“Oktubre 2–8. Mga Taga-Efeso: ‘Alang sa Pagkasangkap sa mga Balaan,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Oktubre 2–8. Mga Taga-Efeso,” Dali, Sunod Kanako—Alang sa mga Indibidwal ug mga Pamilya: 2023
Oktubre 2–8
Mga Taga-Efeso
“Alang sa Pagkasangkap sa mga Balaan”
Nakita ba nimo ang bisan unsa nga mga koneksyon tali sa mga mensahe sa kinatibuk-ang komperensiya ug sa Sulat ni Pablo ngadto sa Mga Taga-Efeso?
I-rekord ang Imong mga Panghunahuna
Sa dihang ang ebanghelyo misugod sa pagkaylap sa Efeso, nakahimo kini og “dili diyutayng kaguliyang” (Mga Buhat 19:23) taliwala sa mga taga-Efeso. Ang lokal nga hanas nga mga platiro kinsa mihimo og mga ampoanan ngadto sa usa ka pagano nga dyosa nakakita sa Kristiyanismo isip usa ka hulga sa ilang panginabuhi, ug sa wala madugay “sila nasilag ug naninggit, … ug ang siyudad napuno sa kagubot” (tan-awa sa Mga Buhat 19:27–29). Handurawa ang pagkabag-ong kinabig ngadto sa ebanghelyo sa maong sitwasyon. Daghang mga taga-Efeso ang midawat ug mipuyo sa ebanghelyo taliwala niining “kaguliyang” (Mga Buhat 19:40), ug si Pablo mipasalig kanila nga si “Kristo … mao ang atong kadaitan” (Mga Taga-Efeso 2:13–14). Kini nga mga pulong, uban sa iyang pagdapit nga “isalikway ninyo ang tanang kayugot ug kapungot ug kasuko ug mga singkahay ug pagtampalas” (Mga Taga-Efeso 4:31), ingon og takdo sa panahon ug makahupay sa karon sama sa kaniadto. Alang sa mga taga-Efeso, ingon alang kanato, ang kalig-on sa pag-atubang sa kalisdanan nagagikan “sa Ginoo, ug sa kusog sa Iyang gahom” (tan-awa sa Mga Taga-Efeso 6:10–13).
Mga Ideya alang sa Personal nga Pagtuon sa Kasulatan
Ang Dios mipili, o mi-orden og daan, kanako sa pagtuman og pipila ka mga responsibilidad sa yuta.
Si Pablo namulong sa mga Santos nga “gipili nang daan” sa Dios ug “napili … sa wala pa matukod ang kalib[o]tan” nga mahimo Niyang katawhan. Bisan pa niana, ingon sa pagtataw ni Presidente Henry B. Eyring, kini wala magpasabot “nga gitino na og una sa Dios hain sa iyang mga anak ang Iyang luwason ug ipaabot ngadto kanila ang ebanghelyo, samtang kadtong wala gayod makadungog sa ebanghelyo klaro nga wala mapili … Ang plano sa Dios mas labaw pa ka mahigugmaon ug ka makiangayon kay sa niana. Gusto gayod sa atong Langitnong Amahan nga pundukon ug panalanginan ang tanan sa Iyang pamilya” (Pagpundok sa Pamilya sa Dios,” Liahona, Mayo 2017, 20). Ang tanang mga anak sa Dios makadawat sa ebanghelyo ug sa mga ordinansa niini tungod sa buhat nga gipahigayon alang sa mga patay diha sa balaang mga templo.
Bisan og walay usa nga gipili nang daan nga pagaluwason o dili luwason, ang moderno nga pagpadayag nagtudlo nga ang pipila sa mga anak sa Dios napili, o “gi-orden nang daan,” sa premortal nga kalibotan sa pagbuhat og piho nga mga responsibilidad sa pagtuman sa mga katuyoan sa Dios dinhi sa yuta. Samtang imong basahon ang Mga Taga-Efeso 1 ug Giya ngadto sa mga Kasulatan, “Gi-orden nang Daan” (topics.ChurchofJesusChrist.org), palandonga kon sa unsang paagi kini nga kamatuoran magamit nganha kanimo.
Ang Dios “mohiusa diha kang Kristo sa tanang mga butang.”
Ngano kaha nga ang atong panahon gitawag og “ang dispensasyon sa kahingpitan sa mga panahon”? Unsa ang gipasabot nga “mohiusa diha kang Kristo sa tanang mga butang”? Samtang ikaw mamalandong niini nga mga hugpong sa mga pulong, basaha ang mosunod nga mga kasulatan: Mga Taga-Efeso 4:13; 2 Nephi 30:7–8; Doktrina ug mga Pakigsaad 110:11–16; 112:30–32; 128:18–21. Mahimong mobati ka nga nadasig sa pagsulat sa imong kaugalingong mga pagpasabot niini nga hugpong sa mga pulong.
Tan-awa usab sa David A. Bednar, “Paghiusa diha kang Kristo sa Tanang mga Butang,” Liahona, Nob. 2018, 21–24.
Mga Taga-Efeso 2:19–22; 3:1–7; 4:11–16
Ang Simbahan gitukod pinaagi sa apostoles ug mga propeta, ug si Jesukristo mao ang bato sa pamag-ang.
Sumala sa Mga Taga-Efeso 2:19–22; 3:1–7; 4:11–16, ngano nga kita adunay mga propeta ug apostoles? Paghunahuna mahitungod sa mga mensahe gikan sa mga propeta ug apostoles nga imong nadungog sa panahon sa kinatibuk-ang komperensiya. Sa unsa nga paagi nga ang ilang mga pagtulon-an nagtuman sa mga katuyoan nga gihulagway ni Pablo? Sama pananglit, giunsa niini nga mga pagtulon-an pagtabang kanimo nga dili “igatuyatuya ug igaliyokliyok sa tanang hangin sa tuloohan”?
