“27 Febwari–5 Maj. Matiu 8; Mak 2– 4; Luk 7: ‘Bilif blong Yu I Mekem Yu Yu Gud Bakegen,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“27 Febwari–5 Maj. Matiu 8; Mak 2– 4; Luk 7,” Kam Folem Mi—Blong Wanwan Man, Woman mo Famli: 2023
27 Febwari–5 Maj
Matiu 8; Mak 2– 4; Luk 7
“Bilif blong Yu I Mekem Yu Yu Gud Bakegen”
Yu mas lukaotgud se yu yu no mas hariap taem yu stap stadi long ol skripja. Tekem taem blong yu prea mo tingting hevi, iven sapos hemia i minim se bae yu gat taem blong ridim evri ves. Ol taem ia we yu stap tingting hevi, plante taem bae oli lidim yu blong kasem revelesen we i blong yuwan.
Raetemdaon Ol Filing mo Tingting blong Yu
Wan long ol mesej we oli klia moa long Niu Testeman, i we Jisas Kraes i wan man blong hilim man. Ol stori blong Sevya we i stap hilim ol sikman, mo olgeta we oli gat hadtaem, i plante long olgeta—stat long wan woman we i gat fiva, i go long wan boe blong wido we i bin ded. ?From wanem oli tokbaot plante hiling ia blong bodi? ?I gat wanem mesej i stap ia blong yumi, insaed long ol merikel ia? I tru, wan long ol klia mesej, i we, Jisas Kraes i Pikinini blong God, wetem paoa ova long evri samting, we i tekem tu ol soa blong bodi, mo ol samting we oli no stret long bodi. Be i gat wan nara mining we i stap long ol toktok blong Hem we i go long ol tija blong loa, we oli tingting plante: “Mi mi wantem soemaot long yufala we mi, mi Pikinini blong Man, mi gat paoa long wol ya blong tekemaot sin blong man” (Mak 2:10). So, taem yu stap rid abaot wan man we i blaen, o wan we i kasem leprosi, we oli kam oraet bakegen, maet bae yu tingting long hiling ia nomo—long saed blong spirit mo long saed blong bodi—we yu save kasem long Sevya, mo harem Hem i talem long yu: “Bilif blong yu i mekem yu yu gud bakegen” (Luk 7:50).
Sam Aedia blong Skripja Stadi blong Yuwan
Sevya i save hilim ol samting we i no stret long bodi mo ol sik.
Olgeta japta ia oli raetem plante taem se merikel hiling i bin tekem ples tru long Sevya. Taem yu stap stadi long ol hiling ia, lukaotem samfala mesej we oli blong yu. Maet bae yu askem yuwan: ?Wanem nao stori ia i stap tijim abaot fet long Jisas Kraes? ?Wanem nao stori ia i stap tijim yumi abaot Sevya? ?Wanem nao God i wantem mi blong lanem aot long merikel ia? Hemia sam eksampol, be i gat plante moa i stap:
-
Wan man wetem leprosi (Matiu 8:1–4)
-
Kapten blong ol soldia blong ol man Rom (Matiu 8:5–13; Luk 7:1–10)
-
Mama blong waef blong Pita (Matiu 8:14–15)
-
Wan man wetem sik blong faol (Mak 2:1–12)
-
Wan man i stap we i no save stretem han (Mak 3:1–5)
-
Pikinini blong wido blong Nen (Luk 7:11–16)
Luk tu long David A. Bednar, “Accepting the Lord’s Will and Timing,” Liahona, Aug. 2016, 17–23; Neil L. Andersen, “We I Karem Kil,” Liahona, Nov 2018, 83–86.
Jisas Kraes i bin kam long wol i no blong panisim ol man we oli mekem sin, be i blong hilim olgeta.
Taem yu stap ridim ol ves ia abaot ol wok blong Jisas wetem ol tija blong loa, mo Ol Farisi, maet bae yu wantem askem yuwan se yu stap luk yuwan long ol stori ia. Eksampol: ?Ol tingting mo ol aksen blong yu oli olsem hemia blong Saemon, Man Farisi ia? ?Olsem wanem nao bae yu tokbaot wanem i defren bitwin wei we Jisas i bin luk ol man wetem sin, mo wei we Ol Man Farisi olsem Saemon, oli bin luk ol man blong mekem sin ia. Tingting long wei we olgeta we sin i hevi long olgeta, bae oli filim olsem wanem taem oli stap wetem Sevya. ?Olsem wanem nao olgeta i filim taem oli stap wetem yu?
Maet bae yu save tingting hevi long wei we yu yu semmak long woman ia we oli stap tokbaot long Luk 7:36–50. ?Wetaem nao yu bin gat wan i soem wan fasin we i kaen mo i gat sore, semmak olsem Sevya i bin soem long woman ia? ?Wanem nao yu stap lanem abaot long eksampol blong fet blong woman ia, mo fasin blong gat lav, mo tingting i stap daon?
