“18–24 ni Tiseba. Siganisucu: ‘Nai Tukutuku Vinaka Mo Dou Reki Vakalevu Kina’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Vou 2023 (2022)

“18–24 ni Tiseba. Siganisucu,” Lako Mai, Mo Muri Au—Baleta na Tamata Yadua kei na Matavuvale: 2023

iVakatakilakila

gone dramidrami

Lami Lailai, mai vei Jenedy Paige

18–24 ni Tiseba

Siganisucu

“Nai Tukutuku Vinaka Mo Dou Reki Vakalevu Kina”

Vakasamataka na kena rawa ni kauta mai na yalo ni vakacegu kei na vakalou ki na gauna ni Siganisucu na kena vakasamataki vakatitobu na sucu kei na ilesilesi ni iVakabula.

Vola na Veika o Vakauqeti Kina

Na cava e dau kauta mai kina na reki levu na sucu ni dua na gone? Baleta beka ni dua na gone vou ena rawa ni vakatakilakila ni inuinui. E dua na ka baleta e dua na bula vou ka sinai ena veika eso e rawa ni rawati, e sureti keda meda vakasamataka vakatitobu na veika e vakarautaka tu na bula ki vua na gone oya, kei na veika totoka ena rawa ni rawata. E se sega mada ni se bau dina sara oqo me vaka na sucu ni Luve ni Kalou, o Jisu Karisito. E se sega mada ni se bau levu cake nai nuinui e tu vua e dua na gone, ka sega ni se dua e sucu mai kei na vuqa nai yalayala me vaka oqo.

Ena gauna a sureti iratou kina na ivakatawa ni sipi e dua na agilosi me vakasaqara na gone se qai sucu e vale ni manumanu, a solia talega vei iratou e dua nai tukutuku me baleta na gone oya. E itukutuku ni inuinui—ni a lako mai ki vuravura na gonelailai oqo me mai vakayacora e dua nai lesilesi tabu. Era vakatakila na ivakatawa ni sipi na nodratou itukutuku “era sa tukuna yani … a ra sa kurabui kecega era sa rogoca na veika sa tukuna vei ira ko ira na ivakatawa ni sipi. A sa taura na vosa kecega oqo ko Meri, ka sa vakananuma kina e lomana” (Luke 2:17–19). Ena vinaka beka meda vakamuria na nona ivakaraitaki o Meri ena Siganisucu oqo: mo vakasamataka vakatitobu e lomamu na veika o sa vulica me baleta na iVakabula ena yabaki oqo. E rawata vakacava o Koya na Nona ilesilesi ni dauveivueti ena veitukutuku o sa wilika? Ka bibi cake sara, e sa veisautaka vakacava na nomu bula na Nona ilesilesi? O na qai vakauqeti mo muria na nodra ivakaraitaki na ivakatawa ni sipi: o na cakava vakacava mo “tukuna yani” na veika sa cakava vei iko o Jisu Karisito?

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 1:18–25; 2:1–12; Luke 1:26–38; 2:1–20

E siro sobu mai o Jisu Karisito me mai sucu ena keda maliwa e vuravura.

E dina beka ni o sa rogoca se wilika vakavica vata na italanoa ni nona sucu o Jisu Karisito, vulica ena gauna oqo ena vakanananu oqo: “Na Siganisucu e sega walega ni dua na gauna marautaki ni sala e lako mai kina ki vuravura ko Jisu ia na kena kilai talega se o cei o Koya e—noda Turaga ka iVakabula, o Jisu Karisito—kei na cava na vuna a lako mai kina o Koya” (Craig C. Christensen, “Na Taucoko ni iTalanoa ni Siganisucu” [Lotu ni Siganisucu ni Mataveiliutaki Taumada, Tise. 4, 2016], broadcasts.ChurchofJesusChrist.org).

Na cava o kila me baleta o cei o Jisu Karisito ni bera ni a sucu mai? (raica, me vakataka na, Joni 17:5; Mosaia 3:5; Vunau kei na Veiyalayalati 76:13–14, 20–24; Mosese 4:2). E veisautaka vakacava na veika o vakila ni o wilika nai tukutuku ni Nona sucu?

Na cava o kila baleta na cava na vuna e lako mai kina o Jisu Karisito ki vuravura? (raica, me vakataka na, Luke 4:16–21; Joni 3:16–17; 3 Nifai 27:13–16; Vunau kei na Veiyalayalati 20:20–28). E veisautaka vakacava na kila-ka oqo na veika o vakila me baleta na iVakabula? E vakayaco veisau vakacava oqo ki na nomu bula?

Raica talega na 2 Koronica 8:9; Iperiu 2:7–18; 1 Nifai 11:13–33; Alama 7:10–13.

1 Korinica 15:21–26; Kolosa 1:12–22; 1 Pita 2:21–25

E vakacavara o Jisu Karisito na Nona ilesilesi ka rawa kina meu na taukena na bula tawamudu.

