Iesu Keriso

11–17 Setema

2 Korinito 1–7

“Ia Outou Lelei ma le Atua”

A o e su’esu’e i tusi a Paulo i Korinito, tusi i lalo nisi o mataupu faavae o le talalelei e te tau i ai ma mafaufau loloto pe faapefea ona e faaaogaina i lou olaga.

Tusifaamaumau Ou Lagona Uuna’i

O nisi taimi, o le avea ma se ta’ita’i o le Ekalesia, o lona uiga o le fai atu o nisi o mea faigata. Sa moni lena mea i aso o Paulo e pei foi ona moni i aso nei. O le mea moni, o se tusi na muamua atu mai ia Paulo i le Au Paia i Korinito, sa aofia ai ni a’oa’iga ma sa mafua ai ni lagona tiga. I le tusi lea sa avea ma 2 Korinito, sa ia taumafai ai e faamalamalama atu le mea na faaosofia ai ana upu malolosi: “Aua o le puapuaga tele atoa ma le atuatuvale o le loto na ou tusi atu ai ia te outou ma loimata e tele; e le’i ina ia faatigaina outou, a ia outou iloa ai lo’u alofa ua matua tele ia te outou” (2 Korinito 2:4). Pe a e i ai i le itu e mauaina nisi o faasa’oga mai se ta’ita’i, e matu’‘i fesoasoani lava le iloa e musuia lea e ala i le alofa faaKeriso. Ma e oo lava foi i na tulaga ia e le musuia ai e ala i le alofa faaKeriso], afai tatou te naunau e vaai atu i isi ma le ituaiga alofa lea sa lagonaina e Paulo, e faigofie lava ona tali lelei atu i soo se faatiga. E pei ona fautuaina mai e Elder Jeffrey R. Holland, “Ia agalelei ona o vaivaiga faaletagata—o ou vaivaiga faapea foi vaivaiga o i latou tou te galulue faatasi i se Ekalesia o loo ta’ita’ia e alii ma tamaitai e galulue fua. Vagana ai i le tulaga o Lona Alo Pele e Toatasi e atoatoa, na o tagata lē atoatoa lava sa galue ai le Atua” (“Le Alii e, Ua Ou Faatuatua,” Liahona, Me 2013, 94).

aikona o su’esu’ega faaletagata lava ia

Manatu mo Su’esu’ega Faaletagata Lava Ia o Tusitusiga Paia

2 Korinito 1:3–7; 4:6–10, 17–18; 7:4–7

O o’u tofotofoga e mafai ona avea ma se faamanuiaga.

I mea uma sa feagai ma Paulo i lona olaga, e le o se mea e faateia ai le tele o mea na ia tusia e uiga i faamoemoega ma faamanuiaga o tofotofoga. A o e faitau i le 2 Korinito 1:3–7; 4:6–10, 17–18; ma le 7:4–7, mafaufau i auala e mafai ona avea ai ou tofotofoga o se faamanuiaga Mo se faataitaiga, atonu e te mafaufau loloto i auala na “faamafanafana mai ai [oe] e le Atua i [ou] puapuaga uma” ma le ala e mafai ai e oe, i se isi itu, ona “faamafanafana atu ia te i latou, ua maua i se tasi lava puapuaga” (2 Korinito 1:4). Pe atonu foi e te taulai atu i le ala “ua faapupula,” atu ai le malamalama o Iesu Keriso i lou loto, e tusa lava pe e te “puapuagatia” ma “fememeai” (2 Korinito 4:6, 8).

Tagai foi Mosaea 24:13–17; Henry B. Eyring “Faaosoosoina, Tofotofoina, ma Faaiilaina,” Liahona, Nov. 2020, 96–99); Gospel Topics, “Faigata,” topics.ChurchofJesusChrist.org.

2 Korinito 2:5–11

O le faamagalo o se faamanuiaga e mafai ona ou tuuina atu ma maua mai.

E le tele ni mea tatou te iloa i le tagata lea na faatatau i ai Paulo i le 2 Korinito 2:5–11pau le mea, sa sala o ia (tagai fuaiupu 5–6) ma sa manao Paulo i le Au Paia e faamagalo o ia (tagai fuaiupu 7–8). Aisea tatou te le mafai ai i nisi o taimi ona “faamauina lo [tatou] alofa i” se tagata e pele ia i tatou o lē sa faatiga ia i tatou? (fuaiupu 8). E faapefea ona afaina isi ma i tatou lava i le taofiofi o le faamagalo atu? (tagai fuaiupu 7, 10–11). E faapefea e le taofiofi o le faamagalo atu ona tuu atu ai “ia oleolegia i tatou e Satani”? (fuaiupu 11).

Tagai foi i le Mataupu Faavae ma Feagaiga 64:9–11.

2 Korinito 5:14–21

E ala i le Togiola a Iesu Keriso, e mafai ai ona ou faalelei ma le Atua.

