“Oktoba 12–18. 3 Nipai 20–26: ‘Kom̧ij ro Nejin Bujen eo,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Oktoba 12–18. 3 Nipai 20–26,” Itok Ļoor Eō—N̄an Kajjojo Armej im Baam̧le ko: 2020
Pija in an Kraist waļokļo̧k n̄an RiNipai ro jān Andrew Bosley
Oktoba 12–18
3 Nipai 20–26:
“Kom̧ij ro Nejin Bujen eo”
N̄e kōnono kōn jeje ko rekwojarjar, Jisōs emakijkij an kōjerbal naan eo kappukōte (lale 3 Nipai 20:11; 23:1, 5). N̄e kwoj riiti 3 Nipai 20–26, ta eo kwonaaj kappukōte?
Je En̄jake ko Rej Im̧we Eok
N̄e kwoj ron̄ an armej kōjerbal naan ko āinwōt im̧ōn Israel, kwoj ke en̄jake āinwōt rej kōnono kōn kwe? RiNipai ro im RiLeman ro raar lukkuun in armej in Isreal—bwebwenato eo aer em̧ool eaar ijjino ilo Jerusalem—bōtaab n̄an jet iaer, Jerusalem eaar aikuj āinwōt “a ilo juon āne eo ettoļo̧k, juon āneo eo jej jab jeļā kake” (Hilamōn 16:20). Aaet, raar “juon raan wōjke in Israel,” bōtaab raar barāinwōt “jebwābwe jān kāān eo an” (Alma 26:36; lale barāinwōt 1 Nipai 15:12). Bōtaab ke Rilo̧mo̧o̧r eo eaar waļokļo̧k n̄an er, Eaar kōņaan bwe ren jeļā bwe raar jab jebwābwe n̄an E. “Kom̧ij jān m̧weo im̧ōn Israel,” Eaar ba, “im kom̧ij jān bujen eo” (3 Nipai 20:25). Emaron̄ in kar ba juon men ainļo̧k wōt n̄an kwe rainin, n̄an juon eo me ej peptaij im ej kōm̧m̧ani bujen ko Ippān ej barāinwōt jān im̧ōn Israel, “jān bujen eo,” jekdo̧o̧n ta wōn eo kwoj itok jāne ak ia eo kwoj jokwe ie. Menin ej meļeļe in, ke Jisōs ej kōnono kōn im̧ōn Israel, Ej kōnono kōn kwe. Naan in kōmeļeļe eo n̄an kōjeraam̧m̧an “aolep nukwin ko an laļ” ej n̄an kwe (3 Nipai 20:27). Kūr eo n̄an “ kwōn bar ruj, im kōņak am̧ kajoor” ej n̄an kwe (3 Nipai 20:36). Im kallim̧ur eo An aiboojoj, “Aō jouj naaj jab ilo̧k jān eok, im jab naaj kōm̧akūt bujen aenōm̧m̧an eo Aō,” ej n̄an kwe (3 Nipai 22:10).
Ļōmņak ko n̄an Ekkatak Jeje ko Rekwojarjar ippam̧ Make
Ilo raan kein āliktata, Anij enaaj kōm̧m̧ane juon jerbal eļap im kabwilōn̄lōn̄.
Rilo̧mo̧o̧r eaar leļo̧k jarlepju eo jet kallim̧ur ko ejej uwaer im kar kanaan kōn ilju jekļaj an armej in bujen ro An—im bwe ekoba kwe. Āinwōt an Būreejtōn Russell M. Nelson kar ba: “Jej ilubwilijin armej in bujen eo an Irooj. Ewōr ad iien em̧m̧an n̄an bōk kuņad kōj make ilo kakūrm̧ool kallim̧ur kein. Ej juon tōre ekaitoktok limo n̄an mour!” (“The Gathering of Scattered Israel,” Ensign ak Liahona, Nob. 2006, 79).
Pukōt kanaan kein kōn raan ko āliktata ilo naan ko an Rilo̧mo̧o̧r ilo 3 Nipai 20–22. Ewi wōt iaan kanaan kein eļap tata an an kaitoktok limo n̄an kwe? Ta eo komaron̄ kōm̧m̧ane n̄an jipan̄ kakūrm̧ool kanaan ko ilo jepta kein?
Kile bwe 3 Nipai 21:1–7 ej kwaļo̧k bwe waļoktok eo an Bok in Mormon (“men kein” ilo eoon 2 im 3) ej juon kakōļļe me kallim̧ur ko an Anij em̧ōj de aer ijjino in kūrm̧ool. Ta kallim̧ur kein, im ekōjkan an Bok in Mormon jipan̄ kakūrm̧ool er?
Lale barāinwōt Russell M. Nelson, “Hope of Israel” (worldwide devotional for youth, June 3, 2018), broadcasts.ChurchofJesusChrist.org.
Rilo̧mo̧o̧r ekōņaan bwe in etale naan ko an rikanaan ro.
Naan ko im jerbal ko an Jisōs ilo aolepān jepta kein rej kwaļo̧k ekōjkan An en̄jake kōn jeje ko rekwojarjar. Ta eo kwoj ekkatak kōn jeje ko rekwojarjar ilo 3 Nipai 20:10–12; 23; im 26:1–12? Ta eo kwoj loe ilo eoon kein me ej im̧we eok n̄an “ etale men kein ilo niknik”? (3 Nipai 23:1).
