Jisas i stap tij antap long bigfala hil

Jisas I Stap Prijim Toktok Antap long Hil, i kam long Gustave Doré

13–19 Febwari

Matiu 5; Luk 6

God Bae I Blesem Yufala

Luklukgud long ol tingting mo filing we yu kasem taem yu stap ridim Matiu 5 mo Luk 6, mo raetem olgeta insaed long wan stadi jenol, o long wan nara samting. Aotlaen ia i save helpem yu blong faenemaot ol impoten prinsipol long ol japta ia, be yu mas open long ol nara prinsipol we yu faenem taem yu stap stadi.

Raetemdaon Ol Filing mo Tingting blong Yu

Taem i kam kasem poen ia long seves blong Hem, i bin klia se ol tijing blong Jisas bae oli no semmak long wanem we ol pipol blong taem blong Hem oli stap harem oltaem. ?Weswe? ?Olgeta we oli pua bae oli kasem kingdom blong God o no gat? ?Weswe? ?Olgeta we oli stap flas, bae oli winim wol ia? ?Bae God i blesem olgeta we oli mekem nogud long olgeta? Ol tija blong loa mo Ol Farisi oli no bin stap tijim ol kaen samting olsem. Be yet, olgeta we oli rili andastanem loa blong God oli bin luksave trutok insaed long ol toktok blong Sevya. “Sapos wan man i spolem wan ae blong yu, ol man oli mas spolem wan ae blong hem tu” mo “Yu mas lavem ol man we oli stap raonabaot long yu, be yu mas agensem ol enemi blong yu,” olgeta ia, oli ol loa we oli moa daon (Matiu 5:38, 43). Be Jisas Kraes i bin kam blong tijim wan loa we i hae moa (luk long 3 Nifae 15:2–10), we i blong helpem yumi blong kam stret evriwan wan dei, iven “olsem fasin blong Papa blong yufala long heven (Matiu 5:48).

stadi blong yuwan pikja aekon

Sam Aedia blong Skripja Stadi blong Yuwan

Matiu 5:1–12; Luk 6:20–26, 46–49

Hapines we i stap longtaem, i kam taem yumi stap laef folem wei ia we Jisas Kraes i bin stap tijim.

Evriwan i wantem blong stap hapi, be i no evriwan i lukaotem hapines long ol semfala ples. Sam oli stap lukaotem hemia insaed long ol paoa mo ol posisen blong wol ia, sam narawan moa oli stap lukaotem hemia insaed long ol rij samting we oli hivimap, o long ol samting we i stretem wanem we bodi blong olgeta i wantem tumas. Jisas Kraes i bin kam blong tijim rod ia we i go long hapines we i stap longtaem, blong tijim wanem nao i tru mining blong Hem i blesem yumi. ?Wanem nao yu lanem abaot fasin blong kasem hapines we i stap longtaem, hemia aot long Matiu 5:1–12 mo Luk 6:20–26? ?Olsem wanem hemia i defren long lukluk blong wol ia long saed blong fasin blong stap hapi?

?Wanem nao ol ves ia, tugeta wetem Luk 6:46–49, oli stap tijim yu abaot fasin blong stap wan disaepol blong Jisas Kraes? ?Wanem nao yumi filim insperesen blong go mekem blong developem ol kwaliti insaed long ol ves ia?

Luk tu long Gaed long Ol Skripja, “Eit Toktok Antap long Hil,” olskripja.ChurchofJesusChrist.org; “Sermon on the Mount: The Beatitudes” (vidio), ChurchofJesusChrist.org.

Matiu 5:13

“Yufala i olsem sol long [wol ia].”

Sol, oli bin yusum longtaem finis i kam blong holemtaet samting, blong givim tes, mo holem i klin gud. Sol, hem i gat mining tu long Ol Man Isrel. Hem i go wetem praktis blong bifo, blong givim ol animol olsem sakrifaes, hemia anda long loa blong Moses (luk long Levitikas 2:13; Namba 18:19). Taem we sol i lusum tes blong hem, hem i nomo konkon, o i nomo gud blong yusum; luk long (Matiu 5:13). Hemia i hapen taem we yumi miksim, o taem nara samting i kam miks wetem, nao i spolem.

Kipim hemia long maen blong yu taem yu tingting hevi long Matiu 5:13. ?Olsem wanem bae yu kipim tes blong yu olsem wan disaepol blong Jisas Kraes? ?Olsem wanem bae yu mekem wok blong yu blong holemtaet mo mekem yu kam klin, semmak olsem sol ia blong wol ia?

Luk tu long Doktrin mo Ol Kavenan 103:9–10.

sol

“Yufala i olsem sol blong [wol ia]” (Matiu 5:13).

Matiu 5:17–48; Luk 6:27–35

Loa blong Kraes i kam kavremap, i ova long loa blong Moses.

Maet ol disaepol oli bin sapraes tumas blong harem Jisas i talem se stret mo gud fasin blong olgeta i nidim blong i hae moa bitim hemia blong ol tija blong loa mo hemia blong Ol Farisi (luk long Matiu 5:20), we oli stap flas mo ting hae long olgeta se, olgeta nao oli kipim gud loa blong Moses.

