“Faaopoopoga: Sauniaina o Lau Fanau mo se Olaga Atoa i luga o le Ala o feagaiga a le Atua,” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023 (2022)

“Faaopoopoga,” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023

Faaopoopoga

Sauniaina o Lau Fanau mo se Olaga Atoa i luga o le Ala o Feagaiga a le Atua

Ona e alofa o Ia ia te oe, faatuatuaina oe, ma silafia lou gafatia, ua tuuina atu ai e le Tama Faalelagi ia te oe le avanoa e fesoasoani ai i lau fanau ia ulu atu ma alualu i luma i luga o Lana ala o feagaiga, le ala i le ola e faavavau (tagai i le Mataupu Faavae ma Feagaiga 68:25–28). E aofia ai le fesoasoani ia i latou e saunia e osia ma tausia feagaiga paia, e pei o le feagaiga o le papatisoga ma feagaiga na osia i le malumalu. E ala i nei feagaiga, o le a fusia ai e lau fanau i latou lava i le Faaola, o Iesu Keriso.

E tele auala e saunia ai lau fanau mo lenei malaga i luga o le ala o feagaiga, ma o le a fesoasoani le Tama Faalelagi ia te oe ia iloa le auala sili e fesoasoani ai ia i latou. A o e sailia musumusuga, ia manatua e le o aoaoga uma e tutupu i le taimi o lesona faatulagaina. O le mea moni, o se vaega o le mea e matuai mamana ai le aoaoina i le aiga, o le avanoa lea e aoao ai e ala i faataitaiga ma e ala i taimi laiti, ma faatauvaa—le ituaiga lea e tupu fua i le gasologa o le olaga o aso taitasi. E pei lava o le mulimuli i le ala o feagaiga o se faagasologa faifai pea, i le olaga atoa, e faapena foi le aoaoina e uiga i le ala o feagaiga. (Tagai i le “Home and Family,” Aoao Atu i le Ala a le Faaola [2022], 30–31.)

E tele auala e saunia ai lau fanau mo la latou malaga i luga o le ala o feagaiga a le Atua.

O nisi nei o manatu e ono taitai atu ai i nisi musumusuga. E mafai ona e maua ni manatu faaopoopo mo le aoaoina o tamaiti ua matutua o le Peraimeri i le “Sauniaina o Fanau mo se Olaga Atoa i luga o le Ala o Feagaiga a le Atua” i le Sau, Mulimuli Mai ia te A’u—Mo le Peraimeri.

Papatisoga ma le Faamauga

Na aoao mai Nifae e faapea o “le faitotoa e tatau ona [tatou] ulu atu ai” i le ala o feagaiga “o le salamo ma le papatisoga i le vai” (2 Nifae 31:17). O au taumafaiga e fesoasoani i lau fanau e saunia ai mo le papatisoga ma le faamauga e mafai ona tutumau ai o latou vae i lena ala. O nei taumafaiga e amata i le aoao atu e uiga i le faatuatua ia Iesu Keriso ma le salamo. E aofia ai foi le aoao atu e uiga i le auala tatou te faafouina ai a tatou feagaiga o le papatisoga e ala i le tagofia o le faamanatuga i vaiaso taitasi.

O nisi nei o punaoa e mafai ona fesoasoani ia te oe: 2 Nifae 31; Autu o le Talalelei, “Papatisoga,” topics.ChurchofJesusChrist.org.

