“25 Septemba–1 Oktoba. Galesia: ‘Wokbaot Folem Spirit,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“25 Septemba–1 Oktoba. Galesia,” Kam Folem Mi—Blong Wanwan Man, Woman mo Famli: 2023
Sevya we i laef bakegen long ded i bin visitim Pol we i bin stap long kalabus (luk long Ol Wok 23:11). Jisas Kraes i save mekem yumi fri long jen blong holem man i slef (Galesia 5:1).
25 Septemba–1 Oktoba
Galesia
Wokbaot Folem Spirit
Taem yu stap ridim Buk blong Galesia, raetemdaon ol filing mo tingting we yu kasem. Taem yu mekem olsem, i save helpem yu blong tingbaot olgeta, mo blong yu tingting hevi long olgeta long wan fiuja taem.
Raetemdaon Ol Filing mo Tingting blong Yu
Gospel blong Jisas Kraes i givim wan rod blong kam fri long fasin blong stap slef long saed blong spirit. Be samtaem, ol pipol we oli bin gotru long fridom blong gospel ia, oli tanem baksaed blong olgeta long hem, mo oli “wantem gobak bakegen long ol devel ya we oli masta blong [olgeta] bifo” (Galesia 4:9). Hemia nao wanem we sam Sent blong Galesia oli bin stap mekem—oli bin stap tanem baksaed long fridom ia we Kraes i bin givim long olgeta (luk long Galesia 1:6). Leta blong Pol i go long Ol Man Galesia, long tetaem ia, i bin wan hariap singaot blong kambak long fridom ia we Kraes i bin mekem olgeta oli kam fri tru long hem (Galesia 5:1). Singaot ia, i wan singaot we yumi tu i nid blong harem mo mekem folem from se, nomata situesen blong yumi i jenis, faet ia bitwin fridom mo fasin blong stap slef, i stap gogohed nomo. Olsem we Pol i bin tijim, hem i no inaf blong talem se “mi mi fri finis” (Galesia 5:13); yumi mas stanap strong long fridom ia (Galesia 5:1) taem yumi stap dipen long Kraes.
Sam Aedia blong Skripja Stadi blong Yuwan
Loa blong Kraes i mekem mi mi fri.
Pol i bin raet i go long Ol Sent long Galesia taem yumi lanem we oli bin wokbaot i go long rong rod from sam giaman tijing (luk long Galesia 1:6–9). Wan long ol tijing ia, i we, blong Lod i sevem yumi, Ol Jentael we oli bin akseptem gospel oli mas sakomsaes, mo oli mas holemtaet ol nara kastom blong loa blong Moses (luk long Galesia 2). Pol i bin singaotem ol kastom ia, se oli “fasem olgeta … i kam slef bakegen” (Galesia 5:1). Taem yu stap ridim advaes blong Pol i go long Ol Man Galesia, lukaotem ol prinsipol we oli save helpem yu blong andastanem wanem nao hem i tru fridom. Mo tu, yu save tingting hevi long ol giaman kastom, o ol nara yok we oli fasem yu i slef i stap, we oli save stap yet insaed long laef blong yu. ?I gat eni samting we i save stopem yu blong harem fridom ia we gospel i givim? ?Olsem wanem nao Kraes mo gospel blong Hem oli mekem yu yu fri? (Galesia 5:1).
Luk tu long 2 Nifae 2:27; 9:10–12.
Mi mi gat raet long ol blesing we God i bin promesem long Ebraham.
Sam long Ol Sent blong Galesia oli bin wari se, from oli kamaot stret long laen blong Ebraham, bae oli no kasem ol blesing we God i bin promesem long Ebraham, mo i tekem tu, fasin ia blong kam olsem wan god. Folem wanem i stap long Galesia 3:7–9, 13–14, 27–29, ?wanem nao i save talem se wan i kamaot long laen blong Ebraham?
Blong lanem abaot ol blesing we God i bin promesem long Ebraham, mo ol blesing we yumi save kasem olsem wan blong laen ia, luk long Gaed long Ol Skripja, “Kavenan blong Ebram,” olskripja.ChurchofJesusChrist.org. ?From wanem ol blesing ia we God i bin promesem long Ebraham, oli impoten long yu?
Ebraham i bin gat gospel blong Jisas Kraes.
Profet Josef Smit i eksplenem: “Yumi no save biliv se olgeta blong bifo, long eni taem, oli no save samting abaot sistem blong heven, olsem plante i stap talem; hemia from evriwan we God i sevem, God i sevem olgeta tru long paoa blong bigfala plan ia blong fasin blong pemaot man, hemia bifo Kraes i bin kam, i kam kasem tedei. … Ebraham i bin mekem ol sakrifaes, mo i nomata long hemia, oli bin prijim Gospel ia long hem” (“The Elders of the Church in Kirtland to Their Brethren Abroad,” The Evening and the Morning Star, Mar. 1834, 143, JosephSmithPapers.org). ?From wanem nao yu ting se i impoten blong Ol Sent long taem blong Pol blong oli mas save se Ebraham mo ol nara profet, oli bin gat gospel blong Jisas Kraes? ?From wanem hem i impoten blong yu yu save hemia? (Luk long Hileman 8:13–20; Moses 5:58–59; 6:50–66.)
