Xjalam-uuch laj Nefi sa’ jun najt xteramil kab’l xb’aan laj Jerry Thompson

24–30 agosto

Helaman 7–12

“Chijultiko’q eere li Qaawa’ ”

Naq yooqat chirilb’al ru Helaman 7─12, k’oxla chan ru naq eb’ li esil ut eb’ li na’leb’ wankeb’ sa’ li ch’ol a’an naru narosob’tesiheb’ li kok’al nakatzoleb’. Eb’ li na’leb’ sa’ li tusleb’ aatin naru neke’xtz’aqob’resi ru laa musiq’ankil laa’at.

Xtz’iib’ankil li nakak’oxla

Xkanab’ankileb’ chi wotzok

Patz’ reheb’ li kok’al k’a’ru neke’xnaw chirix li profeet aj Nefi, li ralal laj Helaman (chi’ilmanq Helaman 7─12). Wi na’ajman ru, ch’olob’ lix jalanil li profeet a’in aj Nefi xk’ab’a’ ut li profeet aj Nefi ajwi’ xk’ab’a’ sa’ xtiklajik lix Hu laj Mormon.

Xk’utb’al li tzol’leb’: Kok’al toj ka’ch’ineb’ xyu’am

Helaman 7:20

Li Qaawa’ naraj naq tinjultika a’an.

Laj Nefi kixpatz’ rib’ k’a’ut naq lix tenamit kixnajtob’resi rib’ rik’in li Dios ut kisach a’an sa’ xch’ooleb’. Chan ru naru nakatenq’aheb’ li kok’al chixtzolb’al chan ru naru najultiko’ li qaChoxahil Yuwa’ ut li Jesus reheb’?

Kok’ k’anjel naru chi b’aanumank

• Seraq’i reheb’ li kok’al junaq aanumsihom b’ar wi’ xsach sa’ aach’ool k’a’ruhaq aajel ru. Patz’ reheb’ ma sachenaq jun sutaq k’a’ruhaq aajel ru reheb’. Yaab’asi Helaman 7:20 ut ch’olob’ naq eb’ laj Nefita ke’xsik’ ru xtz’eqtaanankil li Dios. Li profeet aj Nefi kiraj naq taajultiko’q wi’chik li Dios reheb’. K’ameb’ jalam-uuch sa’ jun li b’oolx li te’reetali chan ru naq eb’ li kok’al naru neke’xjultika li qaChoxahil Yuwa’ ut li Jesus. Kanab’eb’ li kok’al chixk’eeb’aleb’ xhoonal chixsik’b’al ru junaq li jalam-uuch ut chixwotzb’al chan ru naru naqajultika li Dios rajlal kutan.

• Tenq’aheb’ li kok’al chixtz’aqob’resinkil ru li perel re kok’ k’anjel re li xamaan a’in.

Helaman 8:13–23

Eb’ li profeet neke’xch’olob’ xyaalal li Jesukristo.

Laj Nefi kixch’olob’ xyaalal naq li Jesukristo taachalq, ut kixb’oqeb’ lix tenamit chixjalb’al xk’a’uxleb’ ut chixtaaqenkil a’an. Oksiheb’ li ch’ol a’an re xk’utb’al chiruheb’ li kok’al naq eb’ li profeet neke’xch’olob’ xyaalal li Jesukristo.

Kok’ k’anjel naru chi b’aanumank

• K’ut jun xjalam-uuch li Jesukristo ut ye reheb’ li kok’al naq eb’ li profeet jo’ laj Nefi nokohe’xb’oq chixtaaqenkil li Jesus. Ileb’ ru li aatin a’in chirixeb’ li profeet sa’ Helaman 8:22: “Ke’xch’olob’ xyaalal chirix lix k’ulunik li Kristo, ut ke’ilok chi uub’ej, ut ke’saho’ sa’ xch’ool rik’in lix kutan.” Wotz rik’ineb’ li kok’al k’a’ruhaq xyehom li qayo’yookil profeet chirix li Kolonel.

• B’ichahomaq sa’ komonil jun li b’ich na’aatinak chirixeb’ li profeet, jo’ “Jun li profeet” (B’ichleb’aal choq’ reheb’ li Kok’al, 58–59). Sik’ ru junaq ch’ol aatin aajel ru sa’ li b’ich, ut tz’iib’aheb’ li junjunq chi aatin wan sa’ li ch’ol chiru xjalam-uuch li oqej setb’il chiru hu. K’eheb’ lix jalam-uuch li oqej chiru li tz’ak li te’wulaq toj chiru jun xjalam-uuch li Kolonel. Kanab’eb’ li kok’al chixtaaqenkileb’ xjalam-uuch li oqej ut tenq’aheb’ chirilb’aleb’ ru li aatin.

Helaman 10:11–12

Tin’ab’inq chiru li qaChoxahil Yuwa’.

