li Kristo naxk’ut rib’ chiruheb’ laj Nefita

Xjalam-uuch li Kristo naq kixk’ut rib’ chiruheb’ laj Nefita, xb’aan laj Andrew Bosley

14–20 octubre: “Laa’ex ralal xk’ajol li sumwank”

3 Nefi 20–26

Naq nakawab’i chi oksimank li ch’ol aatin lix junkab’al laj Israel, ma nakaweek’a naq yookeb’ chi aatinak chawix laa’at? Eb’ laj Nefita ut laj Lamanita a’aneb’ li ralal xk’ajol laj Israel, “jun ruq’ lix toon che’ re Israel,” a’ut ke’reek’a naq “sachenaqeb’ chaq chiru xtoonal” (Alma 26:36; chi’ilmanq ajwi’ 1 Nefi 15:12). A’b’an li Kolonel kiraj naq te’xnaw naq moko sachenaqeb’ ta sa’ rilob’aal a’an. “Laa’ex xkomonex lix junkab’al laj Israel,” chan, “ut laa’ex wankex sa’ li sumwank” (3 Nefi 20:25). Maare jo’kan tixye raj aawe laa’at sa’ li kutan a’in, xb’aan naq yalaq ani li nakub’e xha’ ut na’ok sa’ sumwank rik’in a’an, a’an ajwi’ xkomon lix junkab’al laj Israel, “sa’ li sumwank.” Sa’ jalan chik aatin, naq li Jesus na’aatinak chirix lix junkab’al laj Israel, a’an yoo chi aatinak chawix laa’at. Li taqlahom re rosob’tesinkileb’ “chixjunil li junkab’al re li ruchich’och’” wan choq’ aawe (3 Nefi 20:27). Li b’oqom, “ajen wi’chik, ut k’e chawix laa metz’ew” wan choq’ aawe (3 Nefi 20:36). Ut li xchaq’al ru yeechi’ihom, “lix chaab’ilal inch’ool moko taa’elq ta aawik’in, chi moko taa’isiiq chaq li sumwank re lin tuqtuukilal,” wan choq’ aawe (3 Nefi 22:10).

Li na’leb’ re tzolok sa’ li ochoch ut sa’ li iglees

3 Nefi 20–22

Sa’ roso’jikeb’ li kutan, li Dios tixk’anjela jun sachb’a-ch’oolejil k’anjel.

Sa’ 3 Nefi 20–22, li Kolonel kixye li taak’ulmanq sa’ jun kutan rik’in lix tenamit re li sumwank (chi’ilmanq tz’aqal 3 Nefi 20:30–32, 39–41; 21:9–11, 22–29). Naq yooqat chirilb’aleb’ li raqal a’in, chijultiko’q aawe li kixye li Awa’b’ej Russell M. Nelson: “Xkomono lix tenamit li Qaawa’ re li sumwank. Noko’osob’tesiik chi tz’aqonk sa’ xtz’aqob’resinkileb’ ru li yeechi’ihom a’in. K’a’jo’ xchaab’ilal li kutan a’in!” (“El recogimiento del Israel disperso,” Liahona, noviembre 2006, 79). K’a’ruheb’ li profeetil aatin mas neke’wulak chawu? K’a’ru naru nakab’aanu re tenq’ank chixtz’aqob’resinkileb’ ru?

Sik’eb’ li aatin ut li ch’ol aatin li neke’wulak chawu. Maare wan naq taataw naq junjunq li aatin sa’eb’ li loq’laj hu neke’xtoch’ aach’ool, chanchan naq tz’iib’anb’ileb’ choq’ aawe laa’at. K’oxla xk’eeb’al reetalileb’ sa’eb’ laa loq’laj hu, malaj taatz’iib’a resileb’ sa’ jun chik li hu re tzolok.

3 Nefi 22; 24

Li Dios naruxtaanaheb’ ru li kristiaan li neke’sutq’i rik’in.

Sa’ 3 Nefi 22 ut 24, li Kolonel naroksi li raatin laj Isaias ut laj Malakias, li nujenaq rik’in li utz’u’ujinb’il aatin ut li jaljookil ru aatin—li ru xam, li plaat saqob’resinb’il ru, li sumlaak, ut li rilob’aal choxa (chi’ilmanq 3 Nefi 22:7–8, 10–17; 24:10–12, 17–18). K’a’ru neke’xk’ut li na’leb’ a’in chawu chirix lix sumwanjik li Dios rik’in lix tenamit—ut aawik’in laa’at? Maq tz’aqob’resinb’ileb’ ru sa’ laa yu’am malaj lix yu’am laa junkab’al li yeechi’ihom wankeb’ sa’ li ch’ol a’in?

