“Hunyo 22–28. Alma 17–22: ‘Himoon Ko Kamo nga usa ka Himan,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Hunyo 22–28. Alma 17–22,” Dali, Sunod Kanako—Alang sa mga Indibidwal ug mga Pamilya: 2020
Si Ammon ug si Haring Lamoni, ni Scott M. Snow
Hunyo 22–28
Alma 17–22
“Himoon Ko Kamo nga usa ka Himan”
Samtang magbasa ka sa Alma 17–22, irekord ang mga impresyon nga moabut kanimo ug buhata kini. Sa pagbuhat niini makita sa Ginoo ang imong kaandam sa pagdawat og dugang pa nga pagpadayag.
Irekord ang Imong mga Impresyon
Hunahunaa ang tanang posible nga irason sa mga tawo nga dili makapaambit sa ebanghelyo: “Wala kaayo koy nahibaloan” o “Wala ko makasiguro kon interesado ba sila” o tingali “Unsa kaha kon makasilo ako kanila” Tingali makita nimo ang imong kaugalingon sa susamang panghunahuna usahay. Ang mga Nephite adunay dugang nga mga rason nga dili mopaambit sa ebanghelyo ngadto sa mga Lamanite, sila “usa ka luog ug magahi ug usa ka mabangis nga mga katawhan; usa ka mga katawhan kinsa nahimuot diha sa pagbuno sa mga Nephite” (Alma 17:14; tan-awa usab sa Alma 26:23–25). Apan ang mga anak nga lalaki ni Mosiah gani adunay mas lig-ong rason nganong mibati sila nga sila kinahanglang mopaambit sa ebanghelyo ngadto sa mga Lamanite: “Sila mga matinguhaon nga ang kaluwasan kinahanglan ipadayag ngadto sa matag nilalang, kay sila dili makatugot nga bisan usa ka kalag sa tawo malaglag” (Mosiah 28:3). Kini nga gugma nga nagdasig kang Ammon ug sa iyang mga igsoong lalaki modasig usab kanimo sa pagpaambit sa ebanghelyo ngadto sa imong pamilya, mga higala, ug mga kaila—bisan niadtong maingon og dili modawat niini.
Mga Ideya alang sa Personal nga Pagtuon sa Kasulatan
Kon lig-unon nako ang akong kaugalingong pagtuo, mas epektibo ako nga makapaambit sa ebanghelyo.
Nakasulay ka na bang nagkahinangpanay pag-usab sa karaan nimong mga higala ug mibati sa gibati ni Alma—nga mibati sa tumang kalipay nga sila nagpabiling lig-on sa pagtuo? (tan-awa sa Alma 17:1–2). Unsay imong nakat-unan gikan sa mga anak nga lalaki ni Mosiah mahitungod kon unsaon sa pagpadayong lig-on sa imong pagtuo sa ebanghelyo ug pasalig niini? Samtang mamalandong ka sa espirituhanong kalig-on sa mga anak nga lalaki ni Mosiah, unsa ang gibati nimong nakadasig nga buhaton?
Sa unsang paagi nga ang espirituhanon nga pagpangandam sa mga anak nga lalaki ni Mosiah nakaapekto sa ilang buhat uban sa mga Lamanite? Tingali makagamit ka niini nga oportunidad sa pagtimbang-timbang sa imong mga paningkamot sa pagtudlo sa ebanghelyo “uban sa gahum ug pagtugot sa Dios” (Alma 17:3).
Mamahimo ako nga himan sa mga kamot sa Dios sa pagdala og kaluwasan ngadto sa Iyang mga anak.
Si Presidente Thomas S. Monson miingon, “Gusto nako kanunay nga mahibalo ang Ginoo nga kon Siya adunay buluhaton nga isugo, si Tom Monson mobuhat niana nga sugo alang Kaniya” (“On the Lord’s Errand: The Life of Thomas S. Monson,” video, ChurchofJesusChrist.org). Samtang magbasa ka sa Alma 17:6–12, pangitaa unsay gihimo sa mga anak nga lalaki ni Mosiah aron sila mahimong mga himan sa mga kamot sa Dios. Sa unsang paagi ikaw mahimong himan sa mga kamot sa Dios sa pagpanalangin sa uban? Unsay imong nakat-unan gikan sa ilang ehemplo nga nakahatag nimo og kaisug sa pagbuhat unsay gikinahanglan sa Ginoo kanimo nga buhaton?
Tan-awa usab sa Dallin H. Oaks, “Pagpakigbahin sa Gipahiuli nga Ebanghelyo,” Liahona, Nob. 2016, 57–60.
Makatabang ako sa uban nga makaandam sa pagdawat sa ebanghelyo.
Si Lamoni ang lider sa “usa ka luog ug magahi ug usa ka mabangis nga mga katawhan” (Alma 17:14), apan nabuntog niya ang katuigan nang tradisyon ug gidawat ang ebanghelyo ni Jesukristo. Samtang magbasa ka mahitungod sa mga inter-aksyon ni Ammon uban ni Lamoni, tan-awa unsay gihimo ni Ammon nga tingali nakatabang ni Lamoni nga mas modawat sa iyang mensahe. Kon ang mga hunahuna moabut kanimo mahitungod sa unsay imong mahimo sa pagpaambit sa ebanghelyo ngadto sa uban, isulat kini nga mga pag-aghat.