Soo se taimi lava e te maua ai se aafiaga e faamalosia ai lou faatuatua i le Tama Faalelagi ma Iesu Keriso, faasoa atu i lau tama. Fesoasoani ia te ia ia malamalama o le faatuatua o se mea e mafai ona tuputupu ae malosi ma malosi atu i le olaga atoa. O a nisi o mea e mafai e lau tama ona fai e atiina ae ai se faatuatua malosi atu ia Keriso a o lei papatisoina o ia?
Pe a faia e lau tama se filifiliga sese, ia tautala fiafia e uiga i le meaalofa o le salamo. Ma pe a e faia se filifiliga sese, faasoa atu le olioli e oo mai pe a e salamo. Molimau atu ona sa puapuagatia Iesu Keriso ma maliu mo a tatou agasala, o lea na Ia tuuina mai ai ia i tatou le mana e suia ai. A sailia e lau tama le faamagaloga, ia faamagalo ma le saoloto ma le olioli.
Ta’u atu i lau fanau e uiga i lou papatisoga. Faaali ata ma faasoa atu manatuaga. Talanoa e uiga i ou lagona, o le ala na fesoasoani ai au feagaiga o le papatisoga ia te oe e iloa atili ai Iesu Keriso, ma auala o loo latou faamanuiaina ai pea lou olaga. Uunaia lau tama e fai ni fesili.
A i ai se papatisoga i lou aiga po o lau uarota, ave lau tama e vaai i ai. Talanoa faatasi e uiga i mea na e vaaia ma lagonaina ma lau tama. Afai e mafai, talanoa i le tagata o loo papatisoina ma fai atu fesili e pei o nei: “Na faapefea ona e faia lenei faaiuga? Na faapefea ona e saunia?”
Soo se taimi lava e te matauina ai lau tama o faia se mea na ia folafola atu e fai, ia fai atu se faaviivii faamaoni. Ta’u i ai o le tausia o tautinoga e fesoasoani lea ia i tatou e saunia ai e tausia feagaiga tatou te osia pe a tatou papatiso. O le a le mea tatou te folafola atu i le Atua pe a tatou papatiso? O le a le mea ua Ia folafola mai ia i tatou? (tagai Mosaea 18:8–10, 13).
Pe a oulua maua faatasi ma lau tama se aafiaga paia (e pei o le i ai i le lotu, a o faitauina tusitusiga paia, po o le auauna atu i se tasi), ta’u atu ia te ia e uiga i lagona po o uunaiga faaleagaga o ia te oe. Valaaulia lau tama e faasoa mai ona lagona. Matau auala eseese e mafai ai e le Agaga ona talanoa atu i tagata, e aofia ai auala e fetalai patino mai ai o Ia ia te oe. Fesoasoani i lau tama ia iloa taimi atonu na ia lagonaina ai le uunaiga a le Agaga Paia.
Maimoa faatasi i ni nai vitio i le tuufaatasiga a le Potutusi o le Talalelei ua faaulutalaina “Faalogo ia te Ia!” Talanoa faatasi e uiga i auala eseese e lagona ai e auauna a le Alii Lona siufofoga. Valaaulia lau tama e tusi se ata pe fai se vitio o le auala na te lagonaina ai le siufofoga o le Faaola.
Talanoa pe na faapefea ona faamanuiaina oe i le avea ai ma se tagata O Le Ekalesia a Iesu Keriso o le Au Paia o Aso e Gata Ai. Na faapefea ona e latalata atili atu i le Tama Faalelagi ma Iesu Keriso a o e auauna atu i isi ma a o auauna atu isi ia te oe? Fesoasoani i lau tama e mafaufau i auala e auauna atu ai ma faamalosia isi o se tagata o le Ekalesia.
Ia avea le faamanatuga o se mea paia ma fiafia na tupu i lou aiga. Fesoasoani i lau tama e fuafua ni auala e taulai atu ai ia Iesu Keriso i le taimi o le faamanatuga. E faapefea ona tatou faaali atu e paia le faamanatuga ia i tatou?
O le mekasini o le Uo e masani ona aofia ai tusiga, tala, ma gaoioiga e fesoasoani lea i tamaiti e saunia mo le papatisoga ma le faamauga. Tuu atu i lau tama e filifili tusiga e faitau ma fiafia faatasi ma oe. (Tagai foi i le tuufaatasiga “Saunia mo le Papatisoga” i le vaega a tamaiti o le Potutusi o le Talalelei.)

Ata
tamaitiiti o loo papatiso

Na aoao mai Nifae e faapea o “le faitotoa e tatau ona [tatou] ulu atu ai” i le ala o feagaiga “o le salamo ma le papatisoga i le vai” (2 Nifae 31:17).

