Ngondu wa Dikumi ne Muibidi 29–Ngondu wa Kumpala 4: Dipungila dia kumpala dia Yezu Kilisto

Mbangilu wa Dipungila Dikulukulu

Panudi nuela meji bua dilonga dia Dipungila Dikulukulu tshidimu etshi, nudi nudiumvua bishi? Ne disanka? Ne dipanga dituishibua? Ne bowa? Bionsu bia ku ngumvuilu eyi bidi biumvuika. Dipungila Dikulukulu didi umua wa ku nsangilu ya mifundu ya kala ya mu buloba emu, ne etshi tshidi mua kuenzeja disanka ne bowa pamua. Mifundu eyi idi ifuma ku ngikadilu ya kala idi mua kumueneka bu mienyi ne misangu mikuabu ya kubabenda anyi kayiyi ya nsongu. Ne kadi mu mifundu eyi tudi tumona bantu ne mamanya adi amueka bu etu. Tudi tumanya biena bualu bia lumu luimpa bidi bitujadikila bua bunzambi bua Yezu Kilisto ne lumu luimpa Luenda. Eyowa, bantu bumudi Abalahama, Sala, Hanna, ne Daniela bakasomba nsombelu udi, mu misangu mikuabu, uvua mushilangana mena ne wetu. Kadi bakamanya kabidi disanka dia mu dîku ne dipangilangana mu dîku, bikondu bia ditabuja ne bikondu bia dipanga dijadika, ne dipeta ne dipangila—bumudi yonsu wa kutudi ubienza. Tshia mushinga, bavua bateka ditabuja mu tshienzedi, bakudimuna mutshima, benza bipungidi, bavua ne mamanya a mu nyuma, ne kabavua balekela milayi ya Mupandishi. Patudi tulonga mushindu udi Nzambi muenza mu nsombelu wabu, tudi tubimona kabidi mu yetu, ne tudi tuamba ne musambu: “dîyi diebe didi muinda ku makasa anyi, ne munya muteme mu njila wanyi. … Ke bualu kayi musadidi weba muunanga” (Misambu 119:105, 140).

Ngenyi bua Dilonga mu Dîku ne mu Ekelezia

Dipungila Dikulukulu didi dijadika bua Yezu Kilisto.

Mushindu umua wa kupeta tshiakudia tshimpa tshia nyuma mu Dipungila Dikulukulu udi dikeba Bidia bia Moyo, Yezu Kilisto (tangila Yone 6:48). Tshilejilu, mushindu kayi uwudi umona Mupandishi mu bidi bilonda ebi?

• Manna (Ekesode 16:4, 11–15; Yone 6:35)

• Mukoko wa tshimpanga wa kulambula (Ekesode 12:3–5; Yone 1:29)

• Nyoka wa tshiamu tshia mitaku (Nomba 21:4–10; Yone 3:14)

• Yona (Yona 1:4–17; Matayo 12:38–41)

Bilejilu ebi bidi bitulongesha tshinyi pa Yeya? Bintu kayi bikuabu bidi bituma ku Yezu Kilisto mu Dipungila Dikulukulu biwukadi muibidila nabi?

Mu mukenji wenda wa “Jesus Christ Is the Treasure,” Mukulu Dale G. Renlund uvua utukolesha bua “kuvuluka ne kutangila misangu yonsu kudi Yezu Kilisto” (Liahona, Ngondu wa Dikumi ne Umua 2023, 98). Ela meji bua kubala mukenji wenda, keba bintu biwudi mua kuenza bua kupeta Yezu Kilisto kabiyi amu mu Dipungila Dikulukulu kadi mu moyo weba kabidi.

Tangila kabidi “Types or Symbols of Christ” mu Guide to the Scriptures, “Jesus Christ,” Tshisangi tshia Mikanda ya Lumu Luimpa; “Seek the Lord Early,” Children’s Songbook, 108.

Keba bimanyishilu bidi bijadika bua Yezu Kilisto. Mukalenga wakalongesha Adama ne Bintu bionsu bidi ne tshimfuanyi tshiabi ne bintu bionsu mbifukibua ne bienza bua kufila bujadiki buanyi (Mose 6:63). Nansha wewa ulonga anyi ulongesha, dishindamena pa Yezu Kilisto didi mua kukuambuluisha bua ngumvuilu wa mifundu ne kudiundisha dinanga dieba ne ditabuja mu Yeya. (Tangila Teaching in the Savior’s Way, 7.)

