Minerva K. Teichert (1888-1976), Si Ammon nagbarug sa atubangan ni Haring Limhi, 1949-1951, lana diha sa masonite, 35 15/16 x 48 ka pulgada. Brigham Young University Museum of Art, 1969.

Abril 27–Mayo 3

Mosiah 7–10

“Diha sa Kusog sa Ginoo”

Basaha sa mainampuong paagi ang Mosiah 7–10, nga mamalandong sa mga impresyon nga imong madawat. Sa unsang paagi ang mga kamatuoran niini nga mga kapitulo makatabang sa pagtubag sa mga panginahanglan sa mga bata nga imong gitudloan?

Irekord ang Imong mga Impresyon

Dapita ang Pagpaambit

Dasiga ang mga bata sa pagpaambit og bisan unsa nga ilang nahibaloan mahitungod sa mga panghitabo niini nga mga kapitulo. Mahimong makakita ka og tabang diha sa “Kapitulo 13: Si Zeniff” (Mga Sugilanon sa Ang Basahon ni Mormon, 36–37 ).

Itudlo ang Doktrina: Mas Gagmay nga mga Bata

Mosiah 7:18–20, 33

Ang Dios mitabang sa mga tawo diha sa mga kasulatan, ug Siya makatabang kanako.

Ang katawhan ni Limhi, kinsa ubos sa pagkaulipon ngadto sa mga Lamanite, nagkinahanglan og hugot nga pagtuo nga ang Dios motabang kanila, busa gipahinumduman sila ni Limhi sa mga panahon nga ang Dios mitabang sa Iyang katawhan.

Posible nga mga Kalihokan

• Hangyoa ang mga bata sa pagpaambit og higayon sa dihang nagkinahanglan sila og tabang. Ipasabut nga ang katawhan ni Haring Limhi anaa sa kalisud, busa mipaambit siya og istorya aron sa pagtabang kanila nga makabaton og hugot nga pagtuo. Basaha ang Mosiah 7:19 ngadto sa mga bata, ug pagpakita og hulagway sa mga anak sa Israel nga mitabok sa Pulang Dagat (tan-awa ang Moses Parting the Red Sea, ChurchofJesusChrist.org). Ribyuha kini nga istorya ug ang istorya sa mana, ug tabangi ang mga bata sa pag-aksyon sa mga istorya (tan-awa ang mga kapitulo 17 ug 18 diha sa Mga Istorya sa Daang Tugon ). Giunsa pagtabang sa Ginoo ang mga tawo? Ipamatuod nga ang Ginoo makatabang usab kanato.

• Basaha ang Mosiah 7:33 ngadto sa mga bata, ug tabangi sila nga makasabut kon unsa ang gitudlo sa bersikulo nga atong buhaton aron makadawat og tabang gikan sa Ginoo. Tabangi ang mga bata sa paghunahuna og mga aksyon nga morepresentar niini nga mga butang, ug isulti og balik ang bersikulo samtang buhaton nila ang mga aksyon. Unsa ang pipila ka mga butang nga nagkinahanglan kita og tabang? Unsaon nato pagpakita nga misalig kita sa Ginoo? Pagpaambit og kasinatian sa dihang misalig ka sa Ginoo ug Siya mitabang kanimo.

• Pagpili og pipila ka mga bersikulo sa “Mga Sugilanon sa Ang Basahon ni Mormon” o “Ang Kaisug ni Nephi” (Songbook sa mga Bata, 62–63, 64–65) nga kantahon uban sa mga bata. Tabangi sila sa pag-ila kon giunsa pagtabang sa Ginoo ang mga tawo sa Basahon ni Mormon. Pagpaambit og ubang mga istorya sa kasulatan nga gibati nimo nga makatabang sa mga bata nga makakat-on ug pagsalig sa Ginoo.

Mosiah 8:16–17

Ang Dios mihatag kanato og mga propeta, mga manalagna, ug mga tigpadayag.

Unsaon nimo paggamit ang Mosiah 8:16–17 sa pagtudlo sa mga bata mahitungod sa tahas sa usa ka propeta isip manalagna?

