“10–16 Epril. Matiu 15–17; Mak 7–9: ‘Yu Yu Mesaea Ya,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“10–16 Epril. Matiu 15–17; Mak 7–9,” Kam Folem Mi—Blong Wanwan Man, Woman mo Famli: 2023
Taem Kraes I Tanem I Kam Narafala, i kam long Carl Heinrich Bloch
10–16 Epril
Matiu 15–17; Mak 7–9
“Yu Yu Mesaea Ya”
Taem yu stap ridim ol skripja, hemia i stap invaetem Tabu Spirit i kam insaed long laef blong yu. Wan long ol impoten misin blong Tabu Spirit, i blong testifae abaot Jisas Kraes. Taem yu stap ridim ol skripja long wik ia, teknot long ol filing long saed blong spirit we oli kam blong mekem testemoni blong yu oli kam strong moa, abaot Sevya.
Raetemdaon Ol Filing mo Tingting blong Yu
?Yu no ting se i defren smol blong Ol Farisi mo Ol Sadusi oli askem Jisas blong Hem i soem “wan saen we i kam long heven”? ?Weswe long plante merikel blong Hem? ?Oli no bin inaf? ?Olsem wanem long ol tijing blong Hem we i gat paoa, o weswe long ol plante defren wei we Hem i bin mekem ol profesi blong bifo oli kamtru? Wanem oli askem, i kam, i no from i no gat saen, be from oli no wantem blong “luksave ol saen” mo akseptem olgeta. (Luk long Matiu 16:1–4.)
Pita, olsem Ol Farisi mo Ol Sadusi, oli bin witnesem ol merikel blong Sevya mo hem i bin harem ol tijing blong Hem. Be strong testemoni blong Pita: “Yu yu Mesaea ya. Yu yu Pikinini blong God ya we i laef, i stap we i stap,” i no kam tru long ol samting we hem i bin filim—tru long “bodi mo blad” blong hem. Testemoni blong hem, “Papa we i stap long heven” nao i bin talemaot long hem. Revelesen i strong ston ia we Sevya i bildimap Jos blong Hem, long bifo, mo long tedei—revelesen we i kam long heven i go long ol wokman blong Hem. Mo hemia i strong ston we yumi save bildimap fasin blong yumi blong kam disaepol—revelesen ia se Jisas Hem i Kraes, mo we wokman blong Hem i holem “ol ki blong kingdom.” Taem oli bildimap yumi antap long fandesen ia, “paoa blong ded bambae i no naf blong winim [yumi]” (Matiu 16:15–19).
Sam Aedia blong Skripja Stadi blong Yuwan
Wan testemoni blong Jisas Kraes, i kam long yumi tru long revelesen.
Sapos Jisas Kraes i askem ol pipol tedei: “?Be yufala, yufala i stap tokbaot mi, se mi hu?” ?wanem nao bae oli talem? Bae yu ansa olsem wanem sapos Jisas i stap askem yu: “?Be yu, yu stap tokbaot mi, se mi hu?” (Luk long Matiu 16:13–15.)
Tingting hevi long testemoni blong Sevya, mo hao nao yu kasem testemoni ia. ?Wanem yu save lanem aot long Matiu 16:15–17 we i save mekem testemoni ia blong yu i kam strong moa? Sapos yu wantem lanem moa abaot testemoni mo revelesen we i blong yuwan, luklukgud insaed long olgeta skripja ia: Jon 15:26; 2 Nifae 31:17–18; Alma 5:45–48; mo Doktrin mo Ol Kavenan 8:2–3.
Luk tu long “President Nelson: Hear Him—Personal Revelation” (vidio), ChurchofJesusChrist.org.
Matiu 16:13–19; 17:1–9; Mak 9:2–9
“Ol ki blong kingdom blong heven” oli stap long wol ia tedei.
“Ol ki blong kingdom blong heven” we Sevya i bin promesem blong givim long Pita, oli ol ki blong prishud (Matiu 16:19). ?Wanem nao oli ol prishud ki? ?From wanem yumi nidim olgeta? Tingting hevi long ol kwestin ia taem yu stap rid abaot promes blong Sevya we i stap long: Matiu 16:13–19 mo taem we promes ia i bin kamtru long Matiu 17:1–9; Mak 9:2–9 (luk tu long Josef Smit Translesen, Mak 9:3 [long Mak 9:4, futnot a]).
Ol nara risos we oli stap blong helpem yu blong lanem abaot ol ki blong prishud, i gat: Doktrin mo Ol Kavenan 65:2; 107:18–20; 110:11–16; 128:9–11; “Ki blong Prishud, Ol” insaed long Gaed long Ol Skripja (olskripja.ChurchofJesusChrist.org); mo mesej blong Elda Gary E. Stevenson “?Wea Nao Ol Ki mo Atoriti blong Prishud?,” (Jeneral Konfrens, Epril 2016, ChurchofJesusChrist.org/general-conference/conferences?lang=bis). Taem yu stap stadi long risos ia, tingting blong mekem wan lis blong wanem yu lanem abaot ol ki blong prishud, mo blong faenem ol blesing we i kam taem. Long tingting blong yu, ?from wanem nao wan ki wan gudfala simbol blong raet ia blong lidim seves blong prishud?