Yezu Kilisto udi Yehowa mu Dipungila Dikulukulu.

Mulombodi Mukulu Dallin H. Oaks wakalongesha ne: “Tatu wakafunkuna Muanenda Umuepela Mulela, Yezu Kilisto, bu Mupandishi ne Musungidi wetu ne wakatupesha mukenji bua ‘kumuteleja.’ Ku buludiki ebu tudi tujikija ne miandiku ya mifundu ya mêyi makula kudi ‘Nzambi’ anyi ‘Mukalenga’ adi pipi ne bionsu mêyi a Yehowa, Mukalenga wetu mubika ku lufu, Yezu Kilisto” (“Malongesha a Yezu Kilisto,” Liahona, Ngondu Muitanu 2023, 102).

The Teachings of Jesus Christ

Pavua balombodi ba Bena Yuda babenga buikadi bua Yezu, Wakabambila ne “Diambedi kabayi banji kulela Abalahama, mema ndiku.” Mêyi aa akatonda bantu bavua bumvua Yezu, ne bavua pabuipi ne kumuela mabua (tangila Yone 8:58–59). Ela meji bua kubala Ekesode 3:13–15; 6:3–5 bua kumona buatshinyi Bena Yuda bakuabu bavua bapandika moyo ku tshivua Yezu muamba.

Buatshinyi bidi ne mushinga kuudi bua kumanya ne Yezu Kilisto udi Yehowa?

Mukalenga wakapinguluja “malu a bungi a patoka ne a mushinga” kupitshila ku Joseph Smith.

Mu tshimônyi etshi, Mukalenga wakaleja Nefi dipatuka dia Bibiliya, umvuija ne “malu a bungi a patoka ne a mushinga” adi umbushibua momu. Ela meji bua kubala 1 Nefi 13:21–29, 38–42, keba mushindu uvua Mukalenga ulongolola bua “kumanyisha patoka ne mushinga wa malu.” Bilondeshila 2 Nefi 3:12, mushindu kayi udi Bibiliya ne Mukanda wa Molomo bienzela mudimu pamua?

Bu munudi nulonga Dipungila Dikulukulu tshidimu etshi, nenulonga kabidi imua ya ku “mikanda mikuabu” ivua Nefi mumona kumpala. Bidi biangata:

• Mukanda wa Mose, tshitupa tshia ku dikudimuna dia Joseph Smith dia Bibiliya. Tshidi tshipinguluja malelela ne milubu bidi kabiyi bisanganyibua katataka mu mifundu ya Genese 1–6.

• Mukanda wa Abalahama, uvua muikala mubuluibua kudi Joseph Smith pavuaye upima nyandu ya mfundilu wa Bena Egipitu wa kala (tangila Topics and Questions, “Book of Abraham,” Tshisangi tshia Mikanda ya Lumu Luimpa).

• Bitupa bishilangana bia mifundu mu dikudimuna dia Joseph Smith, bimua bia ku biobi bidi bimueneka mu Buludiki bua ku Mifundu.

Ebi bidi bimua bilejilu bia Dipungila Dikulukulu bia milubu bipinguluja kupitshila kudi Joseph Smith: Tshimenga tshia Siona tshia Hanoka (Mose 7:18–19), Tshimônyi tshia Abalahama tshia tshipangu mu diûlu (Abalahama 3:22–28), ne mudimu wa Melekisedeke (Dikudimuna dia Joseph Smith, Genese 14:25–40). Buatshinyi milubu eyi idi mikala “malu a patoka ne a mushinga” kuudi?

Adama ne Eva badi bafila milambu, kudi Keith Larson (disulakaja)

Dipungila Dikulukulu didi dingambuluisha bua ngumvua malanda a tshipungidi tshianyi ne Nzambi.

Dipungila Dikulukulu didi muyuki wa Nzambi udi ukeba bua kutuenza “tshisamba tshia pabuatshi” tshienda ku tshipungidi (Ekesode 19:5). Bua kabingila aka, mushindu muimpa wa kudilongolola ku dibala dia Dipungila Dikulukulu udi kulonga pa bipungidi—nangananga tshipungidi tshia kashidi tshivua Nzambi mupesha baprofete ba kala bu mudi Abalahama, Isaaka, Yakoba, ne ndelanganyi yabu. Ne mushindu mulenga bikola bua kulonga pa bipungidi udi dilonga dia mukenji wa Mulombodi Mukulu Russell M. Nelson “Tshipungidi tshia Tshiendelela” (Liahona, Ngondu wa Dikumi 2022, 4–11).

