“Septiembre 7–13. 3 Nephi 1–7: ‘Yangadmo ti Ulom ket Agragsakka,’” Umaykayo, Sumurot Kaniak—Para iti Primary: Libro ni Mormon 2020 (2020)
“Septiembre 7–13. 3 Nephi 1–7,” Umaykayo, Sumurot Kaniak—Para iti Primary: 2020
Maysa nga Aldaw, Maysa a Rabii, Maysa nga Aldaw, ni Jorge Cocco
Septiembre 7–13
3 Nephi 1–7
“Yangadmo ti Ulom ket Agragsakka”
No kasapulam dagiti nayon a kapanunotan bayat ti panagsaganam a mangisuro, kitaen iti “Dagiti Nainayon a Resources para iti Panangisuro kadagiti Ubbing” ken “Panangipaay iti Kasapulan dagiti In-inaudi nga Ubbing” iti rugi ti daytoy a resource.
Isuratmo Dagiti Impresionmo
Yawis ti Panagbibinninglay
Awisem dagiti ubbing a mangibinglay iti no ania ti malagipda a nasursuro itay napalabas a lawas maipapan kadagiti tanda nga imbaga ni Samuel a Lamanite a makatulong a maammuan dagiti tao a nayanak ni Jesus. Ibagam kadagiti ubbing nga ita nga aldaw agsaritada maipapan kadagiti tao a nakakita a mapasamak dagita a tanda.
Isuro ti Doktrina: In-inaudi nga Ubbing
Nagparang ti baro a bituen idi nayanak ni Jesucristo.
Nalatak ti pakasaritaan iti pannakayanak ti Mangisalakan ti Baro a Tulag, uray kadagiti ubbing. Dakkel a gundaway itoy a lawas ti mangisuro kadagiti ubbing iti klasem maipapan kadagiti milagro a nasaksian dagiti Nephite idi nayanak ni Jesus.
Dagiti Mabalin nga Aktibidad
-
Sakbay iti klasem, mangikabil ti maysa a bituen iti rabaw ti pader. Awisem dagiti ubbing a mangsapul ti maysa a banag iti rabaw ti pader a gagangay nga awan idiay. Ibagam kadagiti ubbing a nakita dagiti Nephite ti maysa a baro a bituen iti tangatang idi nayanak ni Jesus. Gupgopem ti pakaammuan iti 3 Nephi 1:4–15, ken 19–21. Mabalinmo met nga usaren ti “Kapitulo 41: Dagiti Tanda iti Panakayanak ni Cristo” (Dagiti Estoria iti Libro ni Mormon, 114–16, wenno ti maitutop a video iti ChurchofJesusChrist.org).
-
Ipakita kadagiti ubbing ti maysa a ladawan iti pannakayanak ti Mangisalakan (kitaen iti Libro ti Arte ti Ebanghelio, blng. 30), ken kantaen ti paggugusto a kanta ti Paskua, kas iti “The Nativity Song” (Children’s Songbook, 52–53). Tulongam dagiti ubbing a makaawat nga adayo dagiti Nephite manipud iti lugar a nakayanakan ni Jesus, ngem ammoda a nayanak Isuna gapu kadagiti tanda a nakitada. Paneknekam a nupay ditayo nakita ti pannakayanak ti Mangisalakan, matulongannatayo ti Espiritu Santo a mangammo a pudno dagiti estoria maipapan iti daytoy kadagiti nasantuan a kasuratan.
Kanayon a maipatpatungpal dagiti balikas dagiti propeta.
Imbaga ti Apo ken ni Nephi ti, “Iparangarangko[nto] iti lubong a tungpalek amin dagiti saok babaen iti ngiwat dagiti nasantuan a propetak” (3 Nephi 1:13).
