Si Pablo nagdiktar og usa ka sulat diha sa bilanggoan

Oktubre 9–15

Mga Taga-Filipos; Mga Taga-Colosas

“Mahimo Ko ang Tanang Butang pinaagi kang Kristo Nga Nagapalig-on Kanak”

Kanus-a ang kataposang higayon nga ikaw nagbasa sa espirituhanong mga panghunahuna nga imong na-rekord panahon sa imong pagtuon sa Bag-ong Tugon? Tingali makatabang ang pagrebyo sa mga pag-aghat nga imong nadawat.

I-rekord ang Imong mga Panghunahuna

Gisulat ni Pablo ang iyang mga sulat ngadto sa Mga Taga-Filipos ug sa Mga Taga-Colosas samtang siya usa ka binilanggo didto sa Roma. Apan kini nga mga sulat walay tono nga imong gipaabot gikan sa usa ka tawo nga anaa sa bilanggoan. Naghisgot si Pablo og daghan mahitungod sa hingpit nga kalipay, pagmaya, ug pasalamat kay sa iyang paghisgot mahitungod sa mga pag-antos ug mga pagsulay: “Si Kristo gisangyaw,” miingon siya, “ug tungod niini ako nagakalipay” (Mga Taga-Filipos 1:18). Ug “kay bisan tuod ako wala diha kaninyo sa lawas, ako anaa uban kaninyo sa espiritu, nga nagakalipay sa pagsaksi … sa pagkamahusay ug sa kalig-on sa inyong pagtuo kang Kristo” (Mga Taga-Colosas 2:5). Sa pagkatinuod, “ang kalinaw sa Dios” nga nasinati ni Pablo diha sa iyang malisod nga mga kahimtang “lapaw sa tanang pagpanabot” (Mga Taga-Filipos 4:7), apan kini tinuod gayod. Sa atong kaugalingong mga pagsulay, mabati nato kining samang kalinaw ug “pagkalipay kamo kanunay diha sa Ginoo” (Mga Taga-Filipos 4:4). Kita makahimo, sama ni Pablo, og hingpit nga nagsalig diha ni Jesukristo, “kang kinsa kita nakabaton sa pagkatinubos” (Mga Taga-Colosas 1:14). Makasulti kita, sama ni Pablo, “Mahimo ko ang tanang butang pinaagi kaniya nga nagapalig-on kanako” (Mga Taga-Filipos 4:13; tan-awa usab sa Mga Taga-Colosas 1:11).

icon sa personal nga pagtuon

Mga Ideya alang sa Personal nga Pagtuon sa Kasulatan

Mga Taga-Filipos 2:5–11; Mga Taga-Colosas 1:12–23

Ang akong hugot nga pagtuo gitukod diha ni Jesukristo.

Miingon si Presidente Russell M. Nelson nga kon siya nakatutok sa iyang pagtuon sa kasulatan diha sa mga bersikulo mahitungod ni Jesukristo, kini adunay ingon nga gibug-aton diha kaniya nga siya mibati sama og “usa ka lahi nga tawo!” (“Pagdawat sa Gah[o]m ni Jesukristo diha sa Atong Kinabuhi,” Liahona, Mayo 2017, 39). Hunahunaa ang pagsunod sa iyang ehemplo samtang imong basahon ang mga taga-Filipos ug mga taga-Colosas (tan-awa ilabi na ang Mga Taga-Filipos 2:5-11; Mga Taga-Colosas 1:12­23). Unsay imong nakat-onan mahitungod sa Manluluwas? Sa unsa nga paagi kini nga mga kamatuoran nagtabang kanimo nga mahimong “usa ka lahi nga lalaki o babaye?

Mga Taga-Filipos 2:12–13

Kita ba “nanlimbasog sa [atong] kaugalingong kaluwasan”?

Pipila sa mga tawo naggamit sa hugpong sa mga pulong “panlimbasogi ninyo ang inyong kaugalingong kaluwasan” (Mga Taga-Filipos 2:12) sa pagsuporta sa ideya nga kita maluwas lamang pinaagi sa atong kaugalingong mga paningkamot. Ang uban naggamit sa pagtulon-an ni Pablo nga “tungod sa grasya kamo nangaluwas pinaagi sa pagtuo” (Mga Taga-Efeso 2:8) sa pag-angkon nga walay mga buhat nga gikinahanglan alang sa kaluwasan. Bisan pa niana, ang mga kasulatan, lakip ang mga sinulat ni Pablo, tataw nga nagtudlo sa panginahanglan alang sa grasya ni Jesukristo ug sa personal nga paningkamot aron makadawat og kaluwasan. Bisan sa atong labing maayo nga mga paningkamot sa pagpanlimbasog sa atong kaugalingong kaluwasan, “ang Dios mao ang nagapalihok sa imong pagtinguha” (Mga Taga-Filipos 2:13; tan-awa usab sa Mga Taga-Filipos 1:6; 2 Nephi 25:23; Giya ngadto sa mga Kasulatan, “Grasya”).

Mga Taga-Filipos 3:4–14

Ang ebanghelyo ni Jesukristo takos sa matag sakripisyo.

Daghan ang gibiyaan ni Pablo sa dihang nakabig siya sa ebanghelyo ni Jesukristo, lakip ang may impluwensya nga katungdanan nga iyang gihuptan diha sa kapunongan sa Judeo isip usa ka Pariseo. Sa Mga Taga-Filipos 3:4–14, pangitaa unsay naangkon ni Pablo tungod kay siya andam sa paghimo og mga sakripisyo alang sa ebanghelyo. Unsay iyang gibati mahitungod sa iyang mga sakripisyo?

