“27 Maj–2 Epril. Matiu 14; Mak 6; Jon 5–6: ‘Yufala I No fraet,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“27 Maj–2 Epril. Matiu 14; Mak 6; Jon 5–6,” Kam Folem Mi—Blong Wanwan Man, Woman mo Famli: 2023
27 Maj–2 Epril
Matiu 14; Mak 6; Jon 5–6
“Yufala I No fraet”
Taem yu stap ridim Matiu 14; Mak 6; mo Jon 5–6, lukaotem ol trutok we oli gat mining long yu. Maet bae yu askem yuwan ol kwestin olsem: “Olsem wanem nao ol stori long ol japta ia oli go wetem laef blong mi? ?Wanem mesej nao mi mi faenem we i blong laef blong mi?” o “Wanem nao bae mi wantem serem wetem famli blong mi, o wetem ol narawan?”
Raetemdaon Ol Filing mo Tingting blong Yu
?Wanem nao i bin save givim insperesen long Pita blong i aot long sef bot ia long medel blong Solwota blong Galili long taem blong wan strong win? ?Wanem nao i bin lidim hem blong biliv se sapos Jisas i save wokbaot long wota, bae hem tu i save mekem? Bae yumi no save stret. Be maet Pita i bin andastanem se Pikinini blong God i kam, i no jes blong mekem ol gudfala wok nomo blong ol pipol, be tu, blong givim paoa long ol pipol olsem Pita blong mekem ol gudgudfala samting tu. Long en, invitesen blong Jisas i bin: “yu biaen long mi” (Luk 18:22). Pita i bin akseptem invitesen blong hem wantaem nomo, mo hem i bin wantem blong akseptem bakegen, iven sapos i minim blong fesem ol fraet blong hem, mo mekem wan samting we i luk se i no posibol blong mekem. Maet bae Lod i no askem yumi blong kamaot long wan bot long medel blong wan strong win, o blong givim las bred blong yumi taem we i gat plante taosen we oli nidim kakae, be Hem i save askem yumi blong akseptem ol taem we Hem i stap soem rod, iven sapos yumi no andastanem fulwan. I nomata long wanem invitesen we i kam long yumi, samtaem, bae yumi sapraes, o iven, bae yumi fraet. Be ol merikel oli save hapen, sapos, olsem Pita, yumi putum fraet blong yumi long saed, mo ol tu tingting, mo ol smol save blong yumi, mo stap folem Hem wetem fet.
Sam Aedia blong Skripja Stadi blong Yuwan
Jisas Kraes i ona long Papa blong Hem.
Rilesensip bitwin Papa long Heven mo wanwan long ol pikinini blong Hem, hem i minim se bae i wan tabuwan. Long ol ves ia, Jisas Kraes, i givim wan eksampol, wetem insperesen, blong folem long rilesensip blong yumi wetem Papa long Heven. Ridim Jon 5:16–47, mo makem, o teknot long evri taem we toktok ia, Papa, i kamaot. ?Olsem wanem nao Pikinini i givim ona long Papa, mo olsem wanem nao yumi save folem eksampol blong hem? ?Wanem nao yu yu lanem abaot wei we Papa i harem abaot Pikinini blong Hem? ?Wanem nao yu yu gat insperesen blong mekem blong mekem se rilesensip blong yu wetem Papa long Heven i kam strong moa.?
Luk tu long Jon 17; Jeffrey R. Holland, “The Grandeur of God,” Liahona, Nov. 2003, 70–73.
Jisas i fidim wan bigfala grup blong faef taosen pipol, wetem faef bred mo tu smol fis, tru long wan merikel.
Matiu 14:15–21; Mak 6:33–44; Jon 6:5–14
Sevya i save mekem ol ofring blong mi we oli smol, oli kam bigwan, blong mekem ol stamba tingting blong Hem oli kamtru.
?Yu yu eva filim se yu no naf blong lukluk long evri nid we yu stap luk raon long yu—insaed long hom blong yu, insaed long ol rilesensip blong yu, o insaed long sosaeti? Ol disaepol blong Jisas Kraes, maet bae oli filim se oli no naf taem we Hem i askem olgeta blong fidim faef taosen pipol we oli hanggri, taem we i gat faef bred mo tu fis nomo i stap. Taem yu stap rid abaot merikel we i hapen afta long hemia, tingting hevi long wei we God i yusum ol smol ofring blong seves we yu yu givim blong blesem olgeta raon long yu. ?Long wanem wei Hem i bin mekem ol efot blong yu oli kam bigwan, taem yu bin stap givim seves long Hem? Tingting long toktok ia we i kam long Sista Michelle D. Craig: “Be yu mo mi, i save givim wanem yumi gat long Kraes, mo bambae Hem i dabdabolem ol traehad blong yumi. Wanem we yu gat blong givim i moa bitim inaf—iven wetem ol samting we yu no strong mo ol wiknes blong yu—sapos yu dipen long gladhat blong God” (“Fasin blong No Hapi Folem Tabu Wei,” Liahona, Novemba 2018, 52).
