Si Alma nga nagsangyaw

Nagtudlo sa Tinuod nga Doktrina, ni Michael T. Malm

Hunyo 8–14

Alma 8–12

Si Jesukristo Moanhi sa Pagtubos sa Iyang Katawhan

Ang pagtuon sa mga kasulatan nagdapit og pagpadayag. Mao nga samtang magbasa ka sa Alma 8–12, irekord ang mga impresyon sa Espiritu samtang motudlo Siya kanimo gikan sa mga mensahe nila ni Alma ug Amulek.

Irekord ang Imong mga Impresyon

Ang buhat sa Dios dili mapakyas. Apan ang atong mga paningkamot sa pagtabang sa Iyang buhat usahay ingon og pakyas—hinoon, dili dayon nato makita ang mga sangputanan nga atong gilauman. Usahay tingali mobati kita nga medyo pareha ni Alma sa dihang nagsangyaw siya sa ebanghelyo sa Ammonihah—gisalikway, gilud-an, ug giabug palayo. Apan sa dihang ang usa ka anghel misugo niya sa pagbalik ug mosulay na usab, si Alma maisugon nga “mibalik pagdali” (Alma 8:18), ug ang Dios miandam og paagi alang kaniya. Wala lang Siya mosangkap ni Alma og pagkaon ug dapit nga kapuy-an, apan giandam usab Niya si Amulek, kinsa nahimong kauban sa trabaho, usa ka agresibong tigpanalipod sa ebanghelyo, ug usa ka matinud-anong higala. Kon kita makasinati og mga kalisud ug mga kasagmuyo samtang mag-alagad kita sa gingharian sa Ginoo, atong mahinumduman kon giunsa sa Dios pagsuporta ug paggiya si Alma, ug makasalig kita nga ang Dios mosuporta ug mogiya usab kanato, bisan sa malisud nga mga sirkumstansya.

icon sa personal nga pagtuon

Mga Ideya alang sa Personal nga Pagtuon sa Kasulatan

Alma 8

Ang akong mga paningkamot sa pagpaambit sa ebanghelyo nanginahanglan og paglahutay ug pailub.

Bisan og adunay mosalikway sa imong pagpamatuod sa ebanghelyo, wala kana magpasabut nga angay kang mawad-an og paglaum—human sa tanan, ang Ginoo dili mohunong niana nga tawo, ug Siya mogiya kanimo unsaon sa paglihok. Sa sitwasyon ni Alma, usa ka anghel ang misugo kaniya sa pagbalik sa Ammonihah aron isangyaw ang ebanghelyo bisan og ang mga tawo didto bangis nang misalikway kaniya (tan-awa sa Alma 8:14–16). Unsa ang imong makat-unan gikan sa ehemplo ni Alma sa pagpaambit sa ebanghelyo bisan pa sa mga hagit ug oposisyon? Unsa nga mga bersikulo sa Alma 8 ang nakadugang sa imong tinguha sa pagpaambit sa ebanghelyo?

Tan-awa usab sa 3 Nephi 18:30–32; Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6–9.

Alma 9:18–25; 10:16–23

Ang Dios mohukom sa Iyang mga anak sumala sa kahayag ug kahibalo nga anaa kanila.

Samtang magbasa mahitungod sa gipakitang pagtagad sa mga Nephite nga taga-Ammonihah ngadto sa mga sulugoon sa Ginoo, sayon ra ang paghikalimot nga sila sa makausa nagsunod sa ebanghelyo, “pinalabi kaayo nga mga katawhan sa Ginoo” (Alma 9:20). Gani, ang usa ka bahin sa mensahe ni Alma ngadto sa katawhan sa Ammonihah mao nga tungod kay sila mipatig-a sa ilang mga kasingkasing bisan og gipanalanginan sila pag-ayo, ang ilang kahimtang mas grabe pa kay sa mga Lamanite, kinsa nakasala tungod sa pagkaignorante. Unsa ang ikatudlo kanato niini nga pagtandi kon unsaon sa Dios paghukom ang Iyang mga anak?

Samtang magbasa ka sa daghang mga panalangin nga gihatag sa Dios sa katawhan ni Nephi (tan-awa ilabi na sa Alma 9:19–23), pamalandungi ang daghang mga panalangin nga Iyang gihatag kanimo. Unsay imong gibuhat aron magpabiling matinud-anon niini nga mga panalangin? Unsang mga kausaban ang gibati nimo nga kinahanglan nimong buhaton?

Tan-awa usab sa Doktrina ug mga Pakigsaad 82:3.

Alma 11–12

Ang plano sa Dios mao ang plano sa katubsanan.

Ang mga propeta sa Basahon ni Mormon migamit og lain-laing mga ngalan sa paghulagway sa plano sa Dios alang sa Iyang mga anak, sama sa plano sa kaluwasan o sa plano sa kalipay. Diha sa Alma 11–12, sila si Alma ug Amulek mipasabut niini isip ang plano sa katubsanan. Samtang magbasa ka niini nga mga kapitulo, pamalandungi ngano nga ang pulong nga “katubsanan” gigamit sa paghulagway sa plano. Mahimo usab kang mosulat og mubo nga summary sa unsay gitudlo ni Alma ug Amulek mahitungod sa mosunod nga mga aspeto sa plano.

