Ob Hlis Ntuj 3–9: “Qhov No Yog lub Txiaj Ntsim Txais Tau Kev Tshwm Sim”

Lus Qhuab Qhia thiab Kev Khi Lus 6–9

Thaum lub caij nplooj ntoo zeeg xyoo 1828, ib tug kws qhia ntawv hluas hu ua Oliver Cowdery tau ua ib txoj hauj lwm qhia ntawv hauv lub zos Manchester, lub xeev New York, thiab nyob nrog Lucy thiab Joseph Smith tus Laus tsev neeg. Oliver twb hnov txog nkawd tus tub Joseph thiab Joseph tej xwm txheej uas xav tsis thoob, ces Oliver, uas xav tias nws yeej yog ib tug uas nrhiav qhov tseeb, nws xav kawm ntxiv. Tsev neeg Smith twb piav txog cov tim tswv txoj kev tuaj xyuas, ib phau ceev xwm txheej puag thaum ub, thiab lub txiaj ntsim txhais lus los ntawm Vajtswv lub hwj chim. Oliver xav tsis thoob tiag. Qhov nkawd hais puas muaj tseeb? Lucy thiab Joseph tus Laus hais ib yam rau nws uas yeej muaj nqis rau txhua tus uas nrhiav qhov tseeb: thov tus Tswv thiab nug seb.

Oliver twb ua li ntawd, tus Tswv teb nws tej lus thov, hais lus ua rau “[nws] lub siab kaj” (Lus Qhuab Qhia thiab Kev Khi Lus 6:23). Oliver tau kawm tias kev tshwm sim tsis yog ib yam uas muab rau cov yaj saub xws li Joseph Smith xwb. Yeej yuav muab rau txhua tus uas xav tau thiab rau siab nrhiav. Oliver tseem yuav tsum kawm ntau yam, tiam sis nws paub txaus kom mus tom ntej. Nws paub tias tus Tswv tab tom ua ib qho tseem ceeb los ntawm Joseph Smith, thiab Oliver xav koom tes ua qhov ntawd.

Kuj saib Saints, 1:58–64; “Days of Harmony” (vidi-aus), Txoj Moo Zoo cov Ntawv.

Days of Harmony

Tej Tswv Yim Pab Qhia hauv Tsev thiab lub Koom Txoos

Lus Qhuab Qhia thiab Kev Khi Lus 6; 8–9

Leej Txiv Saum Ntuj Ceeb Tsheej hais lus rau kuv los ntawm tus Vaj Ntsuj Plig Dawb Huv.

Thaum lub caij nplooj ntoo hlav xyoo 1829, Oliver Cowdery tau qhia tias nws yuav pab ua Joseph Smith tus teev ntawv pab dawb xwb thaum nws muab Phau Ntawv Maumoos txhais lus. Qhov no ua rau nws zoo siab kawg, thiab nws xav paub seb nws puas txais tau lub txiaj ntsim txhais lus thiab. Thawj zaug nws sim ua los ntshe tsis tshua zoo.

Yog tias nyuaj rau koj txais los sis to taub kev tshwm sim, tej zaum koj yuav to taub Oliver—thiab kawm los ntawm nws. Thaum koj nyeem phau Lus Qhuab Qhia thiab Kev Khi Lus 6, 8, thiab 9, cia li kawm tias tus Tswv tau qhia dab tsi rau Oliver txog kev tshwm sim. Piv txwv hais tias:

• Phau Lus Qhuab Qhia thiab Kev Khi Lus 6:5–7; 8:1; 9:7–8 hais dab tsi txog qhov uas tus Tswv xav tau dab tsi ntawm koj ua ntej Nws uav qhia koj txog Nws lub siab nyiam?

• Koj kawm dab tsi los ntawm phau Lus Qhuab Qhia thiab Kev Khi Lus 6:14–17, 22–24; 8:2–3; 9:7–9 txog qhov uas muaj tej txoj kev twg kom txais tau kev tshwm sim? Koj yuav ua li cas kom paub thaum koj txais tau?

• Puas muaj dab tsi ntxiv uas koj kawm txog kev tshwm sim los ntawm tej tshooj no?

Tej zaum Oliver zaj lus yuav ua rau koj “muab koj lub cim xeeb xav mus” txog tej lub sij hawm thaum koj hnov tus Tswv hais lus rau koj (Lus Qhuab Qhia thiab Kev Khi Lus 6:22). Koj puas tau sau koj tej kev xav txog tej lub sij hawm no? Yog koj twb sau, cia li xav seb puas nyeem tej yam uas koj sau. Yog tias koj tsis tau sau, cia li siv sij hawm sau ntawv txog tej yam uas koj nco ntsoov. Cia li xav seb koj yuav ua li cas kom txais dag zog los ntawm tej lub sij hawm no. Yog xav tau tswv yim ntxiv, Txwj Laug Neil L. Andersen zaj lus “Kev Nco txog tej uas Txhawb Yus Sab Ntsuj Plig” (Liyahaunas, Tsib Hlis Ntuj 2020, 18–22).