Luk tu long Jon 3:17; Luk 9:51–56; Dieter F. Uchtdorf, “The Gift of Grace,” Liahona, May 2015, 107–10.
Blong stap olsem wan disaepol blong Jisas Kraes, i minim se mi putum Hem faswan long laef blong mi.
Long ol ves ia, Jisas i bin tijim se, blong stap olsem ol disaepol blong Hem, i askem yumi blong putum Hem i kam faswan long laef blong yumi, iven we i minim se, samtaem yumi mas mekem ol sakrifaes blong ol nara samting we yumi tekem se i impoten tumas. Taem yu stap stadi long ol skripja ia, tingting hevi long fasin blong yuwan blong stap wan disaepol. ?From wanem bae ol disaepol oli mas wantem blong putum Sevya i kam faswan? ?Wanem nao yu nidim blong lego blong save putum Jisas i kam faswan? (Luk tu long Luk 9:57–62.)
Jisas Kraes i gat paoa blong tekem pis i kam long medel blong ol strong win blong laef.
? Yu yu bin harem semmak finis olsem we ol disaepol blong Jisas oli bin harem long medel blong strong win long solwota—we yu stap wajem ol wef blong wota oli fulumap sip, mo oli stap kwestinim “!Tija, yu luk! !Bambae yumi lus nao, be yu yu no wari nating!”?
Long Mak 4:35–41, bae yu faenem fofala kwestin. Mekem wan lis blong wanwan long ol kwestin ia, mo tingting hevi long wanem nao hem i stap tijim abaot fasin blong fesem ol jalenj blong laef wetem fet long Jisas Kraes. ?Olsem wanem nao Sevya i stap tekem pis i kam taem ol strong win blong laef oli kam?
Luk tu long Lisa L. Harkness, “Yu Gat Pis, Yu Stap Kwaet,” Liahona, Nov 2020, 80–82.
Aot long Fraet i go long Fet,, i kam long Howard Lyon
Ol Aedia blong Famli Skripja Stadi mo Haos Naet
-
Matiu 8; Mak 2–4; Luk 7.Tingting blong krietem wan lis blong ol merikel we oli tokbaot long ol japta ia. Traem faenem, o droem sam pikja blong sam long ol olgeta (luk long Gospel Art Buk o ChurchofJesusChrist.org). Wanwan memba blong famli i save yusum ol pikja ia blong tokbaot wan long ol merikel, mo serem wanem we oli lanem aot long ol pikja ia. Maet yu save serem sam eksampol blong ol merikel we yu bin luk o ridim, long taem blong yumi tedei.
Luk tu long ol vidio ia: “Widow of Nain” mo “Calming the Tempest” (ChurchofJesusChrist.org).
-
Matiu 8:5–13; Luk 7:1–10.?Wanem nao, abaot bilif blong kapten blong ol soldia blong Ol Man Rom, we i tajem Jisas? ?Olsem wanem yumi save soem semmak fet long Jisas Kraes?
-
Mak 2:1–12.“Japta 23: Man we I No Save Wokbaot” (long Ol Niu Testeman Stori, 57–58, o vidio we i go wetem long ChurchofJesusChrist.org) bae i save helpem famli blong yu blong toktok raon long Mak 2:1–12. (Luk tu long vidio ia: “Jesus Forgives Sins and Heals a Man Stricken with Palsy” long ChurchofJesusChrist.org.) ?Olsem wanem bae yumi semmak olsem ol fren blong man ia we i no save wokbaot? ?Huia i bin wan fren wetem kaen fasin long yumi?
-
Mak 4:35–41.?Bae stori ia i save helpem ol memba blong famli taem oli filim se oli fraet? Maet oli save ridim ves 39 mo serem ol eksperiens blong taem ia we Sevya i bin helpem olgeta blong filim pis.
Maet ol pikinini oli laekem blong priten se oli stap insaed long wan bot we i stap long strong solwota, mo semtaem wan i ridim Mak 4:35–38. Afta, taem wan i kam blong ridim ves 39, oli priten se oli stap long wan bot we solwota i kwaet. Mo tu, tugeta, yufala i save singsing wan singsing abaot fasin blong faenem pis long Sevya, olsem: “Master, the Tempest Is Raging” (Hymns, namba 105). ?Wanem sentens, insaed long singsing ia, i tijim yumi abaot pis we Jisas i givim?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Master, the Tempest Is Raging,” Hymns, namba 105.
Stap Kam Antap long Fasin blong Yumi blong Stap Tij
Stap oltaem, mo stap blong oli save toktok long yu. Sam long ol bes taem blong tij i stat olsem wan kwestin, o ol wari insaed long hat blong ol memba blong famli. Letem ol memba blong famli oli save, tru long ol toktok mo ol aksen blong yu se yu yu wantem tumas blong lisin long olgeta. (Luk long Teaching in the Savior’s Way, 16.)
Kraes mo Man we I Kasem Leprosi, i kam long J. Kirk Richards