uma sa Missouri

Spring Hill, Daviess County, Missouri, ni Garth Robinson Oborn

Hunyo 7–13

Doktrina ug mga Pakigsaad 63

“Kana Nga Moabut gikan sa Kahitas-an Sagrado”

Miingon ang Ginoo, “Kamo makadawat sa Espiritu pinaagi sa pag-ampo” (Doktrina ug mga Pakigsaad 63:64). Ikonsiderar ang pag-ampo nga ang Espiritu mogiya sa imong pagtuon.

Irekord ang Imong mga Impresyon

Ang luna alang sa siyudad sa Zion napili na. Ang mga lider sa Simbahan mibisita sa dapit ug mipahinungod niini isip pundukanan nga dapit alang sa mga Santos. Sumala sa kasaysayan ni Joseph Smith, “ang yuta sa Zion nga karon mao ang labing mahinungdanon nga kalibutanon nga butang nga makita” (Doktrina ug mga Pakigsaad 63, ulohan sa seksyon). Apan ang mga panglantaw bahin sa Zion sagul-sagol. Daghang mga Santos ang matinguhaon nga magsugod sa pagpundok sa Missouri. Sa laing bahin, ang mga tawo sama ni Ezra Booth nasagmuyo sa yuta sa Zion ug mipahibalo sa ilang mga panglantaw. Gani, sa dihang mibalik si Joseph ngadto sa Kirtland gikan sa Missouri, iyang nabantayan nga ang panagsumpaki ug apostasiya mikuyanap sa Simbahan samtang atua siya sa layo. Niining maong kahimtang nga ang pagpadayag diha sa Doktrina ug mga Pakigsaad 63 nadawat. Dinhi namulong ang Ginoo bahin sa pagpalit og yuta ug pagbalhin sa mga Santos ngadto sa Missouri. Apan apil sa maong praktikal nga mga butang mao ang tukma sa panahon nga pahinumdom: “Ako, ang Ginoo, nagpahayag sa akong tingog, ug kini pagasundon” (bersikulo 5). Ang Iyang tingog, ang Iyang kabubut-on, ang Iyang mando—tanan nga “[nagagikan] sa kahitas-an”—kinahanglang dili isipon sa matahapon o sa kaswal nga paagi. Kini “sagrado, ug kinahanglan gayud ipamulong uban sa pag-amping” (bersikulo 64).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 63:1–6, 32–37

“Ang kasuko sa Ginoo gipukaw batok sa dautan ug mga masinupakon.

Sa dihang nadawat kini nga pagpadayag, nag-atubang si Joseph Smith og grabe nga pagpanaway gikan sa pipila ka miyembro sa Simbahan kinsa mibatok kaniya (tan-awa sa “Ezra Booth and Isaac Morley,” Revelations in Context, 130–36). Unsa nga mga pasidaan ang gihatag sa Ginoo diha sa Doktrina ug mga Pakigsaad 63:1–6, 32–37 kalabut “sa dautan ug mga masinupakon”? Sa unsang paagi nga ang maong mga pasidaan ebidensya sa gugma sa Dios?

Doktrina ug mga Pakigsaad 63:7–12

Ang mga timailhan moabut pinaagi sa hugot nga pagtuo ug kabubut-on sa Dios.

Ang mga timailhan o mga milagro lamang dili makamugna og malungtarong hugot nga pagtuo. Sayo sa 1831 si Ezra Booth, usa ka ministro sa Methodist didto sa Kirtland, nakahukom nga magpabunyag human niya nakita nga milagrusong giayo ni Joseph Smith ang bukton sa higala ni Booth nga si Elsa Johnson.

Apan, sulod sa pipila ka bulan, nawad-an og pagtuo si Booth ug mihinaway sa Propeta. Nganong nahitabo man kini, kon magkonsiderar sa milagro nga iyang nasaksihan? Pamalandungi kini samtang magbasa ka sa Doktrina ug mga Pakigsaad 63:7–12. Mahimo usab nimong ikonsiderar nganong ang ubang tawo makadawat og mga timailhan “alang sa kaayohan sa mga tawo ngadto sa himaya [sa Dios]” (bersikulo 12) ug ang uban makadawat niini “ngadto sa … panghimaraut” (bersikulo 11). Base sa unsay imong nabasa, unsa kaha ang gusto sa Ginoo nga imong mahunahuna ug mabati kalabut sa mga timailhan?

Tan-awa usab sa Mateo 16:1–4; Juan 12:37; Mormon 9:10–21; Ether 12:12, 18.

Doktrina ug mga Pakigsaad 63:13–23

Ang kaputli nagpasabut nga akong ipabiling putli ang akong mga hunahuna ug mga binuhatan.

Kasagaran sa mga tawo moila nga ang pagpanapaw sayop. Apan diha sa Doktrina ug mga Pakigsaad 63:13–19, giklaro sa Manluluwas nga ang mahigalon nga mga hunahuna adunay bug-at usab nga espirituhanong mga sangputanan. “Nganong ang kahigal usa man ka makamatay nga sala?” Si Elder Jeffrey°R. Holland nangutana. “Kana, agig dugang sa hingpit nga epekto niana diha sa atong mga kalag, nagtuo ako nga sala kini tungod kay mohugaw kini sa labing taas ug labing balaan nga pakigrelasyon nga gihatag sa Dios dinhi kanato sa mortalidad—ang gugma nga gibatunan sa lalaki ug sa babaye alang sa usag usa ug ang tinguha nga ang magtiayon kinahanglan magbaton og mga anak ngadto sa usa ka pamilya gituyo nga magmahangturon” (“Walay Luna alang sa Kaaway sa Akong Kalag,” Liahona, Mayo 2010, 44–45).

