“20–26 Febwari Matiu 6–7 ‘Hem I Tijim Olgeta Olsem Wan we I Gat Paoa,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“20–26 Febwari Matiu 6–7,” Kam Folem Mi—Blong Wanwan Man, Woman mo Famli: 2023
Jisas I Stap Tijim Ol Pipol long Saed blong Solwota, i kam long James Tissot
20–26 Febwari
Matiu 6–7
“Hem I Tijim Olgeta Olsem Wan we I Gat Paoa”
Taem yumi ridim ol skripja wetem wan kwestin we i stap long tingting blong yumi, mo wetem wan tru tingting we i wantem andastanem wanem we Papa long Heven i wantem yumi blong save, yumi stap invaetem Tabu Spirit blong givim insperesen long yumi. Taem yumi stap ridim Matiu 6–7, luklukgud long ol filing mo tingting ia.
Raetemdaon Ol Filing mo Tingting blong Yu
Toktok Antap long Hil, i wan long ol moa gud toktok blong Ol Kristin Man. Sevya i bin tij wetem ol rij pikja, olsem wan taon we i stap antap long hil, ol lili flaoa long plantesen, mo ol waeldog we oli werem skin blong sipsip. Be, Toktok Antap long Hil, hem i no jes wan toktok we i naes tumas. Paoa blong ol tijing blong Sevya i go long ol disaepol blong Hem i save jenisim laef blong yumi, speseli taem yumi stap laef folem olgeta. Afta, ol toktok blong Hem oli kam moa bitim sam toktok; oli kam wan sua fandesen blong ful laef, semmak olsem haos blong waesman ia i save stanap agensem ol win mo ol bigfala wota blong wol ia (luk long Matiu 7:24–25).
Sam Aedia blong Skripja Stadi blong Yuwan
Blong stap laef folem ol tijing blong Sevya i save helpem mi blong kam moa olsem Hem.
Toktok Antap long Hil, insaed long hem i gat plante prinsipol blong gospel. Taem yu stap stadi long ol japta ia, askem Lod wanem nao Hem i wantem yu blong lanem.
Wan prinsipol we, maet bae yu faenem, i nid ia blong putum ol samting blong God oli kam faswan long ol samting blong wol. ?Wijwan tijing blong Sevya nao we i stap long Matiu 6–7 i stap helpem yu blong lukluk nomo long ol samting we oli blong heven? ?Wanem ol nara tingting o niu lukluk nao yu gat? ?Wanem insperesen yu kasem blong go mekem? Gat tingting blong raetemdaon ol tingting mo filing blong yu. Eksampol:
|
Mi wantem kea moa abaot wanem God i stap tingting abaot mi bitim wanem we ol narawan oli tingting abaot mi. | |
Wan nara prinsipol long Matiu 6–7, hem i prea. Tekem smol taem blong skelem ol prea blong yu. ?Yu yu stap filim se yu yu stap mekem gud o no blong hadwok blong go kolosap moa long God? ?Wijwan tijing we i stap long Matiu 6–7 i givim yu insperesen blong kam antap long wei we yu stap prea? Raetemdaon ol filing mo tingting we yu kasem. Eksampol:
|
Taem mi prea, mi wantem tritim nem blong Papa long Heven wetem hae respek. | |
|
Taem mi prea, mi save talemaot hat blong mi se bae mi mekem tingting blong Lod. | |
Maet bae yu save tingting blong stap ridim Toktok Antap long Hil bakegen, mo lukaotem ol nara prinsipol we oli stap kambak bakegen, o ol mesej we oli blong yu nomo. Raetemdaon wanem we yu faenem insaed long wan stadi jenol, mo raetem tu ol tingting mo ol filing we yu gat.
Yumi save go kolosap moa long God tru long prea.
?Hem i minim wanem blong talem plante samting, ripitim samting, o talem samting nating, long prea?
Plante taem, ol pipol oli andastanem se ripitim samting, i minim blong ripitim ol semfala toktok, bakegen mo bakegen. Be toktok ia, nating i save tokbaot wan samting we i no impoten. Blong yusum ol toktok nating long prea, i save minim se, blong stap prea, be i no wetem wan tru tingting, o wetem wan filing long hat (luk long Alma 31:12–23).
Mi save jajem man long stret mo gud fasin.
Long Matiu 7:1, i luk se Sevya i talem se yumi no sapos blong jajem man, be long ol nara skripja (wetem sam ves long japta ia), Hem i givim instraksen abaot wei blong jajem man. Sapos hemia i mekem tingting i fasfas, luk long Josef Smit Translesen blong ves ia, we i talem se: “Yufala i no mas jajem man long fasin we i no stret mo i no gud; be yufala i jajem man wetem ol stret mo gud jajmen” (long Matiu 7:1, futnot a). ?Wanem nao yu faenem long Matiu 7:1–5, wetem haf japta we i stap, we i helpem yu blong save olsem wanem blong “jajem man wetem ol stret mo gud jajmen”?
