burrë duke studiuar shkrimet e shenjta

Ide për ta Përmirësuar Studimin Tuaj Vetjak të Shkrimeve të Shenjta

Ja disa mënyra të thjeshta për ta përmirësuar studimin nga ana juaj të fjalës së Perëndisë në shkrimet e shenjta.

Lutuni për Frymëzim

Shkrimet e shenjta janë fjala e Perëndisë, ndaj kërkojini ndihmë Atij për t’i kuptuar ato.

Kërkoni të Vërteta rreth Jezu Krishtit

Shkrimet e shenjta na mësojnë se të gjitha gjërat dëshmojnë për Krishtin (shih 2 Nefi 11:4; Moisiu 6:63), kështu që merrni parasysh që t’i shënoni ose shenjoni vargjet që dëshmojnë për Shpëtimtarin, që e thellojnë dashurinë tuaj për Të dhe ju mësojnë mënyrën si ta ndiqni Atë.

Kërkoni Fjalë dhe Fraza Frymëzuese

Ju mund të zbuloni se fjalë dhe fraza të caktuara në shkrimet e shenjta ju lënë mbresë, sikur të ishin shkruar posaçërisht për ju. Ato mund t’ju duken me domethënie vetjake dhe mund t’ju frymëzojnë e t’ju japin shtytje. Merrni parasysh t’i shenjoni ato në shkrimet tuaja të shenjta ose t’i shkruani ato në një ditar studimi.

Kërkoni të Vërteta të Ungjillit

Nganjëherë të vërtetat e ungjillit (shpesh të quajtura doktrinë ose parime) shprehen drejtpërsëdrejti dhe nganjëherë ato nënkuptohen nëpërmjet një shembulli apo historie. Pyeteni veten: “Çfarë të vërtetash të përjetshme na mësohen në këto vargje?”

Dëgjojeni Shpirtin

Kushtojuni vëmendje mendimeve dhe ndjenjave tuaja, edhe nëse ato nuk kanë lidhje me atë që po lexoni. Ato mbresa mund të jenë pikërisht gjërat që Ati juaj Qiellor dëshiron që ju t’i mësoni.

Përshtatini Shkrimet e Shenjta me Jetën Tuaj

Merreni parasysh mënyrën se si historitë dhe mësimet që po lexoni, gjejnë zbatim në jetën tuaj. Për shembull, ju mund ta pyetni veten: “Çfarë përvojash kam pasur që janë të ngjashme me atë që po lexoj?” ose “Si mund ta ndjek shembullin e këtij personi në shkrimet e shenjta?”

Bëni Pyetje ndërsa Studioni

Ndërsa i studioni shkrimet e shenjta, mund t’ju lindin pyetje në mendje. Këto pyetje mund të kenë lidhje me atë që po lexoni ose me jetën tuaj në përgjithësi. Përsiatini këto pyetje dhe kërkoni përgjigje ndërkohë që vazhdoni t’i studioni shkrimet e shenjta.

Përdorni Ndihma për Studimin e Shkrimeve të Shenjta

Për të marrë ide shtesë për vargjet që lexoni, përdorni poshtëshënimet, Udhëzuesin për Shkrimet e Shenjta (scriptures.ChurchofJesusChrist.org) dhe ndihma të tjera për studimin.

Shqyrtojeni Kontekstin e Shkrimeve të Shenjta

Mund të gjeni ide kuptimplota rreth një fragmenti të shkrimit të shenjtë teksa shqyrtoni kontekstin e tij, përfshirë rrethanat ose mjedisin nga doli në dritë. Për shembull, njohja e sfondit historik dhe e bindjeve fetare të njerëzve, të cilëve u foli Perëndia, mund t’ju ndihmojnë të kuptoni më mirë qëllimin e fjalëve të Tij.

Shënojini Mendimet dhe Ndjenjat Tuaja

Ka shumë mënyra se si t’i shënoni mbresat që ju vijnë teksa studioni. Për shembull, ju mund ta shenjoni një fjalë apo frazë kuptimplotë dhe t’i mbani shënim mendimet tuaja duke i shkruar në shkrimet tuaja të shenjta. Gjithashtu mund të mbani një ditar me idetë, ndjenjat dhe mbresat që merrni.

Studiojini Fjalët e Profetëve dhe të Apostujve të Ditëve të Mëvonshme

Lexojeni atë që kanë dhënë mësim profetët dhe apostujt e ditëve të mëvonshme rreth parimeve që i gjeni në shkrimet e shenjta (për shembull, shih conference.ChurchofJesusChrist.org dhe revistat e Kishës).

Jepni Ide

Diskutimi rreth ideve që dalin nga studimi juaj vetjak, jo vetëm që është një mënyrë e mirë për t’i mësuar të tjerët, por ndihmon edhe në forcimin e të kuptuarit tuaj për atë që keni lexuar.

Jetoni sipas Asaj që Mësoni

Studimi i shkrimeve të shenjta jo vetëm që duhet të na frymëzojë, por duhet të na udhëheqë edhe që ta ndryshojmë mënyrën se si jetojmë. Dëgjojeni atë që Shpirti ju nxit të bëni ndërsa lexoni, dhe më pas zotohuni që të veproni sipas atyre nxitjeve.

grua duke studiuar shkrimet e shenjta

Plaku Dejvid A. Bednar tha: “Ne nuk duhet të presim që Kisha si organizatë të na mësojë ose të na thotë gjithçka që kemi nevojë të dimë e të bëjmë për t’u bërë dishepuj të përkushtuar dhe për të duruar trimërisht deri në fund. Përkundrazi, përgjegjësia jonë vetjake është të mësojmë atë që duhet të mësojmë, të jetojmë ashtu sikurse e dimë se duhet të jetojmë dhe të bëhemi ata që Mësuesi do të donte të bëheshim. Dhe shtëpitë tona janë mjedisi kryesor për të mësuarit, të jetuarit dhe të bërit” (“Të Përgatitur për të Fituar Çdo Gjë të Nevojshme”, Ensign ose Liahona, maj 2019, f. 102).