Tingali makatabang usab ang pagmarka o pagsulat sa mga kamatuoran nga gitudlo ni Ammon ngadto ni Lamoni (tan-awa sa Alma 18:24–39) ug ang mga kamatuoran nga gitudlo ni Aaron sa amahan ni Lamoni (tan-awa sa Alma 22:1–16). Unsa ang gisugyot niini nga mga bersikulo kanimo mahitungod sa mga kamatuoran nga imong ipaambit ngadto sa uban aron sa pagtabang kanila nga magtinguha og pagpamatuod sa ebanghelyo?
Minerva K. Teichert (1888–1976), Ammon Saves the King’s Flocks, 1935–1945, lana nga anaa sa masonite, 35 x 48 ka pulgada. Brigham Young University Museum sa Art
Ang akong pagpamatuod makaimpluwensya og daghang mga tawo.
Bisan og ang mga sugilanon sa pagkakabig nga atong mabasa diha sa mga kasulatan sa kasagaran naglakip og tulukibong mga panghitabo, sa labing importanting bahin sa kasagaran makakita kita og mga indibidwal kinsa adunay kaisug sa pagsulti ug pagpaambit sa ilang pagsaksi ngadto sa uban. Usa ka paagi sa pagtuon sa mga hitabo sa Alma 18–22 mao ang pagtan-aw sa malungtarung mga epekto sa usa ka tawo nga mipaambit sa iyang pagpamatuod. Tingali mahimo nimong irekord unsay imong makita diha sa diagram nga sama niini:
|
Si Ammon mipaambit sa ebanghelyo uban kang , kinsa mipakigbahin sa ebanghelyo uban kang [sa] , ug ang resulta mao ang . |
Ang bukton sa Ginoo itunol ngari kanako kon ako maghinulsol.
Sa katapusan sa sugilanon sa pagkakabig ni Lamoni, si Mormon mitudlo og butang nga importante mahitungod sa kinaiya sa Ginoo. Unsa ang gisugyot sa Alma 19:36 diha kanimo mahitungod sa kinaiya sa Ginoo? Kanus-a nimo nabati ang bukton sa Ginoo nga gitunol nganha kanimo? Unsaon nimo sa pagtabang ang imong mga minahal aron mobati sa Iyang kalooy?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 17–19
Unsaon nimo paghimo ang mga sugilanon niining mga kapitulo nga makapaikag sa imong pamilya? Mahimo nimong idrama ang istorya ni Ammon nga nanalipod sa karnero o ang istorya ni Abish nga nagpundok sa panon sa katawhan aron sa pagsaksi sa gahum sa Dios. Tingali ang mga sakop sa pamilya makadrowing og mga litrato sa lain-laing mga bahin sa istorya ug gamiton ang mga litrato sa pagsaysay sa istorya. Unsay imong mahimo ug sa imong pamilya sa pagsunod sa mga ehemplo nila ni Ammon ug Abish?
Alma 18:24–39
Tingali ang mga sakop sa imong pamilya pweding magdungan sa pagbasa sa Alma 18:24–39 ug mangita sa mga kamatuoran nga gitudlo ni Ammon kang Lamoni. Ngano kaha nga giuna man ni Ammon sa pagtudlo kang Lamoni kini nga mga kamatuoran? Nganong importante man alang kanato nga makabaton og pagpamatuod niini nga mga kamatuoran?
Alma 20:8–15
Unsay atong makat-unan kon giunsa pagtubag ni Lamoni ang iyang amahan? Unsaon nato sa pagsunod ang ehemplo ni Lamoni sa pagbarug sa unsay matarung? (Alang sa pipila ka sanglitanan, tan-awa ang video nga “Dare to Stand Alone” nga naa sa ChurchofJesusChrist.org.)
Alma 22:15–18
Ribyuha ang Alma 20:23 aron makita unsay andam nga isakripisyo [ihatag] sa amahan ni Lamoni aron maluwas ang iyang kinabuhi. Dayon ribyuha ang Alma 22:15 aron makita unsay andam niyang isakripisyo [biyaan] aron madawat ang kalipay sa ebanghelyo. Unsa ang andam niyang isakripisyo aron makaila sa Dios? (tan-awa sa bersikulo 18). Tingali ang mga sakop sa pamilya makasulat og plano sa pagsakripisyo [paghunong] og butang aron hingpit nga mas makaila sa Dios.
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Pagpalambo sa Personal nga Pagtuon
Ilha ang doktrina ug gamita ang mga baruganan. Bisan og ang mga detalye sa mga istorya sa kasulatan ingon og dili nimo magamit, ang mga baruganan niini nga mga istorya sa kasagaran magamit. Samtang magbasa ka mahitungod ni Ammon ug Aaron, unsa nga mga baruganan mahitungod sa pagpakigbahin sa ebanghelyo ang imong nakit-an?
Ang asawa ni Haring Lamoni mibarug gikan sa yuta, nagdayeg ni Jesus. O, Bulahang Jesus, ni Walter Rane