Luk long Gaed long Ol Skripja, “Jajem, Jajmen,” olskripja.ChurchofJesusChrist.org; Lynn G. Robbins, “The Righteous Judge,” Liahona, Nov. 2016, 96–98.
Mi kam blong save Jisas Kraes taem mi stap mekem tingting blong Hem.
Sentens ia, “Neva mi mi save yufala” we i stap long Matiu 7:23 i bin jenis long Josef Smit Translesen i go long: “Yufala i neva save mi” (Matiu 7:23, futnot a). ?Olsem wanem jenis i helpem yu blong andastanem gud moa wanem we Lod i tijim long ol ves 21–22 abaot fasin blong mekem tingting blong Hem? Long tingting blong yu, ?yu yu filim se yu yu savegud Lod? ?Wanem nao yu save mekem blong save Hem gud moa?
Luk tu long David A. Bednar, “If Ye Had Known Me,” Liahona, Nov. 2016, 102–5.
Taem mi stap obei long ol tijing blong Sevya i save mekem mi gat wan strong fandesen blong laef blong mi.
Blong stap laef folem gospel, i no karemaot enemi long laef blong yumi. Tugeta haos insaed long parabol blong Sevya we i stap long Matiu 7:24–27 oli fesem semfala strong win ia. Be wan long ol haos i bin save stanap. ?Olsem wanem nao, taem yumi stap laef folem ol tijing blong Sevya, i krietem wan strong fandesen blong yu? ?Wanem nao yu yu filim blong mekem blong gohed blong bildim “haos blong yu antap long wan strong ston? (luk long ves 24).
Luk tu long Hileman 5:12.
Ol Aedia blong Famli Skripja Stadi mo Haos Naet
-
Matiu 6–7.Wan wei blong lanem samting aot long Matiu 6–7 olsem wan famli, hem i blong wajem “Sermon on the Mount: The Lord’s Prayer” mo “Sermon on the Mount: Treasures in Heaven” (ChurchofJesusChrist.org). Ol memba blong famli oli save folem tu long skripja blong olgeta, mo oli save stopem vidio, long eni taem we oli harem wan samting we oli wantem toktok raon long hem. Aktiviti ia, i save hapen ova long plante dei, sapos i nid.
-
Matiu 6:5–13.?Wanem nao yumi save lanem abaot prea, aot long wei we Sevya i bin prea? ?Olsem wanem yumi save yusum prea blong Hem olsem wan eksampol blong kam antap long prea blong yumiwan mo famli prea? (Luk tu long Luk 11:1–13.) Sapos yu gat ol yangfala pikinini, maet bae yu wantem praktis blong stap prea tugeta.
-
Matiu 6:33.?Hem i minim wanem blong “lukaot gud blong obei long God we i King blong yufala”? ?Long wanem wei nao, yumi stap mekem hemia yumiwan, mo olsem wan famli?
-
Matiu 7:1–5.Blong luk ol tijing long ol ves ia, famli blong yu i save faenem wan smol pis wud, mo wan bigfala pis timba. Taem yu komperem tufala samting ia, ?hem i tijim wanem long yumi abaot fasin blong stap jajem ol nara man? Sapos yu wantem luklukgud insaed long topik ia, yu save yusum sam long ol risos ia long. “Judging Others” (Gospel Topics, topics.ChurchofJesusChrist.org).
-
Matiu 7:24–27.Blong helpem famli blong yu blong andastanem gud moa parabol blong Sevya abaot waesman mo krangke man, yu save letem olgeta oli kapsaetem wota antap long sanbij, mo afta, antap long ston. ?Olsem wanem nao yumi save bildimap fandesen long saed blong spirit blong yumi long wan strong ston?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “The Wise Man and the Foolish Man,” Children’s Songbook, 281.
Stap Kam Antap long Stadi blong Yuwan
Serem sam niu tingting. Blong toktok raon long ol niu tingting blong yu we yu bin gat aot long stadi blong yuwan, i no wan gud wei nomo blong tijim ol narawan, be tu, i wan wei blong help blong mekem andastaning blong yu i kam strong moa long wanem yu bin ridim. Traem blong serem wan prinsipol we yu bin lanem long wik ia, wetem wan memba blong famli o insaed long klas blong Jos.
Mi Bin Prea blong Yu,, i kam long Del Parson