“11–17 ni Tiseba. Ai Vakatakila 6–14: ‘Era sa Rawai … ena vuku ni Dra ni Lami,’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Vou 2023 (2022)

“11–17 ni Tiseba. Ai Vakatakila 6–14,” Lako Mai, Mo Muri Au—Baleta na Tamata Yadua kei na Matavuvale: 2023

iVakatakilakila

E tucake tu o Jisu ena maliwa ni kalokalo

Droini vakasokumuni mai vei Eric Johnson: Na Matabose Cecere, mai vei Robert T. Barrett; soqoni ni veikalokalo iloloma mai na Europe Space Agency

11–17 ni Tiseba

Ai Vakatakila 6–14

“Era sa Rawai … ena vuku ni Dra ni Lami”

A vakasalataka o Peresitedi Boyd K. Packer: “Kevaka e ka vou vei iko na itautau ni vosa ni ivolanikalou, wilika tikoga. Ena yaco totolo nomu na kila na totoka kei na kaukauwa era tiko ena veitabana oqori” (“Na iDola ki na Veitaqomaki Vakayalo,” Liahona, Nov. 2013, 27).

Vola na Veika o Vakauqeti Kina

Raitayalotaka e dua na marama “ni sa bukete sa qoqolou, ni sa taratara me vakasucu.” Qai raitayalotaka “sa dua na gata levu e damudamu, sa vitu na uluna ka tini na nonai leu” sa tu e matai yalewa, sa vakarau, “me kania sara na luvena ni sa qai sucu mai” (Ai Vakatakila 12:2–4). Me da kila vinaka na veitikina oqo ni ivakatakila nei Joni, nanuma tiko na iyaloyalo eso oqo e matataka na Lotu kei na matanitu ni Kalou kei na dredre ena sotava. Vei ira na Yalododonu era sotava na veivakacacani levu ena gauna i Joni, na qaqa mai na vu-ni-ca e rairai sega beka ni rawa. Na qaqa talega oqo ena rawa ni dredre ni laurai ena noda gauna oqo, ena gauna e “veivala kei ira na yalo savasava” ka “me rawai ira … na veimataqali kece, veimatanitu kei na duivosavosa” na meca (Ai Vakatakila 13:7). Ia na icavacava ni vakatakila nei Joni e vakaraitaka ni na qaqa na vinaka mai na ca. Ena rusa o Papiloni. Era na lako mai na Yalododonu “mai na veivakararawataki levu” ena isulu vulavula—sega ni baleta ni a sega ni duka na nodra icurucuru balavu ia baleta ni o ira na Yalododonu era na “sava na nodra isulu, ka vakavulavulataka ena dra ni Lami” (Ai Vakatakila 7:14).

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Ai Vakatakila 6–11

A raica o Joni e vuqa na veika a yaco ena itukutuku kei vuravura, vakabibi na veisiga e muri oqori.

Ena wase oqo o na wilika kina e dua na ivola ka vitu na kena drega. Kevaka o vakataroga se cava na kena ibalebale oya, o sega ni tiko duadua. A yaco talega vei Josefa Simici na Parofita. A vakatakila na Turaga vei Josefa ni ivola oqo kei na kena drega e matataka na italanoa ni “bula vakayago,” kei na drega yadua e matataka tiko e dua na udolu na yabaki (raica na Vunau kei na Veiyalayalati 77:6–7). O na taleitaka beka mo kila ni veika a yaco ena imatai ni va na drega e vakalekalekataki ena raivotu nei Joni ena walu walega na tikina (Ai Vakatakila 6:1–8). Na tolu na tikina e tarava e vakamacalataka na ikalima ni drega (tikina e 9–11). Na veika e yaco ena iotioti ni rua na drega e taura cake e vuqa na vo ni ivola ni Ai Vakatakila. Ena dua tale na kena itukutukuni, na iusutu ni raivotu nei Joni sa iotioti ni gauna—noda gauna. Ni o wilika, vakasamataka vakatitobu na vuna e yaga kina meda kila na veika a vola o Joni me baleta na veisiga e muri oqo.

Ni o wilika na veika a parofisaitaka o Joni, vakasamataka na vakatutu kei na taro eso oqo:

Wilika na Ai Vakatakila 7 ka me nanumi tiko na cakacaka ni nodra vakasokumuni na Isireli. Na vakanananu cava soti e tiko vei iko me baleta na cakacaka oqo? (raica talega na Vunau kei na Veiyalayalati 77:8–11). Na cava o vulica mai na tikina e 13–17 me baleti Jisu Karisito kei ira era lako mai Vua?
Na cava e vakavulica vei iko na wase e 8; 9; kei na 11 me baleta na veika ena yaco ena iotioti ni gauna? (raica talega na Vunau kei na Veiyalayalati 77:12–13, 15). Eda na vakavakarau vakacava vakayalo ki na veika oqo?
Na iVakatakila 10 e tukuna e dua na ivola ka solia vei Joni e dua na agilosi ka vakaroti koya me kania. Na cava e rawa ni vakatakarakarataka oqo? (raica na Vunau kei na Veiyalayalati 77:14).

Ai Vakatakila 12–13

Na iValu mai Lomalagi e tomani tiko oqo e vuravura.