Posible nga mga Kalihokan

• Ipakita sa mga bata kon unsaon sa pagbutang sa ilang mga kamot ngadto sa ilang mga mata nga daw naggamit sila og antiyuhos o teleskopyo. Basaha ang Mosiah 8:17, ug hangyoa ang mga bata sa pagsul-ob sa ilang “mga antiyuhos” sa matag higayon nga madungog nila ang pulong nga “manalagna.” Ipasabut nga ang Dios mihatag kanato og mga propeta ug nga ang usa sa mga tahas sa usa ka propeta mao ang pagkahimong “manalagna” tungod kay siya “makakita” sa mga butang nga moabut. Pagpaambit og pipila ka mga ehemplo sa mga butang nga nakita ug gipadayag kanato sa mga propeta (lakip ang mga kasulatan), o pagpaambit og usa ka ehemplo sa dihang ang usa ka propeta milihok isip usa ka manalagna (sama sa 1 Nephi 11:20–21).

• Paghimo og papel nga porma ug tunob sa tiil [footprints], ug pagdrowing niini og mga hulagway sa mga butang nga gitambag sa mga propeta nga atong buhaton. Ibutang kini nga mga marka sa tunob sa tiil [footprints] diha sa usa ka dalan libut sa kwarto, ug ilarawan ang mga hulagway. Papuli-puliha ang mga bata sa pag-aksyon isip propeta ug naggiya sa ubang mga bata sa pagsunod niini nga mga tunob.

• Ipakita ang hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya ug dapita ang mga bata sa paghulagway sa unsay ilang nakita. Ipasabut nga si Propeta Joseph Smith usa ka manalagna. Ang Ginoo mihatag kaniya og mga himan nga gitawag og Urim ug Thummim ug usa ka bato sa manalagna nga gigamit sa paghubad sa Basahon ni Mormon.

• Pagpasalida og mubo nga video sa bag-ohay lang nga mensahe sa komperensya gikan sa Presidente sa Simbahan (o pagpakita og litrato niya ug pagbasa og usa ka butang nga iyang gitudlo). Pagpamatuod nga siya usa ka propeta, manalagna, ug tigpadayag.

Itudlo ang Doktrina: Mas Dagko nga mga Bata

Mosiah 7:18–20, 33; 9:14–19; 10:6–10, 19–21

Ang Dios mitabang sa mga tawo diha sa mga kasulatan, ug Siya makatabang kanako.

Si Zeniff ug ang iyang katawhan, kinsa mipuyo sa yuta sa mga Lamanite, gisulong sa mga Lamanite ug nagkinahanglan sa tabang sa Dios. Unsa ang makat-unan sa mga bata gikan niini nga istorya mahitungod sa pagtabang sa Dios sa Iyang mga anak?

Posible nga mga Kalihokan

• Bahina ang mga bata ngadto sa tulo ka grupo, ug dapita ang matag grupo sa pagtuon sa usa sa mosunod nga mga istorya sa kasulatan: ang mga Israelite mitabok sa Pulang Dagat (tan-awa sa Exodo 14:10–14, 21–31), ang pamilya ni Lehi mipanaw diha sa kamingawan (tan-awa sa 1 Nephi 16:9–16; 17:1–6), ug ang katawhan ni Zeniff nga giluwas gikan sa mga Lamanite (tan-awa sa Mosiah 9:14–19; 10:6–10, 19–21). Sa unsang paagi ang mga tawo niini nga mga istorya mipakita nga misalig sila sa Dios? Giunsa pagtabang sa Dios kanila? Unsaon Niya pagtabang kanato kon mosalig kita Kaniya?

• Pagdapit og tulo ka mga bata sa pagsulat diha sa pisara og usa ka pagsulay o hagit nga ilang giatubang. Hangyoa ang usa ka bata sa pagbasa sa Mosiah 7:33, ug awhaga ang ubang mga bata sa pagpapas sa usa sa mga pagsulay o mga hagit sa matag higayon nga makadungog sila og usa ka butang nga ilang mabuhat aron makadawat og tabang sa Ginoo. Sa unsang paagi ang pagsalig diha sa Ginoo makatabang kanato sa pagbuntog sa atong mga hagit?

