“O̧kwōj 3–9. Alma 43–52: ‘Jutak Pen ilo Tōmak eo ilo Kraist,’” Itok, Ļoor Eō—N̄an Būraimere: Bok in Mormon 2020 (2020)
“O̧kwōj 3–9. Alma 43–52,” Itok, Ļoor Eō—N̄an Būraimere: 2020
Kōn Kōjeraam̧m̧an ko an Anemkwōj, jān Scott M. Snow
O̧kwōj 3–9
Alma 43–52
“Jutak Pen ilo Tōmak eo ilo Kraist”
Ilo am̧ karōk m̧akūtkūt ko, kwomaron̄ lo ļōmņak ko ijin ilo kakkobba ko n̄an katakin jim̧or ajri ro reddik im rerūtto.
Je En̄jake ko Rej Im̧we Eok
Kajjitōk bwe ren Kwaļo̧k
Kajjitōk ippān ajri ro n̄an kwaļo̧k ta eo ej keememeje kōn jet armej ro ilo bwebwenato ko ilo Alma 43–52, āinwōt Kapen Moronai ak taitōl in anemkwōj eo. N̄an jipan̄ er keememeje, kwaļo̧k pija ko jān Book of Mormon Stories, im Gospel Art Book, ak itok, Ļoor Eō—N̄an Kajjojo Armej im Baam̧le ko.
Katakin Katak ko: Ajri ro Reddikļo̧k
Alma 43:17–21; 48:7–8; 49:1–5; 50:1–6
Imaron̄ lo jetōbin kōjparok ilo gospel in.
N̄an jojomare Rinipai ro ņae Rileman ro, Moronai eaar kepooj armej ro an kōn kein tariņae im kappen ko. Kijejeto ko an rej katakin koj wāween ad maron̄ lo jetōbin kōjparok.
Makūtkūt ko Maron̄ Kōm̧m̧ani
-
Ba n̄an ajri ro jidik kōn pata eo kōtaan Rinipai ro im Rileman ro (lale Alma 43), kwaļo̧k bwe Rinipai ro rekar kōņak kein kōtōrak ko n̄an kōjparok er make. Komaron̄ kōjerbal “Jebta 31: An Kapen Moronai Anjo jān Zeraemna” (Bwebwenato ko ilo Bok in Mormon, 85–88, ak pija in alooj ko ilo ChurchofJesusChrist.org). Riit Alma 43:19, im kajjitōk ippān ajri n̄an jitōn̄ m̧ōttan ko ilo ānbwiinier ilo aer ron̄ eoon eo.
-
Kōmeļeļeik bwe āinwōt an Rinipai kar pād ilo tariņae ilo kanniōk, jej pād ilo jetōbin tariņae ņae Setan, eo ejjab kōņaan bwe jen kōjparok kien ko an Anij. Jin̄aik juon ajri ioon bo̧o̧t, im jipan̄ ajri ro ļōmņake men ko me rej kōjparok kōj ilo jetōb āinwōt an kein kōtōrak ko kōjparok ānbwiiniid ( n̄an waanjon̄ok, jar, riiti jeje ko rekwojarjar, ak kōjparok kien ko). Kajjojo iien n̄e rej ba juon iaan menkein, jin̄aik jidik kein kōttōrak ilo pija in ajri eo ilo bo̧o̧t eo.
Jojomare Jikin eo an Rinipai, jān Minerva K. Teichert
Alma 46:11–16; 48:11–13, 16–17
Imaron̄ in tiljek āinwōt Kapen Moronai.
Moronai ej juon waanjon̄ok eļap kōn tōmak, peran, im jerbal in jipan̄. Ļōmņake ewi wāween am̧ maron̄ im̧we ajri ro n̄an ļoor waanjon̄ok eo an.
