“O̧kwōj 24–30. Hilamōn 7–12: ‘Keememej Irooj,’” Itok, Ļoor Eō—N̄an Būraimere: Bok in Mormon 2020 (2020)
“O̧kwōj 24–30. Hilamōn 7–12,” Itok, Ļoor Eō—N̄an Būraimere: 2020
Pija in Nipai ilo juon tawōr in kallib jān Jerry Thompson
O̧kwōj 24–30
Hilamōn 7–12
“Keememej Irooj”
Ilo am̧ riit Hilamōn 7–12, kōļmenļo̧kjeņ kōn ekōjkan an bwebwenato ko im pedped ko ilo jebta in emaron̄ kōjeraam̧m̧an ajri ro kwoj katakin. Ļōmņak ko ilo laajrak in emaron̄ jipan̄ im̧we eo kwoj bōke.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro ta eo raar jeļā kake kōn rikanaan Nipai, im ļeo nejin Hilamōn (lale Hilamōn 7–12). Eļan̄n̄e ekkar, kōmeļeļeik oktak eo kōtaan rikanaan in etan Nipai im rikanaan eo etan Nipai ilo jinoin Bok in Mormon
Katakin Katak ko: Ajri ro Reddikļo̧k
Irooj ekōņaan bwe in keememej E.
Nipai eaar kōļmenļo̧kjeņ ewi wāween an armej ro an kar oktaļo̧k jān Anij im meļo̧kļo̧k E. Ewi wāween am̧ jipan̄ ajri ro jeļā wāween ko remaron̄ keememej Jemedwōj Ilan̄ im Jisōs?
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro juon en̄jake ke kwaar meļo̧kļo̧k jet men raorōk. Kajjitōk ippāer eļan̄n̄e raar meļo̧kļo̧k jet men. Riit n̄an er Hilamōn 7: 20, im kōmeļeļeik bwe Nipai eaar kālet n̄an jab meļo̧kļo̧k Anij. Rikanaan Nipai eaar kōņaan bwe ren keememej Anij. Bōktok pija in juon pāāk me ej pinej jenkwan wāween ko ajri ro remaron̄ keememej Jemedwōj Ilan̄ im Jisōs. Kōm̧m̧an bwe ajri ro ren bōk kūņaer kālete juon pija im kwaļo̧k wāween ad maron̄ keememej Anij raan otemjeļo̧k
-
Jipan̄ ajri ro kadedeļo̧k peij in m̧akūtkūt eo an wiik in.
Rikanaan ro rej kam̧ool kōn Jisōs Kraist.
Nipai eaar kam̧ool bwe Jisōs Kraist enaaj itok, im eaar kūr armej ro an bwe ren ukweļo̧k im ļoor E. Kōjerbal jebta kein n̄an katakin ajri ro bwe rikanaan ro rej kam̧ool kōn Jisōs Kraist.
M̧akūtkūt ko Maron̄ Kōm̧m̧ani
-
Kwaļo̧k juon pijan in Jisōs Kraist, im ba n̄an ajri ro bwe rikanaan ro āinwōt Nipai ej kūr kōj n̄an ļoor Jisōs Riiti naan kōn rikanaan ro jān Hilamōn 8:22: “Raar kam̧ool kōn itok eo an Kraist, im kar reim̧aanļo̧k, im kar lan̄lōn̄ ilo raan ko an.” Kwaļo̧k ippān ajri ro jet me rikanaan eo ad emour eaar ba kōn Rilo̧mo̧o̧r.
-
Al ippān doon kōn juon al kōn kein ko, eo āinwōt “Follow the Prophet” (Children’s Songbook, 110). Kālet juon unin kōnono jān al in, im je juon iaan naan eo jān eoon kōn jenkwan nee ilo ekajjojo peba ko. Likūt jenkwan nee ko ioon laļ eo ej tōlļo̧k n̄an pijain Rilo̧mo̧o̧r eo. Kajjitōk ippān ajri ro n̄an ļoor iaļen jenkwan nee ko, im jipan̄ er riiti naan ko.
Inaaj pokake Jemedwōj Ilan̄.
Waanjon̄ok in pokake eo an Nipai emaron̄ im̧we ajri ro kwoj katakin n̄an pokake Irooj.
