“Aokati 24–30. Ereman 7–12: ‘Uringa te Uea,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Aokati 24–30. Ereman 7–12,” Nakomai, Iriirai—Ibukiia Aomata n Tatabemaniia ao utu: 2020
Kamataataan tamnein Nibwaai inanon te taua n te onaroka iroun Jerry Thompson
Aokati 24–30
Ereman 7–12
“Uringa te Uea”
Nibwaai, Riaai, ao tabeman riki iai aia “kaotioti aika mwaiti ni katoa bong” (Ereman 11:23). Kaotioti aika teimatoa tiaki tii ibukiia burabeti—a tauraoi ibukimi, naba. Korean mwiin am namakin e kona ni buokiko ni karekea te kaotioti n ae teimatoa.
Korea Am Namakin
Taman Nibwaai, Ereman, e a tia ni kaumakiia natina mwaane n “uringnga, uringnga”: e tangiriia bwa a na uringiia aia bakatibu, uring ana taeka te burabeti, ao n uringa naba “ara Tia Kabooira, are Kristo” (taraa Ereman 5:5–14). E mataata raoi bwa e uringnga Nibwaai, ibukina bwa aio te rongorongo naba are e taekinna n ake ririki imwiina “ma te aki kua” (Ereman 10:4) nakoia aomata. “Ko na kanga ni mwaninga Atuam?” (Ereman 7:20), e titiraki. Ana mwakuri ni kabane Nibwaai—ni kabwarabwara, tataro, karaoi kakai, ao bubutiakin te Atua ibukin te rongo—bon kakatai ni buokiia aomata n rairaki nakon te Atua ao n Uringnga. Ni kawai aika bati, mwanuokinan taekan te Atua bon te kaangaanga ae bubura riki e ngae ngke ko aki Ataia, ao e kai mwanuokinaki ngkana a katabeaki ara iango ma “bwain te aonaaba aio ae akea manenaia” ao ni kaonaki ma te bure (Ereman 7:21; Taraa naba Ereman 12:2). Ma, ngke e a kaoti ana ibuobuoki Nibwaai, e bon aki kona ni waeremwe uringakina ao “rairaki … nakon te Uea ae Atuam” (Ereman 7:17).
Iango ibukin Am Kamatebwai I Bon Iroum ni Koroboki Aika Tabu
Burabeti a kaota ana kaantaninga te Atua.
A mwaiti burabeti aika a kabwarabwaraaki inanon Ana Boki Moomon, ma Ereman 7–11 bon te tabo ae moan te tamaroa n reirei bwa tera te burabeti, tera ae e karaoi, ao ti na kanga ni karekei ana taeka. Ngkana ko wareki mwakoro aikai, kabanea am iango nakon ana mwakuri, ana iango, ao ana marooro Nibwaai ma te Uea. E na kanga ana ibuobuoki Nibwaai ni buokiko ni kaotako riki n tabeia burabeti n ara bong? Aikai tabeua katooto. Tera riki ae ko kunea?
-
Ereman 7:17–22:Burabeti a tataekina te rairannano ao ni kauring ni bwaai aika a na riki man karaoan te bure.
-
Ereman 7:29; 9:21–36:Aomata a ataia man te kaotioti mairoun te Atua bwaai aika a kainnanoia aomata bwa a na ongo.
-
Ereman 10:7:A anganaki te mwaaka burabeti ni kabaebae iaon te aba ao i karawa (Taraa naba Mataio 16:19; RB 132:46).
A kanga kiibu aikai n rota aron am namakin ibukin ara burabeti ae maiu? Tera ae e a tia n reirei n te tai ae aki maan n nako? Tera ae ko karaoia ni kakauongo nakon ao n irii ana kaetieti?
Kanikinaa ao kakai a ibuobuoki ma a aki tau ni katea te onimaki ni karokoa te toki.
Ngkana kanikinaa ke kakai a tau ni bita nanon te aomata, ngkanne a na bon bane n tia n rairaki ni kabane Nibwaite man te kanikinaa ae anga Nibwaai n Ereman 9. Irarikin anne, “te maenako imarenaia aomata” (Ereman 10:1) e riki bukina bwa a mwaiti mai ibuakoia aika a “teimatoa ni kamatoai nanoia” (Ereman 10:15). A kanga aika a buakaka ni kaeka nakon taian kanikinaa ao kakai? (taraa Ereman 10:12–15; Taraa naba 3 Nibwaai 2:1–2). Tera te kabuanibwai ni karaoakin kanikinaa bwa aan te koaua? (tarai “Kanikina,” Atuun te Reirei n te Euangkerio, topics.ChurchofJesusChrist.org).