Makūtkūt ko Maron̄ Kōm̧m̧ani
-
Kwaļo̧k pija eo an Moronai ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Ba n̄an ajri ro kōn taitōl in anemkwōj eo im ta eo kar je ioon, kōjerbal naan ko jān Alma 46:11–16. Kwomaron̄ etal n̄an “Jebta 32: Kapen Moronai im Taitōļ in Anemkwōj eo” (Bwebwenato ko ilo Bok in Mormon, 89–90, ak ilo pija in alooj eo ilo ChurchofJesusChrist.org). Kōm̧m̧an bwe ajri ro ren jipan̄ kwaļo̧k bwebwenato eo jon̄an wōt aer maron̄. Kwaļo̧k bwe Moronai eaar kōjerbal taitōl in anemkwoj eo n̄an jipan̄ armej in Rinipai ro keememej ta eo eaar aorōk n̄an er.
-
Jipan̄ ajri ro ejaake juon taitōl in anemkwōj n̄an er make ak n̄an kūlaaj eo aer. Jino n̄an jipan̄ er ļōmņake men ko rej tōmak ie ak men ko Jemedwōj Ilan̄ ekōņaan bwe ren keememeji. Kōm̧m̧an bwe ren jin̄aik men kein ilo jidik peba kileplep, ak kwomaron̄ bōktok pija ko bwe ren kaddeppe n̄an peba eo.
-
Kajjitōk ippān ajri ro bwe ren kwaļo̧k n̄an eok jet armej ro rekōņaan āinwōt im etke rekōņaan āinwōt er. Innām kwaļo̧k jet iaan naan ko jān Alma 48:11–13 me ekwaļo̧k kadkadin Moronai, im kajjitōk ippāer n̄an kwaļo̧k wōn in naan kein rej kōm̧eļeļeik. Kwaļo̧k juon pija in Moronai, im kōnono jet wāween jemaron̄ āinwōt e.
Katakin Katak ko: Ajri ro Rerūttoļo̧k
Alma 43:17–21; 48:7–8; 49:1–5; 50:1–6
Imaron̄ lo jetōb in kōjparok ilo gospel in.
Laļ in ekanooj obrak kōn jetōb in kauwōtata, ak ekanooj lōn̄ men ko ajri ro remaron̄ ekkatak jān Rinipai ro kōn wāween aer kōjparok er make.
Makūtkūt ko Maron̄ Kōm̧m̧ani
-
Kajjitōk ippān ajri ro n̄an riit ilo ejjeļo̧k ainikien juon iaan eoon kein ilaļ me ej kwaļo̧k wāween kadkadin an Rinipai ro kar kōppopo n̄an tariņae ņae Rileman ro: Alma 43:19; 48:8; 49:1–5; im 50:2–4. Kajjitōk ippān ajri ro n̄an kwaļo̧k ta eo raar katak (leļo̧k jipan̄ eļan̄n̄e ekkar). Kōmeļeļeik bwe jej pād ilo juon jetōb in tariņae ņae Setan, im jej aikuj kōjparok kōj make ilo jetōb, āinwōt an kar Rinipai ro kōjparok er make ilo kanniōk jen Rileman ro. Ta kain jetōb in kein kōttōrak ak kappenļo̧k ko jemaron̄ kōpooji n̄an kōjparok kōj make ilo jetōb in tariņae in ad?
-
Jipan̄ ajri ro kōm̧m̧ane juon penjān ob jen juon peba ekilep ak bo̧o̧k, im kajjitōk ippāer n̄an je ioon men ko me rej kōjparok jetōb eo ad. Leļo̧k n̄an kajjojo ajri jidik peba, im kajjitōk ippāer n̄an je men ko renana me Setan emaron̄ kapo kōj n̄an kōm̧m̧ani (āinwōt, riab, koot, ak jab jouj). Kajjitōk ippāer n̄an nukwij peba ko aer bwe ren erom̧ booļ im joļo̧ke e n̄an penjān ob eo n̄an kōmeļeļeik wāween an gospel in maron̄ kōjparok kōj jān Setan (bar lale Epesōs 6:16).
Alma 46:11–16; 48:11–13, 16–17
Imaron̄ in tiljek āinwōt Kapen Moronai.
Moronai eaar tiljek im juon rikaļoor eo ekajoor an Jisōs Kraist, eo ekar im̧we Rinipai ro n̄an mour kake gospel in (lale Alma 48:17). Ta eo ajri ro ilo kūlaaj eo am̧ remaron̄ ekkatak jān waanjon̄ok eo an?
