“27 ni Noveba–3 ni Tiseba. 1–3 Joni; Juta: ‘Ni sa Loloma na Kalou’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Vou 2023 (2022)

“27 ni Noveba–3 ni Tiseba. 1–3 Joni; Juta,” Lako Mai, Mo Muri Au—Baleta na Tamata Yadua kei na Matavuvale: 2023

iVakatakilakila

E matadredredre o Jisu Karisito ni dabe tiko kei ira na gone era matadredredre

Loloma Uasivi, mai vei Del Parson

27 ni Noveba–3 ni Tiseba

1–3 Joni; Juta

“Ni sa Loloma na Kalou”

Ni o wilika na nodrau ivola o Joni kei Juta, vasaqara na veivakauqeti me baleta na sala mo vakaraitaka kina na nomu lomana na Kalou. Vola na veiuqeti oqo mo qai vakayacori ira.

Vola na Veika o Vakauqeti Kina

Ni rau sa vola o Joni kei Juta na nodrau ivola, sa tekivu me liutaki ira e vuqa na Yalododonu na vunau tawakilikili me ra vukitani. Eso na qasenivuli vakailasu era vakataroga kevaka e a yaco dina nona rairai mai o Jisu Karisito me “liatamata mai” (raica, me vakataka, 1 Joni 4:1–3; 2 Joni 1:7). Na cava beka ena cakava e dua na iliuliu ni Lotu ena ituvaki vakaoqo? A sauma na iApositolo o Paula ena nona wasea na nona ivakadinadina baleta na iVakabula: “Oqo na ivakadinadina sa soli mai na ivakatekivu, o koya keitou a raica ena matai keitou, o koya keitou a vakaraica sara, ia ka tara na ligai keitou, na Vosa ni bula” (iVakadewa i Josefa Simici, 1 Joni 1:1 [ena 1 Joni 1:1, ivakamacala e ra a]). A qai vakatavulica o Joni me baleta na loloma: na loloma ni Kalou vei keda kei na loloma e dodonu me tu vei keda me baleti Koya kei ira kece na Luvena. Ni dina, ni a vakadinadinataka talega o Joni na ka oqo. A sotava sara ga vakataki koya na loloma ni iVakabula (raica na Joni 13:23; 20:2), ka vinakata me ra vakila na Yalododonu na loloma vata ga o ya. Na ivakadinadina kei na veivakavulici nei Joni ena loloma sa gadrevi sara ga ena gauna oqo, ni sa vakatarogi tiko na vakabauti Jisu Karisito kei na ivakavuvuli lasu tale eso. Ni da wilika na ivola i Joni e rawa ni vukei keda meda tadrava na dredre ni gauna oqo ena yaloqaqa, ni “sa sega na rere ena loloma; ia sa biuta tani na rere na loloma levu sara” (1 Joni 4:18).

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

1 Joni; 2 Joni

Ni sa rarama na Kalou, ni sa loloma na Kalou.

Kevaka mo a digia e dua se rua na vosa me vakamacalataka na Kalou, na cava beka na vosa oqori? Ena nona ivola, e dau vakayagataka o Joni na vosa “rarama” kei na “loloma” (raica, me kena ivakaraitaki, 1 Joni 1:5; 2:8–11; 3:16, 23–24; 4:7–21). Ni o wilika na imatai ni rua na ivola i Joni, vakasamataka vakatitobu na veika a sotava o Joni ena rarama kei na loloma ni iVakabula. Me ivakaraitaki, vakasamataka na veika a vulica o Joni mai na ivakavuvuli i Jisu ena Joni 3:16–17; 12:35–36, 46; 15:9–14; 19:25–27. O raica beka e dua na ka e tautauvata ena ivakavuvuli oqo kei na cava e vakavulica na 1 Joni me baleta na rarama kei na loloma ni Kalou? Na cava so o sa sotava ena nomu bula esa vakavulici iko ni sa rarama ka loloma na Kalou?

1 Joni 2–4; 2 Joni

“Ia kevaka eda sa veilomani, sa tiko vei keda na Kalou.”

O na raica talega na vosa me vaka na “tiko ga” kei na “tiko” ena ivola taucoko i Joni. Vakaraica na veivosa oqo, vakabibi ni o wilika na 1 Joni 2–4 kei na 2 Joni. Na cava o nanuma e kena ibalebale me da “tiko ga” se “tiko” kei na Kalou kei na Nona ivunau? (raica na 2 Joni 1:9). Na cava na kena ibalebale vei iko me “tiko ga” se “tiko” vei iko na Kalou?

1 Joni 2:24–3:3

Au rawa ni vakataki Jisu Karisito.

E dau rairai dredre beka vei iko na sasaga mo vakataki Jisu Karisito? Vakasamataka na nona ivakasala veivakauqeti o Joni: “Ia oqo, na luvequ lomani, mo dou tu dei vua; meda doudou kina, ni na rairai mai ko koya, ka me da kakua ni madua vua … [ka] eda na tautauvata kaya” (1 Joni 2:28; 3:2). Na cava o kunea ena 1 Joni 2:24–3:3 e solia vei iko na nuidei kei na vakacegu vakatisaipeli i Jisu Karisito? Ni o vulica na ivola i Joni, vakaraica eso tale na ivakavuvuli se ivakasala ena rawa ni vukei iko ena nomu sasaga mo vakataka vakalevu cake na Karisito.

