24 febrero–2 marzo: “Nim lix loq’aleb’ li aamej”

Tzolʼlebʼ ut Sumwank 18

Naru nab’isman xloq’al junaq li kristiaan chi k’iila paay ru. Lix seeb’al, lix tzolb’al, lix b’ihomal, ut li rilob’aal junaq kristiaan naru naxjal chan ru naqab’is qaloq’al chiqib’il qib’—ut laa’o ajwi’. A’b’an sa’ rilob’aal li Dios, moko ch’a’aj ta xk’eeb’al reetal li qaloq’al, ut ch’olob’anb’il sa’ Tzol’leb’ ut Sumwank 18: “Chijultiko’q eere, nim lix loq’aleb’ li aamej sa’ rilob’aal li Dios” (raqal 10). Li yaal a’in naxch’olob’ naab’al li k’a’ru naxb’aanu li Dios ut k’a’ut naq naxb’aanu. K’a’ut naq kixpatz’ re laj Jose Smith ut laj Oliver Cowdery naq te’xk’ojob’ lix Iglees li Jesukristo sa’eb’ li qakutankil? (che’ilmanq li raqal 1–5). Xb’aan naq nim xloq’aleb’ li aamej. K’a’ut naq a’an “naxtaqlaheb’ chixjunil li winq yalaq b’ar chixjalb’aleb’ xk’a’uxl” ut naxtaqlaheb’ li apostol chixjultikankil li jalb’a-k’a’uxlej? (raqal 9). Xb’aan naq nim xloq’aleb’ li aamej. Ut k’a’ut naq li Jesukristo kixk’ul “li kamk sa’ li tz’ejwalej” ut “lix rahileb’ chixjunileb’ li winq”? (raqal 11). Xb’aan naq nim xloq’aleb’ li aamej. Ut wi jun reheb’ li aamej a’in naxk’ulub’a lix maatan li Kolonel, a’an nasaho’ xch’ool, xb’aan naq “k’a’jo’ xsahil lix ch’ool rik’in li aamej li naxjal xk’a’uxl” (raqal 13).

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 18:1–5

“Taawaklesi lin iglees.”

Sa’ li tasal 18, li Qaawa’ kixk’e xna’leb’ laj Oliver Cowdery re tenq’ank chixk’ojob’ankil xk’ub’elal lix Iglees li Jesukristo. K’a’ru nakak’e reetal chirix li na’leb’ kixk’e—mas wi’chik sa’eb’ li raqal 1–5? Naru nakak’oxla chan ru naq li na’leb’ a’in naru nak’anjelak aawe naq “nakawaklesi” laa paab’aal chirix li Kristo. Jo’ jun eetalil:

• K’a’ru “kawaj laa’at … xnawb’al” rik’in li Qaawa’? (raqal 1).

• K’a’ru naraj naxye choq’ aawe “naq taakanab’ aawib’ chiru li k’a’aq re ru tz’iib’anb’il”? (raqal 3). Chan ru naq li Musiq’ej “naxk’utb’esi chawu” naq yaal li k’a’aq re ru a’in? (raqal 2; chi’ilmanq ajwi’ Tzol’leb’ ut Sumwank 6:22–24).

• Chan ru nakawaklesi laa yu’am sa’ xb’een “li k’ojleb’aal re lix evangelio [li Kolonel] ut lix saqoonaq”? (raqal 5).

Oksiheb’ li patz’om. Li Tzol’leb’ ut Sumwank a’an naxk’ut xyaalal naq eb’ li patz’om neke’xk’am sa’ li k’utb’esinb’il na’leb’. Naq taatzol li loq’laj hu, tz’iib’aheb’ laa patz’om. Toja’ naq taatz’ileb’ rix ut tattijoq re xsik’b’al xsumenkileb’.

Tzol’leb’ ut Sumwank 18:10–13

“Nim lix loqʼalebʼ li aamej saʼ rilobʼaal li Dios.”

Chan ru naqak’e reetal xloq’al junaq k’a’aq re ru? Qayehaq, k’a’ut naq jalan jalanq xtz’aq junaq k’a’aq re ru? Naq taawil li tasal 18 chiru li xamaan a’in, mas wi’chik li raqal 10–13, naru nakak’e reetal chan ru naq eb’ li kristiaan neke’xye naq wan xwankil junaq aamej sa’ rilob’aal li Dios. Naru nakak’e laa k’ab’a’ sa’ xna’ajeb’ li aatin “aamej,” “eb’ li aamej,” ut “chixjunileb’ li winq.” Chan ru naq eb’ li raqal a’in naru naxtenq’aheb’ li ani neke’xtz’il rix lix loq’aleb’?

