“Tianuare 27–Beberuare 2. 1 Nibwaai 16–22: ‘N na Katauraoa te Kawai Imwaaimi,’” Nakomai, Iriirai—Ibukin te Moanrinan: Ana Boki Moomon 2020 (2020)
“Tianuare 27–Beberuare 2. 1 Nibwaai 16–22,” Nakomai, Iriirai—Ibukin te Moanrinan: 2020
Riaai ao te Riaona, iroun Joseph Brickey
Tianuare 27–Beberuare 2
1 Nibwaai 16–22
“N na Katauraoa te Kawai Imwaaimi”
Karaki aika anainano n 1 Nibwaai 16–22 a reirei koaua ake a kona ni kakabwaiaia ataein am kiraati. Wareki mwakoro aikai ao korei am namakin ake ko karekei.
Korea am Namakin
Kaungaa te Tibwatibwa
Korei taeka aikai iaon te burakibooti, ke kaoti tamneia: te Riaona, te kainikatebe, ao te booti. Kaoiia teniman ataei bwa a na rinea teuana te taeka ke te tamnei ao n tibwa mwakoron ana karaki Nibwaai are e kaotaki n te bwai anne. Anga te ibuobuoki ngkana e kainnanoaki.
Reirei te Reirei: Ataei aika a Uarereke
1 Nibwaai 16:10, 28–29; 18:8–13, 20–22
Te Uea e kona ni kawakinai ao ni kairai.
Reireiniia ataei bwa e ngae ngkana a kaitara ma te kaangaanga, te Uea e kona ni buokiia (taraa 1 Nibwaai 16:29).
Waaki ni Kakukurei aika a Kona ni Karaoaki
-
Kaota te kambwati nakoia ataei, te mwabe, ke te bwai teuana are e buokira ni kakaea kawaira, ao ni kabwarabwaraa aron kabonganaakin bwaai aikai. Kabotaui bwaai aikai nakon te Riaona ngkai ko kakimototoi karaki inanon 1 Nibwaai 16:10, 28–29 ao 18:9–13, 20–22. Kaotia bwa ngkana aki ongoeaba ana utu Riaai, te Riaona e aki mwakuri (taraa naba 1 Nibwaai 18:9–12, 20–22). Tera ae e buokiira ni kunea kawaira n okira Tamara are i Karawa n te bong aei?
-
Uota te bwaoki ae kanoana bwaai aika mwaiti are e kaota te kawai ni kabwarabwaraaki iai te tabo ke te kawai ni katobibia ana kateitei te ekaretia. Kabongana te bwaoki ao bwaai ake a kaota te kawai ake a tei ibukin te Riaona, ao anganiia ataei bwa a na ikaruoruo n rinea te bwai ake a kaoti kawai akanne ao ni keetina te tabo. Imwiiina baane mwananga nakon te tabo anne. Kabwarabwaraa bwa ngkana ti kaota te onimaki ao n irii ana kairi te Uea ake e anganiira, E na buokiira n oki nakoina (taraa Aramwa 37:38–42). E kanga Tamara are i Karawa ni kairiira ni kawaira n oki Nakoina?
I kona n riki bwa te banna ni katooto ae tamaroa nakoia au utu.
Ana reitaki Nibwaai ma ana utu n tain te kaangaanga e kona ni buokiia ataei n nooria bwa e ngae ngkana a uarereke, a kona n riki bwa banna ni katooto nakoia aia utu.
Waaki ni Kakukurei aika a Kona ni Karaoaki
-
Katabeia ataei n tatabemaniia bwa a na korea tamnein te bwai teuana ni karakinan ana kai ni katebe Nibwaai are e uruaki (taraa 1 Nibwaai 16:14–32), n aron Nibwaai, te kainikatebe, ke te Riaona. Ngkanne kabonganai tamnei ni karakina te karaki nakoia kain te kiraati, ao anganiia ataei bwa a na ikaruoruo ni karaoa naba anne. Ti na kanga n riki n ai aron Nibwaai ngkana ara utu a rinanon taai aika kaangaanga?
