“Kev Siv Los, Nrog Kuv Mus—Rau Ib Leeg thiab Tsev Neeg,” Los, Nrog Kuv Mus—Rau Ib Leeg thiab Tsev Neeg: Phau Tshiab 2023
“Kev Siv Los, Nrog Kuv Mus—Rau Ib Leeg thiab Tsev Neeg,” Los, Nrog Kuv Mus—Rau Ib Leeg thiab Tsev Neeg: 2023
Kev Siv Los, Nrog Kuv Mus—Rau Ib Leeg thiab Tsev Neeg
Phau Ntawv No Yuav Pab Leej Twg?
Phau ntawv no yuav pab txhua tus neeg thiab txhua tsev neeg hauv lub Koom Txoos. Yog npaj tseg kom pab koj kawm txog txoj moo zoo—txawm nyob ib leeg xwb los yog nrog koj tsev neeg. Yog tias koj tsis tau kawm txog txoj moo zoo ntau thaum yav tas los, phau ntawv no yuav pab koj pib ua li ntawd. Yog tias koj yeej ib txwm tau kawm txog txoj moo zoo lawm, phau ntawv no yuav pab koj txoj kev kawm haj yam muaj nqis.
Kuv Yuav Ua Li Cas Kom Siv Phau Ntawv No?
Siv phau ntawv no kom pab koj xwb. Tej zaum phau ntawv no yuav pab koj thiab koj tsev neeg kawm vaj lug kub ua ke. Tej zaum koj siv tau thaum muaj tsev neeg hmo ua ke. Tej txheej txheem qhia yeej qhia txog tej ntsiab cai tseem ceeb nyob hauv phau Tshiab, qhia txog tej kev kawm thiab tej yam ntxim saib ntxim ua rau koj ib leeg thiab koj tsev neeg, thiab muaj chaw rau koj sau koj tej kev tshoov siab.
Los, Nrog Kuv Mus—Rau Ib Leeg thiab Tsev Neeg yuav tsis pauv tej yam zoo uas koj ua lawm kom kawm txog txoj moo zoo. Cia li ua raws li tus Ntsuj Plig txoj kev qhia kom txiav txim seb koj yuav ua li cas kom kawm Vajtswv txoj lus.
Phau Ntawv Pab No Muaj Feem nrog tej Yam uas Ua Hauv lub Koom Txoos Li Cas?
Tej txheej txheem qhia hauv phau ntawv pab no yeej tau tso haud raws li kev teem sij hawm nyeem txhua lub lim tiam. Tej phau Los, Nrog Kuv Mus rau lub Koom Haum Me Nyuam Yaus, rau Kev Kawm Vaj Lug Kub, thiab rau tej pawg Pov Thawj Hwj Aloos thiab Koom Haum Ntxhais Hluas yeej raws kev teem sij hawm zoo ib yam. Xwv kom pab txhawb nqa koj txoj kev kawm thiab ua neej raws li txoj moo zoo hauv tsev, koj cov xib hwb hauv lub koom txoos yuav muab cib fim rau koj qhia txog tej yam uas muaj los rau koj, koj tej kev xav, thiab tej lus nug txog tej nqe vaj lug kub uas koj kawm hauv tsev.
Vim hais tias peb qhia Hnub Caiv Kev Kawm Vaj Lug Kub ob zaug ib lub hlis xwb, cov xib hwb qhia Hnub Caiv Kev Kawm Vaj Lug Kub xaiv tau kom tsis qhia ib tug txheej txheem qhia los sis tso ua ke kom raws kev teem sij hawm txhua lub lim tiam. Tej zaum yuav tsum ua li no (rau Kev Kawm Vaj Lug Kub thiab lub Koom Haum Me Nyuam Yaus)txog tej lub lim tiam thaum tsis muaj kev sib ntsib hauv lub Koom Txoos li qub vim muaj ceg txheem ntseeg lub rooj sab laj los sis lwm yam. Thaum muaj tej lub lim tiam zoo li no ces koj kawm tau Phau Tshiab hauv tsev mus ntxiv.
Puas Yog Kuv Yuav Tsum Ua Raws Li Kev Teem Sij Hawm No?
Kev teem sij hawm no yuav pab koj nyeem Phau Tshiab tiav thaum xyoo no tag lawm. Tsis tas li ntawd, qhov uas koj ua raws li kev teem sij hawm nrog lwm tus yuav pab koj kawm tej yam uas muaj nqis hauv tsev, hauv lub koom txoos, thiab lwm qhov chaw ntxiv. Tiam sis tsis txhob xav tias koj yuav tsum ua raws li kev teem sij hawm no los sis koj yuav tsum nyeem txhua nqe; nws yeej yog ib yam kom pab koj nyeem zuj zus mus. Qhov tseem ceeb yog qhov uas koj kawm txog txoj moo zoo ntawm yus ib leeg thiab nrog koj tsev neeg ua ke.