Eda sega soti ni kila na veika e baleta na iValu mai Lomalagi, ia e dua na kena ivakamacala lekaleka e tiko ena Ai Vakatakila 12:7–11. Ni o wilika na veitikina oqo, raitayalotaki iko ni o tiko ena veivorati oya ena bula taumada. Na cava o vulica me baleta na sala e rawai tiko kina o Setani? (raica na tikina e 11).

Na ivalu ka tekivu mai lomalagi e se tomani tikoga e vuravura, ni saga tikoga o Setani me “ia na veivaluvaluti kei [ira] sa tu vei ira na ivakadinadina kei Jisu Karisito” (Ai Vakatakila 12:17). Na cava o vulica mai na Ai Vakatakila 13 me baleta na sala e valu tiko kina o koya ena ivalu oya nikua? Ena vukei iko vakacava na “dra ni Lami” kei na “vosa ni [nomu] ivakadinadina” (Ai Vakatakila 12:11) me vukei iko tikoga ena ivalu oqo?

Raica talega na 1 Nifai 14:12–14; Moronai 7:12–13; Mosese 4:1–4; Vunau kei na Veiyalayalati 29:36–37.

Ai Vakatakila 14:6–7

“Au a raica e dua tani tale na agilosi … sa taura na itukutuku vinaka e sega ni oti rawa.”

E dua vei ira na parofisai ena veitikina oqo e yaco ena gauna a rairai mai kina o Moronai vei Josefa Simici ka qai liutaki koya kina itukutuku maroroi a qai vakadewataki ka tabaki me iVola i Momani. Na ivola oqo e tiko kina nai “tukutuku vinaka ka sega ni oti rawa” ka sa noda itavi me da vunautaka yani ki na “veimatanitu, veimataqali, duivosavosa, kei ira na tamata” (Ai Vakatakila 14:6).

Mo vulica me baleti ira na agilosi tale eso era a vakaitavi ena vakalesui mai ni kosipeli tawayalani, raica na Vunau kei na Veiylayalati 13; 27:5–13; 110:11–16; 128:20–21.

Raica talega “Na Vakalesui Mai ni Taucoko ni Kosipeli i Jisu Karisito: A iVakaro ni Yabaki Ruanadrau ki Vuravura,” ChurchofJesusChrist.org.

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Ai Vakatakila 7:9, 13–15.Na cava e vakavulica vei keda na veitikina oqo me baleta na vuna eda dau vakaisulu vulavula kina ni da vakayacora na cakacaka vakalotu ni papitaiso kei na valetabu?

Ai Vakatakila 7:14–17.Sa rawa mo sureta na lewe ni matavuvale me ra wasea na nodra nanuma me baleta na yalayala ni Turaga ena veitikina oqo. Ena vukei keda vakacava na Nona yalayala ni da lako curuma tiko na “veivakararawataki levu”? (tikina e 14).

Ai Vakatakila 12:7–11; 14:6.Eso na lewe ni matavuvale era na marautaka mera droinitaka eso na iyaloyalo ni raivotu ka vakamacalataki tiko ena Ai Vakatakila. Me vakataka, me droinitaki e dua na iyaloyalo me baleta na Ai Vakatakila 12 ena rawa ni veimuataki ki na veivosaki me baleta na iValu mai Lomalagi (raica na tikina e 7–11). Na iyaloyalo e yavutaki ena Ai Vakatakila 14:6 e rawa ni veimuataki ki na veivosaki me baleta na Vakalesui mai ni kosipeli.

Ni wiliki oti vata na Ai Vakatakila 14:6, sa rawa mo vakaraitaka na iyaloyalo ni agilosi o Moronai kei na so tale na agilosi era a veivuke ena kena vakalesui mai na kosipeli ena noda gauna oqo (raica na iyaloyalo ena mua ni ituvatuva oqo). Sa rawa ki na lewe ni matavuvale me ra veivukevuke na taura cake e dua na iyaloyalo ka wasea na vuna era vakavinavinakataka kina ni ra lako mai na agilosi “ka vunautaka vei [keda]na kosipeli tawayalani.”

Ai Vakatakila 12:11.Na cava e rawa ni ibalebale ni malanivosa “na vuku ni vosa era sa tusanaka”? E vukei keda vakacava kei ira eso tale na noda ivakadinadina baleti Jisu Karisito meda vorati Setani kina?

Ai Vakatakila 13:11–14.Na cava na nodratou nanuma na nomu vuvale me baleta na manumanu dau veivakacalai? Eda rawa ni kidava se levea vakacava na veivakacalai eda raica tu nikua ena vuravura oqo?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Meu Dina Tu,” iVolanisere ni Gonelalai, 85.

Vakatorocaketaki ni Vuli ni Tamata Yadua

Dromuci iko ena ivolanikalou. E vakatavulica o Peresitedi Russell M. Nelson, “Na noda dromuci keda e veisiga ena vosa ni Kalou sa ka bibi ki na bulabula vakayalo, vakauasivi ena gauna oqo ni tubu cake tiko na yavavala” (“Rogoci Koya,” Liaona, Me 2020, 89). Na cava na ibalebale ni “dromuci ena vosa ni Kalou” vei iko?