niam tsev thiab ib tug me nyuam kawm vaj lug kub

Tej lub Tswv Yim rau Tsev Neeg Kev Kawm Vaj Lug Kub

Tsev neeg kev kawm vaj lug kub yeej yog ib txoj kev tseem ceeb heev kom pab nej tsev neeg hnov tus Vaj Ntsuj Plig Dawb Huv thiab kawm txoj moo zoo. Qhov uas nej tsev neeg nyeem npaum li cas los sis nyeem ntev li cas los tsis tseem ceeb npaum li qhov uas nej sim nyeem tsis tu tsis tseg. Thaum koj ua kom kev kawm vaj lug kub ua ib qho tseem ceeb hauv koj tsev neeg lub neej, koj yuav pab koj tsev neeg nyob ze Leej Txiv Saum Ntuj Ceeb Tsheej thiab Yexus Khetos thiab txhawb lawv zaj lus tim khawv kom muaj lub hauv paus ntawm Nws txoj lus. Cia li xav seb koj puas xav sib tham ua ke txog tej lus nug no:

• Koj tsev neeg yuav ua li cas kom ib leeg txhawb nqa ib leeg kawm vaj lug kub?

• Koj tsev neeg yuav ua li cas kom ib leeg txhawb nqa ib leeg qhia txog tej yam uas lawv kawm?

• Koj yuav ua li cas kom qhia tias tej ntsiab cai uas koj kawm los ntawm Phau Tshiab tseem ceeb npaum li cas thaum muaj cib fim qhia txhua hnub?

Cia li nco ntsoov tias lub tsev yog qhov chaw zoo tshaj plaws rau kev kawm txog txoj moo zoo. Tej kev kawm thiab qhia txog txoj moo zoo hauv tsev yeej yog tej txoj kev uas siv tsis tau thaum kawm hauv lub Koom Txoos. Cia li siv tswv yim thaum koj xav txog tej yam uas yuav pab koj tsev neeg kawm los ntawm vaj lug kub. Cia li xav txog tej tswv yim no uas yuav pab txhawb nqa koj tsev neeg kev kawm vaj lug kub.

ib tsev neeg thiab lub Koom Txoos cov thawj coj hu nkauj ua ke nyob hauv ib lub tsev

Hu Nkauj

Hu tej zaj nkauj uas qhia txog tej ntsiab cai los ntawm cov vaj lug kub. Muaj ib zaj nkauj qhuas Vajtswv los sis ib zaj nkauj rau cov me nyuam hu nkauj nyob hauv tus txheej txheem qhia txhua lub lim tiam. Tej zaum koj yuav xav nug koj tsev neeg txog tej lus los sis tej kab lus hauv cov nkauj no. Koj tsev neeg hu nkauj los tau, es tsis tas li ntawd xwb, lawv txawj piav tes txog tej yam hauv cov nkauj los sis mloog cov nkauj thaum lawv ua lwm yam ntxim saib ntxim ua. Yog xav tau tswv yim ntxiv, saib “Kev Siv cov Nkauj Dawb Ceev Thaum Koj Kawm txog Txoj Moo Zoo” nyob hauv phau no.

Qhia txog tej Nqe Vaj Lug Kub uas Muaj Nqi

Nrog koj tsev neeg siv sij hawm qhia txog tej nqe vaj lug kub uas muaj nqis rau lawv thaum lawv kawm ntawm lawv ib leeg.

Siv Koj tej Lus

Caw koj tsev neeg hais ntsiab lus txog tej yam uas lawv kawm los ntawm cov vaj lug kub.

Ua Neej Raws Li cov Vaj Lug Kub Qhia

Tom qab nej nyeem ib nqe vaj lug kub, hais kom koj tsev neeg qhia tias lawv yuav ua neej li cas raws li tej yam uas vaj lug kub qhia li cas.

Hais tej Lus Nug

Caw koj tsev neeg nug txog txoj moo zoo, ces siv sij hawm nrhiav tej nqe uas pab tau kom teb tej lus nug ntawd.

Tso Ib nqe Vaj Lug Kub rau Saib

Xaiv ib nqe vaj lug kub uas muaj nqis rau nej, thiab tso rau ib qho chaw uas koj tsev neeg yuav pheej saib. Hais kom txhua tus hauv koj tsev neeg ib leeg zuj zus xaiv ib nqe vaj lug kub kom tso rau saib.

niam tsev thiab cov me nyuam kawm vaj lug kub

Sau Ntawv txog Vaj Lug Kub

Nrog koj tsev neeg, xaiv ob peb nqe vaj lug kub uas koj xav sib tham txog hauv lub lim tiam tom ntej.

Cim Ntsoov tej Nqe Vaj Lug Kub

Xaiv ib nqe vaj lug kub uas muaj nqis rau koj tsev neeg, thiab hais kom koj tsev neeg rov qab hais txhua hnub los sis ua txoj kev ua si kom pab lawv cim ntsoov.

Siv Ib Yam Khoom Qhia

Nrhiav tau tej yam khoom uas qhia txog txoj moo zoo tej ntsiab cai nyob hauv tej nqe vaj lug kub uas koj tsev neeg nyeem. Caw koj tsev neeg kom sib tham txog qhov uas yam khoom ntawd piv txog tej lus qhia hauv vaj lug kub.

Xaiv Ib lub Ntsiab Lus

Cia koj tsev neeg ib leeg zuj zus xaiv ib lub ntsiab lus uas koj tsev neeg yuav kawm ua ke. Siv Phau Qhia txog Vaj Lug Kub (scriptures.ChurchofJesusChrist.org) kom nrhiav tej nqe vaj lug kub txog ntsiab lus ntawd.

Kos Duab

Nyeem ob peb nqe nrog koj tsev neeg, ces cia koj tsev neeg siv sij hawm kos duab txog tej yam uas nej nyeem. Siv sij hawm sib tham txog txhua tus daim duab.

Ua Yeeb Yam txog Ib zaj Dab Neeg

Tom qab koj nyeem ib zaj dab neeg, hais kom koj tsev neeg ua yeeb yam txog zaj ntawd. Tom qab ntawd, sib tham txog qhov uas zaj ntawd qhia txog tej xwm txheej uas koj thiab koj tsev neeg raug hauv nej lub neej.

Thawj Tswj Hwm Russell M. Nelson hais tias: “Kuv cog lus hais tias thaum nej rau siab ntso kho nej lub tsev kom ua lub hauv paus rau txoj kev kawm txoj moo zoo, nyob nyob ces nej tej Hnub Caiv yuav ua rau nej zoo siab kawg. Nej cov me nyuam yuav zoo siab hlo kawm thiab ua raws li tus Cawm Seej tej kev qhia, thiab dab ntxwg nyoog lub hwj chim hauv nej lub neej thiab nej lub tsev yuav tsawg zuj zus mus. Yuav muaj tej kev pauv loj uas kav ntev mus hauv nej tsev neeg” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Liahona, Kaum Ib Hlis Ntuj 2018, 113).