Mêyi a Dipinguluja

Buloko bua Liberty

Pavuaye muela mu nzubu wa lukanu wa Liberty, Missouri, Joseph Smith wakapeta mikanda imumanyisha pa lutatu lukola lua Bansantu ba Matuku a Ndekelu bavua benzejibua bua kumbuka mu tshimenga ku dîyi dia mfumu wa tshimenga. Mukanda usamisha mustshima wakafumina kudi muena kuenda Emma. Mêyi enda, ne mikanda ya Joseph mu diandamuna, idi ileja ntatu ne ditabuija diabu bionsu munkatshi mua tshikondu tshia lutatu etshi mu mulubu wa Ekelezia.

Joseph Smith ne bakuabu bakalamibua mu buloko ebu mu hiver wa 1838–39.

Mukanda wa Emma Smith kudi Joseph Smith, Ngondu Muisatu 7, 1839

Bayanyi munanga

Ndi nteta bua kukufundila bualu ndi mupeta diesa dia kutuma mukanda ewu kudi mulunda, kadi ntshiena nteta bua kumvuija mushindu onsu undi ngumvua, bualu kabiena bikumbana bua kubiumvuija. Bionsu ebi bualu bua bintu bidi bitutapulula: bimanu (bia buloko), milonda (ku madidishi), bikuvu (bia bibi bia buloko), nansha misulu ya mâyi, mikuna ne bipela, mpolu yonsu ya muaba uwudi ne muaba undi, ne dipanga bulelela dia aba badi bakuela mu buloko ne bakulamamu, ne ngumvuilu yanyi idi mitamba diumvuija dionsu.

Bu mema ntshiyi mumanya ne tuvua babingishibua, ne bu lusa lua bunzambi kaluyi luenzeka, ndi mutuishibua ne ntshivua mua mukumbana bua kunanukila dikenga dionsu edi … ; kadi ntshidi ne moyo ne ntshidi mudisuila bua kukenga bikola pikalabi disua dia Nzambi bua mema kunanukila bua bimpa bieba.

Tudi bonsu bimpa bua mpindiewu, pakumbusha Fredrick udi usama bikola.

Alexander muana udi mpindiewu mu maboku anyi udi muana munanga wa pa moyo weba. Udi ne bukola ne ku diambuluisha dia nkuasa udi unyemakana mu tshibambala tshijima. …

Kakuena muntu mukuabu anu Nzambi udi mumanya meji ne ngumvuilu bia mutshima wanyi pangakashiya nzubu ne dîku bianyi, ne pabuipi ne bintu bianyi bionsu bimvua nabi pakumbusha bana betu bakesa, ne nangananga luendu ngumbukila mu tshimenga tshia Missouri, mukushiya mulama mu tshibambalu tshia buloko. Kadi diela meji pa kukushiya ne kushiya nzubu wanyi didi lutatu lutu muntu kayi muanji kumanya. …

… Ndi ntekemena ne nekuikala matuku mimpa alua kutudi. … [Ndi] weba bua kashidi mu dinanga dionsu.

Emma Smith

Mukanda wa Joseph Smith kudi Emma Smith, Ngondu Muinayi 4, 1839

Wa mushinga—Muena kuanyi—munanga.

Mu dinayi butuku mvua musomba ku mubuela dia diba, bu mutudi bakuata ku milonda ya tshibi tshia buloko, bua kukufundila, ne ndi mua kuenza bua umanya mushindu undi. Mbitabibua mpindiewu kukadi ngondu itanu ne matuku asambombu katshia ngikala mu dikankisha dia musalayi mundami butuku ne munya, ne munda mua bimanu, nkanu, ne mitoyi ya bibi bia biamua bia buloko, mu midima, ne buloko bua bukoya. Ne kanyinganyinga kamanya anu kudi Nzambi kandi mfunda naku mukanda ewu. Meji andi nawu mu tshikondu etshi adi makola bua kuafunda anyi kuamba; anyi bua banjelu kuwumvuija kudi muntu utu kayi muanji kumanya lutatu luetu elu. … Tudi tueyemena mu makanda a Yehowa, ki muntu mukuabu nansha, bua bupikudi buetu, ne pikalaye kayi mutshienza, katshiakuenzeka nansha, udi mua kuikala mutuishibua, bualu kudi bantu ba bungi bavua basua kutushipa mu tshimenga etshi; kabiyi bualu tudi ne dipila ku bualu nansha bumua. … Emma wanyi wa mushiga, ndi ngela meji bueba ne bua bana. … Ndi ne dijinga dia kumona Fredrick muana, Joseph, Julia, Alexander, Joana, ne bakulumpa [dîku dia mbua]. … Mvua bua kuenda buludi kubangila apa tô ne kuwudi makasa matupu, ne kumutu kutupu, tshitupa tshia mubidi katshiyi ne bilamba, bua kukumona ne ntshiangata bu disanka dinena, ntshiyi ntshimona bu bujitu anyi mudimu mukola to. … Ndi ngitaba dikengeshibua dianyi dionsu ne makanda onsu,nansha bonsu batudi nabu; kakuena umua wa kutuetu ukadi muteketa nansha. Ndi musua [bua] wewa kulekedi [bana betu] bampua moyo to. Bambila ne mema tatu wabu ndi mubananga ne dinanga dishuwashuwa, ne ndi ngenza monsu mua kuenza bua kumbuka mu lukanu elu ne kulua kudibu. … Bambila ne Tatu udi wamba ne bikala bana bimpa ne batumikila mamuabu. …

Weba,

Joseph Smith Muana

Biakumanya

1. “Letter from Emma Smith, 7 March 1839,” Letterbook 2, 37, josephsmithpapers.org; miaku ne mfundilu biakaja.

2. “Letter to Emma Smith, 4 April 1839,” 1–3, josephsmithpapers.org; miaku ne mfundilu biakaja.

3. Joseph ne balunda benda bavua bakuatshibua mu Ngondu wa Dikumi 31, 1838, ne balamibua kudi basalayi ba bungi butuku ne munya. Panyima pa dilumbulula dia kumpala mu Richmond, Missouri, bakaya nabu ku buloko bua Liberty mu Ngondu wa Dikumi ne Muibidi 1.