“February 3–9. 2 Nibwaai 1-5: ‘Ti Maiuakina te Kukurei,’” Nakomai, Iriirai—Ibukin te Moanrinan: Ana Boki Moomon 2020 (2020)
“Beberuare 3–9. 2 Nibwaai 1-5,” Nakomai, Iriirai—Ibukin te Moanrinan: Ana Boki Moomon 2020
Atam ao Ewa, iroun Douglas Fryer
Beberuare 3-9
2 Nibwaai 1–5
“Ti Maiuakina te Kukurei”
E reirei Riaai nakoia natina n tatabemaniia ni kaineti ma oin kainnanoia ao tera are a mena inanona. Ira aron ana katooto ngkai ko katauraoiko n reireiniia ataei n am kiraati.
Korea Am Namakin
Kaungaa te Tibwatibwa
Imwin kabwarabwaraan are Riaai e reireiniia ana utu ibukin te inaomata ni karaoa oin ara rinerine, kaoiia ataei bwa a na tibwaua te bwai are a tia n rinanona n te tai are a rinea te eti iai. Tera aia namakin imwin karaoakin te rinerine anne? A na kanga ni kauringnga bwa a na rinea te eti n taai aika a na roko?
Reirei te Reirei: Ataei aika a Uarereke
I kakabwaiaaki ngkana I ongeaba.
Te reirei are e reiakinaki n te kibu aei—te ongotaeka e uota te kakabwaia—e aki toki ni kaotaki rinanon Ana Boki Moomon. Iangoia bwa ko na kanga ni buokiia ataei bwa a na ataa aei i bon nanon maiuia.
Waaki ni Kakukurei aika a Kona ni Karaoaki
-
Tuangiia ataei bwa a na buokiko ni kakaea nanon te taeka ae tuua ao karinanii tabeua tuua. Wareka 2 Nibwaai 1:20, ao katereterea bwa ti na “kakabwaiaki,” ke n tekeraoi, ngkana ti kawakin tuua. E na kanga ara namakin ngkana ti kawakin tuua aikai?
-
Kaotia nakoia ataei bwaai ake a kona ni kamanoira, n aron te kauniwae,te bwara, ao nangoan te bai. Anganiia bwa a na karinii iaoia. A kanga bwaai aikai ni kamanoira? Tuangiia bwa a na tua Tamara are i Karawa e kona n kamanoira man te kaangaanga n te maiu n tamnei. Tibwaua te bwai ae e a tia n riki nakoim ngke ko kamanoaki bwa ko irii taian tua.
Te Atua e anganai te inaomata n rinerine.
Ibukin aia rinerine, a riai ni kitana te onaroka are Eten Atam ao Ewa. Kona kanga n reireiniia ataei bwa man aia rinerine Atam ao Ewa e a anganiira te inaomata n rinea Tamara are i Karawa n te bong aei?
Waaki ni Kakukurei aika a Kona ni Karaoaki
-
Korea tamnein te aomata ae e inaomata ao tamnein te aomata ae e kabureaki (tao te aomata n te onikarabuti), ao kaoiia ataei bwa a na kotea te tamnei ae eeti ngkana ko wareki taeka ae inaomata ao tautoronaki n 2 Nibwaai 2:27. Katuruturua te kibu n taeka ae “inaomata n rinerine,” ao kaoiia ataei n tatabemaniia bwa a na manga taekinna.
-
Manga rinanoa karakin Atam ao Ewa ma ataei (taraa 2 Nibwaai 2:17–19; taraa naba “Mwakoro 3: Atam ao Ewa,” Karaki man te O Tetemanti, 15–18, ke te witeo ae irekereke mangaia iaon ChurchofJesusChrist.org) ao te rinerine are a karaoia n te Onaroka i Eten. Buokiia ataei bwa a na korei ni karinani rinerine ake a karaoi ni katoa bong. Taekina koauana bwa Tamara are i Karawa e anganiira te inaomata n rinerine imarenan te raoiroi ao te buakaka, ao kaoiia ataei bwa a na kibakiba ke n uboiboi baia ni kukurei bwa a inaomata n rinerine.
-
Takakaro n te takakaro are ko taekina te taeka (n aron te ota) ao ataei atonga kaitarana (te roo). Karaoa te waaki ni kakukurei aei ni kabatiaa taina. Ni buokiia ataei bwa a na mataata bwa ngkana iai te kakaitara e buokiira ni karaoan te rinerine, wareka te moan itera n 2 Nibwaai 2:11 ao 2 Nibwaai 2:16. Tuangiia ataei karakinan te ataei are e kaririiaki bwa e na karaoa te rinerine ae kairua. Buokiia ataei n iangoa bwa tera kaitaran te rinerine anne, ao kaoiia bwa a na karaoa te kaotioti iaona. Taekina koauana bwa Tamara are i Karawa e kakabwaiaira ngkana ti rinea te eeti.
-
Anenea te anene ibukin karaoan te rinerine, n aron “I’m Trying to Be like Jesus” ke “Choose the Right Way” (Aia Boki n Anene Ataei, 78-79, 160-61), ao tuangiia ataei bwa tera ae a reiakinna man te anene ibukin karaoan te rinerine.
Reirei te Reirei: Ataei aika a Ikawai
I kakabwaiaaki ngkana I ongeaba.
Ngkana ataei a kakoaua ae te Atua e na kakabwaiaiia ngkana a kawakin tuua —e ngae ngkana kakabwaia akanne aki waekoa n roko—e na bebete irouiia karaoakin rinean te eeti.