Aoaoina o Lau Fanau e uiga i le Perisitua

O le perisitua o le pule ma le mana o le Atua lea Na te faamanuiaina ai Ana fanau. O loo i ai le perisitua a le Atua i luga o le fogaeleele i Le Ekalesia a Iesu Keriso o le Au Paia o Aso e Gata Ai. O tagata uma o le Ekalesia o e tausia a latou feagaiga ua faamanuiaina i le mana o le perisitua a le Atua i o latou aiga e faamalosia ai i latou lava ma o latou aiga (tagai Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 3.5, ChurchofJesusChrist.org). O lenei mana o le a fesoasoani i tagata o le ekalesia i le faia o le galuega a le Atua o le faaolataga ma le faaeaga i o latou olaga patino ma aiga (tagai Tusitaulima Aoao, 2.2).

Tatou te maua sauniga e ala i le pule o le perisitua. Pe a galulue alii ma tamaitai i valaauga o le Ekalesia, latou te faia i le pule o le perisitua, i lalo o le taitaiga a i latou o e umia ki o le perisitua. O fanau uma a le Tama Faalelagi—o Ona atalii ma Ona afafine—o le a faamanuiaina a o latou malamalama atili i le perisitua.

Ina ia aoao atili e uiga i le perisitua, tagai Russell M. Nelson, “O Oa Faaleagaga,” Liahona, Nov. 2019, 76–79; Russell M. Nelson, “O Le Tau o le Mana o le Perisitua,” Liahona, Me 2016, 66–69; “Mataupu Faavae o le Perisitua,” mataupu 3 i le Tusitaulima Aoao.

Ia avea sauniga o le perisitua o se vaega faifai pea o lou olaga faaleaiga. Mo se faataitaiga, fesoasoani i lau tama e saunia faaleagaga mo le faamanatuga i vaiaso taitasi. Fautuaina lau tama e saili faamanuiaga faaleperisitua pe a ma’i o ia pe manaomia le faamafanafanaga po o le taitaiga. Fai o se mausa le ta’u atu o auala o loo faamanuiaina ai e le Alii lou aiga e ala i le mana o le perisitua.
A o outou faitau faatasi i tusitusiga paia, vaavaai mo avanoa e talanoaina ai pe faapefea ona faamanuiaina e le Atua tagata e ala i Lona mana. Faasoa atu ou lava aafiaga i se taimi na faamanuiaina ai oe e le Atua e ala i Lana perisitua. Mo ni faataitaiga o faamanuiaga tatou te maua mai le Atua e ala i le perisitua, tagai i le Tusitaulima Aoao, 3.2, 3.5.
Aoao le laina o le pule o le perisitua a se tasi i lou aiga. (E mafai e i latou e umia le Perisitua Mekisateko ona maua se kopi o la latou laina o le pule e ala i le auina atu o se imeli i le LineofAuthority@ChurchofJesusChrist.org; tagai foi i le “Talosaga se Laina o le Pule o le Perisitua” i le Nofoaga Autu mo Fesoasoaniga i le ChurchofJesusChrist.org.) Talanoa pe aisea e taua ai le iloa o le pule o le perisitua e sau mai ia Iesu Keriso lava Ia. Aisea ua Ia faasoa mai ai ia i tatou?
Aoao lau tama a uma le papatisoga, e mafai ona ia maua le mana o le perisitua e ala i le tausia o feagaiga o le papatisoga. Toe faamanatu faatasi le savali a Russell M. Nelson “O Oa Faaleagaga” (Liahona, Nov. 2019, 76–79). Tau i lau tama auala na aumaia ai e sauniga o le perisitua le mana o le Atua i lou olaga. Mo se lisi o nisi o auala ua faamanuiaina ai i tatou i le mana o le perisitua, tagai i le Tusitaulima Aoao, 3.5.
Talanoaina le fesili “E faape’i le auauna a le Alii?” Faitau faatasi le Mataupu Faavae ma Feagaiga 121:36–42, ma vaavaai mo tali. Soo se taimi lava e te matauina ai lau tama (po o se isi) o faaaogaina se tasi o mataupu faavae po o uiga i nei fuaiupu, ia faailoa atu i ai.
Pe afai e faaaogaina e oe po o lau tama se ki e tatala ai se faitotoa pe faaola ai se taavale, faaalu sina taimi e faatusatusa ai na ki i ki o loo umia e taitai perisitua. (Mo se faauigaga o ki o le perisitua, tagai i le Tusitaulima Aoao, 3.4.1). O a mea e “tatala” pe “faaola” e ki o le perisitua mo i tatou? Tagai foi Gary E. Stevenson, “O Fea o i ai Ki ma le Pule o le Perisitua?,” Liahona, Me 2016, 29–32; “O Fea o I Ai Ki?” (vitio), ChurchofJesusChrist.org.
Pe a vaetofiaina oe mo se valaauga, valaaulia lau tama e auai, pe a mafai. Ia vaai lau tama o e faataunuuina lou valaauga. E mafai foi ona e vaavaai mo ni auala talafeagai e mafai ona ia fesoasoani ai ia te oe. Faamatala pe na faapefea ona e lagonaina le mana o le Alii i lou valaauga.