Matiu 14:22–33; Mak 6:45–52; Jon 6:15–21
Jisas Kraes i stap invaetem mi blong mi putum ol fraet mo ol tu tingting blong mi i stap long saed, mo blong mi praktisim bilif we mi gat long Hem.
Insaed long maen blong yu, gat pikja ia blong ol ditel blong wanem oli tokbaot insaed long Matiu 14:22–33; Mak 6:45–52; mo Jon 6:15–21. Traem tingting se, ?Pita mo ol nara disaepol bae oli harem olsem wanem? ?Wanem nao yu lanem abaot wok blong stap disaepol aot long ol toktok mo ol aksen blong Sevya, we i stap long ol ves ia? ?Wanem nao yu yu lanem aot long ol toktok mo ol aksen blong Pita? (Luk tu long 1 Nifae 3:7.) ?Wanem nao Lod i stap invaetem yu blong mekem we i olsem blong stap kamaot long bot? ?Wanem nao yu yu faenem insaed long ol ves ia, we i givim yu paoa long tingting blong praktisim fet blong yu long Jisas Kraes?
Olsem wan disaepol blong Jisas Kraes, mi mi mas glad blong bilivim mo blong akseptem trutok, iven sapos i had blong mekem.
Taem we Jisas i tokbaot Hemwan olsem “bred blong laef” (Jon 6:48), plante oli faenem se “tok ya i strong tumas” (Jon 6:60). ?Olsem wanem nao, ol toktok blong Pita long Jon 6:68–69 oli helpem yu long ol taem we, i luk se i had blong akseptem, o laef folem doktrin blong Sevya? ?Wanem nao i kam long filing mo tingting blong yu abaot testemoni blong Pita? ?Wanem nao “ol tok blong laef ya we i no save finis” (Jon 6:68) we oli stap helpem yu blong stap strong blong stap folem Sevya?
Luk tu long M. Russell Ballard, “To Whom Shall We Go?,” Liahona, Nov. 2016, 90–92.
Ol Aedia blong Famli Skripja Stadi mo Haos Naet
-
Matiu 14:15–21.Tingting olsem wanem yu yu save helpem famli blong yu blong pikjarem se bae i nidim hamas bred mo fis blong fidim faef taosen pipol? Insaed long Matiu 14:15–21, ?wanem nao merikel ia i stap tijim yumi abaot Sevya? Tingting blong serem wan eksperiens blong wan taem we yu filim se yu no gat inaf blong givim, mo Sevya i bin dabdabolem ol hadwok blong yu.
-
Matiu 14:22–33.Maet bae famli blong yu i glad blong aktem bakegen stori we i stap long ol ves ia? ?From wanem ol disaepol bae oli fraet? ?From wanem Pita i bin save winim fraet ia mo lego bot? ?Olsem wanem nao hem i bin soem fet blong hem, iven taem hem i stat blong draon? ?Weswe? ?Yumi tu, samtaem, yumi olsem Pita?
-
Jon 5:1–16.Invaetem ol memba blong famli blong oli tekem not long ol taem we pat blong sentens ia, “kam gud bakegen” i kamaot long ol ves ia. ?Long wanem wei Jisas Kraes i save mekem ol pipol oli kam gud bakegen? ?Wetaem mo olsem wanem Hem i bin mekem yumi kam gud bakegen?
-
Jon 6:28–58.Givim, long wanwan memba blong famli, wan pis bred blong kakae, mo toktok raon long ol gud samting we yumi kasem aot long bred, mo ol nara helti kaekae. Afta, luklukgud insaed long ol ves ia tugeta, mo lukaotem from wanem Jisas Kraes i bin singaotem Hemwan se hem i “bred we i save givim laef” (Jon 6:35). ?Hem i minim wanem blong kakae bred we i givim laef? (luk long D. Todd Christofferson, “The Living Bread Which Came Down from Heaven,” Liahona, Nov. 2017, 36–39).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “God Hem I Waes Mo I Mekem Rod,” STSP, pej 19.
Stap Kam Antap long Stadi blong Yuwan
Lukaotem ol niu wei blong yu blong lukluk ol samting long saed blong spirit. Long stadi blong yuwan mo famli stadi, yu no stop long ol ves ia we oli haelaetem long ol stadi aotlaen ia. Maet Lod i gat ol mesej blong yu we oli stap long ol japta ia, we oli no tokbaot long ples ia. Wetem prea, lukaotem ol mesej ia.
Agensem Win, i kam long Liz Lemon Swindle