Luk tu long Teachings of Presidents of the Church: Joseph Smith (2007), 45–56.
Sapos mi wokbaot wetem Spirit, bae mi kasem ol frut blong Spirit.
Sapos yu stap stadi long ol ves ia bae i save helpem yu blong skelem hamas nao yu stap wokbaot wetem Spirit. ?Yu yu gat frut ia blong Spirit we oli tokbaot long ol ves 22–23? ?Wanem narafala frut, o risal nao, blong fasin blong stap laef long saed blong spirit, yu yu luk long laef blong yu? Tingting hevi long wanem yu nidim blong mekem frut ia i kam moa bigwan. Long wanem wei nao, taem yu stap lukaotem frut ia i stap kam bigwan mo, bae i mekem ol impoten rilesensip insaed long laef blong yu, oli kam antap moa?
Mi mas lukaotem frut blong Spirit insaed long laef blong mi.
Sapos yu stap traem blong wokbaot wetem Spirit, be yu luk se ol hadwok blong yu oli no stap tekem frut olsem promes i talem, ridim Galesia 6:7–10. ?Wanem mesej nao yu yu harem se Lod i stap talem long yu long ol ves ia?
Luk tu long Alma 32:28, 41–43; Doktrin mo Ol Kavenan 64:32–34.
Ol Aedia blong Famli Skripja Stadi mo Haos Naet
-
Galesia 3:11.Long yu, ?hem i minim wanem blong “laef wetem fet”? ?Long wanem wei nao, yumi stap laef wetem fet olsem wan famli?
-
Galesia 4:1–7.Maet yu save presentem Galesia 4 taem yu toktok raon long wanem i defren bitwin ol wokman blong king mo ol pikinini blong hem. ?Wanem janis o paoa nao, wan pikinini blong king i gat, we wan wokman i no gat? Tingting long hemia, taem we, tugeta, yufala i ridim ol ves 1–7. ?Wanem nao ol ves ia oli stap tijim abaot rilesensip we yumi gat wetem Papa long Heven?
-
Galesia 5:16–26.Tingting blong toktok raon long ol defren samting we i stap bitwin ol wok blong man mo frut blong Spirit. Blong ademap sam gud taem long storian blong yufala, famli blong yu i save givim nem blong ol defren frut, mo i yusum ol toktok we Pol i yusum blong tokbaot frut ia blong Spirit. Afta, wanwan memba blong famli i save jusum wan, i talem nem blong hem, mo i tokbaot wan we i eksampol blong frut ia. Hemia i save lidim yufala blong toktok raon long ol wei we famli blong yu i save invaetem Spirit i kam insaed long hom blong yu mo lukaotem gud frut ia. Afta long storian, yufala i save kakae wan frut salad.
-
Galesia 6:1–2.Maet bae i gat ol taem we, wan long famli blong yumi, i foldaon long wan rong samting. ?Wanem kaonsel nao, yu yu faenem insaed long Galesia 6:1–2 abaot wanem blong mekem long kaen situesen olsem?
-
Galesia 6:7–10.Sapos famli blong yu i bin planem wan samting tugeta, yu save yusum eksperiens ia blong soemaot prinsipol ia se, “wanem sid we man i planem fastaem long garen blong hem, be frut blong hem nomo, man ya bambae i mas kakae” (ves 7). O yu save askem ol memba blong famli abaot frut o vejetebol we oli laekem tumas, mo tokbaot wanem i nid blong mekem wan plant i kam bigwan blong i karem kaekae ia. (luk long pikja long en blong aotlaen ia.) Yufala i save tokbaot ol blesing we famli blong yufala i stap hop blong kasem, mo olsem wanem blong yusum ol blesing ia.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Tijim Mi blong Folem Laet Ia blong God,” STSP, pej 66.
Stap Kam Antap long Fasin blong Yumi blong Stap Tij
Helpem famli blong yu blong yusum ol skripja i kambak long laef blong olgetawan. Nifae i bin talem: “mi yusum evri skripja long laef blong mifala, blong hem i save stap blong helpem mifala mo blong mifala i lanem samting” (1 Nifae 19:23). Blong helpem famli blong yu blong mekem hemia, yu save invaetem olgeta blong tingting hevi long ol taem we oli bin filim frut blong Spirit we oli tokbaot long Galesia 5:22–23. (Luk long Teaching in the Savior’s Way, 21.)
Pol i bin tijim se taem yumi wokbaot wetem Spirit, bae yumi filim frut blong Spirit insaed long laef blong yumi.