Ang Pagkapukan:

Ang Manunubos:

Paghinulsol:

Kamatayon:

Pagkabanhaw:

Paghukom:

Tan-awa ang epekto sa mga pulong ni Amulek diha sa katawhan (tan-awa sa Alma 11:46). Ngano kaha nga kini nga mga baruganan ingon man niana kadako og impluwensya? Sa unsang paagi kini nakaimpluwensya sa imong kinabuhi?

Tan-awa usab sa D. Todd Christofferson, “Ang Pagkabanhaw ni Jesukristo,” Liahona Mayo 2014, 111–14.

Alma 12:8–18

Kon ako dili mopatig-a sa akong kasingkasing, ako makadawat pa og dugang sa pulong sa Dios.

Ang pipila ka mga tawo tingali matingala nganong dili ipahibalo sa Langitnong Amahan ang tanan ngari kanato. Diha sa Alma 12:9–14, gipasabut ni Alma ang usa ka posibling hinungdan nganong ang mga misteryo sa Dios usahay pugngan ngari kanato. Kini nga mga pangutana makatabang nga imong mapamalandungan unsay iyang gitudlo:

• Unsa ang gipasabut sa pagpatig-a sa atong mga kasingkasing? Nakamatikod ka na ba nga nahitabo kini sa imong kaugalingon?

• Ngano kaha nga pugngan sa Ginoo ang Iyang pulong niadtong nagpatig-a sa ilang mga kasingkasing?

• Nakasinati ka na ba sa gisaad nga makadawat og mas “dako nga bahin sa pulong”? (Alma 12:10). Unsa nga matang kana nga kasinatian?

• Unsay imong mahimo sa pagsiguro nga ang pulong sa Dios “makit-an diha [kanimo]”? (Alma 12:13). Kon ikaw aduna niana nga pulong sa Dios diha kanimo, unsay epekto niini diha sa imong “mga pulong,” “mga buhat,” ug “mga hunahuna”? (Alma 12:14).

Alang sa usa ka pananglitan niini nga mga baruganan, itandi si Amulek ngadto sa ubang mga tawo sa Ammonihah. Sa unsang paagi ang kasinatian ni Amulek (tan-awa ilabi na sa Alma 10:1–11) naghulagway sa unsay gitudlo ni Alma niini nga mga bersikulo?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.

Alma 8:10–18

Unsay atong makat-unan gikan ni Alma mahitungod sa “pagdali” sa pagsunod sa Ginoo (bersikulo 18) bisan og kini tingali malisud? Sa pagpalig-on niini nga baruganan uban sa gagmayng mga bata, pwede mong magdula diin ikaw ang mohatag og instruksyon alang sa usa ka buluhaton ug tan-awon kon unsa ka dali ang mga sakop sa pamilya nga makahuman niini. Sama pananglit, makita kaha nimo kinsa ang dali nga makapilo og sinina.

Alma 10:1–12

Unsay atong makat-unan gikan sa kasinatian ni Amulek niini nga mga bersikulo? Unsay epekto sa iyang pagpamatuod niadtong naminaw? Dapita ang mga sakop sa pamilya sa paghimo og plano sa pagbuhat og usa ka butang niining semanaha base sa unsay ilang nakat-unan gikan sa ehemplo ni Amulek.

Alma 10:22–23

Unsay atong makat-unan gikan niini nga mga bersikulo mahitungod sa impluwensya sa usa ka grupo sa matarung nga mga tawo sa usa ka dautan nga siyudad?

Alma 11:34–37

Unsay kalainan tali sa pagluwas ni Jesukristo sa atong mga sala ug sa pagluwas gikan sa atong mga sala? (tan-awa sa Helaman 5:10; tan-awa usab sa 1 Juan 1:9–10). Sa paghulagway unsay gitudlo ni Amulek, pwede nimong ipaambit ang sugilanon dapit sa sinugdanan sa mensahe ni Elder Allen D. Haynie “Paghinumdom kang Kinsa Kita Mosalig” (Liahona, Nob. 2015, 121–23). Sa unsang paagi si Jesukristo moluwas kanato gikan sa atong mga sala?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Pagpalambo sa Personal nga Pagtuon

Tun-i ang mga pulong sa ulahing adlaw nga mga propeta ug mga apostoles. Basaha unsay gitudlo sa ulahing adlaw nga mga propeta ug mga apostoles mahitungod sa mga kamatuoran nga imong nakita sa mga kasulatan. Sama pananglit, makita nimo ang usa ka hilisgutan diha sa Alma 8–12 ug tan-awa kana nga hilisgutan diha sa pinakabag-o nga kinatibuk-ang komperensya (tan-awa sa Pagtudlo sumala sa Pamaagi sa Manluluwas, 21).

Si Alma nga nagkaon uban ni Amulek

Paghulagway ni Alma nga nagkaon uban ni Amulek ni Dan Burr