Alu i le Malumalu—Papatisoga ma Faamauga mo e ua Maliliu

O malumalu o se vaega o le fuafuaga a le Tama Faalelagi mo Lana fanau. I totonu o malumalu, tatou te osia ai feagaiga paia ma le Tama Faalelagi a o tatou auai i sauniga paia, o mea uma ia e faasino ia Iesu Keriso. Ua saunia e le Tama Faalelagi se ala mo Ana fanau uma e osia ai feagaiga ma auai i sauniga, e aofia ai i latou e lei mauaina i na vaega i lenei olaga. I le amataga o le tausaga e atoa i ai lona 12 tausaga, ua lava le matua o lau tama e papatiso ai ma faamauina i le malumalu mo tuaa ua maliliu.

Ina ia aoao atili e uiga i papatisoga ma faamauga mo e ua maliliu, tagai i le “About Proxy Baptism and Confirmation,” temples.ChurchofJesusChrist.org.

Auai soo atu i le malumalu e tusa ma avanoa e te maua. Talanoa i lau tama i le mafuaaga e te alu ai ma le ala e fesoasoani ai le malumalu e te lagona ai le latalata atili i le Tama Faalelagi ma Iesu Keriso.
Iloilo ma talanoaina faatasi ia fesili o pepa faataga o le malumalu . Talanoa i lau tama e uiga i le mea e tupu i se faatalanoaga o se pepa faataga o le malumalu. Faasoa atu i le taua o le i ai o se pepa faataga o le malumalu ia te oe.
Faitau faatasi le Malaki 4:6. Talanoa pe faapefea ona liliu atu o outou loto i o outou tuaa. Aoao atili e uiga i ou tuaa e ala i le suesueina faatasi o le talafaasolopito o lou aiga i le FamilySearch.org. Vaavaai mo tuaa o e manaomia ona papatiso ma faamauina. E mafai ona fesoasoani ia te oe se faufautua o le malumalu ma talafaasolopito o aiga.
Iloilo faatasi nisi o punaoa i le tuufaatasiga ua faaulutalaina “Malumalu” i le vaega a tamaiti o le Potutusi o le Talalelei. (Tagai foi i le “Sauniaina o Lou Alo mo Papatisoga ma Faamauga o le Malumalu” i le ChurchofJesusChrist.org.)

Mauaina o se Faamanuiaga Faapeteriaka

O se faamanuiaga faapeteriaka e mafai ona avea o se punavai o le taitaiga, faamafanafanaga, ma musumusuga. O loo i ai fautuaga patino mai le Tama Faalelagi ia i tatou ma e fesoasoani tatou te malamalama ai i lo tatou faasinomaga ma le faamoemoega e faavavau. Fesoasoani i lau tama e saunia e maua se faamanuiaga faapeteriaka e ala i le aoaoina o ia i le taua ma le natura paia o faamanuiaga faapeteriaka.

Ina ia aoao atili, tagai i Autu o le Talalelei, “Faamanuiaga Faapeteriaka,” topics.ChurchofJesusChrist.org.