Mosiah 8:12–19

Ang Dios mihatag og mga propeta, mga manalagna, ug mga tigpadayag alang sa kaayohan sa tanang katawhan.

Atong gipaluyohan ang Unang Kapangulohan ug ang Napulog Duha ka mga Apostoles isip mga propeta, mga manalagna, ug mga tigpadayag. Unsaon nimo pagtudlo ang mga bata mahitungod sa bili sa mga propeta?

Posible nga mga Kalihokan

• Pagpili og pipila ka importante nga mga pulong gikan sa Mosiah 8:12–19, ug isulat kini diha sa pisara. Dapita ang usa ka bata sa pagbasa niini nga mga bersikulo, ug hangyoa ang ubang mga bata sa pagpataas sa ilang mga kamot kon madungog nila ang matag pulong diha sa pisara. Hunonga ang pagbasa ug hisguti sa klase ang matag pulong.

• Hangyoa ang mga bata sa pagribyu sa Mosiah 8:16–18 aron makakat-on kon unsa ang manalagna. Isulat kini nga kapahayag diha sa pisara: Ang usa ka manalagna susama sa . Tabangi ang mga bata nga makahunahuna og mga paagi sa pagkompleto sa kapahayag aron mapasabut nganong ang manalagna usa ka panalangin ngari kanato—sama pananglit, ang manalagna susama sa usa ka tigbantay sa katubigan [lifeguard], kinsa mopasidaan kanato sa mga kakuyaw.

• Pagpili og usa ka hugpong sa mga pulong gikan sa Mosiah 8:16–17, ug isulat kini diha sa pisara, nga ilisan ang matag pulong og hinimo-himo nga simbolo. Hatagi ang mga bata og lista sa mga simbolo ug mga pulong nga girepresentaran niini, ug ipasulbad kanila o “ipahubad” ang hugpong sa mga pulong sama sa buhaton sa mga manalagna. Unsa pa ang ubang mga paagi nga ang mga propeta, mga manalagna, ug mga tigpadayag mahimong “dakung kaayohan” kanato? (Mosiah 8:18).

Mosiah 9:14–18; 10:10–11

Kon ako huyang, ang Ginoo makapalig-on kanako.

Kon ang mga bata mag-atubang og mga hagit, usahay mobati sila nga huyang ug walay mahimo. Gamita ang istorya sa katawhan ni Zeniff aron sa pagtudlo sa mga bata nga mahimo silang makadawat og kusog gikan sa Ginoo.

Posible nga mga Kalihokan

• Hangyoa ang mga bata sa pagpaambit og mga paagi nga mahimo silang kusgan sa pisikal nga paagi. Unsay gipasabut nga adunay “kusog sa tawo”? (tan-awa sa Mosiah 10:11). Unsay gipasabut nga adunay “kusog sa Ginoo”? (tan-awa sa Mosiah 9:17–18; 10:10). Unsaon nato pagdawat ang kusog sa Ginoo?

• Dapita ang mga bata sa pagdrowing og hulagway sa usa ka tawo nga ilang gibati nga adunay kusog sa Ginoo ug sa pagpaambit nganong gidrowing nila kining tawhana.

Awhaga ang Pagkat-on diha sa Panimalay

Dapita ang mga bata sa pagpaambit sa ilang mga pamilya og usa ka istorya gikan sa mga kasulatan nga nagdasig kanila nga “ibutang ang [ilang] pagsalig diha sa Dios” (Mosiah 7:19).

Pagpalambo sa Atong Pagtudlo

Pangutana og dinasig nga mga pangutana. Paghimo og mga pangutana nga makadapit sa mga bata sa pagpaambit sa ilang mga pagpamatuod mahitungod sa mga kamatuoran sa ebanghelyo. Sama pananglit, kon naghisgut ka og mga propeta, mahimo nimong hangyoon ang mga bata sa pagpaambit kon sa unsang paagi ang mga propeta nakapanalangin kanila.