“18–24 Septemba. Seken Korin 8–13: ‘God I Lavem Man we I Save Givim Samting long Gladhat blong Hem,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“18–24 Septemba. Seken Korin 8–13,” Kam Folem Mi—Blong Wanwan Man, Woman mo Famli: 2023
18–24 Septemba
Seken Korin 8–13
“God I Lavem Man we I Save Givim Samting long Gladhat blong Hem”
Raetemdaon ol filing mo tingting long saed blong spirit we yu bin kasem; hemia bae i helpem yu blong tingbaot wanem we yu stap lanem long taem blong skripja stadi. Maet yu save raet long wan stadi jenol, tekem ol not long waet spes we i stap long saed insaed long ol skripja blong yu, ademap ol not insaed long Gospel Laebri Ap, o yu save rekodem voes blong yu mo rekodem ol tingting we oli kam long maen blong yu.
Raetemdaon Ol Filing mo Tingting blong Yu
?Bae yu mekem wanem sapos yu harem se wan kongregesen blong Ol Sent long wan nara eria oli stap gat hadtaem wetem laef we i pua? Hemia i bin situesen we Pol i bin tokbaot long Ol Sent long Korin long 2 Korin 8–9. Hem i bin hop se bae i winim tingting blong Ol Sent long Korin blong oli givim wanem we oli gat fulap i go long Ol Sent we oli gat nid. Be hem i mekem moa bitim blong askem ol donesen; insaed long ol toktok blong Pol i gat ol bigfala trutok abaot fasin blong givim samting: “Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem” (2 Korin 9:7). Long taem blong yumi, i gat yet Ol Sent raon long wol we oli nidim help. Samtaem, wanem we yumi save mekem blong olgeta, i blong livim kakae mo donetem ol fas ofring. Long sam nara kes, fasin blong givim samting i go daerek, o i go stret long wan. I nomata wanem rod blong sakrifaes yumi mekem, i gud blong luklukgud long wanem i pusum yumi blong givim samting. ?Wanem we yumi stap givim, i soemaot lav blong yumi? Long en, lav nao i mekem man i givim samting wetem wan glad hat.
Sam Aedia blong Skripja Stadi blong Yuwan
Mi save glad mo serem wanem we mi gat blong blesem olgeta we oli pua mo olgeta we oli stap long nid.
I gat fulap pipol we oli stap long nid raon long wol. ?Olsem wanem nao yu mekem samting i hapen, we i defren? Elda Jeffrey R. Holland i givim advaes ia: “Yumi rij o yumi pua, yumi mas mekem wanem we yumi save mekem taem nara man i stap long nid [luk long Mak 14:6, 8]. … [God] bae i helpem yu mo bae i soem rod long yu tru long ol aksen blong disaepol we yu mekem wetem lav mo sore; hemia sapos yu save tru, mo yu wantem tru, mo stap prea, mo stap lukaotem ol wei blong obei wan komanmen we Hem i bin givim long yumi, bakegen mo bakegen” (“?I No Yumi Evriwan I Ol Man blong Askem Samting?,” Jeneral Konfrens, Okt 2014, ChurchofJesusChrist.org/general-conference/conferences?lang=bis).
Ridim 2 Korin 8:1–15; 9:6–15, mo tekem not long ol prinsipol we Pol i bin tijim abaot fasin blong stap kea long olgeta we oli pua mo olgeta we oli stap long nid. ?Wanem insperesen nao i kam long yu long saed blong kaonsel blong Pol? Maet yu save prea blong Hem i lidim yu long wanem yu save mekem blong blesem wan we i stap long nid. Meksua blong raetemdaon eni filing o tingting we yu kasem, mo mekem folem olgeta.
Luk tu long Mosaea 4:16–27; Alma 34:27–29; Russell M. Nelson, “Seken Hae Komanmen Ia,” Liahona, Novemba 2019, 96–100; Henry B. Eyring, “?I No Hemia Nao Fasin blong Livim Kakae we Mi Bin Jusum?”,” Jeneral Konfrens, Epril 2015, ChurchofJesusChrist.org/general-conference/conferences?lang=bis.
“I gud yufala nomo i traem luklukgud long laef blong yufala … . Yufala i mas traem faenemaot se yufala i stap holem yet fasin blong bilif, no yufala i no moa holem”
Tedei, semmak olsem long taem blong Pol, i gat olgeta we oli wantem lidim yumi longwe long “gudfala fasin ya blong yufala, we yufala i stap lavem Kraes tumas long fasin we i stret mo i klin gud” (2 Korin 11:3). From risen ia, i impoten blong mekem wanem we Pol i talem: “I gud yufala nomo i traem luklukgud long laef blong yufala … . Yufala i mas traem faenemaot se yufala i stap holem yet fasin blong bilif, no yufala i no moa holem” (2 Korin 13:5). Yu save stat long rod ia taem yu stat blong tingting abaot mining blong “holem fasin blong bilif.” ?Hao nao bae yu yu save se yu yu holem fasin blong bilif. Lukaotem ol janis we yu gat, blong save lukluk insaed long yuwan.