M̧akūtkūt ko Maron̄ Kōm̧m̧ani
-
Riiti Hilamōn 10:2, 11–12, im jipan̄ ajri ro meļeļe bwe Nipai eaar pokake Anij. Kajjitōk ippān ajri ro n̄an mour kake bwebwenato in jeje ko rekwojarjar im al ko. N̄an waanjon̄ok, kajjitōk ippāer n̄an etetal iturājet in ruum̧ eo (āinwōt n̄e rej ro̧o̧l), bōjrak, oktak, im bar etetal iturājet in ruum̧ eo (āinwōt n̄e rej ro̧o̧l in katakin armej ro). Jipan̄ er lo an Nipai kar pokake Irooj men̄e ekar kōm̧m̧ane men eo epen.
-
Jipan̄ ajri ro meļeļe bwe jet iien Jemedwōj Ilan̄ ekōņaan bwe jen kōm̧m̧an jet men roktak jān ta eo jej kōņaan kōm̧m̧ane, ak jemaron̄ pokake E āinwōt kar Nipai. Kwaļo̧k naan in āinwōt “Jet iien ij tin illu, ak Jemedwōj Ilan̄ ekōņaan bwe in … ,” im kōm̧m̧an bwe ajri ro ren kadedeļo̧k naan eo. Rōjan̄ ajri ro n̄an keememej n̄an bōjrak im ļōmņak kōn ta eo Jemedwōj Ilan̄ ekōņaan bwe ren kōm̧m̧ane innām kōm̧m̧ane.
Katakin Katak ko: Ajri ro Rerūttoļo̧k
Inaaj pād ilo jetōbin kōjparok n̄e ij ļoor rikanaan eo.
Būreejtōn James E. Faust eaar kwaļo̧k: “Kōjparok eo ad epād im̧aan ilo ta eo [rikanaan eo an Kabun̄in] ej ba n̄an ļoor kapilōk eo an.” (“Continuous Revelation,” Ensign, No̧b. 1989, 10).
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an kōm̧m̧ane juon laajrak ioon bo̧o̧t eo kōn men ko juon rikanaan ej kōm̧m̧ane (lale “Rikanaan,” Guide to the Scriptures, scriptures.ChurchofJesusChrist.org). Jipan̄ er pukote Hilamōn 7:1–2, 27–29; 8:22–23; im 10:3–4, 6–7 n̄an lo ewi wāween an kar Nipai kōm̧m̧ani men ko jet ilo laajrak eo aer. N̄āāt eo jaar lo an rikanaan eo raan kein kōm̧m̧ane men kein? Kwaļo̧k naan in kam̧ool eo am̧ kōn rikanaan eo emour. N̄an kwaļo̧k aorōk eo an rikanaan ro, kwaļo̧k m̧okta pija eo kōn “Watchman on the Tower” (ChurchofJesusChrist.org).
-
Riit ippān doon Hilamōn 11:3–7 (ak etale “Jebta 39: Nephi Receives Great Power,” Book of Mormon Stories, 108–10, ak pija in alooj eo ilo ChurchofJesusChrist.org). Kajjitōk ippān ajri ro n̄an ron̄jake ta eo eaar waļo̧k n̄an armej ro raar jab ron̄jake rikanaan eo. Ta eo emaron̄ waļo̧k n̄e jejjab ron̄jake rikanaan eo? Elmen ad kar jeraam̧m̧an n̄e jej pokake E? Kwaļo̧k jet men me rikanaan eo ad eaar kwaļo̧ke, im rōjan̄ ajri ro n̄an ļoor katak ko an.
Irooj ekōņaan bwe in keememej E.
Ajri ro kwoj katakin renaaj ioon ļōkapokpok ko re rekōm̧m̧an bwe ren meļo̧kļo̧k Jemedwōj Ilan̄ im Jisōs Kraist. Ewi wāween am̧ maron̄ im̧we ajri ro n̄an leļo̧k iien n̄an men ko an jetōb?
