“Hulyo 22–28. Mga Buhat 16–21: ‘Gitawag Kami sa Dios aron sa Pagmantala sa Maayong Balita’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hulyo 22–28. Mga Buhat 16–21,” Dali, Sunod Kanako—Alang mga Indibidwal ug sa mga Pamilya: 2019
Hulyo 22–28
Mga Buhat 16–21
“Gitawag Kami sa Dios aron sa Pagmantala sa Maayong Balita”
Samtang magbasa ka sa mga paningkamot ni Pablo sa pagsangyaw sa ebanghelyo, ang Espiritu moaghat nimo og mga hunahuna o mga pagbati. Isulat kini nga mga impresyon, ug paghimo og mga plano sa pagbuhat niini.
Irekord ang Imong mga Impresyon
Apil sa katapusang mga pulong sa Ginoo ngadto sa Iyang mga Apostoles mao ang sugo, “Busa panglakaw kamo ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan ug sa Anak ug sa Espiritu Santo: nga magatudlo kanila sa pagtuman sa tanan nga akong gisugo kaninyo” (Mateo 28:19–20). Samtang ang mga Apostoles wala kaayo makaadto sa tanang kanasuran, ang Mga Buhat 16–21 nagpakita nga si Pablo ug ang iyang mga kompanyon nakahimo og talagsaong kauswagan sa pagtukod sa Simbahan. Sila nagtudlo, nagbunyag, ug nagtugyan sa gasa sa Espiritu Santo. Mipahigayon sila og mga milagro, bisan ang pagbanhaw sa usa ka tawo gikan sa patay, ug nanagna sa Dakong Apostasiya (Mga Buhat 20:7–12; 20:28–31). Ug ang buhat nga ilang nasugdan nagpadayon uban sa buhi nga mga Apostoles karon, uban sa mahalarong mga disipulo sama kanimo, kinsa nagtabang nga matuman ang sugo sa Manluluwas sa mga paagi nga dili gayud mahunahuna ni Pablo. Tingali nakaila ka og mga tawo nga wala makaila sa ilang Langitnong Amahan o sa Iyang ebanghelyo. Tingali imong gibati nga ang imong “espiritu nahagit sa sulod [kanimo]” sa pagpaambit kanila unsay imong nahibaloan mahitungod Kaniya (Mga Buhat 17:16). Kon sundon nimo ang ehemplo ni Pablo sa pagkamapainubsanon ug pagkamaisugon sa pagpakigbahin sa ebanghelyo, tingali makakita ka og tawo nga ang “iyang kasingkasing [gi]ablihan sa Ginoo” (Mga Buhat 16:14).
Mga Ideya alang sa Personal nga Pagtuon sa Kasulatan
Ang Espiritu mogiya nako sa akong mga paningkamot sa pagpaambit sa ebanghelyo.
Ang tanan nagkinahanglan sa ebanghelyo ni Jesukristo, apan ang pipila ka tawo mas andam kay sa uban sa pagdawat niini. Mao kini ang usa ka rason nga kita nagkinahanglan sa Espiritu Santo kon kita mopaambit sa ebanghelyo—sa paggiya nato niadtong kinsa andam na. Samtang magbasa ka sa Mga Buhat 16–21, timan-i ang mga higayon diin ang Espiritu migiya ni Pablo ug sa iyang mga kompanyon. Unsa nga mga panalangin ang moabut tungod kay sila misunod sa Espiritu? Kanus-a nimo nabati ang Espiritu nga miaghat nimo sa imong mga paningkamot sa pagpaambit sa ebanghelyo?
Tan-awa usab sa Alma 7:17–20; Dallin H. Oaks, “Pagpakigbahin sa Gipahiuli nga Ebanghelyo,” Liahona, Nob. 2016, 57–60; Isangyaw ang Akong Ebanghelyo, 36–39.
Makapahayag ko sa ebanghelyo sa tanang sirkumstansya.
Ang pagkabalhug sa bilanggoan tungod sa pagsangyaw sa ebanghelyo mao ang masabtan nga rason nga nahunong ang pagsangyaw. Apan ngadto nila Pablo ug Silas, nahimo kining oportunidad sa pagkabig sa magbalantay sa bilanggoan (tan-awa sa Mga Buhat 16:16–34). Sa tibuok Mga Buhat 16–21, pangita og laing mga ehemplo sa pagkaandam ni Pablo sa pagpaambit sa iyang saksi ngadto sa tanan. Ngano kaha nga siya maisugon ug walay kahadlok? Unsay imong nakat-unan sa ehemplo ni Pablo?
Adunay daghan pang mga mensahe mahitungod sa pagpakigbahin sa ebanghelyo kapitulo 16–21. Kon tan-awon nimo pag-ayo, makakita ka og pipila nga magamit nimo. Sulayi ang pagbasa niini nga mga kapitulo uban sa tumong sa hunahuna. Unsa ang imong nakita?