Taem yu stap luklukgud insaed long yuwan, maet bae yu save tingting hevi tu long sentens ia “stap lavem Kraes tumas long fasin we i stret mo i klin gud” (2 Korin 11:3). ?Olsem wanem nao yu yu stap lavem Kraes mo gospel blong hem long stret mo klin fasin? ?Olsem wanem nao maet, bae maen blong yu i kam nogud mo i kamaot long stret mo klin fasin ia? ?Wanem kaonsel nao yu yu faenem insaed long 2 Korin 11:1–6, 13–15?
Tingting tu long kaonsel ia we i kam long Presiden Dieter F. Uchtdorf: “Sapos yu ting se gospel ia i no wok gud long yu, mi invaetem yu blong tekem wan step i gobak biaen, stap long hae plen mo lukluk i go long laef blong yu, mo mekem wok blong yu olsem disaepol i simpol moa. Lukluk nomo long ol besik doktrin, prinsipol, mo wei blong yusum gospel. Mi promes se God bae i lidim mo blesem yu long rod blong yu blong yu gat wan laef we i fulap gud, mo gospel bae i wok gud moa blong yu” (“It Works Wonderfully!,” Liahona, Nov. 2015, 22).
Gladhat blong Sevya i inaf blong helpem mi blong faenem paoa long ol wiknes blong mi.
Yumi no save wanem nao Pol i stap harem nogud from, be yumi evriwan i gat ol ropnil we oli stap stikim yumi, we yumi wantem se God bae i tekemaot long laef blong yumi. Tingbaot ol ropnil blong yu taem yu stap ridim 2 Korin 12:5–10, mo tingting hevi long wanem yu lanem abaot Jisas Kraes long ol ves ia. ?Wanem nao Pol i tijim long ol ves ia abaot ol tes mo ol wiknes? Long yu, ?i minim wanem blong gladhat blong God i inaf long yu?
Luk tu long Mosaea 23:21–24; 24:10–15; Ita 12:27; Moronae 10:32–33.
Ol Aedia blong Famli Skripja Stadi mo Haos Naet
-
2 Korin 8–9.?Wanem nao yumi faenem insaed long ol japta ia we i givim insperesen long yumi blong go helpem ol puaman mo ol narawan long nid? Maet hemia i wan gud taem blong mekem plan blong gat wan aksen blong seves olsem wan famli blong wan we i stap long nid.
-
2 Korin 9:6–7.?Famli blong yu i save wan we yu save talem se hem i wan we i givim wetem gladhat blong hem? ?Olsem wanem yumi mekem seves blong yumi long ol narawan oli hapen wetem moa gladhat? Ol yangfala memba blong famli blong yu oli save mekem ol baj we i talem se: “mi mi man we mi givim wetem gladhat.” Yu save givim ol baj ia i go long ol memba blong famli taem yu luk olgeta oli givim seves long wan narawan wetem glad hat.
-
2 Korin 10:3–7.?Olsem wanem yu save tijim famli blong yu abaot “wo faet” blong yu agensem ol fasin nogud? ?Bae famli blong yu i laekem blong bildim wan wol, o wan strong haos wetem ol jea mo ol blangket? Hemia i save lidim yufala blong toktok raon long fasin blong sakemaot ol samting we oli lidim yumi longwe long God, mo olsem wanem blong “stap tanem olgeta rabis tingting blong man, blong mekem olgeta oli ona long Kraes.” ?Wanem oli sam tul blong faet long saed blong spirit, we yumi save yusum blong kontrolem ol tingting blong yumi? (luk long Efesas 6:11–18).
-
2 Korin 11:3.?Wanem nao famli blong yu i save mekem blong lukluk moa long “lavem Kraes long fasin we i stret mo i klin gud”?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “‘Give,’ Said the Little Stream,” Children’s Songbook, 236.
Stap Kam Antap long Stadi blong Yuwan
Raetemdaon Ol Filing blong Yu. Elda Richard G. Scott i talem: “Save, we oli raetemdaon gud, hem i save we i kam long taem blong nid. … [Taem yu stap raetemdaon daereksen we i kam long Spirit, i save mekem se bae yu save kasem moa laet” (“Acquiring Spiritual Knowledge,” Ensign, Nov. 1993, 88; luk tu long Teaching in the Savior’s Way, 12, 30).
“Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem” (2 Korin 9:7).