“Ritembwa 21–27. Kiritimati: ‘Ao E Na Roko Nakon te Aonaaba Bwa e Na Kaboia Ana Aomata,’” Nakomai, Iriirai—ibukiia Aomata n Tatabemaniia ao Utu: Ana Boki Moomon 2020 (2020)

“Ritembwa 21–27. Kiritimati,” Nakomai, Iriirai—Ibukiia Aomata n Tatabemaniia ao Utu 2020

Tamnei

Iotebwa, Mary ao Iesu te teei n aia tabo n amarake maan.

Taraa ana Tiibu te Teei te Atua, iroun Walter Rane

Ritembwa 21–27

Kiritimati

“Ao E Na Roko Nakon te Aonaaba Bwa e Na Kaboia Ana Aomata”

Tain te Kiritimati bon te tai ni manga iango ao ni kaota am kakaitau ibukin bungiakin te Tia Kamaiu, Iesu Kristo. Ngkana ko wareware ao n iangoia n te wiiki aei Bungiakina ao maiuna, iangoia bwa e kanga kamatebwaiakan Ana Boki Moomon n te ririki aei n tia ni kakorakora am koaua bwa Ngaia bon te Tia Kamaiua te aonaaba. Korei am namakin ake a roko nakoim.

Korei Am Namakin

Mairounn Nibwaai nakon Moronaai, ni kabane n Ana Boki Moomon a kabaeaki burabeti nakon te kantaninga ae tabu ae koreaki ni kakimototoaki iaon atuun Iteranibaante boki: “Anakin nanoia [aomata ni kabane] are Iesu bon te Kristo.” Ara burabeti a Nooria bwa te tamnei imwain te maiu aei, ao temanna e noora Bungiakina ao ana mwakuri n te mii ni burabeti. Temanna te burabeti e tei iaon te o bwa e na katanoatai kanikinaa ni Bungiakina ao Matena, ao are temanna e katorobubua imatan Rabwatana ae e a uti, n riing maneka ni Baina, rangana, ao rarikina. Ngaia ni kabane a ataa te koaua ae kakawaki aei: “bwa akea riki te kawai ke te anga are e kona te aomata ni kamaiuaki iai, tii rinanon raraan Iesu Kristo, are … roko bwa e na kabooa te aonaaba” (Ereman 5:9).

Ngaia are n tain te Kiritimati, ngkai taan onimaki ni kabuta te aonaaba ni bukamarua raoiroi ao ana tangira te Atua ngke e kanakoa Ana Rikitemanna, iangoia bwa e kanga Ana Boki Moomon n tia ni kakorakora am onimaki iroun Kristo. Ngkana ko iangoa Bungiakina, iangoia bwa bukin tera E roko ao E kanga Rokona n tia ni bita maium. Ngkana ko kona ni kakoaua aron kakukurein raoi te Kiritimati—te bwaintangira are e anganiko Iesu Kristo.

Tamnei

te aikaon ibukin am kamatebwai i bon iroum

Iango ibukin Am Kamatebwai I Bon Iroum ni Koroboki Aika Tabu

1 Nibwaai 11:13–36; Motiaea 3:5–10; Ereman 14:1–13; 3 Nibwaai 1:4–22

Iesu Kristo e roko nako aon te aba bwa au Tia Kamaiu.

Bon te katei warekan karakinan bungiakin te Tia Kamaiu n te Nu Tetemanti n tain te Kiritimati, ma ko kona naba ni kunei taetae ni burabeti n te tai ae mimitong aei inanon Ana Boki Moomon. Te katooto, taeka ni burabeti ni bungiakin ao ana mwakuri te Tia Kamaiu a kuneaki n 1 Nibwaai 11:13–36; Motiaea 3:5–10; Ereman 14:1–13; ao 3 Nibwaai 1:4–22. Tera namakin aika a reke iroum ibukin Iesu Kristo ngke ko wareki taeka aikai ao ni kabanea nanon kanikinaa ni Bungiakina aika a kona n reke? A kanga aia koaua burabeti aikai n taai ake ngkoa i Amerika ni kakorakora am koaua iroun Kristo ao Ana mition?

Taraa naba Mataio 1:18–25; 2; Ruka 2.

2 Nibwaai 2:6; Aramwa 7:7–13; 11:40; Ereman 5:9; 14:16–17

Iesu Kristo bon te Tia Kabooi Maiuia aomata ni kabane.