Lix b’aanuhom laj Nefi naq ki’ab’in chiru li Dios naru naxwaklesi xch’ooleb’ li kok’al nakatzoleb’ chi ab’ink chiru li Qaawa’.

Kok’ k’anjel naru chi b’aanumank

• Il ru Helaman 10:2, 11─12 ut tenq’aheb’ li kok’al chixtawb’al ru naq laj Nefi ki’ab’in chiru li Dios. Kanab’eb’ li kok’al chixk’utb’esinkil li kixb’aanu laj Nefi. Qayehaq, kanab’eb’ chi b’eek chixjunpak’al li tzoleb’aal (chanchan ta wi’ naq yooqeb’ chi xik sa’ li rochocheb’), chi xaqliiq, chixb’alq’usinkil rib’ ut chi xik sa’ xjunpak’alil chik li tzoleb’aal (chanchan ta wi’ naq yookeb’ chi q’ajk chixtzolb’aleb’ li tenamit). Tenq’aheb’ chirilb’al naq laj Nefi kiraj ab’ink chiru li Qaawa’ us ta wan li k’a’ru ch’a’aj tento tixb’aanu.

• Tenq’aheb’ li kok’al chixtawb’al ru naq wan hoonal naq li qaChoxahil Yuwa’ naraj naq jalan li taqab’aanu chiru li naqaj xb’aanunkil laa’o, a’b’an naru noko’ab’in chiru jo’ kixb’aanu laj Nefi. Wotzeb’ li na’leb’ jo’: “Wan naq nawaj josq’o’k, a’b’an li qaChoxahil Yuwa’ naraj naq … ,” ut kanab’eb’ li kok’al chixtz’aqob’resinkil ru li aatin. Waklesi xch’ooleb’ li kok’al chixjultikankil xaqliik ut xk’oxlankil k’a’ru naraj li qaChoxahil Yuwa’ naq taqab’aanu, ut chirix a’an xb’aanunkil.

Xk’utb’al li tzol’leb’: Kok’al ak ninqeb’

Helaman 7–11

Kolb’ilaq wix sa’ musiq’ej naq yooqin chixtaaqenkil li profeet.

Li Awa’b’ej James E. Faust kixk’ut: “Kolb’ilaq qix wi noko’ab’in chiru li naxye [li Awa’b’ej re li Iglees] ut naqataaqe li na’leb’ naxk’e” (“Revelación Continua,” Liahona, enero 1990, 10).

Kok’ k’anjel naru chi b’aanumank

• Kanab’eb’ li kok’al chixyiib’ankili xtusulal li naxb’aanu li profeet chiru li pizarron (chi’ilmanq “Profeet,” K’utul Raqal reheb’ li Loq’laj Hu). Tenq’aheb’ chixsik’b’al sa’ Helaman 7:1─2, 27─29; 8:22─23 ut 10:3─4, 6─7 chan ru naq laj Nefi kixb’aanu junjunq reheb’ li na’leb’ xe’xtz’iib’a. Jo’q’e qilom li qaprofeet chixb’aanunkileb’ a’an sa’eb’ li kutan a’in? Ye lix nawom aachʼool chirix li yoʼyookil profeet. Re xk’utb’esinkil x’aajelil ruheb’ li profeet, k’ut lix b’een k’asal li video “Los atalayas en la torre” (ChurchofJesusChrist.org).

• Ilomaq ru sa’ komonil Helaman 11:3─7 (malaj il wi’chik ru li “Ch’ol 39: Laj Nefi naxk’ul nimla wankilal,” Eb’ li Esilal sa’ lix Hu laj Mormon, 108─110, malaj li video sa’ ChurchofJesusChrist.org). K’e xb’oqb’aleb’ li kok’al chi ab’ink re naq te’xsik’ k’a’ru ke’xk’ul li kristiaan li ink’a’ ke’ab’in chiru li profeet. K’a’ru naru nak’ulman wi ink’a’ naqab’i li profeet? Chan ru naq noko’osob’tesiik naq naqataaqe? Wotz k’a’ruhaq xk’utum li qaprofeet ut waklesi xch’ooleb’ li kok’al chixtaaqenkileb’ lix k’utum.

Helaman 7:20–21

Li Qaawa’ naraj naq tinjultika a’an.

Eb’ li kok’al nakatzoleb’ te’xtaweb’ k’a’aq re ru li naru te’xtz’eqtaana wi’ li qaChoxahil Yuwa’ ut li Jesukristo. Chan ru naru nakawaklesi xch’ooleb’ li kok’al chixk’eeb’al xhoonal li musiq’ejil k’a’aq re ru?