Ob peb tug thawj coj hauv lub Koom Txoos tau qhia txog tej lub sij hawm thaum lawv txais kev tshwm sim nyob hauv cov vidi-aus “Mloog Nws Hais.” Tom qab koj saib ob peb zaj vidi-aus no, tej zaum koj yuav txais kev tshoov siab kom sau txog koj lub neej, qhia tias tus Tswv tau hais lus rau koj li cas.

Kuj saib Tej Ntsiab Lus thiab tej Lus Nug, “Kev Tshwm Sim,” Txoj Moo Zoo cov Ntawv; “Oliver Cowdery’s Gift,” nyob hauv Revelations in Context, 15–19.

Lus Qhuab Qhia thiab Kev Khi Lus 6:18–21, 29–37

Ntsia ntsoov Khetos nrog txhua txoj kev xav.

Tus Tswv paub tias Joseph Smith yuav raug “xwm txheej nyuaj” thaum yav tom ntej (Lus Qhuab Qhia thiab Kev Khi Lus 6:18). Nws kuj paub tias koj yuav muaj tej kev sim siab twg thaum yav tom ntej. Koj kawm dab tsi los ntawm Nws tej lus ntuas rau Joseph thiab Oliver nyob hauv Lus Qhuab Qhia thiab Kev Khi Lus 6:18–21, 29–37 uas pab koj tso siab rau Nws?

Koj xav tias “ntsia ntsoov [Khetos] nrog txhua txoj kev xav” txhais li cas? (nqe 36). Koj yuav ua li cas kom ua li no tsis tu tsis tseg—nyob rau ib lub caij zoo thiab thaum raug “xwm txheej nyuaj”? Cia li xav txog tej lus ntuas los ntawm Thawj Tswj Hwm Russell M. Nelson: “Yog ib qho nyuaj kom ntsia ntsoov Nws nrog txhua txoj kev xav. Tiam sis thaum peb ua li ntawd, peb tej kev ua xyem xyav thiab kev ntshai yuav ploj mus” (“Txais Tau Yexus Khetos lub Hwj Chim rau Hauv Peb lub Neej,” Liyahaunas, 41).

Kuj saib Neil L. Andersen, “Kuv lub Siab Tsom Ntsoov rau txoj Kev Xav txog Yexus Khetos No,” Liyahaunas, Tsib Hlis Ntuj 2023, 91–94.

Los ntawm Saib Kuv Sab Tes, los ntawm Jeffrey Ward

Lus Qhuab Qhia thiab Kev Khi Lus 6:29–37

“Tsis txhob ntshai ua qhov zoo.”

Yog vim li cas tej lub sij hawm peb “ntshai ua qhov zoo”? (nqe 33). Koj kawm dab tsi nyob hauv Lus Qhuab Qhia thiab Kev Khi Lus 6:29–37 uas ua rau koj ua siab loj kom ua qhov zoo? Xav seb puas hu nkauj los sis mloog ib zaj nkauj qhuas Vajtswv uas ua rau koj ua siab loj ntseeg Yexus Khetos, xws li “Cia Peb Sawv Daws Sib Zog Ua Vajtswv Tes Num” (Cov Nkauj Qhuas Vajtswv, zaj 113).

Lus Qhuab Qhia thiab Kev Khi Lus 6–7; 9:3, 7–14

“Qhov uas koj xav tau los ntawm kuv ces yuav muaj raws li ntawd rau koj.”

Xyuas seb tau siv lo lus “xav tau” los sis “tej kev xav tau” pes tsawg zaus nyob hauv tshooj 6 thiab 7. Koj kawm dab tsi los ntawm ob tshooj no txog qhov uas Vajtswv saib koj tej kev xav tseem ceeb npaum li cas? Nug koj tus kheej tus Tswv tej lus nyob hauv phau Lus Qhuab Qhia thiab Kev Khi Lus 7:1: “Koj xav tau dab tsi?”

Ib yam ncaj ncees uas Oliver Cowdery xav tau—nws xav txhais lus ib yam li Joseph Smith ua—los tsis tau muaj raws li ntawd. Thaum koj nyeem phau Lus Qhuab Qhia thiab Kev Khi Lus 9:3, 7–14, koj txais tau tej kev tshoov siab twg uas pab tau koj thaum tsis muaj raws li koj tej kev xav tau uas ncaj ncees?

Kuj saib Lus Qhuab Qhia thiab Kev Khi Lus 11:8; Dallin H. Oaks, “Desire,” Liyahaunas, Tsib Hlis Ntuj 2011, 42–45.

Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.

Tej Tswv Yim Pab Qhia cov Me Nyuam

Lus Qhuab Qhia thiab Kev Khi Lus 6:5, 15–16, 22–23; 8:2; 9:7–9

Leej Txiv Saum Ntuj Ceeb Tsheej hais lus rau kuv los ntawm tus Vaj Ntsuj Plig Dawb Huv.