Chi’ilmanq ajwi’ “El Fuego Purificador” (video), Biblioteca del Evangelio.

3 Nefi 23:6–13

Xtz’iib’ankil li musiq’ejil na’leb’ naru narosob’tesi lin junkab’al.

K’a’ru nawulak chawu chirix li kixye li Kolonel re laj Nefi sa’ 3 Nefi 23:6–13? Wi ta li Kolonel tixtz’il rixeb’ li tz’iib’anb’il esil k’uulanb’il aab’aan, k’a’ raj ru tixpatz’ aawe chirixeb’? K’a’ruheb’ li numsihom malaj li musiq’ejil na’leb’ tento raj taatz’iib’a resil? K’a’ut naq aajel ru xtz’iib’ankileb’? (chi’ilmanq 3 Nefi 26:2).

3 Nefi 23; 26:1–12

Li Kolonel naraj naq tintz’ileb’ rix li loq’laj hu.

Naq nakawil 3 Nefi 20:10–12; 23; 26:1–12, k’e reetal li nareek’a li Kolonel chirixeb’ li loq’laj hu. K’a’ru xjalanil xtz’ilb’aleb’ rix li loq’laj hu rik’in yal rilb’aleb’ ru? (chi’ilmanq 3 Nefi 23:1).

3 Nefi 24:7–12

reetalil li seminario

Xtojb’al li lajetqil naxte rilob’aal li choxa.

Chalen chaq xtiklajik, li Dios naxtaqla re lix tenamit naq te’xtoj li lajetqil (chi’ilmanq Genesis 14:17–20; Malakias 3:8–11). Naq yooqat chirilb’al 3 Nefi 24:7–12, k’oxla k’a’ut naq li Dios naxpatz’ re lix tenamit naq te’xtoj li lajetqil. Eb’ li patz’om a’in naru nakate’xtenq’a naq yooqat chi tzolok:

• Kʼaʼru li chaqʼrabʼ re li lajetqil? (Chi’ilmanq Tzol’leb’ ut Sumwank 119. “K’iijik” sa’ li k’utb’esinb’il na’leb’ a’in naraj naxye tojleb’. Chixjunileb’ li komon li neke’xk’ul xtojleb’ tento te’xtoj li lajetqil.) K’a’ru xjalanil li lajetqil rik’in jalaneb’ chik li k’ehom?

• K’a’ru aj-e li lajetqil? Naru nakataw xsumenkil a’an sa’ Temas del Evangelio, “Diezmo” (Biblioteca del Evangelio). Chan ru naq nakat-osob’tesiik xb’aan naq eb’ li komon re li Iglees neke’xtoj lix lajetqil?

• Chan ru neke’osob’tesiik li neke’xpaab’ li chaq’rab’ re li lajetqil? (Chi’ilmanq 3 Nefi 24:7–12). Naru nakataw xsumenkil a’an sa’ li raatin li Elder David A. Bednar, “Las ventanas de los cielos” (Liahona, noviembre 2013, 17–20). K’e reetaleb’ li osob’tesink li maak’a’ rilomeb’ rik’in li tumin. Chan ru naq aawilom li osobʼtesiik aʼan saʼ laa yuʼam?

Naru ajwi’ nakawil li video “Jesus enseña sobre las blancas de la viuda” (Biblioteca del Evangelio), malaj ut, naru nakawil Markos 12:41–44. K’a’ru naxk’ut li seraq’ a’in chawu?

3 Nefi 25:5–6

Li Qaawa’ kixtaqla chaq laj Elias re xsutq’isinkil inch’ool rik’ineb’ lin xe’toonil.

Sa’ li qakutankil, eb’ li ch’oolej “neke’sutq’isiik rik’ineb’ li qayuwa’” rik’in li k’anjel re li santil ochoch ut li resilal li junkab’al. Chan ru xk’ulman a’in sa’ laa yu’am? Naq yooqat chirilb’al 3 Nefi 25:5–6 ut Tzol’leb’ ut Sumwank 110:13–16, k’oxla k’a’ut naq aajel ru a’in sa’ lix k’uub’anb’il na’leb’ li Dios.

Chi’ilmanq ajwi’ “Taaruuq toowanq aran saʼ choxa,” B’ichleb’aal choq’ reheb’ li Kok’al, 98.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

3 Nefi 23:1, 5

Naru nintz’il rixeb’ li loq’laj hu chi yalb’il inq’e.