Anij ej tūriam̧o n̄an ro rej ro̧o̧l n̄an E.
Ilo 3 Nipai 22 im 24, Rilo̧mo̧o̧r eo ej kōnono naan ko jān Aiseia im Malakia me rej obrak kōn pija ko raiboojoj im keidi ko—pedped dekā ko rekōļarļar, coal ko ilo kijeek, jelba ko kar karreoik, wintō ko an lan̄. Emaron̄ in kaitoktok limo n̄an kōm̧m̧ane juon laajrak kake er. Ta eo kajjojo iaer ej katakin kōj kōn kadkad eoa n Anij ippān armej ro An? N̄an waanjon̄ak, 3 Nipai 22:4–8 keidi Anij n̄an juon ļeo pālele im armej ro An n̄an juon lio pālele. Riit kōn pija kein emaron̄ im̧weo eok n̄an ļōmņak kōn kadkad eo am̧ make ippān Irooj. Ekōjkan an kar kallim̧ur kein ilo jepta kein kūrm̧ool ilo mour eo am̧? (lale eļap tata 3 Nipai 22:7–8, 10–17; 24:10–12, 17–18).
Būruwō aikuj oktakļo̧k n̄an rūtto ro aō.
Kallim̧ur eo kōn bar ro̧o̧ltok eo an Elijah ekar kōtmene jān RiJu ro ipeļaakin laļ in ium̧win buki kiiō ko. Armej ro Rekwojarjar ilo Raan ko Āliktata jeļā bwe Elijah em̧ōj an bar ro̧o̧ltok, waļokļo̧k n̄an Josep Smith ilo Kirtland Tampeļ ilo 1836 (lale KB 110:13–16). Jerbal eo an ukōt bōro ko n̄an ro jemeer—tampeļ im jerbal in menmenbwij an baam̧le—em̧ōj de an bōk jikin. Ta en̄jake ko emōj am̧ kar būki me eaar jipan̄ ukōt būruwōm̧ n̄an rūtto ro am̧?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
3 Nipai 22:2
Ālkin riiti eoon in, bōlen komaron̄ kōm̧m̧ane juon em̧ nuknuk kōm̧m̧an in kwe im kōnono kōn ekōjkan an Kabun̄ ej āinwōt juon em̧ nuknuk ilo juon āne jem̧aden. Ta eo emaron̄ in kar meļeļe n̄an “kaitokļo̧k to ko [an]” im “kōkajoorļo̧k dumej ko [an]”? Ekōjkan ad kūr ro jet n̄an pukōt “im̧ōn keppād” ilo Kabun̄ in? (lale pija in alooj “Welcome” ilo ComeUntoChrist.org).
3 Nipai 23:6–13
Eļan̄n̄e Rilo̧mo̧o̧r eo en kar tōn etale ļo̧o̧k ko baam̧le eo ad ekar kōjparoke, ta kajjitōk ko E emaron̄ kajjitōk ippād? Ewōr ke jabdewōt iien ko raorōk ak en̄jake ko ilo jetōb me jej aikuj in ļo̧o̧ki? Kiiō emaron̄ juon iien em̧m̧an n̄an ejake ak kobaik n̄an ļo̧o̧k eo baam̧le im kapilōk ippān doon kōn ta eo n̄an kobaik. Ro uwaan baam̧le eo reddik remaron̄ lem̧ōņōņō ilo kainōknōk ļo̧o̧k eo ami kōn pija ko ak jin̄a ko. Etke ej aorōk n̄an je en̄jake ko ilo jetōb an baam̧le eo ad?
3 Nipai 24:7–18
Ekōjkan ad kar en̄jake kōjeram̧m̧an ko an kōļļā juon m̧ōttan jon̄oul kar kallim̧ur kaki ilo eoon kein? Ennaan eo an Elder David A. Bednar “Winto Ko An Lan̄” (Ensign ak Kweilo̧k eo Eļap, Nob. 2013, 17–20) emaron̄ jipan̄ ro uwaan baam̧le eo kile kōjeraam̧m̧an kein.
3 Nipai 25:5–6
Ekōjkan am̧ naaj jipan̄ ro uwaan baam̧le eo am̧ ukōt būruwier n̄an ro jemeer? Bōlen komaron̄ jitōn̄ ro uwaan baam̧le eo n̄an ekkatak kōn juon iaan rūtto ro ami im kwaļo̧k ippān aolepān baam̧le ta eo rej ekkatak (lale FamilySearch.org). Ak komaron̄ jerbal ippān doon n̄an pukōt juon rūtto me ej aikuj kain̄i ko an tampeļ im karōk juon tūreep n̄an tampeļ n̄an kōm̧m̧ani kain̄i ko.
Kōn Elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere
Kōkm̧anm̧anļo̧k Ad Katakin
Kwaļo̧k naan in kam̧ool eo am̧. “Kwon katakin ta eo kwoj katak,” Elder Neal A. Maxwell eaar katakin. “Piktok ko am̧ enaaj ļapļo̧k aer keememej … jān juon m̧ool ilo juon katak” (“But a Few Days” [address to Church Educational System religious educators, Sept. 10, 1982], 2). Eļan̄n̄e kwoj kōņaan katakin juon pedped in katak an gospel eo, kōm̧m̧ane ijo em̧m̧an tata ippam̧ n̄an mour kōn pedped in katak jab eo.
Bōk M̧aantak Ļo̧o̧k eo, jān Gary L. Kapp