At ixq, k’a’ naq nakatyaab’ak? xb’aan laj Mark R. Pugh

27 julio–2 agosto

Alma 39–42

“Li nimla k’uub’anb’il na’leb’ re sahil ch’oolejil”

Chirix naq nakatzol Alma 39─42 rik’in tijok, k’uub’eb’ ru li kok’ k’anjel li taatenq’anq reheb’ li kok’al chi tzolok. Naru nakataweb’ aana’leb’ sa’eb’ li kok’ k’anjel a’in li naru neke’oksiman a’ yaal jarub’ chihab’ wan reheb’ li kok’al.

Xtz’iib’ankil li nakak’oxla

Xkanab’ankileb’ chi wotzok

Kanab’eb’ li junjunq chi kok’al chi xaqliik ut chixwotzb’al k’a’ruhaq chirix li evangelio li xe’xtzol toje’ sa’ kab’l malaj sa’ li iglees.

Xk’utb’al li tzol’leb’: Kok’al toj ka’ch’ineb’ xyu’am

Alma 39:1, 10–11

Naru ninwan jo’ jun chaab’il eetalil.

Laj Alma kixwaklesi xch’ool laj Korianton chixtzolb’al xna’leb’ rik’in lix chaab’il b’aanuhomeb’ li ras ut kixq’us re naq ink’a’ taawanq jo’ jun yib’ aj k’amol b’e choq’ reheb’ li ras riitz’in.

Kok’ k’anjel naru chi b’aanumank

• Ch’olob’ naq laj Xiblon ut laj Korianton raseb’ rib’ ut naq laj Shiblon kiwan jo’ jun chaab’il aj k’amol b’e choq’ re laj Korianton. Kanab’eb’ li kok’al chixka’sutinkil li patz’om a’in aawik’in: “Ma ink’a’ xb’aanu chi chaab’il chawu li k’a’ru tento raj taa’uxq?” (Alma 39:1). Kanab’eb’ li kok’al chi aatinak chirix anihaq li nawan jo’ chaab’il aj k’amol b’e choq’ reheb’ a’an.

• B’aanuhomaq junaq li b’atz’unk malaj b’ichahomaq junaq li b’ich b’ar wi’ eb’ li kok’al te’xb’aanu li naxye, jo’ “Jo’ ninb’aanu, chab’aanu laa’at” (B’ichleb’aal choq’ reheb’ li Kok’al, 147). K’eheb’ xhoonal li junjunq chi kok’al chi wank jo’ aj jolominel malaj jo’ chaab’il eetalil. Patz’ reheb’ li kok’al chan ru naru neke’wan jo’ chaab’il eetalil choq’ re anihaq.

• K’uteb’ xjalam-uuch li Jesus naq yoo chixb’aanunkil li us ut ch’olob’ naq a’an li qatz’aqal eetalil. Ch’olob’ naq naru nokowan jo’ chaab’il eetalil, jo’ kiwan li Jesus. Kanab’eb’ li kok’al chixyiib’ankileb’ xjalam-uucheb’ a’an naq yookeb’ chixb’aanunkil li us.

Alma 39:9, 13

Li qaChoxahil Yuwa’ ut li Jesukristo naru nikine’xtenq’a chixjalb’al li k’a’ru ink’a’ us ninb’aanu.

Us ta moko aajel ta ru naq eb’ li kok’al toj ka’ch’ineb’ xyu’am te’xjal xk’a’uxl, li raatinankileb’ chirix laj Korianton naru naxtenq’aheb’ chixtawb’al ru k’a’ru naraj naxye li jalb’a-k’a’uxlej.

Kok’ k’anjel naru chi b’aanumank

• Wi nakat-aatinak chirix b’ar nachal chaq li maak, ch’olob’ naq laj Korianton kixsik’ ru xb’aanunkil li ink’a’ us. K’a’ raj ru naru naqaye re, re xtenq’ankil a’an? Il ru choq’ reheb’ li kok’al li kixye laj Alma, lix yuwa’ laj Korianton, re: “Taajal aakʼaʼuxl ut taakanabʼebʼ laa maak” (Alma 39:9). Ye reheb’ naq li jalok k’a’uxlej naraj naxye naq naqapatz’ re li qaChoxahil Yuwa’ ut re li Jesukristo naq te’xkuy qamaak ut toohe’xtenq’a chixtiikob’resinkil ruheb’ li qapaaltil, ut naq chirix a’an taqayal qaq’e chi wank jo’eb’ a’an.