E dina ga ni wavolita tu na italanoa ni sucu i Karisito na veika veivakurabuitaki, na Nona sucu ke a ka walega ke a sega ni vakayacora na cakacaka cecere e mai vakayacora emuri ena Nona bula. Me vaka e vakamacalataka o Peresitedi Gordon B. Hinckley, “Na gone lailai o Jisu mai Peceliema ke a dua walega na gone ke a sega na veivueti va-Karisito mai Kecisemani kei Kalivari, kei na itukutuku qaqa ni Tucake Tale” (“Na iTalanoa Totoka kei na Dina ni Siganisucu,” Ensign, Tise. 2000, 5).

Na ivakadinadina ni ilesilesi vakalou ni iVakabula kei na Nona loloma qaqa vei ira na tamata e kune vakararaba ena Veiyalayalati Vou. Na itukutuku se veitikina cava e yaco mai ki na nomu vakasama? O na vinakata beka mo railesuva tale eso na ivurevure oqo se na nomu ivola ni vuli ni veisiga ka raica eso na vakasama titobu o sa vola tu. Ena rawa talega ni o wilika na 1 Korinica 15:21–26; Kolosa 1:12–22; 1 Pita 2:21–25 ka qai vakasamataka vakatitobu e sa vakalougatataka vakacava na nomu bula na Nona cakacaka na iVakabula. Na cava o vakauqeti mo veisautaka ena nomu bula? Ena rawa vakacava mo taura mai na kaukauwa ni iVakabula?

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 1:18–25; 2:1–12; Luke 1:26–38; 2:1–20.O na rawa ni marautaka vakacava na nona sucu o Jisu Karisito kei na nomu vuvale? Oqo eso na vakasama, se o na rawa ni vakarautaka talega mai eso na nomu:

Wilika se vakatasuasuataka vata eso na tiki ni talanoa ni Siganisucu.
Sarava na vidio “Na Gonelailai na Karisito” (ChurchofJesusChrist.org).
Vakadikeva eso na ivurevure ena “Jisu Karisito” ikumuni ena Valenivola Vakosipeli, vakabibi ena iwasewase ka kena ulutaga “Nona Sucu (Siganisucu).”
Sarava e dua na lotu ni Siganisucu ni Mataveiliutaki Taumada (broadcasts.ChurchofJesusChrist.org).
Lagata vata eso na serenilotu ni Siganisucu, se digitaka eso vei ira na tiko volekati iko se itokani ka laga sere vei ira (raica na Serenilotu,, naba 116–127).
Vakayacora e dua na cakacaka ni veiqaravi.
Kerei ira na lewe ni matavuvale me ra vakasaqara na itukutuku matai lalai ena italanoa ni Siganisucu e solia vei ira na vakasama ni so na iukuuku se isauni era rawa ni cakava mera vakananumi Jisu Karisito kina.

1 Korinica 15:21–26; Kolosa 1:12–22; 1 Pita 2:21–25.Cava na vuna eda vakavinavinakataka kina ni a sucu mai o Jisu Karisito? Nai solisoli cava esa solia vei keda o Koya? Eda na vakaraitaka vakacava vei Koya na noda vakavinavinaka? E rawa ni lagata na nomu matavuvale e dua na sere e vakavulica na Nona ilesilesi, me vaka na “Tala Mai Na Luvena” (iVolanisere ni Gonelalai, 20).

“Se Bula na Karisito: NodraiVakadinadina na iApositolo.”Kevaka o vinakata mo vukea nomu matavuvale ena gauna ni Siganisucu me ra vakanamata vua nai Vakabula, ena rawa mo vakayagataka eso na gauna mo wilika se vulica vata na “Se Bula Tiko Na Karisito: Nodra iVakadinadina na iApositolo” (ChurchofJesusChrist.org). Ena rawa ni o wiligusutaka eso na tikina mai na “Se Bula na Karisito” se vakaraica eso nai vakamacala ni bula ni iVakabula ena Veiyalayalati Vou era tokona nai tukutuku era tiko kina. Ena rawa talega ni o sureti ira na lewe ni matavuvale yadua me ra vola na nodra ivakadinadina kei Jisu Karisito, ka kevaka era vakauqeti, me ra wilika ki na matavuvale.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Vale ni Manumanu,” iVolanisere ni Gonelalai, 25.

Vakavinakataki ni Vuli Yadudua

Vakaraici Jisu Karisito. E vakavulica vei keda na ivolanikalou ni veika kecega e vakadinadinataki Jisu Karisito (raica na Mosese 6:62–63), sa dodonu kina meda vakaraici Koya ena veika kecega. Ni o wilika nai volanikalou, navuca mo vola se makataka eso na tikina e vakavulici iko baleti Koya. Taura na gauna ni sa voleka tiko yani na Siganisucu mo vakasaqara na ka e wavoliti iko e vakadinadinataki Jisu Karisito.