M̧akūtkūt ko Maron̄ Kōm̧m̧ani
-
Riit ippān doon Hilamōn 7:20–21, im kajjitōk ippān ajri ro ta meļeļein meļo̧kļo̧k Anij. Kōmeļeļeik bwe naan eo meļo̧kļo̧k emaron̄ bar meļeļein “n̄an kōjekdoone” ak “kowaane.” Kwaļo̧k juon pijain Rilo̧mo̧o̧r, im kajjitōk ippān ajri ro n̄an jin̄aik men ko remaron̄ joļo̧k iien n̄an kōm̧m̧ani me emaron̄ kōm̧m̧an bwe ren meļo̧kļo̧k Irooj. Likūt jin̄ak ko aer im̧aan pijain Jisōs. Kajjitōk ippān ajri ro n̄an ļōmņake men ko remaron̄ kōm̧m̧ane kajjojo raan n̄an keememej Jemedwōj Ilan̄ im Jisōs. Ilo aer kwaļo̧k ļōmņak ko aer, bōk jin̄a ko aer juon ilo̧k juon m̧ae pijain Jisōs ewaļo̧k.
-
Kajjitōk ippān ajri ro n̄an kadedeļo̧k peij in m̧akūtkūt eo an wiik in.
N̄e ij kōļmenļo̧kjeņ kōn naan in Anij, imaron̄ bōk revelāsōn.
Ajri ro kwoj katakin rejeļā ke ta meļeļein kōļmenļo̧k? Jipan̄ er meļeļe bwe Nipai eaar jeraam̧m̧an kōn revelāsōn ke eaar kōļmenļo̧kjeņ kōn men ko Irooj eaar kwaļo̧k n̄an e.
M̧akūtkūt ko Maron̄ Kōm̧m̧ani
-
Jipan̄ ajri ro meļeļe ta meļeļein kōļmenļo̧kjeņ (lale “Ponder,” Guide to the Scriptures, scriptures.ChurchofJesusChrist.org). Kajjitōk ippān ajri ro n̄an ļōmņake naan ko jet me rej kōmeļeļeik ta meļeļein kōļmenļo̧kjeņ ilo aer ļōmņake. Innām kajjitōk ippāer n̄an riiti Hilamōn 10:1–3 im bōk jikin nan eo kōļmenļo̧kjeņ kōn naan ko rej ļōmņaki. Ta eo Nipai ekar kōm̧m̧an ke ekar kōļmenļo̧kjeņ kōn jeje ko rekwojarjar? (lale Hilamōn 10:3–7). Kwaļo̧k juon tōre kwaar bōk revelāsōn ālkin kōļmenļo̧kjeņ kōn jeje ko rekwojarja ak revelāsōn ko raan kein ak juon jetōbin en̄jake.
-
Leļo̧k iien bwe ajri ro ren riiti Hilamōn 10, ak riiti ippān doon, im rōjan̄ er n̄an pukot juon eoon remaron̄ kōņaan kōļmenļo̧kjeņ ilo wiik eo tok juon. Kajjitōk ippāer n̄an je eoon eo rej kālete ioon juon peba ak kaat im likūti jet jikin n̄an kein kakeememej er n̄an kōļmenļo̧kjeņ kōn eoon eo ilo wiik eo tok. Ilo kūlaaj eo tok juon, leļo̧k n̄an er iien em̧m̧an n̄an kwaļo̧k ta eo raar ekkatak ilo aer kōļmenļo̧kjeņ kōn eoon eo.
Kōketak Ekkatak ilo Mweo
Rōjan̄ ajri ro n̄an kwaļo̧k ippān baam̧le ko aer ta eo raar karōke n̄an kōm̧m̧ane n̄an keememej Jemedwōj Ilan̄ im Jisōs Kraist kajjojo raan Remaron̄ bar kajjitōk ippān baam̧le ko aer n̄an kobaļo̧k ippāer kōn kōttōbar eo aer.
Kōkōm̧anm̧anļo̧k Ad Katakin
Leļo̧k kajjitōk me ebōk anemkwoj in kālet. N̄e kwoj kajjitōk ippān ajriro n̄an mour kake ta eo kwaar katakin er, ļōmņake wāween ko n̄an kautiej anemkwoj eo aer ilo aer mour kake ta eo raar ekkatak. N̄an waanjon̄ok, ālkin juon katak kōn Rilo̧mo̧o̧r eo, kwomaron̄ kajjitōk, “Ta eo kwonaaj kōm̧m̧ane n̄an keememej Rilo̧mo̧o̧r ilo wiik in?”