“Kita Mao ang Kaliwat sa Dios.”
Sa Atena, nakita ni Pablo ang mga tawo nga adunay lain-laing mga opinyon ug mga panglantaw sa relihiyon. Sila usab nangita “sa pagpaminaw sa bag-ong butang,” ug unsay ikatanyag ni Pablo sigurado gayud nga bag-o alang kanila (tan-awa sa Mga Buhat 17:19–21). Nagsimba sila og daghang mga dios, lakip sa usa nga ilang gitawag nga “Dios nga wala hiilhi” (Mga Buhat 17:23), apan nagtuo sila nga ang mga dios mao ang mga gahum, dili buhi, dili tawo, ug dili gayud atong Amahan. Basaha unsa ang gisulti ni Pablo aron pagtabang kanila nga makaila sa Dios, ug timan-i ang mga kinaiya sa Dios nga imong makit-an. Unsay ipasabut diha nimo nga “kaliwat sa Dios”? (Mga Buhat 17:29). Sa imong opinyon, sa unsa nga paagi nga ang pagkaanak sa Dios lahi gikan sa usa lang sa Iyang mga nilalang? Kon ikaw nagbarug sa tupad ni Pablo samtang siya nagpamatuod, unsa kaha ang imong isulti sa karaang mga Gresyanhon mahitungod sa atong Langitnong Amahan? Aduna ka bay nailhan nga makabenepisyo sa pagpaminaw sa imong pagpamatuod?
Bili sa usa ka Kalag ni Liz Lemon Swindle
Tan-awa usab sa Mga Taga-Roma 8:16; 1 Juan 5:2.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Sa pagtabang sa imong pamilya nga makahanduraw unsay nahitabo niini nga mga kapitulo, mahimong makalingaw kini, samtang magbasa kamong tanan nga magdungan, nga markahan ang mga siyudad nga gibisitahan ni Pablo diha sa mapa (tan-awa ang mapa sa katapusan niini nga outline).
Sa unsa nga paagi kita mas mahisama sa mga Santos niini nga mga kasulatan? Sa unsa nga paagi nga ang pagtuon sa mga kasulatan kada adlaw makapahimo nato nga mas “halangdon”? (Mga Buhat 17:11). Unsa ang atong mahimo aron mahimong “batid sa mga kasulatan”? (Mga Buhat 18:24).
Kini nga mga pagtulun-an gikan ni Propeta Joseph Smith mahimong makatabang sa imong pamilya sa paghisgot sa Mga Buhat 19:1–7: “Ang bunyag pinaagi sa tubig katunga lamang sa bunyag, ug walay bili kon wala ang laing katunga—kana mao, ang bunyag sa Espiritu Santo. … ‘Ang pagpakatawo sa tubig ug sa Espiritu’ nagpasabut nga ipaunlod sa tubig alang sa kapasayloan sa mga sala ug modawat sa Espiritu Santo human niana. Kini gihatag pinaagi sa pagpandong sa mga kamot sa usa nga adunay awtoridad nga gihatag kaniya sa Dios” (Mga Pagtulun-an sa mga Presidente sa Simbahan: Joseph Smith, 112–13). Unsa nga mga panalangin ang miabut kanato tungod sa pagdawat sa gasa sa Espiritu Santo?
Unsa ang nakadasig sa mga tawo niini nga mga bersikulo pagsunog sa ilang mga basahon nga nagbili og “kalim-an ka libo ka mga salapi”? (Mga Buhat 19:19). Aduna bay kalibutanong mga kabtangan o mga kalihokan nga kinahanglan natong isalikway aron makadawat sa langitnong mga panalangin?
Kanus-a nakasinati ang imong pamilya sa pagtulun-an ni Kristo nga “labi pang bulahan ang paghatag kay sa pagdawat”? (Mga Buhat 20:35). Aduna bay tawo nga makabenepisyo gikan sa pagserbisyo, panahon, o sa mga gasa nga ikahatag sa imong pamilya? Isip usa ka pamilya, hisguti ang pipila ka ideya ug paghimo og plano sa pagserbisyo sa uban. Unsay atong bation kon kita moserbisyo sa uban? Ngano nga labi pang bulahan ang paghatag kay sa pagdawat?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Irekord ang mga impresyon. Kon ang mga impresyon o mga panabut moabut, irekord kini. Sama pananglit, mahimo nimong irekord ang imong mga hunahuna diha sa imong mga kasulatan, sa Gospel Library app, o sa study journal. “Kon imong i-rekord ang espirituhanong mga impresyon, imong gipakita sa Ginoo nga imong gihatagan og bili ang Iyang direksyon, ug Siya mopanalangin kanimo og mas kanunay nga pagpadayag” (Pagtudlo sumala sa Pamaagi sa Manluluwas, 12; tan-awa usab sa 30).
Ang misyonaryo nga mga panaw ni Apostol Pablo.