Faasoa atu i lau tama lou aafiaga o le mauaina o se faamanuiaga faapeteriaka. E mafai ona e faasoa atu mea e pei o le auala na e saunia ai e maua, pe na faapefea ona fesoasoani ia te oe e latalata atili atu ai i le Atua, ma le auala e te faaaogaina ai le faamanuiaga i lou olaga. E mafai foi ona e valaaulia lau tama e talanoa i isi tagata o le aiga o e ua mauaina o latou faamanuiaga faapeteriaka.
Faaalu se taimi e iloilo faatasi ai nisi o punaoa i Autu o le Talalelei, “Faamanuiaga Faapeteriaka.” Ina ia aoao e uiga i le faagasologa o le mauaina o se faamanuiaga faapeteriaka, tagai i le Tusitaulima Aoao, 18.17.
Afai e i ai ni ou tuaa na mauaina faamanuiaga faapeteriaka, atonu e musuia le faitauina faatasi ma lau tama o nisi o na faamanuiaga. Ina ia talosagaina faamanuiaga o tuaa ua maliliu, alu i totonu i le ChurchofJesusChrist.org, kiliki le aikona o le faitotoa i le tulimanu taumatau pito i luga o le lau, ma filifili le “Faamanuiaga Faapeteriaka.”
A uma ona maua e lau tama se faamanuiaga faapeteriaka, valaaulia soo se tagata o le aiga sa i ai e faamaumau o latou lagona ma faasoa atu i lau tama.

O Le Alu i le Malumalu—o le Faaeega Paia

E finagalo le Atua e faaee, pe faamanuia, Ana fanau uma i le “mana mai lugā” (Mataupu Faavae ma Feagaiga 95:8). E na o le faatasi ona tatou o i le malumalu ina ia maua o tatou lava faaeega paia, ae o feagaiga tatou te osia ma le Atua ma le mana faaleagaga Na te tuuina mai ia i tatou o se vaega o le faaeega paia e mafai ona faamanuiaina ai i tatou i aso uma o o tatou olaga.

Ina ia aoao atili e uiga i le faaeega paia o le malumalu, tagai i le “E Uiga i le Faaeega Paia o le Malumalu,” temples.ChurchofJesusChrist.org; Russell M. Nelson, “Ia Saunia mo Faamanuiaga o le Malumalu,” Liahona, Oke. 2010, 41–51.

Faaali se ata o le malumalu i totonu o lou aiga. Tau atu i lau tama e uiga i lagona e oo ia te oe i totonu o le malumalu. Talanoa soo e uiga i lou alofa mo le Alii ma Lona maota ma feagaiga na e osia iina.
Suesue faatasi temples.ChurchofJesusChrist.org. Faitau faatasi tusiga e pei o le “E Uiga i Le Faaeega Paia o le Malumalu” ma le “Saunia mo le Maota o le Alii.” Tuu i lau tama e fai soo sana fesili e uiga i le malumalu. Mo le taitaiga e uiga i mea e mafai ona e talanoa i ai i fafo atu o le malumalu, tagai i le savali a Elder David A. Bednar “Saunia e Maua Mea Manaomia Uma” (Liahona, Me 2019, 101–4; tagai faapitoa lava i le vaega ua faaautuina “Aoaoina ma le Sauniuniga mo le Malumalu e Faatotonugalemu-i-le-Aiga ma Lagolagoina-e-le-Ekalesia”).
A o e auai ma lau tama pe molimauina isi sauniga (e pei o le faamanatuga po o se faamanuiaga o le faamalologa), faaalu sina taimi e talanoaina ai faatusa o loo aofia ai i le sauniga. O a mea o faatatau i ai faatusa? O faapefea ona molimau mai e uiga ia Iesu Keriso? E mafai ona fesoasoani lenei mea i lau tama e saunia ai e mafaufau loloto i le uiga faafaatusa o sauniga o le malumalu, lea foi e molimau ia Iesu Keriso.
Fesoasoani i lau tama ia matau le ala o loo ia tausia ai feagaiga o le papatisoga o loo faamatalaina i le Mosaea 18:8–10, 13. Fesoasoani foi i lau tama ia matau le auala o loo faamanuiaina ai o ia e le Alii. Fausia le talitonuga o lau tama i lona tomai e tausia feagaiga.
Talanoa e le aunoa e uiga i le auala e taiala ai e au feagaiga o le malumalu au filifiliga ma fesoasoani ia te oe e latalata atili atu ai ia Iesu Keriso. E mafai ona e faaaogaina le Tusitaulima Aoao, 27.2, e iloilo ai feagaiga tatou te osia i le malumalu.

