panalangin ang moabut gikan sa Aaronic Priesthood.

• Ipasalida ang video “Blessings of the Priesthood” (ChurchofJesusChrist.org), ug pangutan-a ang mga bata sa pag-ila og mga paagi ang mga tawo diha sa video napanalanginan tungod sa priesthood.

Joseph Smith—Kasaysayan 1:73–74

Ang Espiritu Santo makatabang kanako sa pagsabut sa mga kasulatan.

Human mabunyagi si Joseph Smith ug Oliver Cowdery, ang Espiritu Santo mitabang kanila sa pagsabut og mas maayo sa mga kasulatan. Kini mahimong makaawhag sa mga bata, kinsa tingali nalisdan sa pagsabut sa mga kasulatan.

Posible nga mga Kalihokan

• Pagdala og yano nga puzzle ngadto sa klase, ug dapita ang mga bata sa pagsumpay nga mapahimutang. Samtang sila nagbuhat, pangutan-a sila kon sa unsa nga paagi ang pagbasa sa mga kasulatan susama sa pagsumpay nga mapahimutang og tingub ang puzzle. Pagbasa og dungan sa Joseph Smith—Kasaysayan 1:73–74, ug dapita ang mga bata sa pagpakigbahin kon unsa ang mitabang ni Joseph ug Oliver sa pagsabut sa mga kasulatan. Unsay atong mabuhat aron sa pagtinguha sa tabang sa Espiritu Santo samtang kita nagtuon sa mga kasulatan?

• Dapita ang mga bata sa paghimo og bookmark nga ilang mabutang sa ilang mga kasulatan aron sa pagpahinumdom kanila sa pagtinguha sa panabang sa Espiritu Santo kon sila magbasa. Tingali sila makakita og makadasig nga hugpong sa mga pulong diha sa Joseph Smith—Kasaysayan 1:74 nga ilang masulat diha sa ilang bookmark.

pagkat-on nga icon

Awhaga ang Pagkat-on diha sa Panimalay

Kon ikaw walay panahon alang sa mga bata sa pagkompleto sa pahina sa kalihokan diha sa klase, hunahunaa ang pagpadala og mga kopya ngadto sa panimalay aron ang mga bata makabuhat niini uban sa ilang mga pamilya.

Pagpalambo sa Atong Pagtudlo

Pagpaayon-ayon ug pamati sa Espiritu. Ayaw hunahunaa nga kinahanglan nga gamiton nimo ang mga ideya niini nga outline. Nakaila ka sa mga bata nga imong gitudloan; hangyoa ang Langitnong Amahan sa paggiya kanimo ngadto sa labing maayo nga mga paagi aron sa pagtabang kanila sa pagkat-on sa doktrina sa ebanghelyo ug sa pagtukod sa ilang hugot nga pagtuo.

pahina sa kalihokan: ang priesthood mao ang gahum sa Dios