Te Iango e karekea te kaotioti.
Ngkana ko a tia n namakina te rawawata, te ingainga, ke te nanououa, ko na reiakina te reirei ae kakawaki man ana katooto Nibwaai n Ereman 10:2–4. Tera ae karaoia ngke e namakinna bwa e “bwaka inano”? (te kibu 3).
E reirei Beretitenti Henry B. Eyring, “Ngkana ti iango, ti kaoa te kaotioti man te Tamnei. Te iango, irou, bon te iango ao te tataro ae I karaoia imwiin te wareware ao te kamatebwai n booki aika tabu ma te karaurau” (“Beeku ma te Tamnei,” Ensign ke Riaona, Nob. 2010, 60). Ko na kanga ni karekea te katei n iango? Ni wareka taekan te kawai teuana n iangoa n tainako ana taeka te Atua, taraa ana rongorongo te Tari Devin G. Durrant “My Heart Pondereth Them Continually” (Ensign ke Riaona, Nob. 2015, 112–15).
Taraa naba Taeka n Rabakau 4:26; Ruka 2:19; 1 Nibwaai 11:1; 2 Nibwaai 4:15–16; 3 Nibwaai 17:3; Moronaai 10:3; RB 88:62.
Te Uea e tangirai bwa N na Uringnga.
N Ereman 12, Moomon, ae kauarerekea te koroboki, e kakimototoi tabeua reirei aika ti kona n reiakin man ana rongorongo Nibwaai n te mwakoro are mai imwaaina. Iangoa te kauarereke aei bwa te tai n tuoa oin nanom. Ko kona ni korei aran bwaai ake e taku Mormon bwa a kai mwaninga iai aomata taekan te Uea. Tera ibuobuoki aika ko kona n Uringnga iai? Tera bitaki aika ko kaungaaki bwa ko na karaoi ae a boboto iaon te bwai ae ko reiakinna?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Ereman 7–9
Tera bwaai aika ti tebo aika ti noori imarenan bwai ake e karaoi Nibwaai ao tera ae a karaoia burabeti n te bong aei? Tera ae anga reirei iaona ara burabeti n te bong aei? Tao ko kona n rinei tabeua reirei aika a tibwa kanakoaki iroun te burabeti ao ni maroroakin n te utu kawai ae ko kona n iria raoi.
Ereman 10:4–5, 11–12
E kanga Nibwaai ni kaotia bwa e ukoukora ana kaantaninga te Uea nakon are bon ana kaantaninga? Ti na kanga ni irii ana banna ni katooto? Tera tabeua kawai ae a kona ara utu ni kona n noora raoi riki iai ana kaantaninga te Uea?
Ereman 11:1–16
Tera ae tangiria Nibwaai ao tera ae karaoia nako iai? Tera ae ti reiakinna ibukin te tataro man ana banna ni katooto Nibwaai?
Ereman 11:17–23
Tera ae ti reiakinna ibukin tarin Nibwaai, Riaai, in Ereman 11:17–23? Antai ae ti ataia ae maiuakina te maiu ae raoiroi ae aki karekea kinakina?
Ereman 12:1–6
Ko kona n iangoa te reirei ma te bwai ni kabootau ae ko kona ni kabongana ni buoka am utu bwa a na ataia bwa tera nanon “aki teimatoa”? Te katooto, ko kona ni kaoa temanna kaain te utu ni kataia ni kabaeranta te bwai iaon atuun teuanne ke neienne. Ko kona ngkanne ni kaoia kaain te utu n taraa Ereman 12:1–6 ibukin bukina ngkai aki kona aomata n teimatoa n ira te Uea. Ti na kanga n tiku n teimatoa n te tamnei?
Ibukin iango riki tabeua ibukin reiakinaia ataei taraa te kamataata n te wiiki aei in Nakomai, Iriirai—Ibukin te Moanrinan.
Kanakoraoan Ara Anga reirei
Rinanona. Aio te iango ni buokiia kaain te utu bwa a na uring koroboki aika tabu aika a reiakin: Rinea te kibu ae ko kunea bwa e uaana, ao kateia ni mweengam n te tabo are a na kona iai kaain am utu n nooria n tainako. Kaoiia kaain te utu ake tabeman bwa a na ikaruoruo n rinea te koroboki ae tabu ni kateia, ao maroroakinna ngkana a ikotaki kain te utu, n aron ae n tain te amwarake ke n te tataro n utu.
© Ana Boki Moomon ibukiia Taan Wareware aika Kairake, Seantum—Te Tia Tiriaomata ae e Kuneaki, iroun Briana Shawcroft; e na aki kaobinaki