• Li kixye li Kolonel sa’ 3 Nefi 23 naxk’ut naq nim xloq’aleb’ li loq’laj hu choq’ re. Re xtenq’ankileb’ laa kok’al chixk’eeb’al reetal a’in, naru nakayaab’asi 3 Nefi 23:1, 5 ut taapatz’ reheb’ naq te’xk’e reetal jun aatin nayeeman oxib’ sut. K’a’ru xjalanil xtz’ilb’al rix jun hu rik’in ka’ajwi’ rilb’al?

• Naru neketz’iib’a li raqal re li loq’laj hu jwal neke’wulak cheru ut teemuq. Chirix a’an, teek’e eehoonal re xtawb’aleb’ li muqb’il raqal, teerileb’ sa’ komonil, ut teetz’il rix k’a’ut naq chaab’ileb’ li raqal a’an.

3 Nefi 24:8–12

Xtojb’al li lajetqil naxte rilob’aal li choxa.

• Tenq’aheb’ laa kok’al chirilb’al 3 Nefi 24:8–12 re xtawb’al chan ru xtz’aqob’resinkil ru li ch’ol aatin a’in: Wi tintoj li lajetqil, li Qaawa’ … . Naru ajwi’ nakawotz jun aanumsihom b’ar wi’ xat’osob’tesiik naq xatoj laa lajetqil. Wi tixtenq’aheb’ laa kok’al, naru nakatz’iib’a junjunq xk’ihal li tumin ut taatenq’aheb’ laa kok’al chixtz’ilb’al rix jarub’ li lajetqil (lix lajetq raqal) rik’ineb’ li tumin a’an.

• Li perel re kok’ k’anjel re li xamaan a’in naru naxtenq’aheb’ laa kok’al chi aatinak chirix li naxb’aanu li Qaawa’ rik’in li lajetqil re rosob’tesinkileb’ li komon re lix Iglees. Naru neke’xyiib’ jalam-uuch (malaj te’xtaweb’ jalam-uuch sa’eb’ li hu re li Iglees) chirix li osob’tesinb’ileb’ wi’ xb’aan li lajetqil.

3 Nefi 25:5–6

Li qaChoxahil Yuwa’ naraj naq tintzoloq chirixeb’ lin xe’toonil.

• Chan ru taawaklesi xch’ooleb’ laa kok’al chixsik’b’aleb’ ut chi tzolok chirixeb’ lix xe’ xtooneb’? Chan ru naru nakawaklesi xch’ooleb’ laa kok’al chixb’aanunkileb’ li k’ojob’anb’il k’anjel choq’ reheb’ lix xe’ xtooneb’ naq tz’aqal xchihab’eb’ re xb’aanunkil? Naru nakatenq’aheb’ chirilb’al 3 Nefi 25:5–6 re xtawb’al jun na’leb’ li taak’ulmanq sa’ roso’jikeb’ li kutan. Eb’ li kok’al toj ka’ch’ineb’ naru neke’xk’e li ruq’eb’ sa’ xb’een li raameb’ rajlal sut naq te’rab’i li aatin “ch’ooleb’” naq yooqat chixyaab’asinkileb’ li raqal a’in. Naru ajwi’ nakawil chan ru naq xtz’aqob’resiman ru li profeetil aatin a’in sa’ Tzol’leb’ ut Sumwank 110:13–16 (chi’ilmanq ajwi’ Hu reheb’ li Jalam-uuch re li Evangelio, 95). Ye reheb’ laa kok’al chan ru naq xsutq’i laa ch’ool rik’ineb’ laa xe’toonil. Qayehaq, naru nakawotz li xak’ul naq xattzolok chirix jun aaxe’ aatoon ut xab’aanu li k’anjel choq’ re sa’ li santil ochoch.

• Tenq’aheb’ laa kok’al chixtz’aqob’resinkil ru li resilal lix junkab’aleb’ rik’ineb’ xk’ab’a’ lix na’ xyuwa’eb’ ut eb’ li rixa’an ut xmama’eb’. K’a’ruheb’ li seraq’ naru nakawotz chirix jun aaxe’ aatoon? K’uteb’ xjalam-uuch, wi naru. Naru nekeb’icha “Taaruuq toowanq aran saʼ choxa” (B’ichleb’aal choq’ reheb’ li Kok’al, 98) ut taaye reheb’ laa kok’al k’a’ut naq aajeleb’ ru li junkab’al sa’ lix k’uub’anb’il na’leb’ li qaChoxahil Yuwa’.

Re xtawb’al xkomon chik li na’leb’, chi’ilmanq li hu Amigos re li po a’in.

li Jesus narileb’ ru li resilaleb’ laj Nefita rik’in laj Nefi

K’am chaq li esil, xb’aan laj Gary L. Kapp

perel re kok’ k’anjel: Xtojb’al li lajetqil naxkab’la li rawa’b’ejihom li Dios