Kok’ k’anjel naru chi b’aanumank

• Ilomaq ru sa’ komonil Helaman 7:20─21 ut patz’ reheb’ li kok’al k’a’ru naraj naxye li sachk li Dios sa’ xch’ooleb’. Ch’olob’ naq li aatin sachk sa’ ch’oolej naraj ajwi’ naxye “xkanab’ankil rilb’al” malaj “xkanab’ankil rab’inkil.” K’e chi kutankil jun xjalam-uuch li Kolonel ut kanab’eb’ li kok’al chixyiib’ankileb’ xjalam-uuch k’a’aq re ru li mas neke’roksi wi’ lix hoonaleb’ ut li naru nasach wi’ li Qaawa’ sa’ xch’ooleb’. K’eheb’ lix jalam-uuch chiru lix jalam-uuch li Jesus. Kanab’eb’ li kok’al chixk’oxlankileb’ k’a’aq re ru li naru neke’xb’aanu rajlal kutan re xjultikankil li qaChoxahil Yuwa’ ut li Jesus. Naq yooqeb’ chixwotzb’al lix na’leb’eb’, yooqat chirisinkileb’ lix jalam-uuch toj reetal naq lix jalam-uuch li Kolonel taakanaaq chi kutankil.

• Kanab’eb’ li kok’al chixtz’aqob’resinkil ru li perel re kok’ k’anjel re li xamaan a’in.

Helaman 10

Naq nink’oxlan chirixeb’ li raatin li Dios, naru tink’ul kutb’esinb’il na’leb’.

Ma neke’xnaw li kok’al nakatzoleb’ k’a’ru naraj naxye k’oxlank sa’ ch’oolej? Tenq’aheb’ chixtawb’al ru naq laj Nefi ki’osob’tesiik rik’in k’utb’esinb’il na’leb’ naq kik’oxlan chirixeb’ li k’a’aq re ru kik’ute’ chiru xb’aan li Qaawa’.

Kok’ k’anjel naru chi b’aanumank

• Tenq’aheb’ li kok’al chixtawb’al ru li naraj naxye k’oxlank sa’ ch’oolej (chi’ilmanq “K’oxlank sa’ ch’oolej,” K’utul Raqal reheb’ li Loq’laj Hu). Kanab’eb’ chixk’oxlankileb’ jalaneb’ chik aatin li te’xch’olob’ k’a’ru naraj naxye k’oxlank sa’ ch’oolej. Chirix a’an kanab’eb’ chirilb’al ru Helaman 10:1─3 ut chixjalb’al ruheb’ li jalan jalanq xtz’iib’ankil li aatin k’oxlank sa’ ch’oolej li wankeb’ sa’eb’ li raqal rik’ineb’ li aatin xe’xk’oxla. K’a’ru kik’ulman naq laj Nefi kik’oxlan chirixeb’ li loq’laj hu? (chi’ilmanq Helaman 10:3─7). Aatinan chirix junaq hoonal b’ar wi’ laa’at xak’ul k’utb’esinb’il na’leb’ chirix k’oxlank chirix junaq raqal sa’eb’ li loq’laj hu, jun k’utb’esinb’il na’leb’ reheb’ li kutan a’in, malaj junaq musiq’ejil numsihom.

• K’e xhoonaleb’ li kok’al chirilb’al ru Helaman 10, malaj ilomaq ru sa’ komonil, ut waklesi xch’ooleb’ chixtawb’al junaq raqal li taawulaq raj chiruheb’ xk’oxlankil chiru li xamaan. Waklesi xch’ooleb’ chixtz’iib’ankil chiru junaq li hu malaj junaq setb’il hu li raqal xe’xsik’ ru, ut chixk’eeb’al sa’ junaq na’ajej b’ar wi’ te’ril ut taajultiko’q reheb’ k’oxlank chirix li raqal a’an chiru li xamaan. Sa’ li tzolok nachal, k’eheb’ xhoonal re te’xwotz li xe’xtzol naq yookeb’ chi k’oxlank chirix li raqal a’an.

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixwotzb’al rik’ineb’ lix junkab’al li neke’xk’uub’ xb’aanunkil re xjultikankil li qaChoxahil Yuwa’ ut li Jesukristo rajlal kutan. Naru ajwi’ neke’xk’e xb’oqb’aleb’ lix junkab’al re te’xb’aanu ajwi’ a’an.

Xchaab’ilob’resinkil li qak’utum

K’eheb’ li b’oqom li te’roxloq’i li xtaql ch’oolej. Naq taak’e xb’oqb’aleb’ li kok’al chixk’anjelankil li k’a’ru xe’xtzol, k’oxla chan ru naru nakawoxloq’i lix taql xch’ooleb’ naq neke’xk’anjela li neke’xtzol. Qayehaq, chirix junaq tzolok chirix li Kolonel, naru nakapatz’: “K’a’ru teeb’anu re xjultikankil li Kolonel chiru li xamaan a’in?”