-
Kaoiia ataei n tatabemaniia bwa a na korea te mronron man te beebwa ao ni korea tamnein te ubu ae nanokawaki iaon te iterana ao ae kukurei iaon iterana are teuana. Ngke ko karakina rongorongon ana kainikatebe Nibwaai are e uruaki, kaoiia bwa a na kabongana tamnein te ubu ni kaota aron aia namakin ana utu Nibwaai inanon mwakoron te karaki aika a kakaokoro. E kanga Nibwaai ni buokiia ana utu bwa a na kukurei? Tera ae ti kona ni karaoi bwa a na kukurei ara utu?
Tamara are i Karawa E kona ni buokai ni karaoi bwaai aika a kaangaanga.
N ai aron Nibwaai, ataei ake ko reireiniia a reiakinna ni karaoi bwaai ake a taraa ni matoatoa. Bwaai ake e rinanona Nibwaai e kona ni buokiia n ataia bwa Tamara are i Karawa e na buokiia ngkana a bubuti.
Waaki ni Kakukurei aika a Kona ni Karaoaki
-
Karakina nakoia ataei rongorongon Nibwaai ngke e tuangaki bwa e na kabaa te te kaibuke, ni kabongana 1 Nibwaai 17:7–19 ao 18:1–4. Ko na bae ni kabongana naba “Mwakoro 7: Kabaan te Kaibuke” (Karaki man ana Boki Moomon, 21–22) ke witeo ake a irekereke iaona n rinanin te witeo n Ana Boki Moomon iaon ChurchofJesusChrist.org. Iteraniban te waaki n te wiiki aei e kona ni manga kamatoa te reirei are Tamara are i Karawa e buoka Nibwaai, ao E na buokiira naba.
-
Ni kabane anenea te kauoua ni kibu man “Nephi’s Courage” (Aia Boki n Anene Ataei, 120–21). Tera ae e buoka Nibwaai ni karekea te ninikoria ngke a bwainikiriinna tarina ibukin kataan kabaakin te kaibuke?
Reirei te Reirei: Ataei aika a Ikawai
1 Nibwaai 16:10, 28–29; 17:13–15; 18:8–13, 20–22
Ngkana I kawakin tuua, te Uea e na kairai.
Kabongana rongorongon ana utu Riaai ngke a kairaki iroun te Riaona ni kaotia nakoia ataei bwa e kanga te Atua ni kairiia ngkai a kataia ni karaoa Ana kantaninga.
Waaki ni Kakukurei aika a Kona ni Karaoaki
-
Rinea teuana ke e mwaiti man rongorongo aikai ni warekia ma ataei: 1 Nibwaai 16:10, 28–29; 17:13–15; ao 18:8–13, 20–22. Tuangiia bwa a na taratara te bwai ae ti riai ni karaoia ni karekea te kairiiri mai iroun te Atua ao maroroakina te bwai are a reiakinna.
-
Imwiin manga rinanoan karaki inanon 1 Nibwaai 16–18, intawiu ma tabeman ataei are angkoa a mwananga ma ana utu Riai. Ko kona n anga titiraki n aron aikai. Bukin tera ko kakaitau ibukin te Riaona? Tera ae ko riai ni karaoia bwa e na mwakuri te Riaona? (taraa 1 Nibwaai 16:28–29). Kaoa te kiraati bwa e na maroroakin bwaai ake e katauraoi te Uea ni kairiira inanon ara bong.