Luk tu long Dallin H. Oaks, “Melkesedek Prishud mo Ol Ki,” Liahona, Mei 2020, 69–72; Gaed long Ol Skripja, “Jenis I Kam Niu.”
Ol ki blong prishud oli atoriti ia blong daerektem fasin blong yusum prishud.
Taem mi stap lukaotem moa bigfala fet, mi save stat wetem bilif ia we mi gat finis.
Papa ia we oli tokbaot long Matiu 17 mo Mak 9 i gat ol tru risen blong no save gud, insaed long hat blong hem, se bae i hilim boe blong hem. Hem bin askem ol disaepol blong Jisas blong oli mekem boe blong hem i kam oraet bakegen, mo oli no bin save mekem. Be taem we hem i bin askem Sevya blong wan merikel, hem i jusum blong talemaot bilif blong hem. Hem i talem: “Masta, mi biliv.” Afta, blong talemaot se bilif blong hem i no stret evriwan, hem i ademap: “Mi mi bilif, be bilif blong mi i smol. Plis yu givhan long mi.”
?Wanem nao Spirit i stap tijim yu taem yu stap rid abaot merikel ia? ?Olsem wanem nao Papa long Heven i bin helpem yu blong gat moa bilif? ?Wanem nao yu save mekem blong kam antap moa long bilif ia we yu gat finis? Maet yu save putum tugeta wan lis blong ol skripja, ol mesej blong konfrens, o ol eksperiens we oli bin mekem bilif blong yu i kam strong moa.
Luk tu long Jeffrey R. Holland, “Lod Mi Mi Biliv,” Jeneral Konfrens, Epril 2013, ChurchofJesusChrist.org/general-conference/conferences?lang=bis.
Ol Aedia blong Famli Skripja Stadi mo Haos Naet
-
Matiu 15:7–9; Mak 7:6–7.?Wanem nao i defren bitwin fasin blong givim ona long God wetem maot blong yumi, o toktok, mo fasin blong stap givim ona wetem hat blong yumi?
-
Matiu 15:17–20; Mak 7:18–23.?From wanem yumi mas lukaot gud long wanem yumi stap putum long maot blong yumi? Folem wanem we Jisas i bin tijim long ol ves ia, ?from wanem bae yumi mas lukaotgud abaot wanem i stap kamaot long maot blong yumi—mo aot long hat blong yumi? ?Olsem wanem yumi save kipim hat blong yumi i klin gud?
-
Matiu 16:15–17.?Olsem wanem nao God i stap talemaot long yumi tru long revelesen se Jisas Hem i “Mesaea ya, Pikinini blong God we i stap laef? (ves 16). ?Olsem wanem nao yumi save rere yumiwan blong kasem revelesen we i kam long Hem?
-
Matiu 16:13–19; 17:1–9.Blong tijim ol pikinini abaot ol ki blong prishud, yu save talem stori blong Elda Gary E. Stevenson we trak blong hem i lok mo hem i no save go insaed (luk long vidio ia: “Where Are the Keys?” long ChurchofJesusChrist.org). Yu save letem ol pikinini blong yu oli yusum ol ki blong openem haos, trak, o ol nara lok. Tingting blong soem wan pikja blong Presiden blong Jos, mo testifae se hem i stap holem evri ki blong prishud, semmak olsem we Pita i bin holem.
-
Matiu 17:20.Ol profet we oli gat strong bilif long Jisas Kraes oli bin muvumaot ol bigfala hil (luk long Jekob 4:6; Moses 7:13). Be plante taem, hemia i no merikel ia we yumi nidim. Presiden M. Russell Ballard i tijim: “Sapos yumi gat fet we i smol olsem wan sid blong masted tri, bae Lod i save helpem yumi blong muvumaot ol bigfala hil blong slak tingting, mo tu tingting long ol wok we oli stap long fored blong yumi taem yumi stap givim seves long ol pikinini blong God, we i tekem ol memba blong famli, ol memba blong Jos, mo olgeta we oli no yet ol memba blong Jos.” (“Ol Nambawan Presen we Oli Kam long God,” Liahona, Mei 2018, 9). ?From wanem nao i gat ol bigfala hil insaed long laef blong yumi we yumi nidim blong muvumaot olgeta? ?Olsem wanem bae yumi save soem bilif blong yumi long paoa blong God blong i helpem yumi blong karemaot ol bigfala hil ia?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Believe in Christ,” Hymns, namba 134.
Stap Kam Antap long Fasin blong Yumi blong Stap Tij
Kam tugeta plante taem. Presiden Henry B. Eyring i tijim: “Neva mestem wan janis blong pulum tugeta ol pikinini blong oli lanem doktrin blong Jisas Kraes. Ol kaen taem olsem, oli no hapen fulap taem komperem long ol traehad blong enemi” (“The Power of Teaching Doctrine,” Ensign, May 1999, 74).
Masta. Mi Karem Pikinini blong Mi I Kam long Yu, i kam long Walter Rane