Jisas Kraes

11–17 Septemba

Seken Korin 1–7

Yufala I Stretem Yufala Wetem God

Taem yu stap stadi long ol leta blong Pol i go long Ol Man Korin, raetemdaon sam long ol prinsipol blong gospel we yu yu faenemaot, mo tingting hevi long wei we yu save praktisim olgeta insaed long laef blong yu.

Raetemdaon Ol Filing mo Tingting blong Yu

Samtaem, blong stap olsem wan lida blong Jos i minim blong mas talem sam samting we i had. Hemia i bin tru long taem blong Pol, semmak olsem tedei. I luk olsem se wan leta blong Pol i go long Ol Sent long Korin, we i bin go fastaem, insaed long hem Pol i tok stretem ol man mo i mekem sam oli harem nogud. Insaed long leta ia we i kam Seken Korin, hem i traem blong eksplenem wanem i bin pusum ol strong toktok blong hem: “Taem mi raetem leta ya long yufala, mi mi harem nogud tumas, tingting blong mi i trabol, mo oltaem mi stap krae. Be mi no raetem leta ya blong mekem yufala i harem nogud, mi raetem blong mekem yufala i save we mi lavem yufala evriwan” (2 Korin 2:4). Taem yu yu stap long saed ia blong kasem ol tok blong stretem man we i kam long wan lida, long hen, i help blong save se lav blong Kraes i givim insperesen long ol toktok ia. Mo iven long ol kes i no hapen olsem, sapos yumi no glad blong luk ol narawan wetem kaen lav ia we Pol i bin filim, hem i isi moa blong fesem wanem i mekem yu yu harem nogud, long wan stret fasin. Olsem we Elda Jeffrey R. Holland i bin givim olsem advaes: “Yufala i mas kaen wetem ol fasin blong ol man—hemia blong yuwan, mo tu, hemia blong olgeta we oli wok wetem yu insaed long wan Jos we ol volontia nomo oli lidim; oli ol man mo woman we oli gat bodi we i save ded. Nomo wetem Stret Pikinini Ia blong Hem, God i bin wok plante wetem ol pipol we oli no stret evriwan” (“Lod, Mi Mi Biliv,” Jeneral Konfrens, Epril 2013, ChurchofJesusChrist.org/general-conference/conferences?lang=bis).

stadi blong yuwan pikja aekon

Sam Aedia blong Skripja Stadi blong Yuwan

2 Korin 1:3–7; 4:6–10, 17–18; 7:4–7

Ol tes blong laef blong mi, oli wan blesing.

Wetem evri samting we Pol i bin fesem long laef blong hem, i no wan sapraes se hem i raet plante abaot ol stamba tingting mo ol blesing blong ol hadtaem. Taem yu stap ridim 2 Korin 1:3–7; 4:6–10, 17–18; 7:4–7, tingting abaot ol wei we ol tes blong yu oli stap olsem wan blesing. Eksampol, yu save tingting hevi long wei we God “Hem i stap givhan long mifala long olgeta trabol blong mifala, blong mekem mifala i harem gud,” mo olsem wanem nao yu yu “save givhan long olgeta, blong mekem olgeta oli harem gud long sem fasin” (2 Korin 1:4). O yu save lukluk nomo long wei we laef blong Jisas Kraes i bin “mekem laet blong hem i saenaot finis” insaed long hat blong yu, iven taem we yu bin “trabol,” mo “no save rod” (2 Korin 4:6, 8).

Luk tu long Mosaea 24:13–17; Henry B. Eyring, “Oli Testem, Yumi Pruvum, Oli Smutum,” Liahona, Nov 2020, 96–99; Gaed long Ol Skripja, “Agens, Wanem I Kam,” olskripja.ChurchofJesusChrist.org.

2 Korin 2:5–11

Fogivnes i wan blesing we mi save givim, mo mi save kasem.

Yumi no save tumas abaot man ia we Pol i tokbaot long 2 Korin 2:5–11—be yumi save nomo se hem i bin brekem loa (luk long ol ves 5–6) mo Pol i bin wantem blong Ol Sent oli fogivim hem (luk long ol ves 7–8). ?From wanem nao, samtaem, yumi mestem rod ia “blong go mekem [wan] i save we [yumi] lavem hem;” olsem wan we yumi lavem be i mekem yumi harem nogud? (ves 8). ?Olsem wanem nao, blong holemtaet fasin blong fogiv, i save spolem ol narawan mo yumiwan bakegen? (luk long ol ves 7, 10–11). ?Olsem wanem nao, blong holemtaet fasin blong fogivim man i blong givim wan janis long Setan blong i winim yumi? (ves 11).

Luk tu long Doktrin mo Ol Kavenan 64:9–11.

2 Korin 5:14–21

Tru long Atonmen blong Jisas Kraes, yumi save stretem yumi long fes blong God.