E tai pei foi o soo se isi lava, sa iloa e Paulo le tulaga o le avea ma se “tagata fou” (2 Korinito 5:17). Sa sau o Ia mai le avea ma se tagata faaoosala o tagata Kerisiano i se tagata e le fefe e puipui Keriso. A o e faitau i le 2 Korinito 5:14–21, mafaufau i fesili e pei o nei: O le a le uiga o le ia faalelei. O le a le uiga o le faalelei i le Atua? Mafaufau loloto i le mea atonu o loo va ai oe mai le Atua. O le a se mea e manaomia ona e faia ina ia saga faalelei atoatoa ai ma Ia? E faapefea ona faia e le Faaola lena mea?

Atonu foi e te mafaufau loloto i le uiga o le ia fai ma “savali a Keriso” i le “galuega o le leleiga” (fuaiupu 18, 20). O a ni malamalamaaga loloto e te maua mai le savali a Elder Jeffrey R. Holland “O Le Galuega o le Faaleleiga”? (Liahona, Nov. 2018, 77–79).

Tagai foi 2 Nifae 10:23–25.

2 Korinito 7:8–11

O le tiga e tusa i le Atua e taitai atu ai i le salamo.

E le masani ona tatou mafaufau i le faanoanoa o se mea lelei, ae sa tautala Paulo e uiga i le “tiga e tusa i le atua” (2 Korinito 7:10) o se vaega e taua o le salamo. Mafaufau i mea ua e iloa e uiga i le tiga e tusa ma le atua mai mau nei: 2 Korinito 7:8–11; Alema 36:16–21; Mamona 2:11–15; ma le savali a Sister Michelle D. Craig “Lē Faamalieina Faaleagaga” (Liahona, Nov. 2018, 52–55). O anafea na e lagonaina ai le faanoanoa e tusa i le atua, ma o le a se aafiaga sa i ai i lou olaga?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

2 Korinito 3:1–3.Pe na i ai se taimi na fai atu ai tagata o lou aiga i se tasi e tusi se tusi o le fautuaina atu mo i latou, e pei o se talosaga mo se galuega po o se aoga? Fai atu ia i latou e talanoa e uiga i le aafiaga lenei. Na aoao mai Paulo, o olaga o le Au Paia sa pei o tusi o le fautuaina atu mo le talalelei mai ia Keriso, “e lei tusia i le vaitusi, a o le Agaga o le Atua soifua.” A o outou faitau faatasi i le 2 Korinito 3:1–3 ia talanoa pe faapefea ona pei a tatou faataitaiga o tusi o le fautuaina atu mo le talalelei lea e mafai ona “iloa ma faitaulia e tagata uma,” Atonu e mafai e tagata taitoatasi o le aiga ona tusi se “tusi” e faamatala ai le auala na avea ai se isi tagata o le aiga ma se faataitaiga lelei o se soo o Iesu Keriso. E mafai ona faitau a latou tusi i le aiga ma tuu atu i le tagata o le aiga sa latou tusi e uiga i ai. Aisea e taua ai ona malamalama o o tatou olaga o “tusi a Keriso”?

2 Korinito 5:6–7.O le a le uiga o le “faatuatua ua matou savavali ai, ae le o le tino mai o mea”? O a ni mea o tatou faia e faaali atu ai ua tatou talitonu i le Faaola e tusa lava pe le o mafai ona tatou vaai ia te Ia?

2 Korinito 5:17.E mafai ona mafaufau lou aiga i se, po o le sue o ni faataitaiga i le natura o ni mea e uia ni suiga mataina ma avea ai ma ni mea fou? (tagai i le ata i le faaiuga o le otootoga lenei). E mafai faapefa e le talalelei a Iesu Keriso ona suia i tatou?

2 Korinito 6:1–10.E tusa ai ma le 2 Korinito 6:1–10, o le a le uiga o le ia avea ma “auauna a le Atua”? (fuaiupu 4). O a uiga auaumama o i ai i se auauna a le Atua?

2 Korinito 6:14–18.E mafai faapefea ona tatou mulimuli i le fautuaga a Paulo, “ia o mai ai outou nai totonu [o le amioletonu], ma ia outou vavae mai,” ao alolofa atu foi ia i latou o siomia i tatou?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fesoasoani Mai Ia Te A’u Tama Pele,” Tusipese a Tamaiti, 52.

Faaleleia o Lo Tatou Aoao Atu

Faasoa atu lesona o mea faitino. O nisi o manatu o le talalelei, e pei o le Togiola, e mafai ona faigata ona malamalama i ai. Mafaufau e faaaoga ata po o mea faitino e mafai ona fesoasoani ai i lou aiga ia malamalama i mataupu faavae e te tau i ai i mau.

anufe, koku, ma le pepe

Pe a tatou liliu mai i le talalelei a Keriso, e matuai o’oo’o lo latou suiga lea na faamatalaina e Paulo o le avea ma se “tagata fou” (2 Korinito 5:17).