Kev Siv cov Nkauj Dawb Ceev Thaum Koj Kawm txog Txoj Moo Zoo

Kev hu cov nkauj ntawm lub Koom Haum Me Nyuam Yaus thiab cov nkauj qhuas Vajtswv yuav foom koob hmoov rau koj thiab koj tsev neeg ntau nplua mias. Tej tswv yim no yuav pab koj siv cov nkauj dawb ceev thaum koj siv zog kawm thiab ua raws li txoj moo zoo.

• Kawm cov ntsiab cai txog cov lus qhuab qhia. Nrhiav cov lus tseeb nyob hauv cov nkauj uas koj hu los sis mloog. Yog koj ua li no tej zaum yuav pab koj sib tham nrog lwm tus txog cov lus tseeb no niaj hnub. Cia li hu nkauj los sis mloog cov nkauj hauv lub Koom Haum Me Nyuam Yaus los sis cov nkauj qhuas Vajtswv uas qhia txog Yexus Khetos thiab Nws txoj moo zoo. Tsom ntsoov rau tej yam uas tus Vaj Ntsuj Plig Dawb Huv ua tim khawv txog tus Cawm Seej thiab Nws tej lus qhia.

• Cia li nco qab tias cov nkauj muaj hwj chim heev. Kev hu nkauj los sis kev mloog cov nkauj hauv lub Koom Haum Me Nyuam Yaus thiab cov nkauj qhuas Vajtswv yuav pab koj tau koob hmoov thaum koj xav tau. Piv txwv hais tias, kev hu ib zaj nkauj yuav pab nplij ib tug me nyuam yaus thaum nws yuav tsaug zog, tsim kev xyiv fab thaum koj tsev neeg ua hauj lwm ua ke, txhawb nqa ib tug neeg zej zog uas mob, los sis nplij ib tug neeg uas txhawj xeeb.

• Qhia tej yam los ntawm lub neej. Qhia tej xwm txheej los ntawm koj tus kheej thiab tsev neeg uas qhia txog tej ntsiab lus ntawm cov nkauj no. Koj kuj qhia tau txog tej dab neeg ntawm vaj lug kub txog tej ntsiab lus no.

• Hais kom koj tsev neeg koom nrog koj. Koj tsev neeg yuav kawm ntxiv los ntawm tej zaj nkauj yog tias lawv koom nrog koj hu nkauj. Yog koj xav kom koj tsev neeg pab, tej zaum koj yuav xav caw ib tug me nyuam uas hlob zog pab kawm ib zaj nkauj rau cov me nyuam yaus los sis caw cov me nyuam qhia koj tsev neeg ib zaj nkauj uas lawv tau kawm hauv lub Koom Haum Me Nyuam Yaus. Tej zaum koj yuav xav cia koj tsev neeg coj nkauj ib leeg zuj zus.

• Cia li tawm tswv yim. Siv ob peb txoj kev qhia cov nkauj dawb ceev nrog koj tsev neeg. Piv txwv hais tias, tej zaum koj yuav xav piav tes taw txog tej lus nyob hauv ib zaj nkauj. Los sis tej zaum koj thiab koj tsev neeg yuav xav ua yeeb yam txog ib zaj nkauj ib leeg zuj zus thaum lwm tus sim twv seb yog zaj nkauj twg. Tej zaum koj tsev neeg yuav nyiam hloov lawv txoj kev hu nkauj xws li hu sai los sis maj mam hu nkauj los sis hu nkauj nrov los yog ua lub suab yau yau. Qhov app Txoj Moo Zoo cov Ntawv thiab qhov app Txoj Moo Zoo rau cov Me Nyuam Yaus muaj tej kev kaw suab thiab tej daim video uas yuav pab koj kawm tej zaj nkauj no. Tej zaum koj yuav xav tso cov nkauj dawb ceev ua ke kom mloog tej zaj nkauj ntawd.

Yog xav tau tswv yim ntxiv, saib tej tshooj “Using Music to Teach Doctrine” thiab “Helping Children Learn and Remember Primary Songs and Hymns,” nyob hauv “Instructions for Singing Time and the Children’s Sacrament Meeting Presentation” nyob hauv Come, Follow Me—For Primary.