Sa unsa nga paagi si Jesukristo sama sa bato sa pamag-ang alang sa Simbahan? Sa unsa nga paagi Siya sama sa bato sa pamag-ang sa imong kinabuhi?
Tan-awa usab sa Mga Buhat 4:10–12.
Si Jesukristo mao ang bato sa pamag-ang sa Simbahan.
Ang pagsunod sa ehemplo sa Manluluwas makapalig-on sa akong mga relasyon sa pamilya.
Samtang ikaw magbasa sa Mga Taga-Efeso 5:21–6:4, paghunahuna mahitungod sa tambag niini nga mga bersikulo nga makapalig-on sa imong mga relasyon sa pamilya.
Importante nga mahibaloan nga ang mga pulong ni Pablo sa Mga Taga-Efeso 5:22–24 gisulat sa kinatibuk-ang kahulogan sa sosyal nga mga batasan sa iyang panahon. Ang mga propeta ug apostoles karon nagtudlo nga ang mga lalaki dili hawod sa mga babaye ug nga ang mga kapikas kinahanglang “managkauban” (tan-awa sa “Ang Pamilya: Usa ka Pamahayag ngadto sa Kalibotan,” ChurchofJesuschrist,org). Bisan pa niana, makakaplag gihapon ka og may kalabotan nga tambag sa Mga Taga-Efeso 5:25–33. Sama pananglit, sa unsa nga paagi si Kristo nagpakita sa Iyang gugma alang sa mga Santos? Unsa ang gipasabot niini mahitungod sa mga magtiayon, isip managkauban, kinahanglan nga motagad sa usag usa? Unsa nga mga mensahe ang imong nakita alang sa imong kaugalingon niini nga mga bersikulo?
Ang hinagiban sa Dios motabang sa pagpanalipod kanako gikan sa dautan.
Samtang magbasa ka sa Mga Taga-Efeso 6:10–18, hunahunaa kon ngano nga ginganlan ni Pablo ang matag piraso sa hinagiban sa paagi nga iyang gibuhat. Gikan sa unsa ang “tibuok hinagiban sa Dios” nagpanalipod kanimo? Unsay imong mahimo nga mas mabutang sa hingpit ang matag piraso sa hinagiban sa matag adlaw?
Tan-awa usab sa 2 Nephi 1:23; Doktrina ug mga Pakigsaad 27:15–18.
Mga Ideya alang sa Pamilya nga Pagtuon sa Kasulatan ug Home Evening
-
Mga Taga-Efeso 1:10.Sa pagtudlo mahitungod niini nga bersikulo, si Elder David A. Bednar migamit sa ehemplo sa usa ka pisi (tan-awa sa “Paghiusa diha kang Kristo sa Tanang Butang”). Hunahunaa ang pagpakita sa mga sakop sa pamilya og usa ka pisi ug paguniti ug ipa-eksamen kini samtang ikaw makigbahin og mga parte sa mensahe ni Elder Bednar. Giunsa sa Dios pagpundok og tingob sa tanang mga butang diha ni Kristo? Sa unsang paagi kita napanalanginan tungod niini nga pagpundok?
-
Mga Taga-Efeso 2:4–10; 3:14–21.Dapita ang mga sakop sa pamilya nga makigbahin og mga kasinatian diin sila mibati sa gugma ug kalooy sa Dios ug ni Jesukristo nga gihulagway niini nga mga bersikulo.
-
Mga Taga-Efeso 2:12–19.Ang imong pamilya tingali malingaw nga magtukod og mga paril gamit ang mga unlan o ubang mga butang nga anaa sa panimalay ug dayon tumbahon kini. Samtang nagpasabot si Pablo ngadto sa “paril” tali sa mga Hentil ug sa mga Judeo, unsa nga matang sa paril ang nagbulag sa mga tawo karon? Giunsa ni Jesukristo “paglumpag” kini nga mga paril? Giunsa Niya “pagmatarong [kita] ngadto sa Dios”? (bersikulo 16).
-
Mga Taga-Efeso 6:10–18.Ang imong pamilya makahimo sa ilang kaugalingong “hinagiban sa Dios” gamit ang mga butang sa balay. Ang video “The Armour of God” (ChurchofJesusChrist.org) makatabang sa mga sakop sa pamilya nga maghanduraw niini nga hinagiban, ug sila makakita og yanong mga pagpasabot sa “Ang Tibuok Taming sa Dios” (, Liahona, Hunyo 2016, 70–71). Sa unsa nga paagi nga ang matag piraso sa hinagiban nagpanalipod kanato sa espirituhanong paagi? Unsay atong mahimo sa pagtabang sa usag usa sa “pagsul-ob sa tibuok hinagiban sa Dios” (Mga Taga-Efeso 6:11) kada adlaw?
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Manunubos sa Israel,” Mga Himno,, nu. 6.
Pagpalambo sa Personal nga Pagtuon
Tugoti ang Espiritu nga mogiya sa imong pagtuon. Pagsensitibo ngadto sa Espiritu samtang Siya naggiya kanimo ngadto sa mga butang nga imong kinahanglan nga makat-onan matag adlaw, bisan kon kini mogiya kanimo sa pagtuon og hisgotanan nga wala nimo planoha sa una.
Ang pagsul-ob sa hinagiban sa Dios makapanalipod kanato sa espirituhanong paagi.