Dagiti Mabalin nga Aktibidad
-
Ipakitam dagiti ladawan a mangiladawan no kasano a nakisao ti Dios kadagiti propeta, kas ken ni Noe (Libro ti Arte ti Ebanghelio, blg. 7–8; kitaen iti Genesis 6–7) ken Samuel a Lamanite (Libro ti Arte ti Ebanghelio, blg. 81; kitaen iti Helaman 14:1–7). Awisem dagiti ubbing a mangibinglay no ania ti ammoda maipapan kadagitoy nga estoria.
-
Ibasam kadagiti ubbing ti 3 Nephi 1:20, ken ibinglaymo ti pammaneknekmo a kanayon a maipatpatungpal dagiti balikas dagiti propeta. Awisem dagiti ubbing a dumngeg iti propeta iti sumaruno a sapasap a komperensia.
Masurotko ni Jesucristo.
Impakdaar ni Mormon, “Maysaak a disipulo ni Jesucristo.” Kasano a matulongam dagiti ubbing a mangibilang iti bagbagida a kas disipulo?
Dagiti Mabalin nga Aktibidad
-
Basaen ti 3 Nephi 5:13, ket awisen dagiti ubbing a mangulit iti ragup dagiti balikas a “Maysaak a disipulo ni Jesucristo.” Isurom kadakuada a maysa a disipulo ni Jesucristo ti agpadpadas a sumurot Kenkuana. Ibinglay ti sumagmamano a banag nga inaramid ni Mormon tapno agbalin a kas ken ni Jesus, kas iti panangisuro iti balikas ti Dios ken panagtungpal kadagiti bilin ti Dios (kitaen iti 3 Nephi 5:13–18). Tulongam dagiti ubbing a mangpanunot kadagiti wagas a pakapagbalinanda a disipulo.
-
Iti maysa a papel, tulongam dagiti ubbing a mangpatugot iti imada ken manggetteng iti daytoy. Isurat ti “Maysaak a disipulok ni Jesuscristo” iti maysa a bangir, ken awisem ida a mangidrowing iti maysa a banag a mabalinda nga aramiden tapno agbalinda a disipulo iti sabali pay a bangir (mabalin a nasken a tulongam ida nga agpanunot kadagiti ideya). Aggigiddan nga agkansion iti maysa a kanta maipapan iti panangsurot iti Mangisalakan, kas iti “I’m Trying to Be like Jesus” (Children’s Songbook, 78–78).
Isuro ti Doktrina: In-inauna nga Ubbing
Dagiti kari ti Dios, a naited babaen kadagiti propetana, ket maipatpatungpal a kanayon.
Ti pakaammuan iti 3 Nephi 1:4–21 ket makatulong a mangbangon iti pammati dagiti ubbing a kanayon a tungpalen ti Dios dagiti karina.
Dagiti Mabalin nga Aktibidad
-
Awisem dagiti ubbing a mangidilig iti padto ni Samuel a Lamanite iti Helaman 14:1–7 iti pannakaipatungpal daytoy iti 3 Nephi 1:19–21. Paneknekam a kanayon a maipatungpal dagiti kari ti Dios a naisao babaen kadagiti propetana.
-
Basaem kadagiti ubbing ti pakaammuan a masarakan iti 3 Nephi 1:4–10. Saludsodem kadagiti ubbing no ania ti nariknada no maysada kadagiti mamati idi nga agbibiag iti dayta a panawen. Awisem dagiti ubbing a mangbasa iti nabati pay a pakaammuan kadagiti bersikulo 11–15 ken mangisingasing kadagiti wagas a mangileppas iti daytoy a binatog: “Ti maadaltayo iti daytoy nga estoria ket …” Kasano a maipakitatayo ti panagtalektayo iti Dios no mariribukan wenno maup-upaytayo?
-
Ibinglaymo ti maysa banag a inkari kadatayo ti sibibiag a propetatayo. Ania ti maaramidtayo a mangipakita iti pammatitayo a naggapu iti Dios dagiti balikas ti propeta?
3 Nephi 2:11–12; 3:13–14, 24–26
Napigpigsatayo no agguummongtayo a sangkamaysa
Nasken nga agguummong dagiti Nephite para iti panagtalged ti bagida. Kasano a matulongam dagiti ubbing a mangkita a ti pannakiummong kadagiti nalinteg a gagayyem ket makaipaay pay kadakuada iti naespirituan a pigsa.