Taem yufala i stap ridim Matiu 5:21–48 mo Luk 6:27–35, tingting blong makem tugeta samting ia, ol fasin we loa blong Moses i putum (“Yufala i harem finis …”) mo wanem we Jisas i tijim blong kam antap long ol fasin ia. Long tingting blong yu, ?from wanem nao wei blong Sevya i wan loa we i hae moa?

Eksampol: ?Wanem nao Jisas i bin tijim insaed long Matiu 5:27–28 abaot responsabiliti blong yumi long saed blong ol tingting blong yumi? ?Olsem wanem nao yumi save gat moa kontrol ova long ol tingting mo filing we oli stap kam insaed long maen mo hat blong yumi? (luk long Doktrin mo Ol Kavenan 121:45).

Luk tu long “Sermon on the Mount: The Higher Law” (vidio), ChurchofJesusChrist.org.

Matiu 5:48

?Weswe? ?Papa long Heven i rili wantem luk mi blong mi stret evriwan?

Presiden Russell M. Nelson i tijim:

“Toktok ia, stret evriwan, oli transletem aot long Grik toktok ia, teleios, we i minim ‘fulwan.’ … Narafala wei blong toktok ia, hem i teleiono, we i minim ‘blong kasem wan en we i stap longwe, blong develop fulwan, blong kakae evriwan, o blong finisim.’ Plis not se toktok ia, i no minim se bae yumi ‘kam fri long eni rong samting,’ i stap minim nomo ‘blong kasem wan poen we i stap longwe.’ …

“… Lod i tijim : ‘Yufala i no save stanap wetem God naoia, …, gohed wetem fasin blong stap wet longtaem gogo kasem taem yufala i kam stret evriwan’ [Doktrin mo Ol Kavenan 67:13].

“Yumi no nid blong slakem tingting sapos ol hadwok blong yumi blong kam stret evriwan naoia, i luk se oli had tumas mo i no gat en blong hem. Fasin blong kam stret evriwan, i stap kam yet. Fasin ia i save kam fulwan nomo afta long Laef Bakegen long Ded, mo i save kam nomo tru long Lod. Hem i wet long evriwan we oli lavem Hem mo stap obei long ol komanmen blong Hem” (“Perfection Pending,” Ensign, Nov. 1995, 86, 88).

Luk tu long 2 Pita 1:3–11; Moronae 10:32–33; Doktrin mo Ol Kavenan 76:69; Jeffrey R. Holland, “Be Ye Therefore Perfect—Eventually,” Liahona, Nov. 2017, 40–42.

famli stadi pikja aekon

Ol Aedia blong Famli Skripja Stadi mo Haos Naet

Matiu 5:1–9.?Wijwan prinsipol nao we oli tijim insaed long Matiu 5:1–9 we i save helpem yu blong mekem hom blong yu i kam wan ples we i hapi moa? Maet bae yu jusum wan, o tu long ol prinsipol ia we yu luk se oli impoten tumas long famli blong yu. Eksampol: ?Wanem nao ol tijing we yumi faenem we i save helpem yumi blong stap olsem man blong putum pis? (luk long Matiu 5:21–25, 38–44). ?Wanem gol yu save putum blong wok from? ?Olsem wanem bae yu folemap?

Matiu 5:13.Tugeta, yufala i kakae samfala kaekae we oli sakem sol long hem, mo semfala kaekae ia we oli no sakem sol long hem. ?Wanem ol samting we i defren we yu bin luksave? ?Hem i minim wanem blong stap olsem “sol blong wol ia”? ?Olsem wanem nao yumi save mekem hemia?

Matiu 5:14–16.Blong helpem famli blong yu blong andastanem se i minim wanem blong stap olsem “laet blong wol,” yu save lukluk long samfala ples we i gat laet insaed long hom blong yu, long ol neba blong yu, mo long wol. Maet bae i help blong soem wanem i hapen taem yu haedem wan laet. ?Wanem nao Jisas i minim taem Hem i talem se: “Yufala i laet ia blong wol”? (Matiu 5:14). ?Hu nao i bin stap olsem wan laet long famli blong yumi? ?Olsem wanem yumi save stap olsem wan laet long ol nara man? (luk long 3 Nifae 18:16, 24–25).

Matiu 5:43–45.Taem we famli blong yu i stap ridim ol toktok blong Sevya long ol ves ia, maet bae yufala i save tokbaot se, huia nao, yufala i filim blong lavem, blesem, mo prea from. ?Olsem wanem nao bae yumi kam antap long lav ia we yumi gat long olgeta?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Shine On,” Children’s Songbook, 144.

Stap Kam Antap long Fasin blong Yumi blong Stap Tij

Save luk samting. “Sapos yu rili lukluk long wanem i stap hapen long laef blong ol pikinini blong yu, bae yu faenem ol gudgudfala taem blong save tij. … Ol tingting we oli talem, o ol kwestin we oli askem i save tekem yufala i go long ol taem blong tij” (Teaching in the Savior’s Way, 16).

kandel

“Yufala i olsem laet long ol man long wol” (Matiu 5:14).