Arin wankeb’ junjunq li raqal li neke’k’utuk chirix xloq’alil li aamej: Lukas 15:1–10; Jwan 3:16–17; 2 Nefi 26:24–28; Moises 1:39. Rik’ineb’ li raqal a’in, chan raj ru taak’os ru li nareek’a li Dios chawix? Naru ajwi’ nakasik’ li raatin li Awa’b’ej Dieter F. Uchtdorf “Ustedes son importantes para Él” (Liahona, noviembre 2011, 19–22) re xtawb’aleb’ aatin ut ch’ol aatin li tate’xtenq’a chixnawb’al laa loq’alil choq’ re li Dios.

Chan ru naq li Dios naxk’ut chawu naq nim aaloq’al sa’ rilob’aal a’an? Chan ru naq li na’leb’ a’in naxjal k’a’ru nakaweek’a chawix laa’at ut chirixeb’ laa was aawiitz’in?

Chi’ilmanq ajwi’ Joy D. Jones “Li moko naru ta chi b’ise’k xtz’aq,” Jolomil ch’utub’aj-ib’ re octubre 2017; Temas y preguntas, “Hijos de Dios,” Biblioteca del Evangelio.

Tzolʼlebʼ ut Sumwank 18:11–16

Li Qaawa’ nasaho’ xch’ool naq ninjal ink’a’uxl.

K’e reetal jo’k’ihal neke’oksiman li aatin jalok-k’a’uxl ut jalb’a-k’a’uxlej sa’ Tzol’leb’ ut Sumwank 18. Tz’il rix k’a’ru nakatzol rik’ineb’ li aatin a’an rajlal sut naq neke’oksiman. K’eheb’ wi’chik reetal li raqal 11–16. Chan ru naq eb’ li raqal a’in neke’xjal li k’a’ru nakaweek’a chirix li jalb’a-k’a’uxlej—a’ lix jalb’al aak’a’uxl laa’at ut li teneb’ahom re xb’oqb’aleb’ laa was aawiitz’in chixjalb’al xk’a’uxleb’ ut chi chaab’ilo’k? Arin wan jun na’leb’ re xtz’iib’ankil li k’a’ru nakatzol: tz’iib’a chan raj ru taatz’aqob’resi ru li ch’ol aatin “Li jalb’a-k’a’uxlej a’an .”

Chi’ilmanq ajwi’ Alma 36:18–21; K’utul Raqal reheb’ li Loq’laj Hu, “Jalb’a-k’a’uxlej,” Biblioteca del Evangelio; Dale G. Renlund, “Li jalb’a-k’a’uxlej: jun sahil ch’oolejil,” Jolomil ch’utub’aj-ib’ re octubre 2016.

Jalam-uuch Li alalb‘ej sachenaq, xb’aan laj Clark Kelley Price

Tzolʼlebʼ ut Sumwank 18:14–16

Li sahil ch’oolejil nachal sa’ xk’ab’a’ xtenq’ankileb’ li qas qiitz’in chi chalk rik’in li Kristo.

Naq taawileb’ li raqal 14–16, tz’il rix k’a’ru naraj naxye “xyaab’asinkil li jalb’a-k’a’uxlej”—ut k’a’ut naq naxk’e xnimal sahil ch’oolejil. Chan ru naru nakatenq’aheb’ laa was aawiitz’in chi chalk rik’in li Kolonel ut chixk’ulb’al xkuyb’al li maak? Chan ru naq eb’ li kristiaan xb’aanuhomeb’ a’an aawik’in laa’at?

Chi’ilmanq ajwi’ Craig C. Christensen, “Moko naru ta nawan kʼaʼruhaq qʼaxal nim ut qʼaxal kiʼ joʼ ta xsahil inchʼool,” Jolomil ch’utub’aj-ib’ re abril 2023.

Tzolʼlebʼ ut Sumwank 18:34–36

Naru nawab’i xyaab’ xkux li Qaawa’ sa’eb’ li loq’laj hu.

Wi ta tixpatz’ anihaq aawe chan ru xyaab’ xkux li Qaawa’, k’a’ raj ru taaye? K’oxla li patz’om a’in naq yookat chirilb’al ru Tzol’leb’ ut Sumwank 18:34–36. K’a’ru xatzol chirix lix yaab’ xkux li Qaawa’ rik’in rilb’al ru li Tzol’leb’ ut Sumwank? K’a’ru taab’aanu re rab’inkil lix yaab’ xkux chi saqen wi’chik ru?