Auauna atu i se Misiona

Na aoao mai Elder David A. Bednar: “O le mea sili ona taua e tasi e mafai ona e faia ina ia saunia ai mo se valaauga e auauna atu, o le avea lea ma se faifeautalai a o lei taitai ona e alu i se misiona. … O le autu e le o le alu i le misiona; ae, o le autu o le avea ma se faifeautalai ma auauna atu i o tatou olaga atoa ma o tatou loto atoa, mafaufau atoa, manatu atoa, ma le malosi atoa. … O loo outou sauniuni atu mo se galuega faafaifeautalai o le olaga atoa” (“Avea ma se Faifeautalai,” Liahona, Nov. 2005, 45–46). O aafiaga ua avea ai lau tama ma se faifeautalai o le a faamanuiaina ai o ia e faavavau, e le mo na o le vaitaimi e mafai ai ona ia auauna atu o se faifeautalai.

Ina ia aoao atili, tagai Russell M. Nelson, “Talai Atu o le Talalelei o le Filemu,” Liahona, Me 2022, 6–7; M. Russell Ballard, “O Le Galuega Faafaifeautalai ua Faamanuiaina ai Lo’u Olaga e Faavavau,” Liahona, Me 2022, 8–10; Sauniuniga a le Faifeautalai: Fetuunai i le Olaga Faafaifeautalai, ChurchofJesusChrist.org.

Fai se faataitaiga pe faapefea ona faasoa atu le talalelei i ni auala masani. Ia mataala i taimi uma i avanoa e faasoa atu ai i isi ou lagona e uiga i le Tama Faalelagi ma le Faaola ma faamanuiaga e te maua o se tagata o Lana Ekalesia. Valaaulia isi e auai faatasi ma lou aiga i gaoioiga e faatatau i le Ekalesia ma le aiga.
Vaavaai mo ni avanoa e fegalegaleai ai lou aiga ma faifeautalai. Valaaulia i latou e aoao au uo, pe ofo atu e tuu atu ia i latou e aoao tagata i lou fale. Fesili atu i faifeautalai e uiga i aafiaga o loo latou mauaina ma pe faapefea ona fesoasoani le galuega faafaifeautalai ia i latou e faalatalata atili atu ai ia Iesu Keriso. Fesili atu foi po o le a se mea sa latou faia (pe moomoo maimau pe ana latou faia) e saunia ai e avea ma faifeautalai.
Afai na e auauna atu i se misiona, talanoa tuusao ma masani e uiga i ou aafiaga. Pe valaaulia ni uo po o tagata o le aiga o e na auauna atu i ni misiona e talanoa e uiga i a latou misiona. E mafai foi ona e talanoa e uiga i auala na e faasoa atu ai le talalelei i isi i lou olaga atoa. Fesoasoani i lau tama e mafaufau i ni auala e mafai ai ona ia faasoa atu le talalelei.
Tuu atu i lau tama ni avanoa e aoao atu ai mataupu faavae o le talalelei i lou aiga. E mafai foi e lau tama ona faataitai le faasoa atu o ona talitonuga i isi. Mo se faataitaiga, e mafai ona outou talanoaina fesili e pei o le “E faapefea ona tatou faailoa atu le Tusi a Mamona i se tasi e lei faalogo lava i ai?” po o le “E faapefea ona tatou faamatalaina le manaomia o le Faaola i se tasi e le o se Kerisiano?”
Fesoasoani i lau tama ia lagona le to’a e talanoa atu i tagata. O a nisi o auala lelei e amata ai se talanoaga? Uunaia lau tama e aoao i auala e faalogo ai i tala a isi, malamalama i mea o loo i o latou loto, ma faasoa atu upumoni o le talalelei e mafai ona faamanuiaina ai o latou olaga.
Vaavaai mo avanoa mo lau tama e aoao ai e uiga i isi aganuu ma faatuatuaga. Fesoasoani ia te ia ia iloa ma faaaloalo i mataupu faavae lelei ma moni i talitonuga o isi.

