“Tianuare 27–Beberuare 2. 1 Nibwaai 16–22: ‘N na Katauraoa te Kawai Imwaaimi,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tianuare 27–Beberuare 2. 1 Nibwaai 16–22,” Nakomai, Iriirai—Ibukiia Aomata n Tatabemaniia ao Utu: 2020
Riaai ao te Riaona, iroun Joseph Brickey
Tianuare 27–Beberuare 2
1 Nibwaai 16–22
“N na Katauraoa te Kawai Imwaaimi”
Ngkana ko kamatebwai 1 Nibwaai 16–22, tarai koroboki aika a anaa nanom. Tabeman aomata a tangiria ni mwaken kiibu aikanne inanon aia boki aika tabu; tabeman a koroi taeka irakin baan te boki. Iangoia bwa ko na kanga ni koroi mwiin bwaai aika a anaa nanom.
Korea Am Namakin
Ngke a mwananga ana utu nakon te aba ni berita, e karaoa te berita aei te Uea nakoia: “N na katauraoa te kawai imwaaimi, ngkana kam kaawakin au tua” (1 Nibwaai 17:13). Ni bon arona, tiaki nanona bwa te berita anne e na kabebetea te kawai—utu a teimatoa n aki boraraoi, kainikatebe a uruaki, ao a korakai aomata ao a mate, ao ana teimatoa ni kabaa te kaibuke man bwaai ni mwakuri aika tauraoi. E ngae n anne, ngke te utu e rinanon te kaangaanga ke te mwakuri ae taraa ni kaangaanga karaoakina, e kunea Nibwaai bwa e aki kona te Uea n raroanako. E ataia bwa te Atua “e na kateimatoai marurungiia [taan onimaki], ma ni kakorakoraia, ao n anganiia kawai ake a na kona iai ni kakoroi bukin bwaai ake e a tia n tuatua bwa ana karaoi” (1 Nibwaai 17:3). Ngkana ko tuai n iangoia bwa bukin tera a riki bwaai aika buakaka nakoia aomata aika raoiroi n aron Nibwaai ao ana utu, ko na kona ni kunei atatai aika nano inanon mwakoro aikai. Ma tao e kakawaki riki, ko na kona n noora te bwai ae a karaoia aomata aika raraoi ngkana a riki bwaai aika buakaka.
Iango ibukin te Kamatebwai ni Booki Aika Tabu i bon iroum
Ngke I kawakin tuua, ao e na buokai te Atua ni kaitarai kakaewenako.
Mwakoro 16–18 of 1 Nibwaai e kabwarabwarai kakaewenako tabeua ake a kaaitara ma ngaai ana utu Nibwaai, n raonaki ma karaoan te kainikatebe ae uruaki (taraa 1 Nibwaai 16:17–32), maten Itimaera (taraa 1 Nibwaai 16:34–39), kabaakin te kaibuke (taraa 1 Nibwaai 17:7–16; 18:1–4), ao te kauntaeka n te utu (taraa 1 Nibwaai 18:9–22). E kanga ana kaeka Nibwaai nakon kakaewenako aikai ni kaokoro ma kaeka mai irouia kain ana utu? Tera mwiin kaeka aikai?
E kona n ibuobuoki n taui mwiin te bwai ae ko kunea inanon te taibora ma atuun rongorongo n aron aikai: “Te Kakaewenako,” “Ana kaeka Nibwaai,” “Kaeka Tabeua,” ao “Mwiia.” Bukin tera n am iango bwa e kona Nibwaai n teimatoa n rangin n onimaki ngkana tabeman aki? Iangoia bwa e na kanga ana katooto Nibwaai ao ana utu ni kona ni buokiko ma am kaangaanga.
Taraa naba witeo aika irekereke inanon te ikotaki n Tamnei ibukin ana Boki Moomon iaon ChurchofJesusChrist.org ke te Gospel Library app.
1 Nibwaai 16:10–16, 23–31; 18:11–22
E kairai te Uea rinanon bwaai aika uarereke man n ni bebete.
Ngke e kairiia ana utu Riaai te Atua inanon te buakonikai, E aki katauraoia ma te babaire ae baireaki ibukin mwanangaia nakon te aba ni berita. Ma e angan Riaai te Riaona bwa e na kairiia ana utu nakon aia tabo are ana nako iai. Tera ae a tia te Tama are i Karawa n anganiko ni katauraoi kairi ao kaetieti? Tera n am iango e na nanonaki n ae “man bwaai aika uarereke ao e a kona iai te Uea ni karaoi bwaai aika korakora”? (1 Nibwaai 16:29).
Ngkana ko wareka 1 Nibwaai 16:10–16, 23–31 ao 18:11–22, iangoia ni karinani reirei ake a kabwarabwarai aron kairakiia Ana ataei te Atua (te katooto, 1 Nibwaai 16:10 e kona n reirei bwa n tabetai te Atua e kairiira ni kawai aika aki kantaningaaki). Tera atatai aika ko a tia ni karekei ma taian reirei aikai?
Taraa naba Aramwa 37:7, 38–47; Reirei ao Berita aika Tabu 64:33–34.