Dagiti Mabalin nga Aktibidad
-
Basaem kadagiti ubbing dagiti sumaganad a bersikulo, ken awisem ida a mangsapul kadagiti gapu no apay a agguummong dagiti Nephite ken dagiti bendision a simmangbay kadakuada iti: 3 Nephi 2:11–12 ken 3:13–14, 24–26. Apay a napateg nga “agguumongtayo” ita kadagiti pamiliatayo ken iti simbaantayo? Kasano a naespirituan a mapapipigsanatayo ti panagguummong?
-
Agusarka iti maysa nga adalen a banag [object lesson] a mangisuro a napigpigsatayo no agkaykaysatayo ngem no agsisinatayo. Kas pagarigan, awisem dagiti ubbing a mangpadas a mangtukkol iti maysa a stick ket kalpasanna mangtukkol itisangareppet a stick wenno mangpigis iti maysa a papel ket kalpasanna mangpigis iti nagtutuon a pappapel. Kasano a maipadatayo kadagiti stick wennopapel? Kasano a mapapigsatayo ti tunggal maysa no agguummongtayo a sangkamaysa kadagiti pamiliatayo wenno iti simbaan?
-
Ilawlawag nga um-ummongen ni Jesus dagiti taona iti Simbaan ita babaen iti aramid ti misionario (kitaen iti 3 Nephi 5:24–26). Awisem ti maysa a full-time a misionario wenno misionario iti ward tapno mangibinglay kadagiti padasda a mangipakita no kasano a napapigsa dagiti tao babaen iti panaguummong iti Simbaan.
3 Nephi 4:30–33; 5:12–26; 6:14; 7:15–26
Maysaak a disipulo ni Jesucristo.
Kasano a matulongam dagiti ubbing a mangkita iti bagbagida kas disipuloda ni Jesucristo, kas iti inaramid ni Mormon? (kitaen iti 3 Nephi 5:13).
Dagiti Mabalin nga Aktibidad
-
Ipakitam ti maysa a ladawan ni Mormon (kas iti Libro ti Arte ti Ebanghelio, blg. 73). Awisem ti tunggal ubing nga agsisinublat ken ulitenda no ania ti imbaga ni Mormon iti 3 Nephi 5:13: “Maysaak a disipulo ni Jesucristo.” Ania ti kaipapanan ti panagbalin a disipulo ni Jesucristo? (kitaen iti DK 41:5).
-
Bingayem ti klase iti babassit a grupo, ket dutokam ti tunggal grupo a mangbasa ti maipapan iti maysa kadagiti sumaganad a pagwadan dagiti disipulo: dagiti napasurot a Lamanite (kitaen iti 3 Nephi 4:30–33; 6:14), Mormon (kitaen iti 3 Nephi 5:12–26), ken Nephi (kitaen iti 3 Nephi 7:15–26). Kasano a nagbalin a napudno a disipulo ni Jesucristo dagitoy a tao? Ania ti maaramidtayo a mangsurot kadagiti pagwadanda?
Yallukoy ti Panagsursuro iti Pagtaengan
Awisem dagiti ubbing a mangpanunot iti maysa a banag a mabalinda nga aramiden iti daytoy a lawas tapno agbalinda a disipulo ni Jesucristo. Allukoyem ida a mangisurat iti daytoy ken mangibinglay iti daytoy kadagiti pamiliada.
Panangpadur-as iti Panangisurotayo
I-display ti maysa a nasantuan a kasuratan. Pumili iti maysa a bersikulo a napateg kenka (wenno awisem dagiti ubbing a mangpili iti maysa), ken i-display daytoy iti siled ti klase a masansan a pakakitaanto dagiti ubbing iti daytoy. Mabalinmo nga i-display daytoy iti sumagmamano a lawas ken agibasar iti daytoy a masansan.