Makūtkūt ko Maron̄ Kōm̧m̧ani
-
Riit ippān doon Alma 46:11–16. Ta eo Moronai eaar kōņaan bwe Rinipai ro ren keememeje? (lale eoon 12). Ewi wāween an kar jipan̄ er keememej men kein? Kajjitōk ippān ajri ro n̄an kōlaajrake jet men ko Jemedwōj Ilan̄ ekōņaan bwe jen keememeji. Kōm̧m̧an bwe ajri ro ren ejaake “taitōl in anemkwōj” eo aer make kōn naan ko ak pija ko me renaaj jipan̄ er keememeji.
-
Kajjitōk ippān juon ajri bwe en riiti Alma 48:17. N̄an jipan̄ ajri ro meļeļe unin ad kōņaan āinwōt Moronai, kajjitōk ippāer bwe ren ekkatak Alma 48:11–13, 16. Kajjitōk ippāer bwe ren pukot naan ko ak eoon ko me rejipan̄ kōj meļeļe unin an Moronai kar juon rikaļooraņ Jisōs Kraist em̧m̧an. Ilo aer kwaļo̧k ta eo raar loe, rōjan̄ er n̄an ļōmņake jet men ko remaron̄ kōm̧m̧ani n̄an erom̧ āinwōt Moronai.
Setan ej kapo im m̧ōņe kōj jidik kōn jidik.
Ajri ro rej aikuj in jeļā bwe Setan enaaj kajjieon̄ in kapo kōj n̄an kōm̧m̧an bōd ko reddik bwe en tōlļo̧k kōj n̄an jerawiwi eļap.
Makūtkūt ko Maron̄ Kōm̧m̧ani
-
Riiti eoon ko kar kāleti ippān doon jān Alma 47:4–19, im kōmeļeļeik n̄an ajri ro wāween an Amalikaia kar bōk tōl ioon ritariņae ro an Leionti, men̄e ro uwaan jarin tariņae eo raar “ukōt ļōmņak ko aer” bwe rejamin bar ire ļo̧k wōt n̄an jidik ippān Rinipai ro. Ta eo en kar waļo̧k n̄e Amalikaia en kar jiron̄ Leionti ta eo eaar peeke n̄an kōm̧m̧ane jen jinoin? Ta eo eoon kein rej katain kōj kōn wāween an Setan kajjieon̄ m̧ōņe kōj?
-
Kwaļo̧k juon pijain juon em̧ me elukkuun in em̧m̧an im juon em̧ me ebwe an nana, ak kwaļo̧k juon pijain juon jikin kallib eo ājimourur im juon jikin kallib eo eobrak kōn wiit. Kōm̧m̧an bwe ajri ro ren kōnono kake ta eo rej loe ilo pija kein im wāween an oktak kein kar waļo̧k m̧oktaļo̧k. Ta eo irooj eo an m̧weeo ak jikin kallib eo en kar kōm̧m̧ane n̄an bōbrae menin? Kōmeļeļeik bwe armej ro remaron̄ jidik jidik jerawiwi eļan̄n̄e reban kowaan kapo ko an Setan n̄an kōm̧m̧ani bōd ko reddik (āinwōt riab ak alooje pija ko renana) innām jet jerawiwi ko reļļap. Ta jet iaan bōd ko me jej aikujin anjo̧ jeni ilo mour ko ad?
Kōketak Ekkatak ilo Mweo
Kajjitōk ippān kajjojo ajri n̄an ņa etan juon me eaar ron̄ kake ak en̄jake rainin ak kōņaan n̄an kwaļo̧ke n̄an juon uwaan baam̧le eo. Rōjan̄ er n̄an ļoor karōk ko aer.
Kōkōm̧anm̧anļo̧k Ad Katakin
Jipan̄ ajri ro kwaļo̧k leke. Jet ajri remaron̄ jab em̧m̧an aer ekkatak kōn gospel in ippāer make. Juon wāween n̄an kōļapļo̧k aer leke ej n̄an nōbar er n̄e rej bōk kuņaer ilo kūlaaj.