Ngkana Ko Tauraoi ao Ko Na Aki Maaku., iroun Clark Kelley Price
I kona ni “kabootaui kanoan koroboki aika a tabu” nakoiu.
E koroboki Itaia nakoia natin Iteraera ni kabane, ao Nibwaai e noria bwa iai inanon aei kabwarabwaraan raoi taekaia ana utu—ao ngkoe naba (taraa 1 Nibwaai 19:23–24). Ni kaineti ma ana anai taeka Nibwaai n ana taeka Itaia, e taku Beretitenti Henry B. Eyring, “I wareki ana taeka Itaia … iangoia bwa ao ngkoa Nibwaai e rinea ana taetae Itaia ae Ngai, n aki oota raoi n te tamnei, e kona n anaia ni kainetia nakon nanou n ae kanga e taetae te Uea nakoiu” (“Ana Boki Moomon e na Bita Maium,” Ensign, Beberuare. 2004, 10).
Iangoakin ana taeka Beretitenti Eyring, iangoi titiraki n aron aikai ngkana ko wareware Mwakoro 20–22:
-
1 Nibwaai 20:1–9.Tera taeka inanon kiibu aikai aika a kabwarabwaraia tibun Iteraera? A kanga ni kabwarabwaraa Raman ao Remuera? Tera kauring ao bonganaia aika ko kunei i bon ibukim?
-
1 Nibwaai 20:17–22.E kanga te Uea ni kairiia tibun Iteraera? E kanga ni kairiia ana utu Riaai? E kanga ni Kairiko?
Tera riki ae ko kunea inanon 1 Nibwaai 20–22 ae e anganiko te namakin bwa e taetae te Uea nakoim? E kanga ana kabwarabwara Nibwaai n te mwakoro 22 ni buokiko ni kaotako n ana taetae ni burabeti Itaia?
Antai te bata are Iteraera ao Tientaire?
Te bata are Iteraera bon ana kariki te burabeti Iakoba n te O Tetemanti, are e anganaki te ara ae Iteraera iroun te Uea (taraa Karikan Bwaai 32:28; 35:10; taraa naba Kairi nakon Booki Aika Tabu, “Iteraera”). Te Uea e karaoi tabeua berita aika tabu ma Iteraera, ao ana kariki a taraaki bwa ana aomata ni berita te Atua. E ngae n anne, a mwaiti mai ibuakoia kain te roro ake imwiina, aika a tannako mairoun te Uea ao n tokina a maenako ni kabuta te aonaaba.
Te taeka Tientaire inanon kiibu aikai a kaineti nakoia aomata aika akea irouia te euangkerio (taraa Kairi nakon Koroboki Aika Tabu, “Tientaire”). E reirei Itaia bwa inanon boong aika kaitira ana anganaki Tientaire te euangkerio ao n riki bwa te bwai ni mwakuri n te anga reirei ao ikotakiia te bata are Iteraera (taraa 1 Nibwaai 21:22; 22:8–12; taraa naba Itaia 60; 66:18–20).
Iango ibukin te Kamatebwai ni Booki Aika Tabu ao Bootakin te Utu n te Tairiki
Ngkana ko wareki booki aika tabu ma am utu, e kona te Tamnei ni buokiko n atai reirei aika ko na kamataatai ao ni maroroakin n te aro bwa ko na buoki kainnanoia am utu. Aikai tabeua iango.
1 Nibwaai 17:1–6, 17–22
Tao a na kona kain am utu ni kabotaua ana rongorongo Nibwaai ni mwanangana inanon te rereua (taraa 1 Nibwaai 17:1–6) ma rongorongon tarina (taraa 1 Nibwaai 17:17–22). Bukin tera n am iango a noori aekan bwaai aikanne n te aro ae rangin ni kaokoro? Tera ae ti kona n reiakinna mairoun Nibwaai iaon karekean te taratara n onimaki?
1 Nibwaai 17:17–22; 18:9–16
Tera mwiin te bwakantang, te itabarara, ao te kakauntaeka inanon te utu? Ti na kanga n tokanikai iaon kaangaanga aikai?
1 Nibwaai 19:22–24
E kabotaui booki aika tabu Nibwaai nakon ana utu “bwa [aia] raka man reireinaki iai” (1 Nibwaai 19:23). Iai tabeua karaki inanon 1 Nibwaai 16–18 are e na kona am utu ni kabotaui bon nakoim. Tao ko kona ni karaoa te kaotioti teuana mai ibuakon karaki aikai ao maroroakinna bwa e na kanga ni kaineti nakon am utu.
1 Nibwaai 21:14–16
E na kanga te rongorongo inanon kiibu aikai ni buoka temanna ae namakina te aki tabeakinaki?
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan te Kamatebwai ibon iroum
Bubutia te Uea ibukin te ibuobuoki. A kanakoaki booki aika tabu n te kaotioti, ao ti kainnanoa te kaotioti bwa ana ota raoi iai. E a tia te Uea ni berita, “Ngke arona bwa kam … titirakinai ma te onimaki, … ao e koaua bwa a na bon kaotaki nanon bwaai aikai nakoimi” (1 Nibwaai 15:11).
A Karaoi Mwakuri ni Iowawa Nakoiu, iroun Walter Rane