• Tej lus tseeb uas Oliver Cowdery kawm txog kev tshwm sim yeej pab tau koj cov me nyuam thaum lawv kawm kom muaj peev xwm to taub tus Vaj Ntsuj Plig Dawb Huv. Tej zaum koj yuav xav siv “Tshooj 5: Joseph Smith thiab Oliver Cowdery” (nyob hauv Cov Dab Neeg hauv phau Lus Qhuab Qhia thiab Kev Khi Lus, 22–25, los sis zaj vidi-aus nyob hauv Txoj Moo Zoo cov Ntawv) kom qhia lawv txog Oliver thiab tej yam uas nws tau kawm. Hais kom ib leeg qhia ib leeg tias nej nyiam feem twg ntawm zaj ntawd. Thaum nej ua li ntawd, cia li qhia txog tej yam uas tus Tswv qhia Oliver tias yuav tsum ua li cas kom hnov Vajtswv lub suab, thiab nyeem tej nqe zoo, xws li Lus Qhuab Qhia thiab Kev Khi Lus 6:23 los sis 9:7–9.

  The Lord Sends Oliver Cowdery: Learning about how God speaks to us

  

  Oliver Cowdery tau kawm txog kev tshwm sim thaum nws pab Joseph Smith muab Phau Ntawv Maumoos txhais lus.

• Tej zaum koj yuav xav caw koj cov me nyuam kov lawv lub haub hau thiab lub hauv siab thaum koj nyeem lo lus “cim xeeb” thiab “lub siab” nyob hauv Lus Qhuab Qhia thiab Kev Khi Lus. Qhia koj cov me nyuam, los ntawm tej yam uas koj tau kawm tias, tus Vaj Ntsuj Plig Dawb Huv zoo li cas thaum Nws hais lus rau koj lub cim xeeb thiab lub siab. Pab lawv nrhiav tej lus teb lo lus nug no “Tus Vaj Ntsuj Plig Dawb Huv ua li cas thiaj hais lus rau peb?” Nyob hauv tej nqe no: Lus Qhuab Qhia thiab Kev Khi Lus 6:15–16, 22–23; 8:2; 9:7–9.

Siv tej zaj dab neeg. Dab neeg pab cov me nyuam to taub tej lub ntsiab cai ntawm txoj moo zoo vim tej no qhia tias lwm tus neeg ua li cas kom ua raws li tej lub ntsiab cai no. Thaum koj qhia, cia li nrhiav kev kom siv tej zaj dab neeg—los ntawm cov vaj lug kub, lub Koom Txoos zaj keeb kwm, los sis los ntawm koj lub neej—uas qhia tej lub ntsiab cai no nyob hauv cov vaj lug kub.

Lus Qhuab Qhia thiab Kev Khi Lus 6:34

Vim muaj Yexus Khetos, kuv yuav “tsis txhob ntshai.”

• Tus Tswv tau hais rau Joseph thiab Oliver tias, “Tsis txhob ntshai, pab me nyuam yaj” (Lus Qhuab Qhia thiab Kev Khi Lus 6:34). Tej zaum koj yuav xav caw koj cov me nyuam rov qab hais kab lus ntawd ob peb zaug. Tej zaum lawv yuav nyiam ua txuj hais tias lawv yog ib pab yaj uas ntshai. Cov yaj ntshai dab tsi? Ces koj thiab koj cov me nyuam saib tau ib daim duab txog tus Cawm Seej uas yog tus tswv yug yaj (muaj ib daim duab nyob hauv tus txheej txheej no) thiab sib tham txog qhov uas Nws saib xyuas peb ib yam li tus tswv yug yaj saib xyuas Nws pab yaj.

• Xav seb puas mloog los sis hu ib zaj nkauj txog kev ua siab loj ntseeg Yexus Khetos, xws li “Dare to Do Right” (Children’s Songbook, 158) los sis “Cia Peb Sawv Daws Sib Zog Ua Vajtswv Tes Num” (Cov Nkauj Qhuas Vajtswv, zaj 113). Zaj nkauj no qhia dab tsi txog qhov uas tus Cawm Seej ua li cas kom pab peb tsis txhob ntshai?

Lus Qhuab Qhia thiab Kev Khi Lus 6:36

Kuv yuav ntsia ntsoov Yexus Khetos nrog txhua txoj kev xav.

• Tom qab nej nyeem Lus Qhuab Qhia thiab Kev Khi Lus 6:36 ua ke, tej zaum koj thiab koj cov me nyuam yuav xav kos duab kom pab nej nco qab “ntsia ntsoov [Yexus Khetos] nrog txhua txoj kev xav.” Cia li hais kom ib leeg qhia ib leeg txog nej daim duab thiab pab koj cov me nyuam xav tias yuav tso cov duab nyob qhov twg lawv thiaj li yuav pom ntau zaus.

Yog xav tau tswv yim ntxiv, saib phau xov xwm Phooj Ywg rau lub hlis no.

Tus Tswv Yog Kuv tus Tswv Yug Yaj, los ntawm Yongsung Kim