E na bon akea bukina iroura ni bukamarua bungiakin Iesu Kristo ngkana tiaki ibukin Ana angakarea ni kamaiu, are ngaia ae E kamaiura iai man te bure ao te mate, ao ni kabebeteira man rawawatara, ao ni buokiira ni “kakororaoaki Inanona” (Moronaai 10:32). Tera ae ko a tia n reiakinna man Ana Boki Moomon n te ririki aei iaon mwaakan te Tia Kamaiu ni kamaiuko? Iai karaki ke reirei aika a kakawaki nakoim? Iangoa te bwai ae a tia n reireiniko katooto aikai iaon ana mwakuri ni kamaiu te Tia Kamaiu: 2 Nibwaai 2:6; Aramwa 7:7–13; 11:40; ao Ereman 5:9; 14:16–17. Tera ae ko namakinna bwa ko karaoia ni kaota am kakaitau Nakoina? (Christmas.ComeUntoChrist.org iai inanona tabeua iango aika ko kona ni waaki ma ngaai.)

1 Nibwaai 6:4; 19:18; 2 Nibwaai 25:23, 26; 33:4, 10

Ana Boki Moomon e kakoaua taekan Iesu Kristo.

“Te Kakoaua Teuana ibukin Iesu Kristo” e raka riki nakon te kabwarabwara ibukin Ana Boki Moomon; bon te rongorongo ibukin te kantaninga mai ieta. Iangoa te bwai ae ko reiakinna man koroboki aika tabu aikai iaon ana mition Ana Boki Moomon ni kakoaua Kristo: 1 Nibwaai 6:4; 19:18; ao 2 Nibwaai 25:23, 26; 33:4, 10.

Iangoia ni koroi n te tieno bwa e kanga te kamatebwai n Ana Boki Moomon n te ririki aei ni uotiko ni kaniiko riki nakon Kristo. Iango aikai a kona ni ibuobuoki:

“Te bwai ae boou ae I reiakinna ibukin te Tia Kamaiu n te ririki aei bon …”
“Warekan [kiibu ibukin te Tia Kamaiu] e bita te kawai are I …”
“Te aomata [ke te karaki] ae mamaten nanou n Ana Boki Moomon e reireina bwa te Tia Kamaiu …”

Tamnei

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.

1 Nibwaai 11:13–23; Motiaea 3:5–10; Ereman 14:1–13; 3 Nibwaai 1:4–22

Ataei a kukurei ni koroi tamnein te bwai ae a ongo ngkana ko wareki rongorongon bungiakin Kristo ao ana mwakuri n 1 Nibwaai 11:13–23; Motiaea 3:5–10; Ereman 14:1–13; ao 3 Nibwaai 1:4–22. Ngkana a kona am ataei ni manga karikin karaki ni kabonganai tamnei ake a tia ni koroi.

“Boni Ngaia te Bwaintangira”

Ni buoka am utu bwa a na kabanea aia iango iaon ana bwaintangira Tamara are i Karawa ae anganiira man kanakoan Ana Rikitemanna, ko kona n rukuma tamnein Iesu Kristo n aron te bwaintangira n te Kiritimati. A kona utu ni maroroakina bwaintangira n te Kiritimati aika a tia ni karekei ke ni kaantaningaia bwa a ana karekei. Ngkanne a kona ni manga kabwara tamnein Kristo ao ni kabwarabwara bwa E kanga n tia n riki bwa te bwaintangira ae kakawaki nakoira. Te witeo “Boni Ngaia te Bwaintangira” (ChurchofJesusChrist.org) e kona ni buokiko ni maroroakinna bwa ko na kanga ni kona ni karekea, butimwaia, ao n tibwaua ana bwaintangira te Tia Kamaiu n aron te utu n te Kiritimati aei.

A na kona naba am utu ni kabwaia man iangoan te “bwaintangira” ae a tangiria n angan te Tia Kamaiu, n aron karaoan te mwakuri bwa ko na bwaina te akoi riki nakoia tabeman ke ni mwakuri n tokanikai iaon katei aika a buakaka. Iangoia ni kaoia kaain te utu bwa a na koroi aia iango, n rukumi kangaa te bwaintangira, ao katikui aia bwaintangira ni katobibia tamnein te Tia Kamaiu.

Tamnein te Kiritimati

E na taraa ni kaunga ngkana te utu a kona ni bairea aia waaki ni kakukurei imwaain tain te Kiritimati bwa a onga n namakina Tamnein Kristo, n aron buokan temanna ke ni bootaki n anenei anenen te Kiritimati. (Ibukin iango, taraa christmas.ComeUntoChrist.org.)

Ibukin iango tabeua ibukin reiakinaia ataei, taraa te kabwarabwara n te wiiki aei n Nakomai, Iriirai—Ibukin te Moanrinan.

Kanakoraoan Ara Anga Reirei

Rimwiian kakao ake a karaoaki ma mwakuriana. “Ngkana ko rimwiin taian kakao ma mwakuriana, ko kaotia nakoia [kaain am utu] bwa ko tabe ibukiia ao e kanga te euangkerio ni kakabwaiai maiuia. Ko anganiia naba aia tai bwa a na tibwaua aia taneiai, are e kakorakora aia motinnano ao ni kariaia bwa a na boutokaia i bon irouia ni maiuakina te euangkerio” (Reirei n Ana Kawai te Tia Kamaiu, 35).