Waaki ni Kakukurei aika a Kona ni Karaoaki
-
Buokiia ataei n rinanoi tabeua rinerine ake a karaoi Nibwaai ma tarina. Tabeua katooto, taraa 1 Nibwaai 2:11–16; 3:5–7; ao 18:9–11. Kaoiia bwa a na bane ni wareka 2 Nibwaai 1:20 ao tibwauaia bwa e aera Riaai e na anga te rongorongo aei nakoia natina.
-
Korei mwakoro ni kibu n taeka man 2 Nibwaai 1:20 iaon taian moti ni beebwa, ao marooroakina nanon mwakoro ni kibu n taeka aikanne. Kaoiia ataei bwa a na katikui beebwa ma taekaia ni kaeti n aron are e karinanaki n te kibu. Ni kaota te kaokoro i marenan ae e kakabwaiaki ao ae e kaakeaki, kaotia nakoia ataei te aroka ae maiureirei ao te baanikai ke mwaangan te kai ae e a tia ni maoto man te aroka. Tera te kaokoro i marenan te baanikai are e nim ma te aroka ao teuana are e koutaki man te aroka? Ti kanga n ae ti te arona ngaira ma te baanikai iaon te aroka ngkana ti kawakin ana tua te Atua? Kaoiia ataei bwa a na korei n aia tieno kawai are e kakabwaiaia iai te Atua ngkana a rinea te eeti.
E anganai te inaomata n rinerine te Atua.
E kainaomataira Iesu Kristo man te mate n rabwata ao te mate n tamnei (kamaenakoara ma te Atua ibukin ara bure) rinanon Ana Mwakuri ni Kamaiu ao Mangautina. Ni kona ni manga maeka ma Tamara are i Karawa, ti riai ni kabongana inaomatara n reitanako te rairannano ao ni keiakina ni maiuna te maiu ae e itiaki.
Waaki ni Kakukurei aika a Kona ni Karaoaki
-
Kaota tamnein Atam ao Ewa (taraa Te Boki n Tamnei n te Euangkerio, nambwa. 4), ao kaoiia ataei bwa a na tibwaua te bwai ae a ataia ibukin te bwai ae e riki nakon Atam ao Ewa n te Onaroka i Eten. Buokiia ataei ni karekei kaeka n 2 Nibwaai 2:22–27. Kabwarabwaraa bwa ibukin aia rinerine Atam ao Ewa, ti kakabwaiaaki n roko iaon te aba ao ni kabongana inaomatara n rinea ae e raoiroi ao n rairannano rinanon Ana Mwakuri ni Kamaiu Kristo ngkana ti karaoa te rinerine ae kairua.
-
Korei taekan te 2 Nibwaai 2:27 iaon te burakiboti. Buokiia ataei bwa a na kamatenanoa te kibu n taekinna ni kaokiokia ao a na bane ni iai aia tai ni kamaunai taeka ni katoaa te tai are a taekinna. Buokiia ataei n iangoia bwa e kangaa aron te maiu ngkana akea te rinerine. Bukin tera ngkai a kakaitau ibukin te rinerine?
-
Kaoiia ataei bwa a na tibwaua te bwai ae e a tia n riki nakoia ngke a karaoa te rinerine ae eeti. Tera aia namakin imwin karaoan te rinerine anne? Tera ae ti kona ni karaoia ni buokiira n rinea te eeti ngkana ti kariiriaki bwa ti na karaoa te kairua? Iangoia n anenea te anene ibukin karaoan te rinerine, n aron “Choose the Right” (Anene n Taromauri, nambwa. 239), ao kaoiia ataei bwa a na tibwaua te bwai are a reiakinna man te anene.
Iotebwa Timiti bon te “tia mamata ae e rineaki.”
Inanon 2 Nibwaai 3 Riaai e taekina kanoan te taetae ni burabeti ibukin Iotebwa Timiti. Ko kona ni kabongana te tai aei n reireia ataei ibukin ana mwakuri ni boong aika kaitira.
Waaki ni Kakukurei aika a Kona ni Karaoaki
-
Kaoiia ataei bwa a na kakaea n 2 Nibwaai 3:6–24 bwaai ake a kaotia bwa antai te burabeti are e taekinaki. Korei ni karinanii bwaai akanne iaon te burakibooti. Bukin tera ngkai e aranaki Iotebwa Timiti bwa “te tia mamata ae e rineaki”? Tera ae e a tia ni karaoia Iotebwa Timiti “ae moan te kakawaki nakoia [tarina]”? (kiibu 7).
-
Anenea te kuna n taromauri ibukin Iotebwa Timiti, n aron “Neboa Teuare” (Anene n Taromauri, nambwa. 27), ke mataku n te witeo are e kaoti mwakoron ana mwakuri, n aron ake a kuneaki n history.ChurchofJesusChrist.org/article/joseph-smith-video-downloads. Titirakiniia ataei bwa bukin tera a kakaitau ibukin te Burabeti Iotebwa Timiti.
Kaungaa te Kamatebwai n te Mweenga
Kaungaia ataei bwa a na tarai taai ake a na kona ni karaoi aia rinerine iai n te wiiki aei. Kaoiia bwa a na tauraoi n tibwauaia nakon te wiiki ae e na roko bwa tera ae a tia n rineiia ao tera mwiin te rinerine anne.
Kanakoraoan Ara Anga reirei
Ataei a kona n ataa ana kairiiri te Tamnei. Reireiniia ataei bwa namakinan te rau, te tangira, ao te kimwareirei are a karekea ngkana a taetae ke n anenea taekan Iesu Kristo ao Ana euangkerio e roko mai iroun te Tamnei ae Raoiroi. Aekakin namakin aikai a kona ni kakorakorai aia koaua.