Chi’ilmanq ajwi’ “Naq nintzol li loq’laj hu,” Eb’ li B’ich, 179

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 18:10–13

Chiqajunilo laa’o nim qaloq’al sa’ rilob’aal li Dios.

• Naq laa’at ut eb’ laa kok’al teeril Tzol’leb’ ut Sumwank 18:10–13, naru teek’e xk’ab’a’eb’ chixjunileb’ sa’ xna’ajeb’ li aatin “aamej,” “eb’ li aamej,” ut “chixjunileb’ li winq.” Chirix a’an naru nekeye chan ru naq eb’ li raqal a’an nokohe’xtenq’a chixtawb’al ru k’a’ru nareek’a li qaChoxahil Yuwa’ chiqix.

• Naru ajwi’ nakapatz’ reheb’ laa kok’al k’a’ru li wan xloq’al choq’ reheb’ li kristiaan. Malaj naru nakak’ut chiruheb’ yalaq k’a’ ru wan xloq’al choq’ aawe. Chan ru naqileb’ li k’a’aq re ru ninqeb’ xloq’al choq’ qe? Chirix a’an kanab’eb’ chixk’eeb’aleb’ xhoonal chirilb’aleb’ rib’ sa’ jun li lem. Naq te’xb’aanu a’an, ye reheb’ sa’ junjunqal naq a’an ralal xk’ajol li Dios ut naq nim xloq’al. Chan ru naru naqak’ut chiruheb’ li qas qiitz’in naq “nim xloq’al li raameb’” sa’ qilob’aal?

• Re xka’sutinkil chiruheb’ chixjunil li kristiaan naq ninqeb’ xloq’al sa’ rilob’aal li qaChoxahil Yuwa’, eb’ laa kok’al naru neke’ril li jalam-uuch sa’ xraqik li tusleb’ aatin a’in ut laa’at taawil Tzol’leb’ ut Sumwank 18:10–13.

Jalam-uuch re Lix loq’al jun aamej, xb’aan li xLiz Lemon Swindle

Tzolʼlebʼ ut Sumwank 18:13–16

Xwotzb’al li evangelio naxk’e sahil ch’oolejil.

• Re xwaklesinkil xch’ooleb’ laa kok’al chixwotzb’al lix evangelio li Jesukristo, naru neke’raatina rib’ chirib’ileb’ rib’ chirix xnumsihomeb’ b’ar wi’ ke’xtaw jun na’leb’ li ke’raj xwotzb’al rik’ineb’ li ramiiw malaj lix junkab’al. K’a’ut naq xawaj xwotzb’al ut k’a’ru xaweek’a naq xawotz? Chirix a’an naru nakawil Tzol’leb’ ut Sumwank 18:13, 16. K’a’ru nak’ehok xsahil xch’ool li Qaawa’? K’a’ru taak’ehoq xsahil qach’ool jo’ naxye a’an? Laa’at ut eb’ laa kok’al naru nekex’aatinak chirix junaq eenumsihom naq xewotz lix sahilal lix evangelio li Kolonel.

• Jun li b’ich chirix xwotzb’al li evangelio, jo’ “Nawaj tinwanq choqʼ jun li misioneer” (B’ichleb’aal choq’ reheb’ li Kok’al, 90), naru naxtenq’aheb’ laa kok’al chixk’oxlankil chan ru naru neke’xwotz li evangelio.

Tzolʼlebʼ ut Sumwank 18:34–36

Naru nawab’i xyaab’ xkux li Qaawa’ sa’eb’ li loq’laj hu.

• Laa kok’al maare taawulaq raj chiruheb’ xb’aanunkil jun b’atz’unk b’ar wi’ te’xyal xnawb’al ru xyaab’ xkuxeb’ jalan jalanq chi kristiaan, amiiw, malaj aj jolominel sa’ li Iglees. Chan ru naqanaw ru xyaab’ xkuxeb’ li qas qiitz’in? Chan ru naqanaw ru xyaab’ xkux li Qaawa’? Naru nekeril Tzol’leb’ ut Sumwank 18:34–36 sa’ komonil re aatinak chirix li patz’om a’in. Naru ajwi’ nekewotz cherib’il eerib’ chan ru naq nekerab’i xyaab’ xkux li Qaawa’ sa’eb’ li loq’laj hu.

Re xtawb’al xkomon chik li na’leb’, chi’ilmanq li hu Amigos re li po a’in.

Chixjunil li aamej xchaq’al ru choq’ re li Dios.