• K’e re jun li ch’ina al k’a’ruhaq aal re naq tixchap naq yooqat chixseraq’inkil li esil chirix anihaq kixb’aanu li ink’a’ us ut chirix a’an kiraho’ xch’ool. Ye reheb’ li kok’al naq li k’a’aq re ru a’an, chanchan chik li yib’ aj eek’ahom naru nawan qik’in naq naqab’aanu li ink’a’ us. Chap li k’a’aq re ru aal wan rik’in li ch’ina al naq yooqat chixch’olob’ankil xyaalal naq, wi naqajal qak’a’uxl, li qaChoxahil Yuwa’ ut li Jesukristo naru neke’risi li yib’ ut aalil aj eek’ahom ut naru nokohe’xtenq’a chixyiib’ankil li qapaaltil. B’ichahomaq sa’ komonil jun li b’ich chirix li jalb’a-k’a’uxlej, jo’ “Li jalb’a-k’a’uxlej” (B’ichleb’aal choq’ reheb’ li Kok’al, 142).

Alma 40:23

Tinwakliiq chi yo’yo.

Tenq’aheb’ li kok’al chiroyb’eninkil chi anchaleb’ xch’ool li kutan b’ar wi’ a’aneb’ ut eb’ li raarookeb’ xb’aan te’wakliiq chi yo’yo.

Kok’ k’anjel naru chi b’aanumank

• Naq yooqat chixyaab’asinkil Alma 40:23 k’e xb’oqb’aleb’ li kok’al chiroksinkil li perel re kok’ k’anjel re li xamaan a’in re xtenq’ankileb’ chirilb’al li naxk’ut li raqal a’an. Kanab’eb’ li junjunq chi kok’al chiroksinkil li perel re kok’ k’anjel re xk’utb’al chiru jun chik ch’ina al k’a’ru li wakliik chi yo’yo.

• K’ut jun xjalam-uuch li Kolonel waklijenaq chi yo’yo ut k’ut chiruheb’ li kok’al jun li b’ich chirix li wakliik chi yo’yo, jo’ “Ma yaal naq li Jesus xwakli?” malaj “Ak xwakli” (B’ichleb’aal choq’ reheb’ li Kok’al, 45; Eb’ li B’ich, 121). Xaqab’ li b’ich chi kok’ aj xsa’ re xch’olob’ankil li naraj naxye ut lix aajelil ruheb’ li aatin ut eb’ li ch’ol aatin.

• Patz’ reheb’ li kok’al ma kamenaq anihaq neke’xnaw ru. Ch’olob’ xyaalal naq sa’ jun kutan li kristiaan a’an ut chixjunileb’ li kristiaan te’wakliiq chi yo’yo sa’ xk’ab’a’ li Jesukristo. Wi na’ajman ru, oksi li perel re kok’ k’anjel re li xamaan a’in re xch’olob’ankil k’a’ru naraj naxye li wakliik chi yo’yo.

  

  Li xMaria ut li Qaawa’ waklijenaq chi yo’yo, xb’aan laj Harry Anderson

Xk’utb’al li tzol’leb’: Kok’al ak ninqeb’

Alma 39:1, 10–11

Naru ninwan jo’ jun chaab’il eetalil.

Li na’leb’ kixk’e laj Alma re laj Korianton naru naxtenq’aheb’ li kok’al chixtawb’al ru lix aajelil ru xtaaqenkileb’ li chaab’il eetalil ut ajwi’ li wank jo’ chaab’il eetalil.

Kok’ k’anjel naru chi b’aanumank

• Ch’olob’ naq laj Korianton, li ralal laj Alma, kixb’aanu jun li nimla maak naq sa’ xna’aj a’an tento raj naq wan chaq chixjultikankil li evangelio. Ilomaq ru rik’ineb’ li kok’al lix raqik li aatin sa’ Alma 39:11 ut k’e xb’oqb’aleb’ re naq te’xk’e reetal chan ru naq lix maak laj Korianton kixtoch’eb’ laj Tzoramita. Tenq’aheb’ li kok’al chixk’oxlankil aniheb’ li kristiaan naru raj te’toch’e’q xb’aaneb’ lix b’aanuhomeb’ a’an. Chan ru naru neke’wan jo’ jun chaab’il eetalil choq’ reheb’ li kristiaan a’an?

• Ilomaq ru sa’ komonil Alma 39:1. Chan ru naq laj Xiblon (li ras laj Korianton) kiwan jo’ jun chaab’il eetalil? Kanab’eb’ li kok’al chixtawb’al xkomoneb’ xsumenkil li patz’om a’an sa’ Alma 38:2─4. Aatinan chirix junjunqeb’ li chaab’il eetalil sa’ laa yu’am ut kanab’eb’ li kok’al chixb’aanunkil ajwi’ a’an. K’ut li video “Lecciones que aprendí en la niñez” (ChurchofJesusChrist.org) ut patz’ reheb’ li kok’al chan ru naq li asb’ej kiwan jo’ jun chaab’il eetalil.