-
Tuangiia ataei bwa a na iangoia bwa a na kanga ni kona ni kabongana karakinan te Riaona ni buoka te rao ae e kainnanoia ni karaoa te babaire ae kakaawaki. Kaota am iango n reitaki ma 1 Nibwaai 16:10, 26–31 ao 18:9–22, a kona naba n nakon Aramwa 37:38–44. Tibwaua te bwai ae ko rinanona are e a tia ni buokiko iai Tamara are i Karawa inanon te tai ni kaanganga, ke kaoiia ataei bwa a na tibwaua teuana. Tera ae ti riai ni karaoia bwa ti aonga ni karekea Ana ibuobuoki?
Anuau ao au rinerine a kona ni karekea te bitaki ae raoiroi iaon au utu.
Ana onimaki Nibwaai bon te kakabwaia ae rangi n tamaroa ngkana e kaitara ana utu ma te kataaki. Ko na kanga ni buokiia ataei bwa a na reireinaki man ana banna ni katooto?
Waaki ni Kakukurei aika a Kona ni Karaoaki
-
Kaoiia ataei bwa a na korei aia tamnei ni kaota rongorongon ana kai ni katebe Nibwaai are e uruaki (taraa 1 Nibwaai 16:14–39). Manga rinanon te karaki ma ngaiia, ngkana e kainnanoaki. Ngkai a tibwatibwa iaon aia tamnei, buokiia bwa a na kinai aron ana kakaonimaki Nibwaai are e kakabwaiaia iai ana utu. Kaoiia ataei bwa a na iangoi kakaewenako ake a kaitara ma ngaia ke aia utu. Tera ae a kona ni karaoia n ira ana banna ni katooto Nibwaai?
-
Ni kabane wareki tabeua kiibu man 1 Nibwaai 16:21–32. Maroroakin tabeua kouru n aia utu ataei, n aron karaoan te bootaki n utu n te tairiki ni katoa tai ke te tataro n utu. A kanga ataei ni buokiia aia utu ni kakoroa bukin aia kouru? Kaoiia bwa a na baireia ni karaoa te bwai teuana ni buokiia aia utu ni kakoroa bukin aia kouru n te wiiki aei.
I kona ni kabotau koroboki aika tabu nakon maiu.
Buokiia ataei n noori karaki ni koroboki aika tabu bwa a nano riki nakon karaki—iai inanona reirei ake a kona ni kakabwaiai maiuia.
Waaki ni Kakukurei aika a Kona ni Karaoaki
-
Tuanga te ataei bwa e na wareka 1 Nibwaai 19:22–24 ni kabaibati, ao n tuangiia ataei te bwai ae a iangoia bwa e nanonaki “ni kabotau koroboki aika a tabu ni kabane” nakoira. Buokiia bwa a na kunea bwa e kanga Nibwaai ni kabotau rongorongo man koroboki aika tabu nakon te bwai are e rinanona ni karekean bwaatua aika buraati (taraa 1 Nibwaai 4:1–4; taraa naba Te Otinako 14). E kanga uringakin te karaki aei ni buoka Nibwaai ma tarina?
-
Rinanoi tabeua karaki are a tia n reiakinna ataei n rongorongon Riaai ma ana utu man 1 Nibwaai, ao kaoiia bwa a na tibwaua te bwai are a reiakinna man karaki aikai. Buokiia bwa a na iangoi bwaai inanon maiuia ake titebo ma karaki aikai. Te katooto, te Uea E tuanga Nibwaai bwa e na kabaa te kaibuke tao e na kauringiia taai are a kainnanoia ni karaoi bwaai aika a kaangaanga ao n ukora ana ibuobuoki te Uea.
Kaunga te Kamatebwai n te Mweenga
Kaoiia ataei bwa a na rinea te karaki man 1 Nibwaai 16–22 ao n tibwauaia ma aia utu bwa a kanga ni “kabotaua” te karaki anne ma maiuia.
Kanakoraoan Ara Anga reirei
Kabonganai karaki. Karaki a buokiia ataei n ota n ana reirei te euangkerio ibukina bwa a kabwarabwaraa bwa a kanga tabeman ni maiuakini reirei akanne.