Dayon hunahunaa ang imong kaugalingong pagkadisipulo. Unsa ang imong gisakripisyo alang sa ebanghelyo ni Jesukristo? Unsay imong nadawat? Aduna bay bisan unsa nga dugang mga sakripisyo nga imong gibati nga kinahanglan nga imong himoon aron mahimong mas mapahinunguron nga disipulo sa Manluluwas?

Tan-awa usab sa 3 Nephi 9:19–20; Doktrina ug mga Pakigsaad 58:2–5; Taylor G. Godoy, “Usa Nalang ka Adlaw,” Liahona, May 2018, 34–36.

Mga Taga-Filipos 4:1–13

Makakaplag ako og kalipay ni Kristo, walay pagsapayan sa akong mga kahimtang.

Ang kinabuhi ni Pablo mao ang usa ka tataw nga paghulagway sa kamatuoran nga gipahayag ni Pesidente Russell M. Nelson: “Kon ang sentro sa atong kinabuhi anaa … ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang hingpit nga kalipay moabot gikan ug tungod Kaniya” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82).

Samtang magbasa ka sa Mga Taga-Filipos—ilabi na sa kapitulo 4––siksika ang mga pahayag nga makatabang kanimo nga makakaplag og hingpit nga kalipay sa bisan unsa nga kahimtang sa imong kinabuhi. Kanus-a nimo nasinati “ang kalinaw sa Dios” atol sa mahagiton nga panahon? (bersikulo 7). Kanus-a ka nakakaplag og kalig-on “diha kang Kristo” sa pagbuhat og malisod nga mga butang? (bersikulo 13). Ngano sa inyong hunahuna nga importante “sa pagpahaigo” diha sa tanan nga mga kahimtang? (bersikulo 11). Sa unsa nga paagi nga ang pagbansay sa mga hiyas sa bersikulo 8 nagtabang kanimo nga makakaplag og kalipay sa imong mga kahimtang?

Tan-awa sa Alma 33:23; Dieter F. Uchtdorf, “Mapasalamaton sa Bisan Unsang Kahimtang,” Liahona, Mayo 2014, 70–77.

Mga Taga-Colosas 3:1–17

Ang mga disipulo ni Jesukristo mahimong “bag-o” samtang nagpuyo sila sa Iyang ebanghelyo.

Unsaon ninyo pagkahibalo nga si Jesukristo nagtabang kaninyo nga mahimong usa ka “bag-ong lalaki [o babaye]”? Usa ka paagi sa pagpamalandong niini mao ang pagsiksik sa Mga Taga-Colosas 3:1–17 ug sa paghimo og lista sa mga kinaiya, mga hiyas, ug mga lihok sa “daan nga tawo” ug laing lista sa mga kinaiya, mga hiyas, ug mga lihok sa “bag-ong tawo.”

I-rekord ang imong mga hunahuna mahitungod kon giunsa sa Manluluwas pag-usab kanimo, aron nga ikaw makaribyo niini sa umaabot ug mamalandong unsaon nimo sa pag-uswag.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mga Taga-Filipos.Tingali ang imong pamilya makamatikod sa mga pulong hingpit nga kalipay o pagmaya nga gibalik-balik kanunay diha sa Mga Taga-Filipos. Matag higayon nga makasugat ka og usa niini nga mga pulong, makahunong ka ug hisguti unsa ang gitudlo ni Pablo mahitungod kon unsaon sa pagpangita og hingpit nga kalipay.

Mga Taga-Filipos 2:14–16.Sa unsa nga paagi nga kita “nagasidlak ingon nga mga kahayag dinhi sa kalib[o]tan”?

Mga Taga-Filipos 4:8.Ang mga sakop sa pamilya makaila sa mga butang nga “pagahunahunaon” nga mohaom sa mga paghulagway dinhi niini nga bersikulo (tan-awa usab sa Mga Artikulo sa Hugot nga Pagtuo 1:13). Sa unsa nga paagi nga ang imong pamilya mapanalanginan pinaagi sa pagsunod sa tambag ni Pablo?

Mga Taga-Colosas 1:23; 2:7.Tingali ang imong pamilya makabasa niini nga mga bersikulo samtang naglingkod libot sa usa ka punoan sa kahoy o samtang nagtan-aw sa hulagway sa usa ka kahoy (sama sa usa nga nag-uban niini nga latid). Unsay gipasabot nga mahimong “dili matar[o]g” ug “pinagam[o]t” diha kang Kristo? Sa unsa nga paagi kita makatabang sa usag usa sa paglig-on sa atong espirituhanong mga gamot?

Mga Taga-Colosas 2:2–3.Ang imong pamilya mahimong malingaw sa pagsulod sa usa ka “kaban sa bahandi” sa mga butang nga nagrepresentar sa mga “katigayonan” ug “mga bahandi sa kaalam ug kahibalo” nga imong makaplagan diha sa ebanghelyo.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Paglipay, ang Ginoo Hari!,” Mga Himno, nu. 33.

Pagpalambo sa Atong Pagtudlo

Puy-i ang imong pagpamatuod. “Ikaw nagtudlo kon unsa ikaw,” si Elder Neal A. Maxwell mitudlo. “Ang imong mga kinaiya mas mahinumdoman … kay sa usa ka piho nga kamatuoran sa usa ka piho nga leksiyon” (sa Pagtudlo sumala sa Pamaagi sa Manluluwas, 13).

kahoy nga adunay mga gamot

Mitudlo si Pablo nga ang atong hugot pagtuo kinahanglang “nakagamot” diha kang Jesukristo (Mga Taga-Colosas 2:7).