• K’am jun li pook malaj xjalam-uuch li saq’e, ut juntaq’eeta li saqen rik’in lix wankil li tiikil eetalil. Jo’ chanru naq lix saqen jun li pook malaj li saq’e naru nokoxtenq’a chirilb’al li b’e li tento taqak’am, jun li tiikil eetalil naxk’ut chiqu k’a’ru taqab’aanu re xtaaqenkil li qaChoxahil Yuwa’. Seraq’i jun aanumsihom b’ar wi’ lix chaab’il eetalil anihaq xatxtenq’a. K’a’ru naru neke’xb’aanu li kok’al re naq te’wanq jo’ jun chaab’il eetalil? Ch’olob’ xyaalal naq li Jesukristo a’an li qachaab’il eetalil tz’aqal re ru.

Alma 39:9–13

Naru ninjal ink’a’uxl naq ninb’aanu li ink’a’ us.

Jo’ chiqajunilo laa’o, eb’ li kok’al nakatzoleb’ neke’maakob’ ut neke’xb’aanu li ink’a’ us. Chan ru naru nakamusiq’aheb’ re “te’xkanab’eb’ lix maak” ut te’xjal xk’a’uxleb’? (Alma 39:9).

Kok’ k’anjel naru chi b’aanumank

• Kanab’eb’ li kok’al chi aatinak chirix junaq hoonal b’ar wi’ xe’wan jun xtoch’olaleb’. K’a’ru xe’xb’aanu re xk’irtesinkil lix toch’olaleb’? Ch’olob’ naq li maak naxrahob’tesi li qamusiq’, a’b’an li Kolonel naru nokoxk’irtesi naq naqajal qak’a’uxl.

• Kanab’eb’ li kok’al chixtawb’al li ch’ol aatin “taajal aak’a’uxl ut taakanab’eb’ laa maak” sa’ Alma 39:9, ut tenq’aheb’ chixtawb’al ru k’a’ru naraj naxye “jalok k’a’uxlej” ut “kanab’ank.” Ch’olob’ xyaalal naq li jalb’a-k’a’uxlej naru chi uxmank xb’aan li Jesukristo ut lix tojb’al rix li maak kixb’aanu. Ilomaq ru sa’ komonil Alma 39:10─14 re xtawb’al k’a’ chik ru naru naqab’aanu li taatenq’anq qe chixjalb’al qak’a’uxl ut chirisinkil qib’ chiru li maak.

Alma 40:6–7, 11–14, 21–23

Chirix li kamk, li qamusiq’ naxik sa’ li ruchich’och’ reheb’ li musiq’ej toj re naq nawulak xhoonalil li wakliik chi yo’yo ut li raqb’a-aatin.

Ak re naq naqapatz’ qib’ k’a’ru nak’ulman chirix li kamk. Li raatin laj Alma naru naxtenq’aheb’ li kok’al chixtawb’aleb’ xsumenkil a’an rik’in li Musiq’ej.

Kok’ k’anjel naru chi b’aanumank

• Tz’iib’a kamk, ruchich’och reheb’ li musiq’ej, wakliik chi yo’yo ut raqb’a-aatin chiruheb’ jalan jalanq li hu, ut k’eheb’ chiru li pizarron chi moko tusb’il ta. Tenq’aheb’ li kok’al chixtawb’al ru k’a’ru naraj nekex’ye li aatin a’an. Il ru Alma 40:6─7, 11─14 ut 21─23 rik’ineb’ li kok’al ut kanab’eb’ chixkeeb’aleb’ li aatin wankeb’ chiru li pizarron chi tustu jo’ chanru neke’k’ulman.

• Tz’iib’a chiru li pizarron jun xtusulal li patz’om sumenb’ileb’ sa’ Alma 40:6─7, 11─14 ut 21─23, ut kanab’eb’ li kok’al chixk’ulinkileb’ rib’ li junjunq chi patz’om rik’ineb’ li raqal neke’sumen re. Qayehaq, “Chan ruhaq lin tib’el naq tinwakliiq chi yo’yo?” nasumeman sa’ Alma 40:23. Wi na’ajman ru, ch’olob’eb’ li aatin ch’a’aj xtawb’aleb’ ru choq’ reheb’ li kok’al naq yooqeb’ chirilb’aleb’ ru. Waklesiheb’ xch’ool li kok’al chixwotzb’al k’a’ut naq neke’xb’antioxi lix k’uub’anb’il na’leb’ li qaChoxahil Yuwa’.

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixb’antioxinkil re junaq komon sa’ lix junkab’aleb’ xb’aan lix chaab’il eetalileb’ choq’ reheb’ a’an ut chixk’oxlankil chan ru naru neke’wan jo’ jun chaab’il eetalil chiru li xamaan a’in.

Xchaab’ilob’resinkil li qak’utum

Oksiheb’ li junxaqalil. “Lix k’ihaleb’ li kok’al (ut eb’ li ak ninqeb’) neke’tzolok chi us wi neke’roksi lix junxaqalileb’. Sik’ chan ru naru nakatenq’aheb’ li kok’al rik’in li ilok, rik’in li ab’ink, ut rik’in li ch’e’ok naq yookeb’ chi tzolok” (Li k’utuk jo’ li Kolonel, 25).