“Septiembre 14–20. 3 Nephi 8–11: ‘Bumangon ket Umaykayo Kaniak,’” Umaykayo, Sumurot Kaniak—Para iti Primary: Libro ni Mormon 2020 (2020)
“Septiembre 14–20. 3 Nephi 8–11,” Umaykayo, Sumurot Kaniak—Para iti Primary: 2020
Siak ti Silaw ti Lubong, ni James Fullmer
Septiembre 14–20
3 Nephi 8–11
“Bumangon ket Umaykayo Kaniak”
Basaem ti 3 Nephi 8–11 a pampanunotem dagiti ubbing a sursuruam. Mabalin pay a makatulong dagiti kapanunotan iti daytoy a balabala iti panagsaganam.
Isuratmo Dagiti Impresionmo
Yawis ti Panagbibinninglay
Ipakitam ti maysa a ladawan ti panagparang ni Jesucristo iti America, kas ti maysa iti balabala itay a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangilawlawag kadagiti detalye iti ladawan ken mangiibinglay iti maysa a banag nga ammoda maipapan iti estoria a mailadladawan.
Isuro ti Doktrina: In-inaudi nga Ubbing
Awisennak ni Jesucristo nga umay Kenkuana.
Mabalin a saanmo a kabaelan ngaibinglay kadagiti ubbing dagiti amin a detalye maipapan iti panagparang ti Mangisalakan kadagiti tao ni Nephi, ngem matulongam ida a mangrikna iti ayat nga impakitana kadagiti tao iti 3 Nephi 8–11.
Dagiti Mabalin nga Aktibidad
-
Isaritam kadagiti ubbing maipapan kadagiti bagyo ken sipnget a nailadawan iti 3 Nephi 8, nga agannad a saanmo a butbutngen wenno pagdanagen ida. Mabalinmo nga usaren ti “Kapitulo 42: Dagiti Tanda ti Pannakailansa ni Cristo” (Dagiti Estoria iti Libro ni Mormon, 117–19, wenno ti maitutop a video iti ChurchofJesusChrist.org). Saludsodem kadagiti ubbing no ania ti mariknada no naipasangodan kadagiti bagyo ken sipnget. Ilawlawagmo a dagiti bagyo ken sipnget ket dagiti tanda a natay ni Jesus, ken ipakitam ti maysa a ladawan ti Pannakailansa iti Krus (kitaen iti Libro ti Arte ti Ebanghelio, num. 57). Kalpasanna basaen ti 3 Nephi 9:13. Ania ti kinuna ni Jesus nga aramidenna kadagiti tao a nagbabawi? Tulongam dagiti ubbing a makaawa a ti kaipapanan ti balikas nga “agasan” iti daytoy a bersikulo ket ti panangpakawan kadakuada ni Jesus.
-
I-display ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, bayat iti panangiladawanmo iti bukodmo a balikas ti panagparang ti nagungar a Mangisalakan kadagiti Nephite ken Lamanite. Basaen dagiti ababa a binatog manipud iti 3 Nephi 11 a mangtulongto kadakuada a makarikna iti kinasagrado daytoy a pasamak. Awisem dagiti ubbing nga agkidem ken agpammarangda no kasano ti riknada no makitada ni Jesus. Wenno ipabuya ti umuna a minuto ti video “My Joy Is Full” (ChurchofJesusChrist.org). Isaritam kadagiti ubbing no kasano ti riknam no basaem ken utobem dagitoy a pasamak. Paneknekam a kayat ni Jesus nga umaytayo amin Kenkuana ken riknaen ti ayatna. Leppasem ti panid ti aktibidad a kadua dagiti ubbing.
Salakniban ni Jesus dagiti taona a kas iti panangsalaknib ti maysa nga upa kadagiti piekna.
Mabalin a mangisuro kadagiti ubbing ti ladawan ti maysa nga upa a mangum-ummong kadagiti piekna ti maipapan iti liwliwa ken salaknib nga idaton ti Mangisalakan no umaytayo sumurot Kenkuana.
Dagiti Mabalin nga Aktibidad
-
Ipakitam ti maysa a ladawan ti maysa nga upa a mangtartaraken kadagiti piekna. Basaen ti 3 Nephi 10:6, ken isaritam kadagiti ubbing maipapan iti upa nga aw-awaganna dagiti piekna ken salsalaknibanna ida iti sirok dagiti payakna no adda peggad. Ilawlawag no kasano a maipada iti upa ni Jesus ket maipadatayo kadagiti piek. Kasano a makaumaytayo Kenkuana a mangsarak iti kinatalged?
-
Mangikabil ti maysa pay a ladawan ni Jesucristo iti pader. Awisem dagiti ubbing a magna iti lawlaw ti siled ti klase bayat ti panagbasam ti 3 Nephi 10:4 iti napigsa. Ibagam kadakuada nga agpasangoda a mapan iti ladawan ni Jesus no mangngegda dagiti balikas a “inummong” wenno “aguummong.” Ulitem daytoy nga aktibidad bayat ti panangbasam kadagiti bersikulo 5 ken 6. Ibinglaymo kadagiti ubbing no kasano nga immasidegka iti Mangisalakan para iti kinatalged, ket paneknekam a salaknibannatayonto manipud kadagiti naespirituan a peggad bayat ti panagtungpaltayo kadagiti bilinna.
Kayat ni Jesuscristo a mabuniaganak.
Agsagsagana dagiti ubbing a sursuruam a mabuniagan. Makatulong dagiti pannursuro ni Cristo kadagitoy a binatog a maammuanda no apay a napateg ti panagbuniag.