Pawudi ubala, dikonka: Buatshinyi bipungidi bidi ne mushinga kundi? “Dinanga kayi dia pabuadi ne luse” dindi mua kupeta kudi Nzambi pandi ndama bipungidi bianyi nenda? Pawudi ubala Dipungila Dikulukulu tshidimu etshi, ikala ne ntema pa bintu bidi Nzambi musua kukulongesha pa malanda a tshipungidi tshieba Nenda.

Tangila kabidi Yelemiya 31:31–34.

Bua bia bungi, tangila malu a ngondu ewu a Liahona ne Magazina a Bua Dikankamika dia Bansonga.

Ngenyi bua Kulongesha Bana

Ndi mua kulonga pa Yezu Kilisto mu Dipungila Dikulukulu.

• Miaku ne ngikadilu bia Dipungila Dikulukulu bidi mua kuikala bikola bua bana bua kumvua, kadi udi mua kubambuluisha bua kumona Yezu Kilisto mu bimfuanyi ne mu miyuki. Pamuapa wewa ne bana beba nudi mua kumona tshimfuanyi tshidi kuinshi etshi, Muprofete Yeshaya wamba bua Diledibua dia Kilisto. Lekela bana beba baleja tutupa tonsu tudibu bamona. Koka ntema yabu, nangananga, pa muana Yezu. Pashisha udi mua kubala nabu pa tshidi Yeshaya mufunda pa diledibua dia Mupandishi mu Yeshaya 7:14; 9:6. Abanyanganayi ne bana beba mushindu unudi numvua pa dikeba Mupandishi mu Dipungila Dikulukulu tshidimu etshi.

  

  Yeshaya ufunda diledibua dia Yezu (Muprofete Yeshaya wamba bua Diledibua dia Kilisto), kudi Harry Anderson

• Wewa ne bana beba nudi mua kubala kabidi Misambu 23 anyi Yeshaya 53:3–9 ne kupeta miaku idi yikuvuluija bua Yezu Kilisto. Tshinyi tshidi miaku eyi itulongesha bua moyo ne Bupikudi bienda?

Tatu wa mu Diûlu mmusua bua kuenza nanyi bipungidi.

• Bipungidi ke tshiena bualu tshinena mu Dipungila Dikulukulu. Bua kuleja tshiena bualu etshi kudi bana beba, udi mua kuyukila nabu pa milayi ivuabu benza ne balama ne mêku anyi ne balunda ne buatshinyi dilama dia milayi eyi didi ne mushinga. Pashisha nudi mua kutangila tshimfuanyi tshia ditambula ne kuyukila bua mulayi, anyi tshipungidi, bitudi tuenza ne Nzambi patudi tutambushibua (tangila Mosiya 18:10, 13). Udi mua kuleja kabidi tshimfuanyi tshia ntempelo ne kuabanyangana ngumvuilu pa bipungidi bituvua benza koku.

• Dibeji dia tshibilu dia lumingu elu didi mua kuambuluisha bana beba bua bikala ne disanka bua kuenza ne kulama bipungidi ne Tatu wa mu Diûlu. Nudi kabidi mua kuimba musambu pa dienza bipungidi, bu mudi “Viens et suis-moi!” (Cantiques, 61).

Yezu Kilisto udi Yehowa mu Dipungila Dikulukulu.

• Bana beba badi mua kuikala bamanya muntu kampanda udi ne mena mashilangana mu miaba mishilangana? Pamuapa muledi anyi mulongeshi udi mua kuikala ubikidibua ku mudimu, dîku ne mu ekelezia bishilangana. Yukilanganayi pa mena aa, pashisha balayi Ekesode 6:3 pamua ne bikila bana beba bua bapeta avua Yezu Kilisto mumanyika kumpala kua diledibua dienda (tangila kabidi Dikudimuna dia Joseph Smith kuinshi kua dibeji c).

Bua bia bungi, tangila malu a ngondu ewu a Makazina a Mulunda.

Luaku kudi Yezu, kudi Michael Malm