Umahan ni Martin Harris

Umahan ni Martin Harris, ni Al Rounds

Pebrero 22–28

Doktrina ug mga Pakigsaad 18–19

“Ang bili sa mga kalag mahinungdanon”

Ang mga pagpadayag diha sa Doktrina ug mga Pakigsaad nahatag agi og tubag sa piho nga mga kahimtang sa dul-an 200 ka tuig nang milabay, apan ang mga baruganan nga gitudlo niini walay kinutuban. Pangitaa kining mga baruganan samtang magbasa ka, ug hunahunaa kon sa unsang paagi nga kini imong magamit.

Irekord ang Imong mga Impresyon

Sila si Martin ug Lucy Harris adunay usa sa kinanindutan nga umahan didto sa Palmyra, New York. Miabut og daghang katuigan una nila kini naangkon, nakapahimo kini nila nga makabuhi og pamilya, ug nakahatag og maayong dungog diha sa komunidad. Apan niadtong 1829 naklaro nga ang Basahon ni Mormon mahimong mamantala lang kon i-prenda ni Martin ang iyang umahan aron makabayad sa tig-imprinta. Si Martin nakaangkon og pagpamatuod sa Basahon ni Mormon, apan si Lucy wala. Kon gipadayon ni Martin ang pagprenda ug ang Basahon ni Mormon dili kaayo mohalin, mawala kaniya ang iyang umahan ug maangin ang iyang kaminyoon. Sa usa o sa laing punto, kitang tanan mag-atubang og samang pangutana nga giatubang ni Martin: Unsa may bili sa ebanghelyo ni Jesukristo ngari kanako? Unsay andam nakong isakripisyo aron pagtabang sa pagtukod sa gingharian sa Dios? Mahimong makatabang kanato sa paghinumdom nga walay laing nagbayad og mas dakong kantidad aron mapanalanginan ang mga anak sa Dios kay ni Jesukristo, “ang labing halangdon sa tanan” (Doktrina ug mga Pakigsaad 19:18).

Mihukom si Martin sa pagprenda sa iyang umahan. Ang iyang sakripisyo gibayad sa pagprinta sa unang 5,000 ka mga kopya sa Basahon ni Mormon. Ug karon, kapin na sa 190 ka milyon ka mga kopya, minilyon ka mga kalag sa tibuok kalibutan ang napanalanginan.

Alang sa dugang impormasyon mahitungod sa pagmantala sa Basahon ni Mormon, tan-awa sa Mga Santos, 1:76–84.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 18:10–16

Ang Ginoo magmaya kon kita maghinulsol.

Timan-i kon kapila gigamit ang mga pulong paghinulsol sa tibuok Doktrina ug mga Pakigsaad 18 ug 19, ug pamalandungi unsa ang imong makat-unan gikan sa mga pulong sa matag higayon nga kini gigamit. Hunahunaa ilabi na sa Doktrina ug mga Pakigsaad 18:10–16; sa unsang paagi kini nga mga bersikulo makaapekto sa imong pagbati mahitungod sa paghinulsol—ang imong kaugalingong panghinulsol ug ang katungdanan sa pagdapit sa uban nga maghinulsol?

Tan-awa usab sa Alma 36:18–21; Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 121–24.

Doktrina ug mga Pakigsaad 18:34–36

Akong madungog ang tingog sa Ginoo diha sa Doktrina ug mga Pakigsaad.

Kon adunay tawo nga mangutana nimo sama sa unsa ang tingog sa Ginoo, unsa man ang imong isulti? Hunahunaa kini nga pangutana samtang magbasa ka sa Doktrina ug mga Pakigsaad 18:34–36. Unsay imong nakat-unan mahitungod sa tingog sa Ginoo nga magagikan sa pagbasa sa Doktrina ug mga Pakigsaad? Unsay mahimo nimong buhaton aron madungog ang Iyang tingog og mas klaro?

Doktrina ug mga Pakigsaad 19:15–20

Si Jesukristo nag-antos aron nga ako mahimong makahinulsol ug makaduol ngadto Kaniya.

Ang Bag-ong Tugon naghulagway sa pag-antus sa Manluluwas didto sa Getsemani gikan sa panglantaw niadtong nag-obserbar niini. Sa Doktrina ug mga Pakigsaad 19:15–20, gisulti ni Jesukristo ang mahitungod sa Iyang pag-antus diha sa Iyang kaugalingong mga pulong. Samtang magbasa ka niining sagrado, personal nga asoy, pangitaa ang mga pulong nga naghulagway sa pag-antus sa Manluluwas. Hunahunaa kon unsa ang gitudlo sa hugpong sa mga pulong diha nimo. Nganong ang Manluluwas andam nga moantus? Hunahunaa ang pagsulat sa imong mga gibati mahitungod kang Jesukristo ug sa Iyang sakripisyo alang kanimo.