Unsa nga mga sangputanan ang gihisgutan sa Ginoo diha sa Doktrina ug mga Pakigsaad 63:13–19 nga moabut niadtong dili maghinulsol sa dili putli nga mga hunahuna ug mga binuhatan? Timan-i ang mga panalangin nga gisaad sa Manluluwas diha sa mga bersikulo 20 ug 23 ngadto niadtong kinsa matinud-anon. Unsa nga mga panalangin ang miabut sa imong kinabuhi tungod sa pagtuman sa balaod sa kaputli? Sa unsang paagi nga ang Manluluwas mitabang kanimo nga magpabilin o mahimong putli?

Tan-awa usab sa Doktrina ug mga Pakigsaad 121:45; Linda S. Reeves, “Angayan sa Gisaad Kanato nga mga Panalangin,” Liahona, Nob. 2015, 9–11.

lalaki ug babaye nga anaa sa gawas sa templo

Mapanalanginan kita samtang atong ipabiling putli ang atong mga hunahuna ug mga binuhatan.

Doktrina ug mga Pakigsaad 63:24–46

Gigiyahan sa Ginoo ang espirituhanon ug temporal nga mga kalihokan sa Iyang mga Santos.

Human gitakda sa Ginoo kon asa tukuron ang Zion, ang mga Santos sa Ohio nagkinahanglan gihapon og direksyon kon kanus-a magsugod sa pagbalhin ug asa kuhaon ang kwarta sa pagpalit sa yuta. Samtang magbasa ka sa Doktrina ug mga Pakigsaad 63:24–46, pangitaa ang espirituhanon ug temporal nga direksyon nga gihatag sa Ginoo kalabut sa Zion. Unsa ang espirituhanon ug temporal nga direksyon nga gihatag sa Ginoo kanimo?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 63:7–12.Ang istorya bahin ni Ezra Booth nga mibiya sa Simbahan bisan nakasaksi pa sa pagkaayo ni Elsa Johnson (tan-awa sa mubo nga mga detalye diha sa “Mga Ideya alang sa Personal nga Pagtuon sa Kasulatan” ug sa artwork nga nag-uban niining outline) mahimong makaaghat og panaghisgutan mahitungod sa mga milagro. Tingali ang mga sakop sa imong pamilya makahisgot mahitungod sa mga milagro nga nakapalig-on sa ilang pagtuo, lakip na sa mga kasinatian gikan sa imong pamilya o sa imong family history. Giunsa nila pagpakita ang ilang hugot nga pagtuo nga gikinahanglan aron makadawat niining mga milagro? Unsa man ang gitudlo diha sa Doktrina ug mga Pakigsaad 63:7–12 mahitungod sa relasyon tali sa hugot nga pagtuo ug sa mga milagro?

Doktrina ug mga Pakigsaad 63:13–19.Sa unsang paagi nga atong mapanalipdan ang atong kaugalingon gikan sa dili maayo nga mga impluwensya, lakip na sa pornograpiya? (Makakita ka og daghang makatabang nga mga kapanguhaan alang sa mga pamilya diha sa AddressingPornography.ChurchofJesusChrist.org.) Unsa ang mga panalangin sa pagtuman sa balaod sa kaputli?

Doktrina ug mga Pakigsaad 63:23.Unsaon nimo pagtabang nga masabtan sa imong pamilya kon sa unsang paagi nga ang “mga misteryo sa gingharian,” o mga kamatuoran sa ebanghelyo, susama sa usa ka “atabay sa buhi nga tubig”? Pananglitan, mahimo kang mobiyahe ngadto sa duol nga tubod o suba (o magpakita og usa ka video o hulagway niini). Sa unsang paagi nga ang mga kamatuoran sa ebanghelyo sama sa tubig?

Doktrina ug mga Pakigsaad 63:58.Unsa nga mga pasidaan ang atong makita diha sa seksyon 63? Unsa ang pipila sa mga pasidaan nga atong madungog gikan sa atong mga lider sa Simbahan karon?

Doktrina ug mga Pakigsaad 63:58–64.Pakit-a ang imong pamilya og usa ka bililhon nga bahandi sa pamilya. Unsaon man nato pagtagad kini nga butang nga lahi kay sa ubang mga butang nga dili ingon ka bililhon? Unsa ang gitudlo kanato sa Doktrina ug mga Pakigsaad 63:58–64 mahitungod sa unsay atong mabuhat aron mahatagan og balaanong pagtahud ang sagradong mga butang?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ang Pagtahud Usa ka Gugma,” Songbook sa mga Bata, 12.

Pagpalambo sa Personal nga Pagtuon

Buhata kon unsay imong nakat-unan. “Samtang imong mabati ang kalipay nga nagagikan sa pagsabut sa ebanghelyo, gusto ka nga mogamit sa unsay imong nakat-unan. Paningkamot sa pagpuyo nga nahisubay sa imong nasabtan. Ang pagbuhat sa ingon molig-on sa imong pagtuo, kahibalo, ug pagpamatuod” (Isangyaw ang Akong Ebanghelyo, 21).

si Joseph Smith nga nagkupot sa kamot sa usa ka babaye

Ang Pag-ayo sa Abaga ni Elsa Johnson, ni Sam Lawlor