Alu i le Malumalu—Faamauga

I totonu o le malumalu, e mafai ona faamauina ai se tane ma le ava mo le faavavau. E tupu lenei mea i se sauniga e ta’ua o le faamauga. E ui lava o lenei sauniga atonu e tele ni tausaga e faatali ai lou atalii po o lou afafine, o mea laiti, faatauvaa, ma faifai pea tou te faia faatasi i na tausaga e mafai ona fesoasoani ia te ia e saunia ai mo lenei faamanuiaga matagofie.

Ina ia aoao atili, tagai i Autu o le Talalelei, “Faamauga,” topics.ChurchofJesusChrist.org.

Faitau faatasi le “O Le Aiga: O Se Folafolaga i le Lalolagi” i le ChurchofJesusChrist.org. O le a se mea o aoao mai e lenei folafolaga e uiga i le fiafia i le olaga faaleaiga ma e uiga i faaipoipoga faamanuiaina? Faatasi ai ma lau tama, filifili se mataupu faavae se tasi o loo lisi atu i le folafolaga e suesue ai. E mafai ona e sueina mau e fesootai i lena mataupu faavae i le Taiala i Tusitusiga Paia. E mafai foi ona e setiina ni sini e faaaoga atoatoa ai lena mataupu faavae i lou aiga. A o e galue i au sini, talanoaina faatasi le aafiaga o le ola ai i lena mataupu faavae i le olaga faaleaiga.
Faatasi ai ma lau tama, faitau le savali a Peresitene Dieter F. Uchtdorf “I Le Viia Ai o i Latou o E Laveai” (Liahona, Me 2016, 77–80). A e oo atu i le vaega ua faaautuina “O Se Malo o Mea e Faaaoga ma Toe Lafoa’i,” e mafai ona e vaavaai mo mea i lou aiga e mafai ona lafoai ma isi mea e le mafai. Talanoa pe faapefea ona ese lou taulimaina o mea pe a e manao ia tumau mo se taimi umi. O le a se mea o fautua mai ai lenei mea e uiga i le auala e tatau ona tatou taulimaina ai faaipoipoga ma sootaga faaleaiga? O le a se isi mea ua tatou aoao mai le savali a Peresitene Uchtdorf e uiga i le ala e mafai ai e le Faaola ona fesoasoani ia i tatou e fausia ni faaipoipoga ma ni aiga malolosi?
Afai ua e faaipoipo, ia e talanoa ma lau tama e uiga i mea e te lagona o loo lelei ona oulua faia o se ulugalii, o mea o loo e aoaoina, ma auala o loo e taumafai e faaleleia atili ai. Afai ua faamauina oe ma lou toalua i le malumalu, ia faaali atu i lau tama e ala i faataitaiga le ala o loo oulua taumafai ai e tausia a oulua feagaiga ma le tasi ma le isi ma le Alii. Tau atu i lau tama pe faapefea ona e taumafai e avea le Tama Faalelagi ma le Faaola ma totonugalemu o lau sootaga ma le auala o loo La fesoasoani ai ia te oe.
Pe a manaomia ona faia ni faaiuga faaleaiga, fai ni fonotaga ma talanoaga faaleaiga. Ia mautinoa ua faaleo ma faatauaina manatu o tagata uma o le aiga. Faaaoga nei talanoaga e fai ma avanoa e faataitai ai fesootaiga lelei ma le agalelei i sootaga faaleaiga, tusa lava pe le tutusa le vaai a tagata uma i mea.
A i ai se feeseeseaiga po o se feteenaiga i le aiga, ia faaalia le onosai ma le agaalofa. Fesoasoani i lau tama ia iloa le auala e mafai ai e le taulimaina o feteenaiga i auala faaKeriso ona fesoasoani ia te ia e saunia ai mo se faaipoipoga fiafia. Faitau faatasi le Mataupu Faavae ma Feagaiga 121:41–42, ma talanoa pe faapefea ona faaaoga mataupu faavae o loo i nei fuaiupu i faaipoipoga.