Tan-awa sa Juan 15:13; Mosiah 3:7; Alma 7:11–12; Doktrina ug mga Pakigsaad 18:10–13.

Si Jesus nagkugos og gamay nga bata

Bili sa usa ka Kalag ni Liz Lemon Swindle

Doktrina ug mga Pakigsaad 19:26–27, 34–41

Ang mga panalangin sa Dios mas dako kay sa mga bahandi sa yuta.

Ang Basahon ni Mormon wala nahalin og maayo didto sa Palmyra, ug agi’g resulta, si Martin Harris mibaligya og dakong porsyon sa iyang umahan aron mabayran ang utang (tan-awa sa “The Contributions of Martin Harris,” Revelations in Context, 7–8). Pamalandungi kana nga sakripisyo—ug ang mga panalangin nga imong nadawat tungod niini—samtang magbasa ka niining mga bersikulo. Mahimo usab nimong hunahunaon ang mahitungod sa unsay gipangayo sa Ginoo nga imong isakripisyo. Unsay imong nakit-an dinhi niining bersikulo nga makapadasig nimo sa paghimo niining mga sakripisyo inubanan sa “pagmaya” ug “kalipay”? (tan-awa usab sa mga bersikulo 15–20).

Doktrina ug mga Pakigsaad 19:23

Ang kalinaw moabut gikan sa pagkat-on kabahin ni Jesukristo ug sa pagsunod Kaniya.

Hunahunaa ang pagdapit sa Manluluwas “Pagkat-on kanako.” Unsay imong makat-unan mahitungod ni Jesukristo diha sa Doktrina ug mga Pakigsaad 19? Isulat ang imong mga hunahuna, ug pamalandungi kon sa unsang paagi kining mga kamatuoran mahitungod sa Manluluwas makatabang nimo sa pagkaplag og kalinaw. Para nimo unsay gipasabut sa “lakaw diha sa kaaghup sa [Iyang] Espiritu”?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 18:1–5.Tingali ang mga sakop sa pamilya makapaambit og pipila sa “daghang higayon” sa (bersikulo 2) diin ang napakita sa Espiritu nga ang mga kasulatan tinuod, sama sa Iyang gibuhat alang kang Oliver Cowdery. Unsaon nga ang imong pamilya “mosalig niana nga mga butang nga nahisulat” (bersikulo 3) diha sa kasulatan? Sa unsang paagi nga matukod nimo ang pundasyon sa pamilya diha sa “lig-on nga sukaranan” (bersikulo 4) sa ebanghelyo?

Doktrina ug mga Pakigsaad 18:10–13; 19:16–19.Ang matag sakop sa pamilya makabasa sa Doktrina ug mga Pakigsaad 18:10–13 ug pulihan sa iyang ngalan ang mga pulong “kalag,” “mga kalag,” ug “tanan nga mga tawo.” Mahimo na dayon nimong hisgutan kining mga bersikulo aron matabangan ta nga makasabut sa atong bili ngadto sa Amahan ug sa Anak (tan-awa sa Doktrina ug mga Pakigsaad 19:16–19).

Doktrina ug mga Pakigsaad 18:21–25.Aduna bay espesyal nga kahulugan ang mga ngalan sa mga sakop sa imong pamilya? Tingali mahimo kamo nga maghisgut kon nganong importante ang mga ngalan ug unsay kahulugan sa pagdala ngari kanato sa ngalan ni Jesukristo (tan-awa sa Mosiah 5:7). Mahimong usa kini ka maayong oportunidad sa pagtabang sa mga sakop sa pamilya nga mag-andam sa pagdala sa ngalan ni Kristo diha sa ilang kaugalingon kon sila mabunyagan.

Doktrina ug mga Pakigsaad 19:15–20.Aron matabangan ang imong pamilya nga makabaton og makahuluganon nga kasinatian niining mga bersikulo, tingali mahimo ka nga mobasa ngadto nila samtang ipakita ang hulagway ni Jesukristo (usa nga kauban niining latid). Dayon ang mga sakop sa pamilya makapaambit sa ilang mga pagbati mahitungod sa Manluluwas. Usa ka paborito nga himno mahitungod sa Manluluwas mahimo usab nga makadapit sa Espiritu.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ako Nahingangha, Nahibulong,” Mga Himno ug mga Awit sa mga Bata, nu. 22.

Pagpalambo sa Personal nga Pagtuon

Pangutana. Ang Doktrina ug mga Pakigsaad mao ang ebidensya nianang mga pangutana nga mosangput ngadto sa pagpadayag. Samtang magtuon ka sa mga kasulatan, isulat ang mga pangutana nga makita nimo. Dayon pamalandungi ug pag-ampo aron makapangita sa mga tubag.

Si Kristo nag-ampo sa Tanaman sa Getsemani

Si Kristo Nag-ampo diha sa Tanaman sa Getsemani, ni Hermann Clementz