Raica talega na Moronai 7:48; Vunau kei na Veiyalayalati 88:67–68; Scott D. Whiting, “Yaco mo Vakataki Koya,” Liaona, Nove. 2020, 12–14.

1 Joni 4:12

Dina beka “sa sega na tamata sa raica na Kalou … ena dua na gauna”?

iVakadewa i Josefa Simici, 1 Joni 4:12 e vakamatatataka “ni sega na tamata e raica na Kalou ena dua na gauna, vakavo ga o ira era sa vakabauta” (ena 1 Joni 4:12, ivakamacala e ra a; raica talega na Joni 6:46; 3 Joni 1:11). Na ivolanikalou e tiko kina e vica na itukutuku ni gauna a vakaraitaki Koya kina na Kalou na Tamada vei ira na tamata yalodina, oka kina o Joni (raica na Ai Vakatakila 4; raica talega na Cakacaka 7:55–56; 1 Nifai 1:8; Vunau kei na Veiyalayalati 76:23; Josefa Simici—Ai Tukutuku 1:16–17).

1 Joni 5

Niu cakacakataka na noqu vakabauti Jisu Karisito kau sa sucu tale, au sa rawa ni vorata na vuravura.

Ni o wilika na 1 Joni 5, vakaraica na veika meda cakava meda vorati vuravura kina ka rawata na bula tawamudu. Ena vakaivei beka na irairai ni vorati vuravura ena nomu bula? Ena rawa ni o kunea na saunitaro kei na vakasama titobu eso ena itukutuku nei Elder Neil L. Andersen na “Vakadrukai Vuravura” (Liaona, Me 2017, 58–62).

Juta 1

“Dou [tarai] kemudou cake ena nomudou vakabauta savasava duadua.”

Na cava e vakavulica vei iko na Juta 1:10–19 me baleti ira era veivala kei na Kalou kei na Nona cakacaka? Na cava o vulica mai na tikina e 20–25 me baleta na sala me qaqaco tikoga kina na nomu vakabauti Jisu Karisito?

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

1 Joni 2:8–11.Me vukea na nomu matavuvale ena kena vakasamataki titobu nai vakavuvuli i Joni, dou soqoni vata ena dua na rumu buto na lewe ni matavuvale me ra vakila na duidui ni “sa tu ena butobuto” kei na “tu ena rarama.” E vakavuna vakacava vei keda na veileti meda tu ena butobuto ka tarabe? E kauta mai vakacava na rarama ki na noda bula na veilomani vakaikeda?

1 Joni 3:21–22.Na cava e tiko ena veitikina oqo e rawa ni vakalevutaka cake na noda “doudou” vua na Kalou kei na noda rawa ni ciqoma na isau ni noda masu?

Na vakamuria na vunau ni Kalou e vukei keda meda vorati vuravura.

1 Joni 5:2–3.E tiko beka eso nai vunau eda vakatoka me “sa sega ni ka bibi” se dredre me vakamuri? E rawa ni veisautaka vakacava na noda loloma vua na Kalou na sala meda muria kina na Nona ivunau?

3 Joni 1:4.Na cava na ibalebale meda “muria na dina”? E rawa ni o taura na madigi oqo mo tukuna vei ira na lewe ni matavuvale na sala o sa raica kina ni ra muria na dina ka veivosakitaka na reki e kauta mai vei iko. Era na marautaka beka na lewe ni matavuvale me ra vola se droinitaka na dina era sa vulica ena mawe ni yava pepa ka vakayagataka me caka e dua na sala me ra lako vata kina na nomu matavuvale.

Juta 1:3–4.E tiko beka eso na veivakaleqai vakayalo e sa “curu lo mai” ki na noda bula kei na noda vuvale? (Juta 1:4). Ena rawa vakacava ni da vakamuria na veivakaroti i Juta meda “gumatua sara me maroroya na vakabauta” ka vorata na veika vakarerevaki oqo? (Juta 1:3). Na cava eda rawa ni cakava me “vakalevutaki vei kemudou na vakacegu, kei na loloma” ena nomu matavuvale? (Juta 1:2).

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Loloma Talei Tu,” iVolanisere ni Gonelalai, 76.

Vakatorocaketaki ni Vuli ni Tamata Yadua

Kunea na loloma ni Kalou. E vakatavulica o Peresitedi M. Russell Ballard, “[Na] kosipeli esa kosipeli ni loloma—lomana na Kalou kei na tamata vakayadua” (“Na Loloma ni Kalou baleti Ira na Luvena,” Ensign, Me 1988, 59). Ni o wilika na ivolanikalou, mo vola se makataka na ivakadinadina eso ni loloma ni Kalou.