Dagiti Mabalin nga Aktibidad
-
Basaem ti 3 Nephi 11:21–26, ket awisem dagiti ubbing a tumakderda tunggal mangngegda ti balikas a “buniag.” Ilawlawag nga insuro ni Jesus kadatayo ti umno a wagas ti panagbuniag. Ipakitam ti ladawan ti maysa nga ubing a mabumbuniagan (kitaen iti Libro ti Arte ti Ebanghelio, num.104). No nakakita idin dagiti ubbing iti panagbuniag, awisem ida a mangiladawan iti no ania ti nakitada. Asino ti nangannong iti panagbuniag, ken kasano nga inaramidna daytoy?
-
Kasakbayanna, awisem ti ama ti maysa kadagiti ubbing nga umay iti klasem ken ibinglayna kadagiti ubbing no apay a napateg a mabuniagantayo babaen iti pannakaipabatok ti maysa a tao nga addaan iti priesthood. Mabalin met nga ilawlawagna kadagiti ubbing no anianto ti mapasamak no mabuniaganda ken dagiti bendision a maawatdanto. Allukoyem isuna a mangusar iti 3 Nephi 11:23–26 iti panangilawlawagna.
Isuro ti Doktrina: In-inauna nga Ubbing
No addaak iti kasipngetan, mabalin a silawko ni Jesucristo.
Ti maysa a nabileg a mensahe dagitoy a kapitulo isu a ni Jesucristo ti silaw iti lubong, ken Isuna ti mabalin a silawtayo kadagiti biagtayo.
Dagiti Mabalin nga Aktibidad
-
Aggigiddan a basen ti 3 Nephi 8:5–7, 11–23, ken ti 10:9–13 (no mabalin, pasipngetem ti siled bayat iti panangbasam). Agsardengka sagpaminsan iti panagbasam ken saludsodem kadagiti ubbing no kasano koma ti riknada no mapadasanda dagitoy a pasamak. Basaem kadagiti ubbing dagiti sumagmamano a balikas ni Jesucristo kadagiti tao kabayatan ti kaaddada iti kasipngetan (kitaen ti 3 Nephi 9:13–14, 18). Apay nga inawagan ni Jesucristo ti Bagina a Silaw iti Lubong? Ania ti inyawis ni Jesus kadagiti tao, ken kadatayo, nga aramiden tapno Isuna ti mabalin a silawtayo? (kitaen iti 3 Nephi 9:20–22).
-
Ipakitam kadagiti ubbing ti maysa a mapa iti lubong, ken tulongam ida a mangsapul iti Jerusalem ken kadagiti America. Ilawlawag a ti pannakadadael a nailadawan iti 3 Nephi 8 ket maysa a tanda kadagiti tao iti America a nailansa iti krus ni Jesucristo iti Jerusalem. Aggigiddan a basaen ti 3 Nephi 11:1–15, ket kiddawem kadagiti ubbing a mangibaga kenka no masarakanda ti maysa a banag kadagitoy a bersikulo a mangtulong kadakuada a makarikna iti ayat ti Dios. Ibinglay ti bersikulo 37, ken paneknekam nga ay-ayaten ti Mangisalakan ti amin nga annakna. Paneknekam ti maipapan iti kinapudno dagiti basbasaem.
Saggaysa, ni Walter Rane
Masursurok ti mangbigbig iti timek ti Dios iti biagko.
Saan a maawatan dagiti tao iti damona ti timek a nangngegda manipud iti langit. Ania ti masursuro dagiti ubbing manipud kadagitoy a pakaammuan maipapan iti pannakaawat ti paltiing?
Dagiti Mabalin nga Aktibidad
-
Basaem ti 3 Nephi 11:1–4 kadagiti ubbing, nga agsardeng tapno agsaludsodkas iti “Apay iti panagkunayo a saan a maawatan dagiti tao ti timek?” Awisem dagiti ubbing a mangbasa kadagiti bersikulo 5–7 tapno maammuan no ania ti inaramid dagiti tao a nakatulong kadakuada a makaawat iti timek iti puspusoda. Kasano a maikarigatantayo ti dumgngegiti Dios no agsao Isuna iti puspusotayo babaen iti Espiritu Santo?
-
Agpatokar iti maysa a recording ti maysa a himno wenno kanta dagiti ubbing a siaalumamay tapno narigat daytoy a mangngeg. Saludsodem kadagiti ubbing no maawatanda dagiti balikas iti kanta. Kalpasanna tulongam dagiti ubbing a mangsukisok iti 3 Nephi 11:3 dagiti panangiladawan ti timek manipud iti langit. Apay a saannatayo a kasao ti Dios iti maysa a“napigsa” wenno “narusanger” a timek? Ania ti maaramidtayo a dumngeg Kenkuana a nasaysayaat?
Yallukoy ti Panagsursuro iti Pagtaengan
Awisem dagiti ubbing a mangisarita iti maysa a tao maipapan iti panangsarungkar ni Jesus kadagiti America—no mabalin, maysa a tao a di makaammo ti maipapan iti daytoy.
Panangpadur-as iti Panangisurotayo
Risuten dagiti makasinga nga addaan iti ayat. “No dadduma agtignay ti maysa nga ubing iti wagas a pakasingaan ti panagsursuro dagiti dadduma iti klase. No mapasamak daytoy, agbalinka a naanus, managayat, ken mannakaawat maipapan kadagiti karit a mabalin a sangsanguen ti ubing. … No adda dagiti naisangsangayan a kasapulan ti ubing a mangigapu iti pannakasinga, kasaritam ti espesialista iti pagkurangan [disability especialist] iti ward wenno stakewenno bisitaem ti disabilities.ChurchofJesusChrist.org tapno maammuam no kasano a nasaysayaat a maipaaymo dagita a kasapulan” (Panangisuro iti Wagas ti Mangisalakan, 26).