Olsem eni narawan, Pol i bin save se i olsem wanem blong kam wan “niufala man” (2 Korin 5:17). Hem i stap olsem wan we i mekem nogud long Ol Kristin Man, i kam wan man blong difendem Kraes, we i no gat fraet long hem. Taem yu stap ridim 2 Korin 5:14–21, tingting long ol kwestin olsem ia: ?i minim wanem blong yu stretem yu? Long yu, ?hem i minim wanem blong stretem yuwan long fes blong God? Tingting hevi long wanem i save seperetem yu long God. ?Wanem nao yumi nidim blong mekem blong yu stretem yuwan moa wetem Hem? ?Long wanem wei nao Sevya i mekem hemia i posibol?

Maet yu save tingting hevi se i minim wanem blong stap olsem “man blong karem tok blong Kraes” long wok blong letem “God i tanem yu” (ol ves 18, 20). ?Wanem niu tingting yu kasem aot long mesej blong Elda Jeffrey R. Holland: “Seves Ia blong Man I Stretem Hemwan”? (Liahona, Novemba 2018, 77–79).

Luk tu long 2 Nifae 10:23–25.

2 Korin 7:8–11

Harem nogud olsem hemia blong God, i lidim man blong i jenisim laef.

Plante taem, yumi no tekem se harem nogud i wan gud samting; be Pol i tokbaot taem wan i “harem nogud be i luk long God,” (2 Korin 7:10) se hemia i wan impoten pat blong fasin blong sakem sin. Tingting long wanem yu bin lanem abaot fasin blong harem nogud wetem lukluk i go long God, aot long olgeta ia: 2 Korin 7:8–11; Alma 36:16–21; Momon 2:11–15; mo mesej blong Sista Michelle D. Craig “Fasin blong No Hapi Folem Tabu Wei” (Liahona, Novemba 2018, 52–55). ?Wetaem nao yu bin filim harem nogud be yu bin luk long God, mo wanem nao hemia i bin mekem long laef blong yu?

famli stadi pikja aekon

Ol Aedia blong Famli Skripja Stadi mo Haos Naet

2 Korin 3:1–3.?I gat ol memba blong famli blong yu we i eva askem wan blong raetem wan leta blong sapotem olgeta long saed blong askem wok, o aplae long wan skul? Askem olgeta blong tokbaot eksperiens ia. Pol i bin tijim se laef blong Ol Sent oli olsem ol leta blong sapot long gospel blong Jisas Kraes, we oli “no yusum ing blong raetem, i yusum Spirit blong God ya we i laef we i no save ded.” Taem yu stap ridim 2 Korin 3:1–3 tugeta, toktok raon long hao nao ol eksampol blong yumi, oli olsem ol leta we man i save mo i save ridim, we i soemaot trutok, mo hamas gospel ia i impoten. Maet wanwan memba blong famli i save raetem wan leta we i eksplenem olsem wanem wan nara memba blong famli i bin wan gudfala eksampol blong stap wan disaepol blong Jisas Kraes. Oli save ridim ol leta i go long ol famli, mo givim olgeta leta i go long ol memba blong famli we oli bin raet abaot hem. ?From wanem i impoten blong andastanem se laef blong yumi, oli ol leta abaot Kraes?

2 Korin 5:6–7.?Hem i minim wanem blong “no makem laef blong yumi long ol samting we yumi luk. Yumi makem long bilif blong yumi”? ?Wanem nao yumi stap mekem blong soem se yumi stap biliv long Sevya iven we yumi no save luk Hem?

2 Korin 5:17.?Bae famli blong yu i save tingting o faenem sam eksampol blong ol samting we oli stap long neja, we oli stap jenis long wan bigfala wei, mo oli kam ol niu samting? (luk long pikja long en blong aotlaen ia). ?Olsem wanem nao gospel blong Jisas Kraes i save jenisim yumi?

2 Korin 6:1–10.Folem wanem i stap long 2 Korin 6:1–10, ?hem i minim wanem blong stap olsem “man blong wok blong God”? (ves 4). ?Wanem kwaliti nao wan man blong wok blong God i mas gat?

2 Korin 6:14–18.?Olsem wanem nao yumi folem advaes blong Pol blong “no go joen wetem ol man we oli no Kristin,” be long semtaem, lavem olgeta we oli stap raon long yumi?

Blong gat moa tingting blong stap tijim ol pikinini, luk long aotlaen blong wik ia ong Kam Folem Mi—Blong Praemeri.

Wan singsing: “Help Me, Dear Father,” Children’s Songbook, 99.

Stap Kam Antap long Fasin blong Yumi blong Stap Tij

Serem ol lesen we yu yusum wan samting long hem. Samfala poen blong gospel, olsem Atonmen, oli save kam had blong andastanem. Tingting blong yusum ol pikja o ol samting we oli save helpem famli blong yu blong andastanem ol prinsipol we yu faenem insaed long ol skripja.

grin bebet blong lif, basket blong wom blong bataflae, mo bataflae

Taem yumi tanem laef blong yumi i kam long gospel blong Kraes, jenis ia, i bigwan tumas mekem se Pol i tokbaot se i olsem yumi kam wan “niufala man” (2 Korin 5:17).